Debates tal-kamra tad-deputati

ABBOZZ TA' LIĠI DWAR IL-KUMMERĊ TA' L-ASSIGURAZZJONI

THE INSURANCE BUSINESS BILL

ONOR. LEO BRINCAT: Madam Speaker, nipproponi t-Tieni Qari ta' l-Abbozz ta' Liġi msejjaħ "Att biex jirregola l-kummerċ ta' l-assigurazzjoni".
MADAM SPEAKER: Min jissekonda, jekk jogħġobkom?
ONOR. LINO SPITERI: Nissekonda.
MADAM SPEAKER: Rimarki, jekk jogħġobkom? Il-Ministru tal-Finanzi u l-Kummerċ.
ONOR. LEO BRINCAT: Madam Speaker, huwa ta' sodisfazzjon kbir għalija personali u anke għall-amministrazzjoni Laburista li sa fl-aħħar qegħdin inressqu quddiem il-Kamra leġislazzjoni, li fil-fatt hija leġislazzjoni komprensiva, dwar il-qasam ta' l-assigurazzjoni. Huwa ta' sodisfazzjon għalija wkoll li minkejja l-battibekki li jkollna f'din il-Kamra, meta niġu għas-servizzi finanzjarji naħseb li ż-żewġ naħat urew fl-imgħoddi - u jidher li se jkomplu juru anke fil-ġejjieni - ċerta maturita' politika. Wieħed irid jirrikonoxxi x-xogħol fejjiedi li sar miż-żewġ amministrazzjonijiet biex il-qasam tas-servizzi finanzjarji jitpoġġa fuq il-footing sod li għandu llum. Fil-fatt it-tir tagħna huwa li, l-istess kif ġara f'liġijiet oħrajn dwar servizzi finanzjarji, anke fir-rigward tal-leġislazzjoni importanti li għandna quddiemna llum nilħqu ċertu kunsens flimkien ma' l-Oppożizzjoni. Dan għaliex ma jagħmilx sens li liġi bħal din ngħadduha bl-impożizzjoni jew ngħadduha b'maġġoranza relattiva meta huwa importanti li mhux biss tgħaddi mill-Parlament kemm jista' jkun malajr imma tgħaddi mill-Parlament bil-kunsens ħalli għada pitgħada, ikun hemm min ikun hemm fil-gvern, ikollna ċertu sens ta' kontinwita'.
Fi stadju ieħor inkunu rridu nressqu xi emendi li dwarhom irridu niddiskutu anke ma' l-Oppożizzjoni u huwa ta' sodisfazzjon għalija li, l-istess kif kienet għamlet l-amministrazzjoni Nazzjonalista meta ressqet il-financial services legislation fi żmienha u anke għamlet ċerti sessions biex tagħmel briefing lin-naħa ta' l-Oppożizzjoni, din id-darba l-MFSC ħadet l-inkarigu, bl-approval min-naħa tagħna ovvjament, li jsir ċertu briefing anke għan-naħa ta' l-Oppożizzjoni, ħalli wieħed ikun jista' jiċċara ċerti affarijiet fl-istadju inizjali tagħhom iktar milli fi stadju iktar avvanzat. Aħna se nibqgħu miftuħin għal dawn it-tip ta' briefings anke waqt li l-abbozz ta' liġi nniffsu jkun għaddej fis-Second Reading fil-Parlament ħalli kemm jista' jkun kull naħa jkollha l-ideat tagħha ċari u jkollha an open mind f'dak li tkun qiegħda tiddibatti f'din il-Kamra dwar dan is-suġġett.
Fil-laqgħat li kelli ma' assoċjazzjonijiet u anke kumpanniji individwali ta' l-assigurazzjoni, Madam Speaker, mill-ewwel rajt li kien hemm interess qawwi li din il-liġi tgħaddi u jekk jista' jkun tgħaddi malajr. Fil-fatt qegħdin inżommu l-wegħda tagħna li nressquha fil-Parlament kmieni kemm jista' jkun, biex ngħid hekk, wara r-recess tal-Milied. Konna se nressquha saħansitra iktar kmieni imma ovvjament qabel ngħaddu għall-Abbozz ta' Liġi dwar il-Kummerċ ta' l-Assigurazzjoni kien jenħtiġilna li neħilsu l-ewwel ċertu raft ta' liġijiet, bħal din li għalaqna d-dibattitu fuqha llum, li huma konsegwenzjali għall-budget. Biss naħseb li l-fatt li qegħdin ngħadduha bħala waħda mill-ewwel items tal-leġislazzjoni, apparti minn dawk relatati mal-budget, għandu jibgħat sinjal ċar lit-trade innifisha ta' l-impenn li hemm min-naħa tagħna biex din il-liġi komprensiva tfittex tiġi in place kemm jista' jkun malajr fil-pajjiż.
Madam Speaker, jiena m'iniex wieħed li nħobb nagħmel ħarsiet storiċi lejn l-affarijiet imma naħseb li nkun qed nonqos jekk ma nagħmilx ċertu aċċenn għall-iżvilupp storiku tas-servizzi finanzjarji u b'mod partikolari għall-assigurazzjoni ġewwa pajjiżna. Naħseb li l-ewwelnett irrid nissottolinja l-fatt li l-iżvilupp ta' Malta bħala ċentru ta' servizzi finanzjarji li tista' toqgħod fuqu ġab miegħu f'dawn l-aħħar snin attivita' leġislattiva sinifikanti. Kienet leġislazzjoni kkomplikata u leġislazzjoni anke estensiva, li tibda bil-liġi li tirregola l-kumpanniji, tibqa' sejra sa serje ta' liġijiet li jirregolaw in-negozju bankarju, l-assigurazzjoni, is-servizzi ta' l-investimenti u anke istituzzjonijiet finanzjarji, u tasal għal riformi sinifikanti fir-reġim fiskali, b'bidliet b'mod radikali għax-xenarju legali li fih jopera n-negozju. Kif semmejt aktar kmieni, l-ikbar sodisfazzjon naħseb għaż-żewġ naħat huwa li dawn il-bidliet leġislattivi dejjem saru bl-approvazzjoni unanima ta' din il-Kamra.
Madam Speaker, Malta bdiet qafas legali li jirregola s-servizzi finanzjarji bbażat l-aktar fuq direttivi ta' l-Unjoni Ewropea. Dan jenħtieġ konsiderazzjoni serja minħabba l-isforzi ta' Malta biex issir ċentru finanzjarju internazzjonali b'reputazzjoni għola, u iżjed u iżjed illum li Malta m'hijiex miexja aktar lejn sħubija sħiħa fl-Unjoni Ewropea imma lejn assoċjazzjoni mill-qrib. Fil-fehma tagħna, din il-politika tappoġġa l-isforzi ta' Malta biex jirnexxielha tiġbed operazzjonijiet internazzjonali sabiex joperaw minn pajjiżna. B'konsegwenza ta' dan, aħna nemmnu li kull qafas statutorju u anke regolatorju għandu jkollu l-vantaġġ tal-flessibbilta' biex iħajjar kumpanniji internazzjonali jirreġistraw u, aktar importanti, joperaw minn ġewwa pajjiżna.
L-evoluzzjoni ta' pajjiżna f'ċentru finanzjarju u kummerċjali b'reputazzjoni tajba u miftuħa għal barra u li joffri servizzi diversifikati u anke effiċjenti tiddependi ħafna, Madam Speaker, minn riżorsi umani kwalifikati u anke effiċjenti. Titlob effettivament infrastruttura leġislattiva adatta. F'dan is-sens kien hemm ċertu tħassib kbir - dan m'iniex qed ngħidu b'mod politiku għax nixtieq li kemm jista' jkun inżomm 'il fuq mill-partiġjaniżmu fil-kummenti tiegħi - fi ħdan l-industrija ta' l-assigurazzjoni tagħna li din ir-riforma mwegħda għall-Att li jirregola l-Kummerċ ta' l-Assigurazzjoni ħadet ċertu ammont ta' żmien biex tasal. Imma jien ma nħobbx inħares lura. Jiena nħobb inħares 'il quddiem u għalhekk naħseb li għandna nħarsu lejn l-aspett pożittiv li fi żmien ftit ġranet oħra, din il-liġi issa għandha tkun in place. Madam Speaker, xtaqt li qabel ma ngħaddu għal dak li għandna ppjanat f'din il-leġislazzjoni, tajjeb li nitkellmu ftit dwar is-suq ta' l-assigurazzjoni Malti kif kien qabel l-1981, jiġifieri qabel ma għaddiet ċertu leġislazzjoni minn dan il-Parlament.
Jekk ninsab informat tajjeb, dak iż-żmien dan is-suq kien magħmul minn 20 aġent u minn żewġ uffiċji ta' fergħat. Ma kien hemm ebda liġi jew regolament biex jikkontrollaw il-mod kif isir in-negozju ta' l-assigurazzjoni f'pajjiżna. Barra minn hekk, ma kien hemm ebda ftehim tas-suq u l-aġenti kienu jmexxu n-negozju tagħhom kif jgħidulhom il-kumpanniji li kienu jirrappreżentaw. L-uniċi regolamenti li f'dak iż-żmien kienu effettivi kienu dawk ta' l-Ordinanza ta' l-1939 dwar l-Assigurazzjoni ta' Vetturi bil-Mutur għar-Riskji ta' Terzi Persuni, Kap 104 tal-liġijiet ta' Malta.
Li ġara mbagħad fl-1972 kien li l-Bank Ċentrali ta' Malta ħareġ regolament dwar il-poloz ta' l-assigurazzjoni tal-ħajja. Dan ir-regolament kien jgħid li l-premiums u s-somma assigurata kellhom jidhru fil-polza f'liri Maltin u jitħallsu fil-Belt Valletta. Minn dak iż-żmien, dan kien ġie rtirat u mbagħad għadda l-Att ta' l-1975 dwar Assikurazzjoni Obbligatorja għar-Responsabbilta' ta' Min Iħaddem. Barra minn hekk imbagħad insibu taqsimiet 361 sa 440 tal-Kodiċi Kummerċjali li għandhom provvedimenti dwar il-kuntratt ta' assigurazzjoni marittima, id-drittijiet u l-obbligi ta' l-assiguratur u l-assigurat, u konċetti li jiġbru prattiċi fil-qasam marittimu u anke dak assigurattiv.
Tajjeb li wieħed jgħid, Madam Speaker, li għandu jiġi nnotat li sa l-1981 - u din ma rridx ngħidha b'mod li nagħti l-impressjoni li x-xemx telgħet fl-1981 imma naħseb li dan huwa stat ta' fatt li wieħed irid jirrikonoxxih - is-suq ma kienx laħaq jew għadu laħaq il-livell professjonali meħtieġ minn kriterji Ewropej, kuntrarju għas-sitwazzjoni kif inhi llum. Dak inhar in-negozju kien l-aktar dak ta' linji personali u kien mixħut l-aktar fuq dawk li huma vetturi. L-akbar riskji u dawk ikkomplikati kienu jiġu assigurati direttament ma' kumpanniji barranin. L-aġenti nfushom kienu jużaw għadd ta' sotto-aġenti biex jiġġeneraw in-negozju tagħhom. Dawn l-hekk imsejħa sotto-aġenti kienu jikkonsistu l-aktar f'negozjanti tal-karozzi, sidien tal-ħwienet jew pjazzisti u kellhom rabtiet ta' l-aġenzija partikolari bis-saħħa ta' l-operazzjonijiet tagħhom.
Qabel l-1981, dawk li jaħdmu fl-assigurazzjoni kellhom biss ftit kwalifiki akkademiċi u ħafna minnhom ma kellhom xejn. Ħtija ta' nuqqas ta' provvedimenti leġislattivi dwar brokers, dawn kważi lanqas biss kienu jeżistu qabel nofs is-snin sebgħin. Sa dak iż-żmien servizzi ta' brokers professjonali f'Malta kont tista' teħodhom biss permezz ta' djar ta' brokers ewlenin, l-aktar Ingliżi. Imbagħad fl-1976 rajna l-bidu ta' brokers professjonali lokali ta' l-assigurazzjoni u naħseb is-sodda għal dan l-iżvilupp kienet infirxet mill-Mediterranean Insurance Brokers Ltd., illum parti mill-grupp multinazzjonali AOM.
Din is-sitwazzjoni ta' qabel l-1981 fiha nnifisha ħolqot il-ħtieġa għal leġislazzjoni adegwata biex tirregola n-negozju ta' l-assigurazzjoni. Fil-fatt il-leġislazzjoni kellha tkun għal protezzjoni akbar tal-pubbliku u li setgħet tipprovdi ċerti elementi ta' superviżjoni. Il-ħruġ ta' premiums ta' assigurazzjoni barra minn Malta kien regolat mill-kontroll tal-kambju u l-introduzzjoni ta' l-Att ta' l-1981 dwar l-Impriża ta' l-Assigurazzjoni ġie segwit mit-twaqqif tal-Mediterranean Insurance Training Centre fl-1982. Dan iċ-ċentru kien u għadu fundamentali għall-iżvilupp ta' dawk li jridu jidħlu għal karriera fl-assigurazzjoni. Fil-fatt ta' min wieħed jgħid li 'l fuq minn 25% ta' dawk li jaqilgħu l-għajxien tagħhom mill-industrija Maltija ta' l-assigurazzjoni għandhom kwalifiċi akkademiċi aċċettati internazzjonalment.
Tajjeb li wieħed iħares issa lejn l-Att ta' l-1981 dwar l-Impriżi ta' l-Assigurazzjoni. L-avviż legali tat-13 ta' Lulju, 1981 stabilixxa d-data li fiha l-provvedimenti kollha ta' dan l-Att kellhom jidħlu fis-seħħ barra artiklu 23, li jitkellem dwar insurance brokers and insurance salesmen, liema taqsima daħlet fis-seħħ fl-1 ta' Jannar, 1982. L-oġġettivi li għalihom iddaħħal dan l-Att kienu tlieta; u dawn kienu biex jirregola l-assigurazzjoni f'Malta fl-interess tal-konsumatur, biex joħroġ liċenzi lill-assiguraturi u jirregola l-operat tagħhom, u biex jiżgura li jinżamm ċertu livell professjonali. Huwa evidenti li dan l-Att intlaqa' tajjeb u ġie applikat tajjeb ukoll. Fil-fatt kull leġislazzjoni li ddaħħal kondizzjonijiet u limiti finanzjarji l-aktar fil-qasam ta' kapital, riżervi u likwidita' bdiet topera għall-vantaġġ tal-konsumatur ġenerali, inklużi x-xerrejja kummerċjali u industrijali privati.
L-Att inniffsu kellu ċerti implikazzjonijiet li jwasslu fit-tul u kien jinkorpora taqsimijiet li jiġbru fost ħwejjeġ oħra d-definizzjoni ta' l-operaturi fis-suq, il-minimu mhux minsus tal-kapital ta' l-ishma, riżervi u fondi oħrajn, marġini ta' likwidita', regolamenti u anke fond tas-sigurta'. Qabel ma daħal l-Att innifsu, kumpanniji Maltin li kellhom aġenziji minn għadd ta' kumpanniji barranin kienu qegħdin jinnegozjaw taħt liċenzja ta' negozju ġenerali. Fil-fatt, l-Att għamilha obbligatorja li kull interess Malti kellu jkollu liċenza mill-ministeru tal-finanzi wara li jkun issodisfa kulma hu mitlub mill-istess Att. Id-definizzjoni ta' brokers ta' l-assigurazzjoni kienet titlob kapital bla minsus ta' ishma ugwali għal dak meħtieġ minn aġenti u kopertura ta' assigurazzjoni ta' responsabbilta' professjonali ta' mhux inqas minn Lm0.25 miljun. Fil-fatt insibu li l-pjazzisti kienu wkoll regolati iżda f'livell inqas. L-Att serva ta' influwenza li llikwidat ħafna kumpanniji li kellhom interessi diversi biex waqqfu kumpanniji separati li jispeċjalizzaw fl-assigurazzjoni u b'hekk jikkonformaw mal-provvedimenti ta' l-Att.
Wieħed irid iżid li l-provvedimenti ta' dan l-Att rigward iċ-ċessjoni ta' riassigurazzjoni legali llum m'għadhiex tapplika. Is-suq dirett għall-konsumatur kien u għadu ħieles billi assiguraturi barranin jistgħu jidħlu jirreġistraw Malta suġġett għall-provvedimenti ta' l-Att. Iċ-ċessjoni jew cession obbligatorja kienet prinċipalment f'forma ta' riassigurazzjoni, u l-vantaġġ ewlieni tagħha kien li assiguraturi barranin kienu obbligati li jħallu f'Malta sa 30% tal-premium ta' riassigurazzjoni jew ko-assigurazzjoni fil-każ ta' Lloyd's of London tar-riskju bla ma jaffettwaw l-interessi tal-konsumatur. Fil-fatt dan ma affettwa xejn lis-suq primarju. It-tnaqqis tal-ħruġ tal-premiums barra minn Malta kellu l-effett li jnaqqas l-ispiża ta' importazzjoni inviżibbli u nkoraġġixxa l-iżvilupp professjonali ta' aġenziji ta' kumpanniji barranin.
Oġġettiv ieħor kien intlaħaq bit-twaqqif ta' għadd ta' assiguraturi lokali li fosthom illum insibu l-ewwel kumpannija indiġena ta' din ix-xorta, il-Middle Sea Insurance plc. Jekk wieħed iħares lejn l-iżvilupp ta' l-industrija lokali ta' l-assigurazzjoni, wara l-introduzzjoni ta' l-Att ta' l-1981 dwar l-Impriża ta' l-Assigurazzjoni, isib li l-objettivi ewlenin li ispiraw dik il-leġislazzjoni ntlaħqu. Biex nagħti eżempju minn ċifri li għandi, is-suq lokali ta' assigurazzjoni baqa' juri tkabbir inkoraġġanti. Kien hemm ukoll titjib konsiderevoli fil-kwalita' tas-servizz u mhux biss fil-volum tan-negozju. Ir-reġim regolatorju li ġie wara l-1981 baqa' miexi mal-prinċipji u prattiċi diġa' stabiliti biex iħarsu l-interessi tal-pubbliku, jeżerċitaw kontroll monetarju sodisfaċenti u jkomplu jżommu l-ogħla standards ta' servizzi professjonali.
Tajjeb li wieħed jgħid li l-għanijiet ta' l-Att li għadni kif irriferejt għalih kienu effettivament, Madam Speaker, biex jikkontrolla u jirregola l-impriża ta' l-assigurazzjoni u biex jipprovdi għall-ħwejjeġ li għandhom x'jaqsmu magħha jew li huma anċillari għaliha. Illum is-suq ta' l-assigurazzjoni għandu ħames kumpanniji ta' l-assigurazzjoni Maltin li tnejn minnhom imexxu biss kummerċ ta' assigurazzjoni fuq il-ħajja. Barra s-suq ta' Lloyd's f'Malta għandna 23 kumpannija barranija li jmexxu l-kummerċ ta' l-assigurazzjoni minn aġenziji lokali li bejniethom joffru prodotti ta' assigurazzjoni li jvarjaw minn poloz fuq il-ħajja sa poloz fuq is-saħħa u poloz li jassiguraw kull riskju mhux marbut mal-ħajja. Għandna 27 aġent ta' l-assigurazzjoni li jmexxu l-kummerċ kemm f'isem kumpanniji ta' l-assigurazzjoni barranin, kif ukoll f'isem kumpanniji Maltin. Għandna wkoll 25 broker fl-assigurazzjoni u 479 bejjiegħ ta' l-assigurazzjoni. Dawn kollha għandhom liċenza jew awtorizzazzjoni maħruġa lilhom taħt dan l-Att.
Naħseb li huwa tajjeb issa li naraw f'termini komparattivi l-ammont ta' premiums li tħallsu f'assigurazzjoni kif żdiedu u kibru tul is-snin. Jekk nieħdu, per eżempju, l-assigurazzjoni fuq il-ħajja, insibu li matul l-1982 l-ammont ta' premiums kien ta' ¥1,847,000 u matul is-sena 1996, dan l-ammont tela' għal ¥11,670,000. Dwar assigurazzjoni mhux fuq il-ħajja, insibu li matul is-sena 1982 l-figura tal-premiums kienet ta' ¥6,563,000 u matul is-sena 1996 l-ammont ta' premiums tela' għal ¥30,446,000. L-ammont ta' somom assigurati dwar assigurazzjoni fuq il-ħajja sa l-aħħar tas-sena 1982 kien ta' ¥105,113,000. Sa l-aħħar tas-sena 1996 dan l-ammont kien tela' għall-figura pjuttost fenomenali by local standards ta' ¥713,643,000. Madam Speaker, naħseb li minn din l-istatistika wieħed jara l-progress sostanzjali li sar fil-qasam ta' l-assigurazzjoni minn meta dan is-suq beda jiġi effettivament irregolat.
Dwar impjiegi fis-suq ta' l-assigurazzjoni, bla ma wieħed iqis il-bejjiegħa ta' l-assigurazzjoni sat-tmien ta' l-1996 kien hemm 739 impjegat full-time u 129 impjegat part-time. Ma' dawn wieħed irid iżid dawk l-impjegati professjonali u tekniċi li joffru support lis-suq bħalma huma awdituri, periti ta' claims u anke oħrajn. Tajjeb li wieħed josserva li minn suq immexxi tista' tgħid minn persuni bl-ebda kwalifiki, matul dawn is-16-il sena ħafna żgħażagħ ħatfu l-opportunita' u qabdu karriera fil-kummerċ ta' l-assigurazzjoni wara ħafna studju f'dan il-qasam kemm f'Malta u kif ukoll barra mill-pajjiż. Illum għandna managers li huma effettivament fellows jew anke associates taċ-Chartered Institute of Insurance tar-Renju Unit u dawn huma fil-biċċa l-kbira tagħhom managers kompetenti li bil-kontribut tagħhom għollew il-livell tas-suq għal wieħed ta' livell ġenwinament internazzjonali. Irrid nerġa' nsemmi l-ħidma sfiqa tal-Mediterranean Insurance Training Centre li twaqqaf apposta biex iħarreġ żgħażagħ Maltin u barranin fil-kummerċ ta' l-assigurazzjoni fuq livell internazzjonali. Naħseb li dan ta kontribut siewi li jixraqlu l-għarfien ta' din il-Kamra.
Pass ieħor 'il quddiem u ta' servizz soċjali huwa dak li sar bis-saħħa ta' l-Att ta' l-1981 dwar l-Impriżi ta' l-Assigurazzjoni meta kien twaqqaf il-fond imsejjaħ "Il-Fond ta' Assigurazzjoni". Dan il-fond twaqqaf għall-ħlas ta' kull talba kontra kumpannija ta' l-assigurazzjoni li tmexxi impriża ta' l-assigurazzjoni f'Malta li tibqa' ma titħallasx minħabba insolvibbilta' ta' dik il-kumpannija, u għal dawk l-għanijiet l-oħra dwar assigurazzjoni magħdud kumpens lil vittmi ta' disgrazzji tat-traffiku. Dan il-fond li jitmexxa skond ir-Regolamenti ta' l-1986 dwar il-Fond ta' Assigurazzjoni ta' l-Impriżi ta' l-Assigurazzjoni ġie fis-seħħ fl-1 ta' Lulju, 1986 bis-saħħa ta' Avviż Legali Nru. 28 ta' l-1986. Nieħu pjaċir ngħid li sal-lum għadu qatt ma kellna każ ta' kumpannija li tmexxi l-kummerċ tagħha f'Malta li kienet fi stat ta' insolvibbilta'. Għalhekk, għadu qatt ma sar ebda ħlas mill-fond dwar talbiet li baqgħu ma tħallsux minħabba din l-insolubility.
Ma nistax ngħid l-istess ħaġa dwar it-tieni għan tal-fond. F'dawn l-aħħar għaxar snin tħallset mill-fond is-somma ta' ¥132,310 bħala kumpens lil vittmi ta' disgrazzji tat-traffiku. Dan kien ħlas lil vittmi ta' każijiet ta' hit and run u li, fiċ-ċirkostanzi, l-assiguratur tal-vettura li kkaġunat l-inċident baqa' mhux magħruf. Somma oħra ta' ¥60,500 għad trid titħallas mill-fond. Hawnhekk, wieħed irid jgħid ukoll li l-assiguraturi tal-vetturi ħallsu bejniethom is-somma ta' kważi ¥438,000 fi claims li ma kenux koperti minn poloz ta' assigurazzjoni. Dan sar taħt ftehim ta' "l-assiguratur konċernat" kif provedut fir-Regolamenti ta' l-1986 dwar il-Fond ta' l-Assigurazzjoni ta' l-Impriża ta' l-Assigurazzjoni u dan kollu kien effettivament ħlas ex gratia.
Miżura oħra li ttieħdet taħt l-Att ta' l-1981 dwar l-Impriża ta' l-Assigurazzjoni kienet bis-saħħa ta' Avviż Legali Nru. 129 ta' l-1989 dwar Avviż Statutorju marbut ma' poloz ta' assigurazzjoni fuq il-ħajja. Bis-saħħa ta' din il-miżura, kull persuna li tinnegozja polza ta' assigurazzjoni fuq il-ħajja jingħatalha 15-il jum wara li tinnegozja l-polza biex taħsibha mill-ġdid u, jekk tkun tixtieq, biex terġa' lura min-negozju u tħassar il-polza. Minħabba li assigurazzjoni fuq il-ħajja hija rabta fit-tul, kien xieraq li persuna li tinnegozja polza fuq il-ħajja tingħata ftit żmien aktar biex tagħmel mill-ġdid il-kalkoli tagħha u terġa' taħsibha. Bil-mod il-mod f'dawn l-aħħar 16-il sena bdiet tinxtered aktar fostna l-kultura ta' assigurazzjoni u l-assigurazzjoni ma baqgħetx marbuta biss mal-vetturi tas-sewqan bħalma kienet qabel ma daħlet fis-seħħ il-liġi, għall-inqas f'għajnejn il-biċċa l-kbira tan-nies.
Għalkemm l-Att ta' l-1981 kellu dispożizzjoni speċifika dwar tmexxija ta' assigurazzjoni esklussivament barra minn Malta, kien pass għaqli li, meta fl-1988 ġie fis-seħħ l-Att ta' l-1988 dwar Attivitajiet Kummerċjali Internazzjonali ta' Malta, l-attivitajiet offshore ta' kumpanniji ta' l-assigurazzjoni bdew jiġu rregolati taħt dak l-Att. Fl-1994 il-Parlament approva tibdil sostanzjali fl-Att ta' l-1988 dwar Attivitajiet Kummerċjali Internazzjonali ta' Malta, u bis-saħħa ta' dak it-tibdil, il-funzjonijiet regolatorji ta' l-Awtorita' mwaqqfa taħt dak l-Att twessgħu f'oqsma oħra ta' servizzi finanzjarji l-aktar fl-assigurazzjoni domestika u f'servizzi ta' investiment.
Biex tkun riflessa l-funzjoni ġdida kif imwessa' ta' l-awtorita', l-isem ta' l-awtorita' regolatorja nbidel f'"Ċentru għas-Servizzi Finanzjarji ta' Malta". L-Att innifsu bidel ukoll ismu u mill-Att ta' l-1988 dwar Attivitajiet Kummerċjali Internazzjonali ta' Malta beda jissejjaħ l-Att ta' l-1988 dwar iċ-Ċentru għas-Servizzi Finanzjarji ta' Malta.
Fl-1 ta' Diċembru, 1994 il-Ministru tal-Finanzi għadda l-poteri u l-funzjonijiet mgħoddija lilu bis-saħħa ta' l-Att ta' l-1981 dwar l-Impriża ta' l-Assigurazzjoni, għajr għal xi dispożizzjonijiet, liċ-Ċentru għas-Servizzi Finanzjarji ta' Malta. Dan sar biex il-kummerċ ta' l-assigurazzjoni, kemm dak onshore kif ukoll dak offshore ikun irregolat mill-istess awtorita'. Aktar ma għadda ż-żmien aktar is-suq ta' l-assigurazzjoni beda jissaħħaħ u anke jistabilizza ruħu. Is-suq beda wkoll b'xi mod jirregola lilu nnifsu u twaqqfu fuq l-inizjattiva tal-membri tas-suq l-assocjazzjoni tal-kumpanniji ta' l-assigurazzjoni u l-assoċjazzjoni tal-brokers fl-assigurazzjoni. Ċerti restrizzjonijiet li kienu meħtieġa fl-ewwel snin tal-liġi ma baqgħux aktar validi u maż-żmien anke tneħħew. Illum is-suq huwa wieħed professjonali u huwa wieħed effettivament miftuħ u nistgħu ngħidulu anke suq kompetittiv. Il-konsumatur għandu quddiemu għażla wiesa' ta' prodotti ta' assigurazzjoni. Iċ-ċittadin sar ukoll jagħraf aktar il-ħtieġa ta' assigurazzjoni u sar jaf kif ifittixha u anke kif jagħżilha.
Madam Speaker, s'issa tajt ħarsa ħafifa lejn kif żviluppa s-suq ta' l-assigurazzjoni f'pajjiżna minn meta ġiet fis-seħħ l-ewwel liġi dwar l-assigurazzjoni wara ħafna snin ta' suq maħlul għall-aħħar u bla ebda regola. Illum aħna rridu nħarsu b'fiduċja lejn dan il-qasam importanti kemm bħala qasam ta' attivita' ekonomika kif ukoll bħala qasam li jaqa' taħt l-umbrella ta' servizzi finanzjarji, kemm bħala qasam ta' kummerċ domestiku kif ukoll bħala qasam ta' kummerċ internazzjonali. Liġijiet oħra li jaqgħu taħt l-umbrella ta' servizzi finanzjarji u li kien għadda żmienhom ġew riveduti u minflokhom saru u daħlu fis-seħħ liġijiet ġodda li jirriflettu aħjar il-ħteġijiet tal-lum. Biex nieħdu eżempju wieħed, Madam Speaker, dan ġara fl-Att ta' l-1970 dwar il-Kummerċ Bankarju li ġie rivedut u minfloku daħal fis-seħħ l-Att ta' l-1994 dwar il-Kummerċ Bankarju.
L-istess ħaġa jenħtieġ li jiġri fil-qasam ta' l-assigurazzjoni. Il-liġi ta' l-1981 qdiet dmirha sew u bil-għaqal. Kienet il-ġebla tax-xewka li fuqha nbena u żviluppa l-kummerċ ta' l-assigurazzjoni. Iżda minn xi snin 'l hawn beda jidher ċar li l-liġi jenħtiġilha tinbidel mill-għeruq biex taqdi aħjar il-ħteġijiet moderni tal-lum u biex tieħu postha bħala kolonna oħra mal-kolonni l-oħrajn li fuqhom jinstabu mibnija s-servizzi finanzjarji li joffri pajjiżna. Għal dan il-għan sar l-istudju meħtieġ u saru wkoll ir-riċerki meħtieġa u beda jitfassal abbozz ta' liġi ġdid. Saru konsultazzjonijiet wiesgħa u fit-tul ma' kull min kellu kontribut x'jagħti f'dan il-qasam. Dawn il-konsultazzjonijiet involvew is-suq kollu ta' l-assigurazzjoni, jiġifieri assiguraturi, aġenti ta' l-assigurazzjoni u brokers fl-assigurazzjoni. Saru wkoll konsultazzjonijiet ma' Lloyd's, ma' accountants u anke ma' awdituri. Dawn il-konsultazzjonijiet saru ma' l-għaqdiet kostitwiti ta' dawk il-persuni li jmexxu l-kummerċ ta' l-assigurazzjoni jew li jeżerċitaw il-professjoni ta' accountant. Saru wkoll konsultazzjonijiet ma' konsulenti barranin.
Min-naħa l-oħra t-team li ħejja l-abbozz ta' liġi ġdid kellu wkoll l-ideat tiegħu, ideat imfassla fuq l-esperjenza u liġijiet ta' kummerċ ta' l-assigurazzjoni ta' pajjiżi barranin avvanzati - fosthom dawk tar-Renju Unit, ta' l-Irlanda, ta' Lussemburgu u ta' Guernsey - u fuq id-direttivi dwar l-assigurazzjoni ta' l-Unjoni Ewropea. Il-prodott aħħari, bi qbil wiesa' mal-partijiet kollha, huwa ż-żewġ abbozzi ta' liġi li għandu quddiemu dan il-Parlament. Dawk li fasslu l-leġislazzjoni ġdida deherilhom - u kulħadd qabel magħhom - li minflok l-Att ta' l-1981 għandu jkun hemm żewġ liġijiet, liġi waħda biex tirregola l-kummerċ ta' l-assigurazzjoni u liġi oħra biex tirregola r-reġistrazzjoni ta' brokers fl-assigurazzjoni u intermedjarji oħra u attivitajiet ta' intermedjarji fl-assigurazzjoni. L-abbozzi rispettivi huma l-Abbozz Nru. 8 imsejjaħ "l-Att ta' l-1996 dwar Brokers fl-Assigurazzjoni u Intermedjarji Oħra" u l-Abbozz Nru. 9 imsejjaħ "l-Att ta' l-1996 dwar il-Kummerċ ta' l-Assigurazzjoni.".
L-għan ta' l-Abbozz dwar il-Kummerċ ta' l-Assigurazzjoni huwa li jagħmel dispożizzjonijiet ġodda li jirregolaw il-kummerċ ta' l-assigurazzjoni li jsir f'Malta jew minn Malta jew f'pajjiż jew minn pajjiż barra minn Malta, minflok dawk li jinsabu fl-Att ta' l-1981 dwar l-Impriża ta' l-Assigurazzjoni u, relattivament għall-kummerċ li jsir minn Malta, li jinsabu fl-Att ta' l-1988 dwar iċ-Ċentru għas-Servizzi Finanzjarji ta' Malta, u sabiex jipprovdi għal ħwejjeġ konnessi magħhom jew anċillari għalihom. Biex jintlaħaq dan il-għan, l-Abbozz dwar il-Kummerċ ta' l-Assigurazzjoni jaħseb ukoll biex ikun hemm liġi waħda li tirregola l-kummerċ ta' l-assigurazzjoni u b'hekk titneħħa d-distinzjoni bejn kummerċ onshore u dak li huwa kummerċ offshore.
Dan l-abbozz jaħseb biex ikun hemm awtorita' kompetenti regolatorja waħda li tirregola l-kummerċ ta' l-assigurazzjoni u din l-awtorita' tkun l-awtorita' kompetenti li tirregola s-servizzi finanzjarji. Jaħseb ukoll biex il-leġislazzjoni li tirregola l-kummerċ ta' l-assigurazzjoni togħla għal-livell internazzjonali. GĦanijiet oħrajn ta' dan l-abbozz ta' liġi huma biex jintlaħaq l-ambjent meħtieġ sabiex kumpanniji li jmexxu kummerċ ta' l-assigurazzjoni, b'mod partikolari, dawk li jmexxu kummerċ ta' riassigurazzjoni jew ta' assigurazzjoni affiljata, imexxu l-kummerċ tagħhom minn Malta; biex kull persuna li effettivament tmexxi l-kummerċ ta' l-assigurazzjoni tkun persuna xierqa u idonea biex tiżgura tmexxija b'mod tajjeb u b'mod prudenti; u biex ebda persuna ma jkollha aktar minn awtorizzazzjoni waħda biex tmexxi xi kummerċ ta' l-assigurazzjoni jew attivita' fl-assigurazzjoni. Madam Speaker, l-abbozz ta' liġi li għandna quddiemna llum huwa qafas ta' kunċetti li fuqhom irid jiġi rregolat il-kummerċ ta' l-assigurazzjoni. Għalhekk l-abbozz huwa wieħed enabling fejn id-dettalji ta' kif jiġi regolat il-kummerċ joħorġu b'regolamenti, u fejn id-direzzjoni dwar it-tmexxija ta' kuljum tingħata mill-awtorita' kompetenti bis-saħħa ta' direttivi dwar l-assigurazzjoni. Fil-fatt insibu li l-abbozz jinqasam fi 12-il taqsima, u hemm miegħu ħames skedi separati.
Bħal kull abbozz ieħor, fl-ewwel taqsima preliminari nsibu t-tifsira tal-kliem. Biex żgur jitneħħa kull dubju ta' x'ifissru t-termini "riskju sitwat f'Malta" u "riskju sitwat barra minn Malta" ingħatat tifsira preċiża u dettaljata ta' kull wieħed minn dawn it-termini. Tifsira oħra li ngħatat importanza hija dik tat-terminu "assigurazzjoni affiljata". Dan huwa terminu modern għal dak ix-xorta ta' kummerċ ta' l-assigurazzjoni li jissejjaħ ukoll "captive insurance". Fil-fatt insibu li l-abbozz innifsu jagħti ħafna importanza lil dan ix-xorta ta' kummerċ għaliex wieħed jittama li malli l-liġi dwar l-assigurazzjoni tidħol fis-seħħ, jirnexxielna niġbdu lejn pajjiżna numru ta' kumpanniji barranin li jmexxu dan ix-xorta ta' kummerċ biex jirreġistraw f'Malta u jmexxu dan il-kummerċ minn Malta. Għal dan il-għan, dwar kummerċ ta' assigurazzjoni affiljata u riorganizzazzjoni, uħud mid-dispożizzjonijiet ta' l-abbozz jew huma modifikati jew dikjarati li ma japplikawx. Biex jinħoloq l-ambjent meħtieġ għal dawk il-kumpanniji li jridu jmexxu l-kummerċ internazzjonali ta' l-assigurazzjoni tagħhom minn Malta, se nressaq numru ta' emendi fl-Att dwar it-Taxxa fuq id-Dħul pero' dwar dawn l-emendi nitkellem meta niġi biex nispjega l-ħames skeda li tinsab ma' dan l-abbozz.
Madam Speaker, bħal kull liġi oħra dwar servizzi finanzjarji u minħabba l-fatt li l-liġi dwar l-assigurazzjoni hija mmirata biex tħajjar kumpanniji barranin li jmexxu kummerċ ta' assigurazzjoni affiljata jew ta' riassigurazzjoni li jirreġistraw f'Malta, l-abbozz jipprovdi li jekk ikun hemm konflitt bejn it-test Ingliż u t-test Malti, għandu jipprevali t-test Ingliż. Il-liġijiet l-oħra dwar servizzi finanzjarji ta' pajjiżna huma wkoll immirati lejn is-suq internazzjonali u, biex ebda investitur barrani ma jidħollu dubju li t-test Malti jista' b'xi mod jinftiehem xorta oħra mit-test Ingliż, it-test Ingliż għandu jipprevali.
Madam Speaker, id-dispożizzjonijiet li nsibu fit-tieni taqsima dwar sorveljanza tal-kummerċ ta' l-assigurazzjoni jixbħu ħafna fil-ħsieb u anke fil-kontenut id-dispożizzjonijiet dwar sorveljanza ta' kummerċ u attivitajiet li nsibu f'liġijiet oħra dwar servizzi finanzjarji. Din it-taqsima tagħmel dispożizzjonijiet dwar is-setgħat u d-dmirijiet tal-ministru responsabbli, fosthom id-dmir li jaħtar l-awtorita' kompetenti, u dwar is-setgħat u d-dmirijiet ta' l-awtorita' kompetenti biex taqdi l-funzjonijiet mogħtija lilha bl-abbozz jew taħtu, fosthom is-setgħa li tagħmel direttivi dwar l-assigurazzjoni dwar ħwejjeġ speċifikati fl-abbozz.
Jekk niġu mbagħad għat-tielet taqsima nsibu li din tirrigwarda l-awtorizzazzjoni għat-tmexxija ta' kummerċ ta' l-assigurazzjoni u tikklassifika l-kummerċ ta' l-assigurazzjoni f'kummerċ fit-tul u kummerċ ġenerali. Id-dettalji dwar il-klassijiet ta' kummerċ jidhru fit-tieni skeda li tinsab ma' l-abbozz għal dawk li huma klassijiet ta' kummerċ fit-tul u fit-tielet skeda għal dawk li huma klassijiet ta' kummerċ in ġenerali. Din il-klassifika, Madam Speaker, hija klassifika standard fil-pajjiżi avvanzati ta' l-Ewropa.
Kull min imexxi f'Malta jew minn Malta kummerċ ta' l-assigurazzjoni, jenħtieġ li jikseb awtorizzazzjoni mill-awtorita' kompetenti. L-abbozz jorbot lill-awtorita' kompetenti li toħroġ awtorizzazzjoni fi żmien sitt xhur minn meta tirċievi t-tagħrif kollu li hu meħtieġ li jingħata ma' l-applikazzjoni. Fir-rigward tal-kummerċ ta' assigurazzjoni affiljata jew riassigurazzjoni, l-awtorizzazzjoni għandha toħroġ fi żmien tliet xhur minn meta jingħata dan it-tagħrif. Meta ma tingħatax awtorizzazzjoni, l-awtorita' kompetenti għandha l-obbligu li tagħti bil-miktub lill-applikant ir-raġunijiet għaliex ma ngħatalux awtorizzazzjoni.
Madam Speaker, l-abbozz jispeċifika l-ħteġijiet biex wieħed jingħatalu awtorizzazzjoni. F'dawk il-ħteġijiet daħal il-konċett ta' "fondi tal-kumpannija stess". Dan il-konċett m'huwiex ġdid għal din il-Kamra għaliex insibuh diġa' mħaddem fl-Att ta' l-1994 dwar il-Kummerċ Bankarju. Il-ħteġijiet ġenerali li hemm fl-abbozz japplikaw kemm għal kumpannija lokali kif ukoll għal kumpannija barranija li trid tmexxi l-kummerċ ta' l-assigurazzjoni f'Malta jew minn Malta. Imbagħad, skond kif ikun il-każ, japplikaw ħteġijiet oħrajn għal kumpannija lokali u kumpannija barranija.
Biex żgur ma jinqalgħux diffikultajiet jew komplikazzjonijiet meta wieħed ikun irid iħarrek kumpannija barranija fil-qrati Maltin, jew jenforza sentenza mogħtija mill-qrati Maltin, kull kumpannija barranija li tingħatalha awtorizzazzjoni biex tmexxi l-kummerċ f'Malta jew minn Malta trid tinnomina persuna bħala rappreżentant tagħha. Dan ir-rappreżentant ikun awtorizzat li jaġixxi b'mod ġenerali u li jaċċetta notifika ta' kull dokument f'isem il-kumpannija. Is-soċjeta' Ingliża magħrufa bħala Lloyd's, li dwarha nitkellem aktar 'il quddiem meta nispejga l-ewwel skeda li tinsab ma' l-abbozz, taqa' taħt l-istess dispożizzjoni.
Madam Speaker, kull kumpannija ta' l-assigurazzjoni li tmexxi l-kummerċ tagħha bħala assiguratur tista', jekk trid, fil-każ ta' kumpannija lokali, tiftaħ fergħat f'Malta u taħtar kemm aġenti kif ukoll managers ta' l-assigurazzjoni. Fil-każ ta' kumpannija barranija, ikollha kemm fergħa f'Malta kif ukoll aġent ta' l-assigurazzjoni, u l-fergħa tista' titmexxa minn manager ta' l-assigurazzjoni. Meta ngħidu manager ta' l-assigurazzjoni qegħdin nitkellmu dwar konċett ġdid. Fil-fatt dwar l-attivitajiet ta' din il-persuna nitkellem meta nispjega r-raba' skeda li tinstab ma' dan l-abbozz.
Ir-raba' taqsima li tikkonċerna kondizzjonijiet għat-tmexxija ta' kummerċ ta' l-assigurazzjoni, tagħmel dispożizzjonijiet bażiċi biex jitmexxa bla nkwiet il-kummerċ ta' l-assigurazzjoni. Fil-fatt, din it-taqsima tittratta fid-dettall il-marġini ta' solvibbilta' li kull kumpannija awtorizzata li tmexxi l-kummerċ ta' l-assigurazzjoni għandha l-obbligu li żżomm, u x'jiġri meta kumpannija tonqos li żżomm l-inqas marġini ta' solvibbilta'. Tittratta wkoll il-fond ta' garanzija li kull kumpannija awtorizzata għandha żżomm f'Malta kif ukoll il-proviżjonijiet tekniċi adegwati, inklużi l-proviżjonijiet matematiċi dwar kummerċ li l-kumpannija tkun awtorizzata li tmexxi. Fir-rigward ta' ċerti klassijiet ta' kummerċ ġenerali li jistgħu jiġu preskritti, tittratta r-riserva ta' ekwalizzazzjoni u l-klassijiet li jistgħu jiġu preskritti huma dwar riskji katastrofiċi. Fl-aħħarnett, l-abbozz jagħmel dispożizzjonijiet dwar il-kustodja ta' l-attiv ta' kull kumpannija li għandu jinżamm ġewwa pajjiżna.
Taqsima ħamsa tirrigwarda kontijiet, investigazzjonijiet minn attwarji u dikjarazzjonijiet finanzjarji u tagħmel dispożizzjonijiet dwar is-sena finanzjarja ta' kumpanniji awtorizzati, dwar l-għemil u l-pubblikazzjoni ta' dikjarazzjonijiet finanzjarji verifikati ta' kumpannji, dwar ħatra ta' awdituri minn kumpanniji, dwar il-ħatra ta' attwarju minn kumpannija li tmexxi kummerċ fit-tul, dwar il-ħtieġa li kumpannija li tmexxi kummerċ fit-tul ikollha investigazzjonijiet perjodiċi minn attwarju tagħha fil-qagħda finanzjarja tagħha dwar dak il-kummerċ u dwar l-obbligazzjonijiet ta' awdituri u attwarji lejn l-awtorita' kompetenti. L-awditur u l-attwarju, fejn kumpannija tmexxi kummerċ fit-tul, huma l-għassiesa ta' solvibilita' tal-kumpannija. L-abbozz jgħabbi lil dawn iż-żewġ għassiesa b'ħafna obbligi u għalhekk kull awditur, sabiex jivverifika l-kummerċ ta' l-assigurazzjoni, jeħtieġ l-ewwelnett li jkun awditur skond l-Att ta' l-1995 dwar il-Kumpanniji u, t-tieni nett, li jkun approvat mill-awtorita' kompetenti.
Biex awditur jivverfika l-kummerċ ta' l-assigurazzjoni jenħtieġ li jkun imħarreġ sew fid-dispożizzjonijiet ta' l-abbozz u tar-regolamenti u fid-direttivi dwar l-assigurazzjoni li joħorġu taħt l-abbozz. Minħabba f'hekk awditur taħt l-Att dwar il-Kumpanniji jenħtieġlu jikseb l-approvazzjoni taħt dan l-abbozz mill-awtorita' kompetenti. L-istess ħaġa jrid jingħad dwar dak li huwa l-attwarju. Madam Speaker, dan kollu huwa maħsub biex is-solvibilta' ta' kumpannija ta' l-assigurazzjoni tkun taħt sorvelja l-ħin kollu.
Dwar l-uffiċċju ta' attwarju, nixtieq nirrimarka li s'issa m'għandna ebda persuna kompetenti Maltija li tista' terfa' r-responsabbilta' ta' dan l-uffiċċju. Wieħed jittama li 'l quddiem in-numru tal-kumpanniji li jmexxu f'Malta, jew minn Malta, kummerċ fit-tul, jiżdied u l-effett ta' din id-dispożizzjoni tkun ukoll li persuni Maltin jitħajru jagħmlu l-istudji neċessarji dwar din il-materja biex ikunu jistgħu jiksbu l-ħatra f'dan l-uffiċċju.
Is-sitt taqsima tikkonċerna s-setgħat ta' intervenzjoni u tagħmel dispożizzjonijiet dwar is-setgħat li l-awtorita' kompetenti għandu jkollha biex tintervjeni meta tħoss il-ħtieġa li għandha tintervjeni. U ebda awtorita' kompetenti ma tkun awtorita' jew kompetenti jekk fil-liġi li twaqqafha ma jkunx hemm id-dispożizzjonijiet meħtieġa li jagħmluha awtorita' u kompetenti. Fil-fatt, l-abbozz jispeċifika ċ-ċirkostanzi meta awtorizzazzjoni maħruġa jew miżmuma taħtu tiġi revokata awtomatikament.
L-awtorita' kompetenti għandha dmir li tħares l-interess kemm tad-detenturi tal-polza kif ukoll tal-pubbliku. Għalhekk l-awtorita' kompetenti għandha wkoll is-setgħa li tissospendi jew tirrevoka awtorizzazzjoni maħruġa minnha. Iżda, meta tasal biex tieħu dan il-pass, l-awtorita' għandha wkoll id-dmir li tagħti avviż bil-miktub lill-kumpannija konċernata u r-raġunijiet għaliex kien beħsiebha tieħu dak il-pass.
Jekk naraw imbagħad id-dispożizzjonijiet tas-seba' taqsima li jikkonċernaw superviżjoni ta' kumpannija awtorizzati, insibu li dawn huma komplimentari għad-dispożizzjonijiet tat-taqsima sitta. Taħt din it-taqsima, l-awtorita' kompetenti għandha s-setgħa li tikseb mingħand kull kumpannija awtorizzata kull tagħrif li tenħtieġ, li teżamina l-affarijiet ta' kull kumpannija awtorizzata, li tidħol f'post ta' persuna li jkun ingħatalha avviż li l-affarijiet tagħha jkunu qed jiġu mistħarrġa u biex tikseb minn dak il-post tagħrif u anke dokumenti. Biex żgur ma jkunx hemm abbuż f'dawn is-setgħat, l-abbozz jimponi fuq l-awtorita' kompetenti ċerti restrizzjonijiet.
Madam Speaker, il-kumpanniji awtorizzati għandhom l-obbligu li darba kull sena, u jekk ikun meħtieġ mill-awtorita' kompetenti wkoll f'xi żmien ieħor tas-sena, jibagħtu lill-awtorita' kompetenti dikjarazzjonijiet kummerċjali dwar il-kummerċ ta' l-assigurazzjoni mmexxi minnhom matul is-sena kalendarja li dwarha jkunu qegħdin jirrapportaw jew matul dak il-perjodu speċifikat fid-direttiva ta' l-awtorita' kompetenti.
F'taqsima tmienja li tikkonċerna trasferimenti ta' kummerċ ta' l-assigurazzjoni, hemm dispożizzjonijiet sabiex il-kummerċ ta' l-assigurazzjoni jkun jista' jiġi ttrasferit sħiħ jew parti minnu minn kumpannija għall-oħra. Kif diġa' spjegajt, il-kummerċ ta' l-assigurazzjoni hu kklassifikat f'kummerċ fit-tul li jkopri poloz ta' assigurazzjoni fuq il-ħajja, u kummerċ ġenerali li jkopri poloz ta' assigurazzjoni mhux fuq il-ħajja. L-abbozz jipprovdi illi, dwar kummerċ ġenerali, kull talba għal trasferiment issir lill-awtorita' kompetenti u din tiddeċiedi jekk taċċettax jew le dik it-talba.
Sabiex l-awtorita' kompetenti tikkonsidra talba għal trasferiment ta' poloz ta' kummerċ ġenerali, l-abbozz jiddetermina dak kollu li hu meħtieġ li jsir minn applikant li jagħmel it-talba. Fost dawn il-ħteġijiet hemm l-obbligu li kull detentur ta' polza indikat fl-iskema tat-trasferiment, jiġi nnotifikat bil-miktub mill-applikant bit-talba għal trasferiment u t-talba nnifisha jingħatalha pubbliċita' fl-istampa. Kull detentur ta' polza konċernat jista', jekk ikun irid, jagħmel rappreżentazzjonijiet bil-miktub lill-awtorita' kompetenti dwar dik it-talba. Meta l-awtorita' kompetenti ma tilqax talba għal trasferiment, l-awtorita' għandha l-obbligu li tgħarraf bil-miktub liż-żewġ partijiet interessati fit-talba bir-raġunijiet tar-rifjut tagħha.
Dwar trasferiment ta' kummerċ fit-tul, it-talba għal trasferiment trid issir lit-tribunal għal servizzi finanzjarji. Tajjeb li nispjega hawnhekk li skond l-artiklu 10 ta' l-Att ta' l-1994 dwar il-Kummerċ Bankarju jrid jitwaqqaf tribunal li jkun magħruf bħala "it-tribunal għal servizzi finanzjarji" li għandu l-funzjonijiet mogħtija lilu bl-Att dwar il-Kummerċ Bankarju jew b'xi liġi oħra. Dispożizzjonijiet speċifiċi sabiex isir użu minn dan it-tribunal insibuhom f'żewġ liġijiet dwar is-servizzi finanzjarji. Kemm l-Att ta' l-1994 dwar Servizzi ta' Investiment, kif ukoll l-Att ta' l-1994 dwar Istituzzjonijiet Finanzjarji għamlu dispożizzjonijiet dwar funzjoni u poter esklussiv lil dan it-tribunal biex jittratta appelli magħmula quddiemu skond id-dispożizzjonijiet ta' kull waħda minn dawn iż-żewġ liġijiet. Dwar appelli magħmula taħt dan l-abbozz quddiem dak it-tribunal u dwar il-funzjonijiet u l-poteri ġodda mogħtija lit-tribunal taħt dan l-abbozz, nispjega aktar 'il quddiem.
Għalissa ngħid biss illi t-tribunal għal servizzi finanzjarji għandu kompetenza esklussiva mogħtija lilu taħt dan l-abbozz biex jittratta u jiddeċiedi talbiet għal trasferiment ta' poloz ta' kummerċ fit-tul minn kumpannija għall-oħra. Il-konsiderazzjoni u l-approvazzjoni tat-tribunal għal kull talba ta' trasferiment ta' kummerċ fit-tul għandhom ikunu skond id-dispożizzjonijiet ta' l-abbozz innifsu. Il-proċedura tat-trasferiment hija waħda dettaljata u ssir skond il-klawsola 35 ta' dan l-abbozz.
Għalissa ngħid biss illi kull applikazzjoni ta' trasferiment ta' kummerċ fit-tul jenħtieġ li jkollha magħha rapport fuq il-kondizzjonijiet ta' l-iskema magħmul minn attwarju indipendenti, li ssir pubbliċita' lit-talba, li jkun hemm sommarju tar-rapport ta' l-attwarju miftuħ għad-detenturi ta' polza milquta minn trasferiment li juri l-fehma ta' l-attwarju dwar x'aktarx ikunu l-effett ta' l-iskema fuq id-detenturi ta' polza, li d-detenturi ta' polza jkunu notifikati bil-miktub dwar it-talba u li d-detenturi jistgħu jekk iridu, jagħmlu r-rappreżentazzjonijiet tagħhom lit-tribunal. L-awtorita' kompetenti għandha d-dritt li tirċievi kopja tad-dokumentazzjoni kollha dwar kull talba ta' trasferiment u l-obbligu li tagħti l-fehma tagħha dwar it-talba lit-tribunal. Irrid nissottolinja l-fatt, Madam Speaker, li d-dispożizzjonijiet tat-taqsima tmienja ma japplikawx għall-kummerċ ta' riassigurazzjoni jew għal dik li tissejjaħ assigurazzjoni affiljata.
Niġu issa għal taqsima disgħa li titkellem dwar akkwist u disponiment ta' azzjonijiet, irtirar, xoljiment u stralċ. Din it-taqsima tagħmel dispożizzjonijiet dwar parteċipazzjoni f'kumpannija awtorizzata, liema dispożizzjonijiet fil-ħsieb u fil-kontenut, huma l-istess bħad-dispożizzjonijiet dwar parteċipazzjoni f'kumpanniji awtorizzati li huma regolati minn liġijiet oħrajn dwar servizzi finanzjarji. L-abbozz jagħmel restrizzjonijiet biex persuna takkwista holding ta' azzjonijiet f'kumpannija awtorizzata, b'mod partikolari, meta dak il-holding ikun hekk imsejjaħ holding kwalifikattiv. Fil-fatt l-abbozz jagħti d-definizzjoni tat-terminu "holding kwalifikattiv". Dwar kumpanniji li ma jibqgħux imexxu kummerċ ta' l-assigurazzjoni, l-abbozz jagħmel dispożizzjonijiet biex dawn il-kumpanniji, jew huma stess jew xi aġent jew manager ta' l-assigurazzjoni f'isimhom, jagħmlu servicing jew run-off ta' dak il-kummerċ li ma jibqgħux imexxu.
Fl-aħħarnett din it-taqsima tittratta x-xoljiment u l-istralċ ta' kumpanniji awtorizzati. Meta l-kumpannija tkun waħda Maltija, il-kumpannija xxolji u konsegwenzjalment tistralċja taħt u skond l-Att ta' l-1995 dwar il-Kumpanniji. Meta mbagħad min-naħa l-oħra l-kumpannija tkun waħda barranija, il-kumpannija xxolji u tistralċja skond il-liġijiet tal-pajjiż fejn ikun sitwat l-uffiċċju prinċipali tagħha li jirregolaw ix-xoljiment u l-istralċ ta' dawk il-kumpanniji. Meta kumpannija li tmexxi l-kummerċ ta' l-assigurazzjoni tkun se xxolji u tistralċja, l-abbozz jagħmel restrizzjonijiet biex iħares l-interessi tad-detenturi ta' polza.
Taqsima għaxra, li tikkonċerna t-tmexxija tal-kummerċ ta' l-assigurazzjoni, tagħmel dispożizzjonijiet biex kull min għandu awtorizzazzjoni biex imexxi l-kummerċ ta' l-assigurazzjoni jew permess biex jagħmel servicing jew run-off ta' dak il-kummerċ, jgħarraf lill-awtorita' kompetenti b'kull tibdil materjali fid-dokumentazzjoni provduta, jew meħtieġa li tiġi provduta, minnu taħt l-abbozz. Fil-fatt dan it-tagħrif jinkludi wkoll kull żieda jew tibdil fil-memorandum jew fl-istatut ta' l-assoċjazzjoni ta' kumpannija. Taqsima għaxra tipprovdi wkoll illi kumpannija li tmexxi kummerċ fit-tul ma tistax tidħol f'kuntratt ta' assigurazzjoni li l-effett tiegħu jikkostitwixxi tmexxija ta' kummerċ fit-tul, ħlief ta' kuntratt li jissejjaħ linked long term, kemm-il darba dik il-kumpannija ma tagħtix lill-parti l-oħra l-kuntratt, bil-mod kif jiġi preskritt, avviż statutorju dwar dak il-kuntratt bl-informazzjoni li tista' tiġi preskritta.
Din id-dispożizzjoni hija maħsuba sabiex l-informazzjoni li tingħata llum taħt ir-Regolamenti ta' l-1989 dwar l-Assigurazzjoni fuq il-Ħajja b'avviż statutorju dwar id-dritt li wieħed jista' jħassar kuntratt ta' assigurazzjoni fi żmien 15-il jum minn meta jiġi fis-seħħ il-kuntratt, tibqa' tingħata wkoll taħt dan l-abbozz. Taħt din it-taqsima hemm ukoll dispożizzjoni li tagħti poter lill-ministru li jagħmel regolamenti dwar poloz ta' assigurazzjoni linked long term. Dawn ix-xorta ta' poloz li dwarhom jistgħu jsiru regolamenti, huma kuntratti ta' assigurazzjoni li l-effett tagħhom jikkostitwixxi t-tmexxija ta' kummerċ fit-tul u li jsiru minn kumpannija Maltija awtorizzata taħt l-abbozz biex tmexxi kummerċ fit-tul; u li huma wkoll kuntratti li taħthom il-benefiċċji li jitħallsu lil detentur ta' polza huma għal kollox jew f'parti b'riferenza għall-valur ta', jew id-dħul minn, proprjeta' ta' xi deskrizzjoni, jew b'riferenza għal tibdil li, jew f'indiċi ta', il-valur ta' proprjeta' ta' kull deskrizzjoni.
Ta' min jgħid li minħabba li, bażikament, poloz linked long term jikkostitwixxu investiment, il-bejgħ ta' dawn il-poloz jeħtieġ li jsir taħt l-Att ta' l-1994 dwar Servizzi ta' Investiment u mhux taħt dan l-abbozz. Naturalment biex persuna tkun tista' tbigħ dawn ix-xorta ta' poloz, din jenħtiġilha tikseb liċenzja taħt l-Att ta' l-1994 dwar Servizzi ta' Investiment. Biex dan il-bejgħ ikun jista' jsir taħt dak l-Att, meta dan l-abbozz jidħol fis-seħħ, bis-saħħa ta' avviż legali se ssir emenda fit-tieni skeda li tinsab ma' l-Att ta' l-1994 dwar Servizzi ta' Investiment biex poloz ta' assigurazzjoni linked long term jidħlu fl-iskeda ta' strumenti kif imfissra taħt dak l-Att.
Dispożizzjoni ta' importanza taħt din it-taqsima hija dik provduta fi klawsola 46 ta' l-abbozz. Din il-klawsola tipprovdi illi ebda kuntratt ta' assigurazzjoni ma jkun jista' jiġi meqjus null jew ma jista' jiġi annullat minn assiguratur minħabba biss il-fatt li, fiż-żmien li jkun sar il-kuntratt, kien hemm ksur ta' xi waħda mid-dispożizzjonijiet ta' dan l-abbozz jew ta' l-Abbozz dwar Brokers fl-Assigurazzjoni u Intermedjarji Oħra. Din id-dispożizzjoni fil-fatt hija maħsuba fl-interess tal-konsumatur.
Madam Speaker, l-abbozz jipprovdi wkoll biex, b'direttiva dwar l-assigurazzjoni, l-awtorita' kompetenti tistabilixxi l-lingwa li fiha ċerti kuntratti dwar riskju sitwat f'Malta għandhom ikunu b'hekk espressi. B'din id-dispożizzjoni detentur ta' polza jkun jista' jifhem aħjar il-kondizzjonijiet jew il-limitazzjonijiet tal-kuntratt u, fl-istess ħin, titrawwem kultura li l-assigurazzjoni m'hijiex xi prodott importat biss iżda hi wkoll prodott Malti. 'Il quddiem l-awtorita' kompetenti trid tara liema kuntratti li jkopru dak ix-xorta ta' riskju jistgħu jinkitbu bil-Malti. Din id-dispożizzjoni ma tapplikax għall-kummerċ ta' riassigurazzjoni jew għall-assigurazzjoni affiljata.
Din it-taqsima tittratta wkoll ir-reklamar dwar l-assigurazzjoni. L-awtorita' kompetenti trid tara li r-reklamar li għandu x'jaqsam ma' kummerċ ta' l-assigurazzjoni ma jsirx b'mod li jqarraq, jew li jista' jqarraq, jew li jinganna, jew li jista' jinganna, lil xi detentur ta' polza jew anke lill-pubbliku in ġenerali. Għal dan il-għan l-awtorita' kompetenti, b'direttiva dwar l-assigurazzjoni, tagħti dawk il-linji-gwida meħtieġa biex kull reklamar dwar l-assigurazzjoni jkun reklamar li jirrifletti bl-ebda ambigwita' s-saħħa finanzjarja tal-kumpannija li tagħmel ir-reklam u l-benefiċċji dwar il-prodott reklamat mill-kumpannija.
Taqsima ħdax titkellem dwar fond għal protezzjoni u kumpens u tagħmel dispożizzjoni biex twaqqaf fond li fl-abbozz ikun jissejjaħ fond għall-protezzjoni u kumpens. L-għanijiet ta' dan il-fond huma l-istess bħall-għanijiet tal-fond ta' assigurazzjoni mwaqqaf taħt l-Att ta' l-1981 dwar l-Impriża ta' l-Assigurazzjoni. Fil-fatt l-għanijiet huma l-ewwel, għall-ħlas ta' kull talbiet dwar riskji sitwati f'Malta kontra kumpannija awtorizzata li tmexxi l-kummerċ ta' l-assigurazzjoni f'Malta li jibqgħu ma jitħallsux minħabba insolvibbilta' ta' dik il-kumpannija, u t-tieni, sabiex mill-fond jitħallas kumpens lill-vittmi ta' inċidenti tat-traffiku fit-toroq. Sabiex ikun hemm tkomplija, l-għanijiet tal-fond huma l-istess bħal dawk tal-fond kif nafuh illum iżda b'xi limitazzjonijiet f'dak li hu finanzjament tal-fond minn kumpanniji ta' l-assigurazzjoni.
Madam Speaker, dawn il-limitazzjonijiet huma maħsuba biex ikun żgurat li jekk xi kumpannija ta' l-assigurazzjoni tisfa' insolvibbli, il-ħlasijiet magħmulha mill-kumpanniji l-oħra ma joħolqux diffikultajiet finanzjarji lil dawk il-kumpanniji. Minħabba li l-fond huwa fond b'għanijiet soċjali, il-Gvern qiegħed jagħti sehmu billi qiegħed jeżenta l-fond mill-ħlas tat-taxxa fuq l-income. Fil-fatt, taqsima 12 ma tapplikax għall-kummerċ ta' riassigurazzjoni u assigurazzjoni affiljata.
Taqsima 12 titkellem dwar dispożizzjonijiet ġenerali u għaldaqstant tagħmel dispożizzjonijiet ta' natura ġenerali. Xi wħud minn dawn id-dispożizzjonijiet huma dispożizzjonijiet li nsibuhom f'liġijiet oħra dwar servizzi finanzjarji. B'mod ġenerali, dawn huma dispożizzjonijiet dwar koperazzjoni fi dmirijiet ta' sorveljanza u skambju ta' informazzjoni bejn l-awtorita' kompetenti u l-awtoritajiet regolatorji ta' pajjiżi barranin, dwar komunikazzjoni mill-awdituri ma' l-awtorita' kompetenti, dwar komunikazzjoni ta' informazzjoni konfidenzjali u dwar notifika ta' avviż u esklużjoni ta' responsabbilta' fir-rigward ta' l-awtorita' kompetenti u l-membri, l-uffiċjali u anke l-impjegati tagħha.
Taħt din it-taqsima, Madam Speaker, hemm ukoll dispożizzjonijiet biex il-ministru jkollu s-setgħa li jagħmel regolamenti dwar ħwejjeġ differenti kif speċifikat fl-abbozz. Il-ministru għandu wkoll is-setgħa li jagħmel regolamenti dwar kif jiġu stabbiliti l-valur ta' l-attiv u l-ammont ta' l-obbligazzjonijiet fejn huwa meħtieġ b'xi dispożizzjoni ta' l-abbozz li l-valur jew l-ammont jiġu stabbiliti skond regolamenti ta' valutazzjoni.
Dispożizzjoni oħra ta' importanza taħt din it-taqsima hija dwar tkomplija ta' kumpanniji li jmexxu kummerċ ta' assigurazzjoni affiljata. Din id-dispożizzjoni tagħti s-setgħa lill-ministru li jagħmel diversi regolamenti taħt l-abbozz. Fost dawn insibu l-ewwelnett li korp ġuridiku, reġistrat, inkorporat jew kostitwit f'pajjiż barra minn Malta, li jkun jixbaħ fl-għamla tiegħu lil kumpannija privata kif magħrufa taħt il-liġijiet ta' Malta u li, kieku kien kumpannija bħal dik, kien jikkwalifika li jiġi awtorizzat taħt l-abbozz bħala kumpannija li tmexxi kummerċ ristrett għal assigurazzjoni affiljat, jista' jitkompla bħala kumpannija li tmexxi kummerċ ristrett għall-assigurazzjoni affijata taħt l-Att ta' l-1995 dwar il-Kumpanniji u taħt l-abbozz.
Provvediment ieħor huwa biex kumpannija li tmexxi kummerċ ristrett għal assigurazzjoni affijata taħt l-abbozz tista' titkompla bħala korp ġuridiku reġistrat, inkorporat jew kostitwit taħt il-liġijiet ta' pajjiż barra minn Malta, f'kull każ billi timxi skond ir-regolamenti, u l-Att ta' l-1995 dwar il-Kumpanniji għandu, dwar dawk il-korpi ġuridiċi jew kumpanniji li jmexxu kummerċ ta' assigurazzjoni affiljata jkollu jseħħ skond hekk.
Madam Speaker, din id-dispożizzjoni dwar tkomplija ta' kumpanniji li jmexxu kummerċ ta' assigurazzjoni affiljata m'hijiex xi konċett ġdid fil-liġijiet tagħna dwar servizzi finanzjarji. Fil-fatt, ta' min jgħid li din id-dispożizzjoni hija l-istess dispożizzjoni ta' l-artiklu 39 ta' l-Att ta' l-1988 dwar Attivitajiet Kummerċjali Internazzjonali ta' Malta. Minħabba li l-kummerċ ta' l-assigurazzjoni offshore issa mhux se jibqa' regolat taħt dak l-Att iżda se jiġi regolat taħt dan l-abbozz, qegħdin nittrasferixxu biss id-dispożizzjonijiet eżistenti dwar din it-tkomplija minn taħt dak l-Att għal taħt dan l-abbozz.
Taħt din it-raqsima nixtieq nerġa' lura għat-tribunal għal servizzi finanzjarji. Kif diġa' spjegajt aktar qabel f'dawn il-kummenti, dan it-tribunal għandu kompetenza esklussiva li jittratta u jiddeċiedi talbiet għal trasferiment ta' poloz ta' kummerċ fit-tul minn kumpannija għall-oħra. Dan it-tribunal għandu wkoll l-istess kompetenza esklussiva dwar kull appell li jsir taħt dan l-abbozz. Minħabba l-fatt li dan it-tribunal twaqqaf taħt l-Att ta' l-1994 dwar Kummerċ Bankarju, skond l-artiklu 10 ta' dak l-Att, it-tribunal jiġi ikkostitwit minn chairman u żewġ membri oħra maħtura mill-ministru responsabbli għall-finanzi. Iċ-chairman għandu jkun avukat b'minimum ta' 12-il sena ta' prattika legali u l-membri l-oħra għandhom ikunu persuni li fl-opinjoni tal-ministru jkollhom it-tagħrif u l-esperjenza meħtieġa fil-kummerċ bankarju jew fis-servizzi finanzjarji.
Hawnhekk irrid nispjega li t-tribunal, għall-finijiet ta' proċeduri li joħorġu taħt dan l-abbozz, ifisser it-tribunal imwaqqaf skond l-artiklu 10 ta' l-Att ta' l-1994 dwar il-Kummerċ Bankarju iżda l-persuni maħtura bħala membri għandhom ikunu persuni li fil-fehma tal-ministru jkollhom it-tagħrif u l-esperjenza meħtieġa fil-kummerċ ta' l-assigurazzjoni. Dan it-tibdil dwar il-membri tat-tribunal qed isir biex meta t-tribunal għal servizzi finanzjarji jkollu quddiemu affarijiet dwar proċeduri li joħorġu taħt dan l-abbozz ikun, u jidher li jkun, tassew kompetenti fi ħwejjeġ dwar l-assigurazzjoni.
Dispożizzjoni oħra importanti taħt din it-taqsima hija dwar l-appelli. Kull persuna li tħossha aggravata b'deċiżjoni ta' l-awtorita' kompetenti li tirrifjuta li toħroġ awtorizzazzjoni, li timponi xi kondizzjonijiet f'xi awtorizzazzjoni, li tirrevoka xi awtorizzazzjoni, li tirrifjuta xi applikazzjoni għal trasferiment ta' kummerċ ġenerali, li toħroġ għal xi avviż jew tagħmel xi ordni taħt klawsoli speċifikati fl-abbozz u li timponi xi penali amministrattivi, tista' tappella kontra d-deċiżjoni lit-tribunal li jkollu kompetenza esklussiva biex jisma' appelli ta' din ix-xorta. Madam Speaker, din it-taqsima tiġbor fiha wkoll ir-reati u pieni u anke l-proċedimenti għal reat kontra l-abbozz.
L-aħħar dispożizzjoni taħt din it-taqsima hija dwar it-tħassir ta' l-Att ta' l-1981 dwar l-Impriża ta' l-Assigurazzjoni u r-riżervi dwar dan it-tħassir. Fil-fatt, ta' min jgħid li kull persuna li għandha liċenza taħt dan l-Att biex tmexxi l-kummerċ ta' l-assigurazzjoni bħala prinċipal jew aġent qiegħed jingħatalha sitt xhur żmien minn meta l-Abbozz dwar il-Kummerċ ta' l-Assigurazzjoni jidħol fis-seħħ biex tikkonforma ruħha miegħu u b'hekk dik il-persuna tkun tista' tkompli tmexxi l-kummerċ ta' l-assigurazzjoni bħala prinċipal jew aġent taħt l-Abbozz dwar il-Kummerċ ta' l-Assigurazzjoni. Jekk persuna ma tikkonformax ruħha ma' l-abbozz meta dan isir liġi fiż-żmien stipulat fl-istess abbozz, allura dik il-persuna titlef il-liċenza li kellha taħt l-Att ta' l-1981 dwar l-Impriża ta' l-Assigurazzjoni u titqies li waqfet tmexxi l-kummerċ ta' l-assigurazzjoni taħt l-abbozz u, għalhekk, is-servicing jew ir-run-off ta' dak il-kummerċ li dik il-persuna kienet tmexxi sa dakinhar li waqfet, jitmexxa taħt id-dispożizzjonijiet ta' dan l-abbozz.
Ngħaddi issa fi ftit ħin li baqa' biex nispjega l-ħames skedi li jinsabu ma' l-abbozz, Madam Speaker. L-ewwel skeda għandha dispożizzjonijiet dwar Lloyd's. Kull min xi ftit jew wisq huwa midħla tal-kummerċ ta' l-assigurazzjoni, kemm f'kontest internazzjonali kif ukoll lokali, jaf illi Lloyd's ta' Londra hi organizzazzjoni unika, u m'hijiex kumpannija ta' l-assigurazzjoni li, b'mod wiesa', tirregola lilha nnifisha. Lloyd's hija soċjeta' u korporazzjoni mwaqqfa mil-Lloyd's Act 1871, tar-Renju Unit, u hija regolata bi jew taħt il-Lloyd's Act 1982 tar-Renju Unit. Il-korporazzjoni tal-Lloyd's ma tmexxi ebda kummerċ ta' l-assigurazzjoni. Il-funzjoni tagħha hi biss li tirregola l-kummerċ ta' l-assigurazzjoni li jmexxu l-membri tagħha. Il-membri tas-soċjeta' Lloyd's li jmexxu l-kummerċ ta' l-assigurazzjoni huma l-underwriting members, individwi jew korporati, li jiktbu kuntratti ta' assigurazzjoni. Il-brokers ta' Lloyd's jaġixxu ta' intermedjarji bejn l-underwriting members ta' Lloyd's u persuni li daħlu jew li jixtiequ li jidħlu f'kuntratti ta' assigurazzjoni ma' Lloyd's. Il-brokers ta' Lloyd's huma soċjeta' jew korp ġuridiku mħolli mill-kunsill ta' Lloyd's biex imexxu l-kummerċ ta' broking fl-assigurazzjoni ma' Lloyd's.
Taħt dan l-abbozz awtorizzazzjoni mogħtija lil Lloyd's biex tmexxi f'Malta l-kummerċ ta' l-assigurazzjoni titqies li hi awtorizzazzjoni mogħtija lil kull underwriting member tagħha li jmexxi dak il-kummerċ jew permezz ta' brokers fl-assigurazzjoni awtorizzati taħt l-Abbozz dwar Brokers fl-Assigurazzjoni u Intermedjarji Oħra jew permess ta' aġenti ta' assigurazzjoni awtorizzati taħt dan l-abbozz li jaġixxu għal underwriting members, individwali jew korporati, jew għal sindakati ta' underwriting members ta' Lloyd's. Minħabba li l-organizzazzjoni u l-istrutturi ta' Lloyd's huma dawk li huma, u jridu jiġu aċċettati kif inhuma, xi dispożizzjonijiet ta' l-abbozz ma jistgħux japplikaw għal Lloyd's kif inhuma magħmula. Jistgħu biss japplikaw għal Lloyd's jew għall-underwriting members ta' Lloyd's jekk jiġu modifikati jew sostitwiti. Ta' min jgħid li hemm dispożizzjonijiet oħrajn li ma jistgħux japplikaw.
Għalhekk l-iskop ta' l-Ewwel Skeda hu biex jiġu ddeterminati d-dispożizzjonijiet ta' l-abbozz li japplikaw għal Lloyd's jew għall-underwriting members ta' Lloyd's kif magħmula, modifikati jew sostitwiti jew li ma japplikawx għal Lloyd's jew għall-underwriting members ta' Lloyd's. Mill-bqija l-Att għandu, bla ħsara għad-dispożizzjonijiet ta' l-ewwel skeda, japplika għal Lloyd's jew għall-underwriting members ta' Lloyd's bl-istess mod u sa l-istess limitu li japplika għal kumpannija awtorizzata.
It-tieni skeda tispeċifika l-klassijiet ta' kummerċ fit-tul, li huma disgħa, u tagħti deskrizzjoni ta' kull klassi. It-tielet skeda tispeċifika l-klassijiet ta' kummerċ ġenerali, u għandha żewġ taqsimiet. L-ewwel taqsima ta' l-iskeda tispeċifika t-18-il-klassi ta' kummerċ ġenerali u tagħti deskrizzjoni ta' kull klassi. It-tieni taqsima tiġbor fiha t-18-il klassi fi tmien gruppi ta' klassijiet u tagħti deskrizzjoni ta' dawn il-gruppi u l-kompożizzjoni tal-klassijiet konċernati.
MADAM SPEAKER: Ippermettili Onor. Brincat. Sar il-ħin. Tibqa' in possession?
ONOR. LEO BRINCAT: Iva, nibqa' in possession.
Fid-9.00 p.m. id-diskussjoni ġiet interrotta u baqgħet aġġornata.
Billi aktar kmieni fil-Kumitat kienet intalbet votazzjoni fuq klawsola 4 ta' l-Abbozz ta' Liġi li jemenda l-Att dwar Dazju tas-Sisa (Emenda Nru 3), il-Kamra marret f'Kumitat.