ONOR. JOE DEBONO GRECH: Dwar l-ewwel parti tad-domanda nirriferi lill-Onor. Interpellant għat-tweġiba għall-mistoqsija parlamentari numru 12940.
Jiena nformat li s-sezzjonijiet tad-Dipartiment ta' l-Avjazzjoni Ċivili li ġew trasferiti lill-MIA baqgħu joperaw mill-istess bini li kienu joperaw minn qabel it-trasferiment tagħha fl-ewwel ta' Mejju 1998. It-trasferiment kien jinkludi kemm in-nies kif ukoll dan il-bini.
DIPARTIMENT GĦALL-AVJAZZJONI ĊIVILI - TIBDIL
14567. L-ONOR. ĊENSU GALEA staqsa lill-Ministru għat-Trasport u Portijiet: Billi fit-28 ta' Frar, 1998 kien hemm indikazzjoni li se jkun hemm tibdil fid-Dipartiment għall-Avjazzjoni Ċivili, jista' l-Ministru jagħti tagħrif dwar jekk dan it-tibdil hux se jġib miegħu bdil fir-responsabbilta' bid-Direttur għall-Avjazzjoni Ċivili?
ONOR. JOE DEBONO GRECH: Jiena nformat li d-Dipartiment ta' l-Avjazzjoni Ċivili qabel l-ewwel ta' Mejju 1998 kellu responsabbilitajiet regolatorji kif ukoll responsabbilitajiet ta' operazzjonijiet f'materji li għandhom x'jaqsmu mal-avjazzjoni ċivili. Wara l-ewwel ta' Mejju id-Direttur ta' l-Avjazzjoni Ċivili baqa' jżomm ir-responsabbilitajiet regolatorji kollha li kellu inklużi responsabbilitajiet regolatorji fuq operazzjonijiet konnessi ma' l-avjazzjoni ċivili li issa waqa' taħt il-MIA.
