Debates tal-kamra tad-deputati

ONOR. MICHAEL FARRUGIA: Nirreferi l-Onorevoli nterpellant għat-tweġiba mogħtija għall-mistoqsija Numru 525.

FGURA - TRIQ ĦAŻ-ŻABBAR - TISWIJA

561. L-ONOR. CHRIS AGIUS staqsa lill-Ministru għax-Xogħlijiet Pubbliċi u Kostruzzjoni: Peress li Triq Haż-Żabbar, fil-Fgura hija fi stat verament tal-biki, jista' l-Ministru jgħidilna xi ħsieb hemm sabiex din it-triq prinċipali fil-Fgura tiġi rranġata għal stat diċenti?
ONOR. CHARLES BUHAGIAR: Ir-responsabilta' biex titranġa Żabbar Road, il-Fgura hija primarjament tal-Kunsill Lokali. Il-Gvern, permezz tad-Dipartiment tat-Toroq daħal biex jgħin sabiex din it-triq titranġa.
Hija x-xewqa tal-Kunsill Lokali li qabel ma' jingħata wiċċ ġdid, jinqalgħu s-siġar u jitqiegħdu servizzi ġodda fil-bankini mill-Korporazzjoni ta' l-Ilma. Diġa nbeda "pilot work" u nqalgħu ftit siġar u deher ċar li l-friegħi tad-dranaġġ u ta' l-ilma jistgħu jinqalgħu ma' l-għeruq.
F'laqgħa li saret xi jiem ilu bejn il-Kunsill tal-Fgura, id-Dipartiment tat-Toroq u d-Dipartimenti l-oħra tal-Gvern konċernati f'dan ix-xogħol sar pjan kif se jsir ix-xogħol li ma jinkludiex biss Żabbar Road, imma anke t-toroq l-oħrajn li għandhom bżonn "resurfacing" minħabba tpoġġija ta' mains ta' l-Ilma. Ix-xogħol ser jinkludi fost oħrajn it-tpoġġija ta' "dual mains" tad-drenaġġ u l-ilma f'Żabbar Road, l-estenzjoni tal-main tad-drenaġġ fi triq il-Ġiżi kif ukoll il-kostruzzjoni ta "storm water culvert" ġdid f'Żabbar Road. Se jitpoġġew ukoll pajpijiet ġodda tat-Telemalta għal-cables tagħha u jsiru bankini ġodda f'Żabbar Road b'tali mod li jipprovdu aktar spazju għal parking. Se jinżergħu wkoll pjanti fuq il-bankini li huma addattati għal dan il-post. Ix-xogħol fuq dan il-proġett diġa beda.

BORMLA/KALKARA - AKKOMODAZZJONI SOĊJALI

562. L-ONOR. CHRIS AGIUS staqsa lill-Ministru tad-Djar: Jista' l-Ministru jgħidilna jekk il-postijiet għall-akkomodazzjoni soċjali li tlestew f'St. Liena, Bormla u fil-Kalkara ġewx allokati kollha?
ONOR. FREDDIE PORTELLI: L-appartamenti f'St.Liena, Bormla li ħarġu għall-allokazzjoni taħt Avviż 56 ġew allokati waqt li dawk tal-Kalkara li ħarġu taħt l-Avviż Numru 57 (għall-Bejgħ) u taħt Avviż Numru 58 (għall-Kiri) qegħdin fil-proċess ta' allokazzjoni.

SAĦĦA - TOBBA BARRANIN

563. L-ONOR. FRANCIS AGIUS staqsa lill-Ministru tas-Saħħa, Kura ta' l-Anzjani u Affarijiet tal-Familja: Jista' l-Ministru jagħti n-numru ta' tobba barranin li huma mpjegati mas-Servizz pprovdut mill-Gvern? Jista' jekk jogħġbu jagħti "breakdown" skond l-isptar jew units oħra fejn qegħdin?
ONOR. MICHAEL FARRUGIA: In-numru ta' tobba barranin li qed jagħtu servizz ipprovdut mill-Gvern huwa kif jidher hawn taħt:

Sptar San Luqa
Anestesija	21
Ostetricja u Ġinekoloġija	1
Oftalmija	1
Ortopedija	6
Patoloġija	1
Radjoloġija	4
Kirurġija	6
Neuro-Mirurġija	1

Residenza San Vinċenz 1

Sptar Ġenerali Għawdex
Anestesija	2
Mediċina	1
Ostetricja u Ġinekoloġija	1
Kirurġija	2
Patoloġija	1
Radjoloġija	1
	50

SAĦĦA - UŻU TA' L-ISKOLA TAL-PIETA'

564. L-ONOR. FRANCIS AGIUS staqsa lill-Ministru tas-Saħħa, Kura ta' l-Anzjani u Affarijiet tal-Familja: Jista' l-Ministru jagħti informazzjoni rigward x'użu se jsir mill-iskola tal-Pieta' viċin l-iSptar San Luqa min-naħa tad-Dipartiment tas-Saħħa?
ONOR. MICHAEL FARRUGIA: L-iskola tal-Pieta' taqa taħt id-Dipartiment tal-Edukazzjoni.


TURIŻMU - RAPPORT DWAR L-INDUSTRIJA TAT-TURIŻMU

577. L-ONOR. MICHAEL REFALO staqsa lill-Ministru tat-Turiżmu: B'riferenza għat-tweġiba għall-mistoqsija parlamentari numru 271 u għat-tqegħid fuq il-Mejda tal-Kamra ta' l-Executive Summary tar-rapport kummissjonat lil De Loitte & Touche, jista' l-Ministru jgħid:- (a) jekk jaqbilx mal-premessi u l-kondizzjonijiet kollha li jwasslu għall-konklużjonijiet li ħarġu bihom il-konsulenti; (b) jekk jaqbilx mar-rakkommandazzjonijiet kollha li ġew sottomessi? F'każ negattiv, jista' l-Ministru jgħid fejn ma jaqbilx u r-raġunijiet għaliex?

ONOR. KARMENU VELLA: L-Onor. Interpellant jifhem illi r-rapport imsemmi jikkomprendi premessi u konsiderazzjonijiet li waslu għal konklużjonijiet u rakkomandazzjonijiet li ħarġu bihom il-konsulenti.

Naħseb li l-Onor. Interpellant japprezza l-fatt li kull min jaqra r-rapport jista' jaqbel jew ma jaqbilx mal-kontenut jew partijiet mill-kontenut tiegħu.

AIR MALTA - LINJA TA' L-AJRU AZZURRA AIR

578. L-ONOR. MICHAEL REFALO staqsa lill-Ministru tat-Turiżmu: Jista' l-Ministru jgħid għaliex il-linja ta' l-ajru Azzurra Air li fiha l-Air Malta għandha investiment sostanzjali li dwaru jeżisti kunsens unanimu fil-pajjiż ma bdietx topera kif ippjanat f'Novembru li għadda? X'inhi l-qagħda llum u x'inhi l-agenda operativa futura ta' l-Azzurra Air fil-ġejjieni qarib? X'tip ta' ajruplan tħaddem l-Azzurra Air fuq ir-rotot li sservi?

ONOR. KARMENU VELLA: Meta nbidel il-Gvern fis-26 ta' Ottubru 1996 il-proġett AZZURRAair kien ilu li ġie approvat kemm mill-Board tad-Diretturi ta' l-Air Malta kif ukoll mill-Gvern ta' qabel. Kif jaf tajjeb l-Onor. Interpellant ma kien hemm l-ebda "kunsens unanimu fil-pajjiż.". Il-proġett kien diġa' iffinalizzat. Skond il-pjanijiet li kienet qegħda segwi l-Air Malta, l-AZZURRAair suppost bdiet topera minn April ta' l-1966. Għal diversi raġunijiet din id-data ġiet posposta għal diversi drabi. L-aħħar 'target date' kienet dik ta' l-10 ta' Diċembru 1996. L-ebda data fix-xahar ta' Novembru ma kienet imsemmija. L-Ajruplani ta' l-AZZURRAair huma l-istess ajruplani (tip RJ85) li nxtraw xhur qabel ma ġie finalizzat il-ftehim ma AZZURRAair u li x-xiri tagħhom ġie approvat kemm mill-Bord tad-Diretturi ta' l-Air Malta (inizjalment fit-ta' April 1996) kif ukoll mill-Gvern ta' dak iż-żmien. Il-kuntratt tax-xiri ta' dawn l-ajruplani ġie approvat mill-Bord tad-Diretturi ta' l-Air Malta fis-7 ta' Mejju 1996.

Ir-rotot li qegħda topera huma bejn Bergamo u Ruma, Bergamo u London City Airport, u Bergamo u Charles De Gaulle Airport, Parigi.

TURIŻMU - SODOD LIĊENZJATI FIL-KATEGORIJA DE LUXE

579. L-ONOR. MICHAEL REFALO staqsa lill-Ministru tat-Turiżmu: Jista' l-Ministru jgħid kemm kien hemm sodod liċenzjati fil-kategorija De Luxe (li sussegwentement ġiet ekwiparata għall-Five Star) f'dawn iż-żmenijiet:- Ġunju 1971; Diċembru 1971; Ġunju 1987; Diċembru 1987; Diċembru 1992 u Novembru 1996? Meta, f'liema stabbilimenti u f'liema ammonti hu mbassar li se jkun hemm żieda ta' sodod f'din il-kategorija? Meta mqabbla mas-settur kollu ta' l-akkomodazzjoni, x'kienet u x'inhi l-perċentwali ta' sodod De Luxe/Five Star fix-xhur imsemmija aktar 'il fuq kif ukoll kemm hi mbassra tkun l-istess perċentwali sena b'sena matul il-ħames snin mill-1997 sa l-2001?
ONOR. KARMENU VELLA: Peress li l-klassifika tal-lukandi saret għall-ewwel darba fl-1973 ma tistax tingħata informazzjoni kif mitluba għas-sena 1971. Barra minn dan peress li l-għadd ta' sodod huwa aġġornat kull l-aħħar tas-sena, qed nagħti l-informazzjoni mitluba a bażi ta' Diċembru.

In-numru ta' sodod fil-lukandi De Luxe jew 5-Star kif kien u kif inhu proġettat sa llum huwa kif ġej:-

	Sodod 5-Star	Total Sodod	Persentagg
DICEMBRU 1986	1720	33190	5.2%
DICEMBRU 1987	1772	38349	4.5%
DICEMBRU 1992	1088	47814	2.3%
DICEMBRU 1996	1774	51152	3.5%
DICEMBRU 1997	3744	55732	6.7%
DICEMBRU 1998	4644	58844	7.9%

In-nuqqas ta' sodod fil-5-Star, u konsegwentement it-tnaqqis fil-persentaġġ għal Diċembru 1992, meta mqabbla ma Diċembru 1987, huwa riżultat tal-bidla fis-sistema ta' klassifikazzjoni (fosthom minn De Luxe għal 5-Star) li seħħet fl-1989 u wkoll għaliex il-Lukanda Phoenicia kienet għalqet temporanjament.

DJAR - PLOTS

683. L-ONOR. AUSTIN GATT staqsa lill-Ministru tad-Djar: Jista' l-Ministru jgħid kemm ingħataw "plots", djar u appartamenti bejn l-1 ta' Ġunju 1987 u l-31 ta' Ottubru, 1996 kategorizzati skond lokalita', s-sena li fiha ġew allokati u jekk ingħatawx mill-Awtorita' tad-Djar jew mid-Dipartiment għall-Akkomodazzjoni Soċjali?

ONOR. FREDDIE PORTELLI: L-Awtoriata' tad-Djar ħarġet dan li ġej:

Plots

Sena	Numru ta'Plots	Data tal-harga tal-Gazzetta tal-Gvern
1988	975	20-10-88
1989	600	23-10-89
1990	500	03-09-90
1991	299	30-05-91
1993	244	30-07-93

Djar u Appartamenti

1987	17	05-11-87
1988	58	26-02-88
		07-12-88
1989	494	27-01-89
		09-03-89
		17-04-89
		13-06-89
		15-09-89
		14-12-89
1990	86	02-08-90
		04-09-90
1991	731	13-02-91
		24-04-91
		23-08-91
		21-11-91
1993	51	29-04-93
1994	85	26-05-94
1995	255	22-02-95
		26-06-95
		28-09-95
1996	524	29-07-96
		06-09-96

Rigward il-lokalita' l-Onor. interpellant jista' jirreferi għall-Gazzetti tal-Gvern imsemmija fuq.

AWTORITA' TAD-DJAR - SKEMI

684. L-ONOR. AUSTIN GATT staqsa lill-Ministru tad-Djar: Jista' l-Ministru jpoġġi fuq il-Mejda tal-Kamra kopja ta' l-iskemi kollha maħruġa mill-Awtorita' tad-Djar u/jew id-Dipartiment ta' l-Akkomoazzjoni Soċjali u li għadhom fis-seħħ?

ONOR. FREDDIE PORTELLI:

Skema	Data tal-Pubblikazzjoni fil-Gazzetta tal-Gvern	Gazzetta tal-Gvern
I - Xiri ta' djar ta'abitazzjoni tal-Gvern mill-inkwilini	27-05-95	16128
J - Sussidju fuq kera ta' residenzi privati	01-09-95	16159
K - Fidi ta' ċnus fuq HOS plots ta' wara 1977	29-08-95	16157
L - Sussidju fuq xogħolijiet ta' rranġar fi djar privati minn inkwilini	27-02-96	16242
M - Sussidju fuq Xiri u fuq xogħolijiet ta' tranġar u titjib ta' djar privati	22-07-96	16307
N - Sussidju fuq xogħolijiet ta' rranġar u titjib f'residenzi privati mis-sidien	22-07-96	16307
P - Fidi ta' ċnus ta' HOS plots allokati mill-Lands Department	13-08-96	16316

AWTORITA' TAD-DJAR - KONSULENT DR STEFAN BUONTEMPO

685. L-ONOR. AUSTIN GATT staqsa lill-Ministru tad-Djar: Peress li fi Press Release Nru. 1800 maħruġa fil-5 ta' Novembru, 1996 il-Ministru jgħid li għandu bħala konsulent lill-Dr Stefan Buontempo, jista' l-Ministru jgħid meta ġie mqabbad Dr Buontempo? X'inhuma l-kondizzjonijiet tax-xogħol tiegħu u jekk ġie ffirmat kuntratt tista' kopja tiegħu titqiegħed fuq il-Mejda tal-Kamra? X'benefiċċji għandu Dr Buontempo?

ONOR. FREDDIE PORTELLI: Qed inqiegħed fuq il-mejda tal-Kamra kopja tal-kuntratt ta' Dr.Stefan Buontempo, liema kuntratt huwa mibni fuq wieħed "standard" għall-konsulenti.

DJAR - PRESS RELEASE 1800
686. L-ONOR. AUSTIN GATT staqsa lill-Ministru tad-Djar: B'riferenza għall-Press Release Numru 1800, jista' l-Ministru jgħid x'inhuma b'mod speċifiku l-affarijiet urġenti li ġew diskussi?
ONOR. FREDDIE PORTELLI: Ninforma l-Onor Membru li waqt il-laqgħa mad-Direttur ta' l-Uffiċju Konġunt ġiet diskussa partikolarment l-iskema li kienet qed titħaddem mid-Dipartiment. Ġiet trattata il-qagħda amministrattiva kif ukoll il-fatt li l-listi ta' korrezzjonijiet li kienu ġew preżentati lill-Ministru preċedenti kienu għadhom ma tpoġġewx fuq il-Mejda tal-Kamra u fil-fatt poġġejthom jiena fis-seduta numru 2 tat-Tnejn, 9 ta' Diċembru 1996, tal-Kamra tad-Deputati.


DIPARTIMENT GĦALL-AKKOMODAZZJONI SOĊJALI - PUNTI LILL-APPLIKANTI

687. L-ONOR. AUSTIN GATT staqsa lill-Ministru tad-Djar: Jista' l-Ministru jispjega l-kriterji li fuqhom jingħataw il-punti lill-applikanti mid-Dipartiment tal-Akkomodazzjoni Soċjali?
ONOR. FREDDIE PORTELLI: Applikanti jingħataw punti l-ewwel fuq id-daqs tal-familja, l-eta' tal-membri, jekk it-tfal ikunu ta' sess differenti u jekk il-familja tkun tgħix ma' familja oħra. Imbagħad jingħataw punti li jiddependu fuq id-daqs u l-kummditajiet tad-dar tal-applikant u l-kundizzjoni tagħha. Fl-aħħar jingħataw punti skond id-dħul tal-applikant, xi mard jew inkapaċita, kif ukoll għaż-żmien li jkun ilhu japplika.

PBS - RAPPORT

701. L-ONOR. EDWIN VASSALLO staqsa lill-Prim Ministru: Jista' l-Prim Ministru jgħid jekk min għamel ir-rapport dwar il-Public Broadcasting Services, jiġifieri l-Enemalta, il-Management Systems Unit, it-Telemalta, id-Drydocks u oħrajn tħallsux tax-xogħol li għamlu u jekk fl-affermattiv, kemm kien il-ħlas f'kull każ? Dawk li għamlu dawn ir-rapporti intalbu jagħmlu dikjarazzjoni ta' interess fis-sens li ma jaċċettawx karigi fl-azjendi li dwarhom irrapportaw?
ONOR. ALFRED SANT: Il-konsulenti li għamlu r-rapporti li qed jirreferi għalihom l-Onor. Membru tħallsu Lm700 kull wieħed.

Kull konsulent intrabat professjonalment li jirrispetta l-provvedimenti ta' l-Att dwar is-Sigrieti Uffiċjali u ta' l-Att dwar is-Segretezza Professjonali.

MOSTA - TRIQ ĠUŻEPPI HYZLER

702. L-ONOR. EDWIN VASSALLO staqsa lill-Ministru għax-Xogħlijiet Pubbliċi u Kostruzzjoni: Jista' l-Ministru jieħu passi biex fi Triq Ġużeppi Hyzler, fil-Mosta fejn la hemm main ta' l-ilma u lanqas triq tajba, isiru arranġamenti biex dawn il-familji li ilhom jinqdew bis-servizz tal-bowser għal ta' l-inqas ikollhom servizz ta' l-ilma temporanju kif ukoll li tiġi rranġata t-triq?

ONOR. CHARLES BUHAGIAR: It-Triq Ġużeppi Hyzler, Mosta hija magħmulha min blat tal-qawwi. Il-wiċċ tat-triq għad irid jiġi mbaxxi, tant li f'xi postijiet hemm pied u nofs x'jitbaxxa.
F'kundizzjonijiet bħal dawn il-Korporazzjoni għas-Servizzi ta' l-Ilma ma tistax tgħaddi kanen permanenti u wisq inqas temporanji. Il-kanen żgur isofru ħsarat permezz ta' traffiku tqil u x-xogħol ta' rranġar tat-triq.
Qiegħed isir programm ta' xogħol li għad irid isir biex każijiet bħal dawn ikunu solvuti kollha. Madankollu ir-responsabbilta' għal formazzjoni u l-irranġar tat-triq sakemm din tiġi asfaltata hija tas-sidien li bnew djar għal fuq din it-triq.
Id-Dipartiment tat-Toroq ma jistax jasfalta' din it-triq qabel is-servizzi kollha ikunu tqiegħdu b'mod permamenti.

MAGĦTAB - "DUMPING SITE"

703. L-ONOR. EDWIN VASSALLO staqsa lill-Ministru tal-Ġustizzja u Kunsilli Lokali: Ġaladarba "d-dumping site" tal-Magħtab fuq in-naħa tal-kosta waslet fi tmiem tagħha, jista' l-Ministru jgħid jekk il-Kunsill Lokali tan-Naxxar għandux jidħol fi proġett ta' "landscaping" tal-kosta biex ma jibqax jidher l-effett ta' din id-"dumping site"?
ONOR. CHARLES MANGION: Ma jidhirlix li għandi nkun jien li ngħid lill-Kunsilli Lokali x'għandhom jew x' ma għandhomx jagħmlu.

Skond id-disposizzjonijiet ta' Artikolu 33 (1) (f) ta' l-Att ta' l-1993 dwar Kunsilli Lokali hija l-funzjoni ta' kull Kunsill Lokali "li jagħmel rakkomandazzjonijiet lil kull awtorita' kompetenti għal jew dwar xi skema ta'ppjanar jew bini.....".

Għaldaqstant il-Kunsilli Lokali għandhom jiġu kkonsultati fuq l-ippjanar ta' xi proġett.


ENEMALTA - PROĠETT TA' "STREET LIGHTING"

704. L-ONOR. EDWIN VASSALLO staqsa lill-Ministru tal-Kummerċ: Jista' l-Ministru jgħid jekk il-Korporazzjoni Enemalta hijiex se tinvolvi lill-Kunsilli Lokali fil-proġett ta' "street lighting"? Jista' l-Ministru jgħid kif se jitwettaq dan il-proġett?
ONOR. LEO BRINCAT: Il-Korporazzjoni EneMalta għandha l-ħsieb tinvolvi l-Kunsilli Lokali fi proġetti ta` Street Lighting. Fil-fatt għandhom isiru taħdidiet bejn il-Korporazzjoni EneMalta u l-Uffiċċju responsabbli mill-Kunsilli Lokali dwar din il-ħidma.

SKEJJEL - DUN ĠUŻEPP BRIGHELLA

711. L-ONOR. GEORGE PULLICINO staqsa lill-Ministru ta' l-Edukazzjoni u Kultura Nazzjonali: Jista' l-Ministru jgħid meta l-istudenti tal-Junior Lyceum Dun Ġużepp Brighella fil-Ħamrun se jerġa' jkollhom għalliem tat-Technical Drawing minflok l-għalliem li kellhom sa l-elezzjoni t'Ottubru 1996, liema għalliem llum mar jaħdem fis-segreterija ta' wieħed mill-Ministri? Jista' l-Ministru jgħid jekk approvax it-trasferiment ta' dan l-għalliem minkejja li ma kellux sostitut immedjat?

ONOR. EVARIST BARTOLO: L-għalliem tat-Technical Drawing li kellha tibda taħdem fil-Junior Lyceum Dun Ġużepp Żammit Brighella il-Ħamrun mis-7 ta Jannar 1997 ma daħlitx għax-xogħol peress li din ma kinitx tiflaħ. Fil-preżent din l-għalliema qiegħda tgħallem f din l-iskola.
Rigward l-għalliem li l-Onorevoli Nterpellant x aktarx qiegħed jirreferi hu għas-Sur Victor Mamo li mar mal-Ministeru tax-Xogħolijiet Pubbliċi.

Rigward l-approvazzjoni uffiċċjali ta dan it-trasferiment ninforma lill-Onorevoli Nterpellant li s issa m hemmx approvazzjoni.