Debates tal-kamra tad-deputati

MISTOQSIJIET GĦAL TWEĠIBIET BIL-MIKTUB

AMBAXXATUR MAURICE ABELA

W1,057. L-ONOR. TONIO BORG staqsa lill-Viċi Prim Ministru, Ministru ta' l-Affarijiet Barranin u Ambjent: Jista' l-Viċi Prim Ministru jagħti xahar b'xahar dettalji dwar infiq għall-entertainment and hospitality mill-Ambaxxatur Maurice Abela fi Vjenna mill-ħatra tiegħu sa Settembru, 1997?
ONOR. GEORGE VELLA: L-infie fuq ospitalita' u entertainment fl-Ambaxxata Maltija ġewwa Vjenna, għall-perjodu bejn Lulju 1996 u Settembru 1997 kien dan:

Xahar	Austrian Schillings	Lm	Okkażjoni
Lulju 1996	1,500	50.87	Ikliet
Ottubru 1996	3,760	128.01	Ikliet
Novembru 1996	2,463	82.83	Ikliet
Jannar 1997	900	29.62	Ikliet
Frar1997	2,756	89.95	Ikliet
Marzu 1997	1,017	32.83	Ikliet
April 1997	1,400	45.20	Ikliet
Ġunju 1997	2,927	93.21	Ikliet
Lulju 1997	18,848	591.28	servew jew se jservu fl-ambaxxata

In-nefqa totali f'sena għalhekk kienet ta' ATS 35,571, jiġifieri Lm1,143.80.

Djar - każ b’file no. HA/51/97

W1086. L-Onor. Sandro Schembri Adami staqsa lill-Ministru tad-Djar u tal-Kunsilli Lokali: Jista’ l-Ministru jgħid x’inhi r-raġuni li fil-każ tal-file no. HA/51/97 tal-persuna li d-dettalji tagħha qed jintbagħtu separatament għadu ma sarx il-kuntratt? Meta se jsir il-kuntratt?
ONOR. ALFRED PORTELLI: Il-persuna ndikata iffirmat il-konvenju fuq ir-residenza governattiva tagħha fit-3 ta’ Ġunju 1997. Fil-5 ta’ Ġunju l-Awtorita’ tad-Djar kitbet lill-Kummissarju ta' l-Artijiet biex jagħtiha l-boundaries and root of title (provenjenza) ħalli jkun jista’ jsir il-kuntratt. Sallum l-Awtorita’ tad-Djar għadha ma rċievitx din l-informazzjoni.

Djar - HA 51/97

W1,103. L-Onor. SANDRO Schembri Adami staqsa lill-Ministru tad-Djar u tal-Kunsilli Lokali: Jista’ l-Ministru jgħid x’qed iżomm il-Lands milli jipproċessaw b’aktar ħeffa l-applikazzjoniji ta’ persuna mill-Marsa, li dettalji tagħha qed jintbagħtu separatament, biex tkun tista' tixtri l-post fejn toqgħod (HA 51/97)? Meta se jsir il-kuntratt? Jaf il-Ministru li l-każ tagħha ilu ‘lfuq minn seba’xhur?
ONOR. ALFRED PORTELLI: Jien informat li l-Awtorita’ tad-Djar għada tistenna l-provenjenza mill-Lands Department ta’l-art li fuqha hemm mibnija d-dar. It-talba lill-Lands Department saret fil-5 ta’Ġunju 1997.


Djar - Applikazzjoniji Nru. HAN 122/97

W1,105. L-Onor. SANDRO Schembri Adami staqsa lill-Ministru tad-Djar u tal-Kunsilli Lokali: Jista’ l-Ministru jgħid fiex waslet l-applikazzjoni tal-persuna minn tas-Sliema, li d-dettalji tagħha qed jintbagħtu separatament, bil-File: HAN 122/97 Scheme N ?
ONOR. ALFRED PORTELLI:GĦalkemm il-persuna ssottomettiet l-applikazzjoni taħt din l-iskema fit-13 ta’ Diċembru 1997, parti mid-dokumenti neċċessarji kif ukoll il-ħlas rikjesta mal-formola saru fit-12 ta’Jannar 1998.
Fil-preżent l-applikazzjoni qed tiġi pproċessata.


Djar - RO 8241

W1,107. L-Onor. SANDRO Schembri Adami staqsa lill-Ministru tad-Djar u tal-Kunsilli Lokali: B’riferenża għal RO 8241, jista’ l-Ministru jgħid għaliex id-Diretur ta’l-Akkommodazzjoni Soċjali qed idum ma jilqa’ dik it-talba u li id-dettalji qed jintbagħtu separatament?
ONOR. ALFRED PORTELLI: Jien informat illi t-talba tal-persuna ndikata ma tistax tiġi milqugħa għax il-post li daħlet fih mhux se jibqa' jintuża għal skopijiet residenzjali.

Djar - Kuntratti

W1,111. L-Onor. SANDRO Schembri Adami staqsa lill-Ministru tad-Djar u tal-Kunsilli Lokali: Jista’ l-Ministru jgħid meta persuni bħal persuna minn Ħal-Qormi, li d-dettalji tagħha qed jintbagħtu separatament, se jkunu jistgħu jagħmlu l-kuntratt tal-post tagħhom, hekk kif l-art issir tal-gvern? Meta se ssir tal-gvern l-art? X’qed joħloq dan id-dewmien? X’risposta se jkollu dan iċ-ċittadin?
ONOR. ALFRED PORTELLI: Meta l-Awtorita’ tad-Djar ikollha t-titolu legali fuq l-art li fuqha hemm mibnija d-dar taħt il-Home Ownership Scheme, tkun tista tikkonkludi t-trasferiment tal-art lill-persuna msemmija.

Djar - Xiri

W1,116. L-Onor. SANDRO Schembri Adami staqsa lill-Ministru tad-Djar u tal-Kunsilli Lokali: Jista’ l-Ministru jgħid meta persuna mill-Belt, li d-dettalji tagħha qed jintbagħtu separatament, se jkun jista’ jixtri l-post (tal-gvern) fejn qed joqgħod wara li ilu li applika xhur sħaħ ilu?
ONOR. ALFRED PORTELLI: Il-persuna msemmija applikat uffiċjalment biex tixtri r-residenza tagħha li hija proprjeta’ tal-gvern fil-21 ta’ Ottubru 1997.
Ftit jiem oħra din il-persuna ser tiġi mitluba tiġi l-Awtorita’ tad-Djar biex jiġi iffirmat il-konvenju fuq dan il-post.


Djar - Każ H 11342

W1,120. L-Onor. SANDRO Schembri Adami staqsa lill-Ministru tad-Djar u tal-Kunsilli Lokali: Jista’ l-Ministru jgħid f’liema stadju ta' ipproċessar wasal il-każ ta’persuna mill-Belt Valletta, li dettalji qed jintbagħtu separatament, b’File No. H 11342, li qed titlob akkomodazzjoni alternattiva saret inspeċtion f’darba? Meta?
ONOR. ALFRED PORTELLI: Jien informat illi l-persuna ndikata kienet ġiet allokata post li kienet talbet hi stess fil-Belt iżda wara rrifjutatu. GĦalhekk ma tantx għandha ċans terġa tiġi offruta post ieħor.


GŻIRA - DAR TA' L-ANZJANI

W1,173. L-ONOR. SANDRO SCHEMRI ADAMI staqsa lill-Ministru tas-Saħħa, Kura ta' l-Anzjani u Affarijiet tal-Familja: Jista' l-Ministru jgħid jekk hijiex se ssir kjarifika dwar id-dar ta' l-anzjani li tinsab fil-Gżira fid-dawl ta' dak li ġie rrapportat fuq it-television li din mhijiex adattata u trid titneħħa? Kif se jiġu affettwati l-anzjani tal-lokal?
ONOR. MICHAEL FARRUGIA: Id-Dar ta' l-Anzjani tal-Gżira ġiet mixtrija fl-1988. Din id-dar għandha diversi problemi, fosthom in-numru ta' sulari u t-taraġ bejn dawn is-sulari. Barra minn hekk il-post hu relattivament żgħir.
Minħabba esiġenzi ta' prijorita', għalissa m'hemmx il-ħsieb li din id-dar tingħalaq.


GŻIRA - DAY CENTRE

W1,174. L-ONOR. SANDRO SCHEMBRI ADAMI staqsa lill-Ministru tas-Saħħa, Kura ta' l-Anzjani u Affarijiet tal-Familja: Jista' l-Ministru jgħid meta se jingħata bidu għad-Day Centre għall-anzjani tal-Gżira, peress li din kellha sseħħ f'Jannar 1998 u sal-lum jidher li għadu ma sar xejn?
ONOR. MICHAEL FARRUGIA: Is-Segretarju Parlamentari preżenti qatt ma wiegħed li d-Day Centre għall-anzjani se jinfetaħ f'Jannar 1998.

GŻIRA - ASFALTAR TA' TOROQ

W1,175. L-ONOR. SANDRO SCHEMBRI ADAMI staqsa lill-Ministru tax-Xogħlijiet Pubbliċi u Kostruzzjoni: Jista' l-Ministru jara li jiġu asfaltati kemm Tabone Lane li r-residenti ilhom jitolbuh li ssir għal dawn l-aħħar 30 sena, kif ukoll New Street in Luqa Briffa Street, it-tnejn fil-Gżira li hi kollha ħofor u perikoluża?
ONOR. CHARLES BUHAGIAR: Nassumi li l-Onor. Interpellant qed jirreferi għal Triq Taliana fil-Gżira u t-triq ta’ ħdejha li qiegħda mniżżla fil-lista tat-toroq li jridu jiġu asfaltati.


GŻIRA - TRIQ SAN ĠORĠ

W1,179. L-ONOR.SANDRO SCHEMBRI ADAMI staqsa lill-Ministru għax-Xogħlijiet Pubbliċi u Kostruzzjoni: Jista' l-Ministru jgħid jekk hemmx il-ħsieb illi l-gvern jiftaħ triq fejn hemm għalqa fi Triq San Ġorġ ma' Triq Luqa Briffa fil-Gżira, biex jitħaffef it-traffiku u nsolvu parti mill-problema ta' l-ilma li jinżel minn hemm billi jsir xi lqugħ?
ONOR. CHARLES BUHAGIAR: It-toroq imsemmija mill-Onor. Interpellant għadhom mhumiex żviluppati u għalhekk ma jistgħux jinfetħu għalissa. Is-sitwazzjoni tat-traffiku w ta’ l-ilma qed jiġu kkunsidrati fil-kuntest globali ta’ żvilupp ta’ toroq fil-lokal inkonnessjoni mal-proġett ta’ Manoel Island.


GŻIRA - QLUGĦ TA' TRINEK

W1,181. L-ONOR. SANDRO SCHEMBRI ADAMI staqsa lill-Ministru għax-Xogħlijiet Pubbliċi u Kostruzzjoni: Jista' l-Ministru jara li jinqalgħu t-trinek kif suppost wara li jsiru xi tiswijiet mill-WSC fil-lokalita' tal-Gżira, meta jkunu saru xogħlijiet utili?
ONOR. CHARLES BUHAGIAR: Preżentament il-Korporazzjoni għas-Servizzi tal-Ilma twettaq ir-“reinstatement” tat-triq b’kisi temporanju meta jsiru xogħlijiet fis-sistema tad-distribuzzjoni ta’ l-ilma. Sadanittant il-Korporazzjoni qed tieħu ħsieb li taħtar kuntrattur permezz ta’ sejħa pubblika sabiex dawn ix-xogħlijiet isiru b’mod permanenti.


MANOEL ISLAND - PROĠETT

W1,182. L-ONOR. SANDRO SCHEMBRI ADAMI staqsa lill-Ministru għax-Xogħlijiet Pubbliċi u Kostruzzjoni: Jista' l-Ministru jgħid x'effett se jkollu l-proġett utili ta' Manoel Island inkluż it-twaqqigħ ta' bini, fuq l-infrastruttura u l-imaniġġjar tat-traffiku fil-lokal?
ONOR. CHARLES BUHAGIAR: Peress li għadhom qed jiġu kkunsidrati diversi alternattivi għas-sistema ta’ toroq u l-immaniġġjar tat-traffiku fil-lokal għalissa ma tistax tingħata l-informazzjoni mitluba mill-Onor. Interpellant.


Pembroke - Proġetti

W2,001. L-ONOR. SANDRO SCHEMBRI ADAMI Staqsa lill-Ministru tad-Djar u tal-Kunsilli Lokali: Jista l-Ministru jgħid x’inhuma l-proġetti li l-Gvern għandu għal Pembroke fejn jirrigwarda Housing?
ONOR. ALFRED PORTELLI: Nirriferi lill-Onor. Interpellant għad-Diskors tal-Budget 1998 dwar Korporazzjoni għall-Iżvilupp Urban ta’ Pembroke.


Gzira - Proġetti ta’Housing

W2,002. L-Onor. SANDRO SChembri Adami staqsa lill-Ministru tad-Djar u tal-Kunsilli Lokali: Jista’ l-Ministru jgħid xi proġetti għandu l-Gvern dwar Housing f’Manoel Island, Gzira? Jista l-Ministru jgħid xi studji saru, minn min saru u x’direzzjoni se jieħdu għar-rigward ta’ soluzzjonijiet parzjali tal-problema tal-Housing?
ONOR. ALFRED PORTELLI: Il-Proġett għall-iżvilupp ta’ Manoel Island u Tigne’ ma’ jinkludix Social Housing. Nirreferi wkoll lill-Onor. Interpellant għall-mistoqsija parlamentari numru 7284 li saret mill-Onor. Jose’ Herrera lill-Prim Ministru.


Djar - DJAR Substandard

W2,003. L-Onor. SANDRO Schembri Adami staqsa lill-Ministru tad-Djar u tal-Kunsilli Lokali: Fid-dawl ta' survey li sar dan l-aħħar fejn irriżulta li hemm madwar 8,000 dar/fond substandard, jidhirlu l-Ministru li ta’ min issir spjegazzjoni fuq kull waħda minn dawn id-djar biex jiġi mistħarreġ jekk dawn jaqgħux taħt xi waħda mill-iskemi ta’ l-Awtorita’ tad-Djar biex allura dawn jiġu resi up to standard?
ONOR. ALFRED PORTELLI: Qegħdin isiru taħdidiet ħalli safejn hu possibbli jsir dan l-eżerċizzju u jiġi stabbilit jekk dawn il-każijiet jikkwalifikawx taħt l-iskemi ta’ l-Awtorita’ tad-Djar biex dawn l-abitazzjonijiet jiġu resi up to standard.


Djar - Xiri

W2,005. L-Onor. SANDRO Schembri Adami staqsa lill-Ministru tad-Djar u tal-Kunsilli Lokali: Jista’ l-Ministru jgħid kif dawk li joqogħdu f’postijiet residenzjali tal-gvern li talbu biex jixtru l-post tagħhom u ma jistgħux jagħmlu dan u minhabba li l-art li fuqha hemm mibnija r-residenza m’hijiex proprjeta’ tal-gvern, jaħseb il-Ministru li għandhom jingħataw iċ-ċans li jakkwistaw ir-residenza tagħhom bħal ħaddieħor? Konxju l-Ministru li; (i) b’hekk anke l-piż ta’l-inkwilin jonqos; (ii) l-awtorita’ddaħħal aktar flus; u (iii) tikber il-possibilita’ ta’ bini ta’aktar djar għall-poplu?
ONOR. ALFRED PORTELLI: L-Awtorita’ tad-Djar qed tistudja skema għal dan il-għan.
Djar - Skemi

W2,007. L-Onor. SANDRO Schembri Adami staqsa lill-Ministru tad-Djar u tal-Kunsilli Lokali: Jista’ l-Ministru jgħid kif għandhom jitħaffu l-proċeduri biex min għandu dar mibnija fuq HOS plot li qegħda fuq art li l-gvern m’għandux titolu fuqħa, jkunu jistgħu jifdu ċ-ċens ta’fuq il-plot u b’hekk ma jiġux imċaħħda minn dritt li għandu ħaddieħor?
ONOR. ALFRED PORTELLI: L-Awtorita’ tad-Djar qed tistudja skema għal dan l-iskop.


P.A. -PA 5713/96

W2,011. L-ONOR. SANDRO SCHEMBRI ADAMI staqsa lill-Viċi Prim Ministru, Ministru għall-Affarijiet Barranin u Ambjent: Wara li fi Triq Danny Cremona kien sar tħaffir fuq sit li n-numru tal-permess mill-Awtorita' ta' l-Ippjanar PA 5713/96, liema tħaffir sar b'traskuraġni u kkawża problemi strutturali f'żewġt idjar li jmissu mas-sit, jista' l-Viċi Prim Ministru jara li tintuża l-kawtela kollha biex fil-futur affarijiet bħal dawn ma jsirux? Jaf il-Viċi Prim Ministru li kawża ta' dan, kull xitwa qed jinġabar m'għola metru ilma tax-xita li jdum hemm sal-bidu tas-sajf, u qed jispiċċa biex jinġabar numru kbir ta' nemus li jinvadu il-btieħi tar-residenti?
ONOR. GEORGE VELLA: It-tħaffir li għalih saret referenza f'din l-interpellanza huwa kopert bil-permess PA 5713/96 maħruġ fit-23 ta' Settembru, 1997.
L-aċċess minn Triq Danny Cremona li jagħti ġos-sit in kwestjoni huwa magħluq b' hoarding skond il-kondizzjonijiet imposti fil-permess li preżentement għadu validu.
L-Awtorita' ta' l-Ippjanar m'għandha l-ebda kontroll fuq l-ilma tax-xita li mela l-ħofra proġettata għall-basement u mill-impatt sfavorevoli illi jirriżulta mill-istess ilma bħal nemus u qtates imgħarqa. Dan l-ilment għandu jiġi riferut lill-Awtoritajiet tas-Saħħa u Sanita għall-azzjoni meħtieġa minn naħa tagħhom.
L-istess, rigward problemi strutturali f'żewġt idjar li jmissu mas-sit - dan huwa problema ta' natura ċivili li għalihom l-Awtorita' ma hiex responsabbli.