Debates tal-kamra tad-deputati

AĠĠORNAMENT

ONOR. GEORGE VELLA: Madam Speaker, nipproponi l-Aġġornament tal-Kamra għal nhar il-Ġimgħa, 25 ta' April, 1997 fid-9.00 a.m. b'din l-aġenda:
Ordnijiet tal-Ġurnata
Mozzjoni dwar self għat-tenur tas-subartikolu (1) ta' l-artikolu 2 ta' l-Att dwar Self għall-Iżvilupp - Kontinwazzjoni;
Abbozz ta' Liġi dwar Self Lokali u Self Ieħor - Kumitat (Kont.)
Abbozz ta’ Liġi li jemenda l-Att dwar id-Dazju tas-Sisa - Tieni Qari (Kont);
Abbozz ta' Liġi dwar Tribunal għall-Investigazzjoni ta' Inġustizzji - Kumitat (Kont);
Abbozz ta' Liġi li jemenda l-Att dwar l-Iżvilupp Industrijali - Tieni Qari;
Abbozz ta' Liġi dwar ir-Ratifika tal-Konvenzjoni dwar l-Armi Kimiċi - Tieni Qari;
Abbozz ta’ Liġi biex jemenda Diversi Liġijiet Finanzjarji - Tieni Qari;
Abbozz ta' Liġi li jemenda l-Att dwar il-Protezzjoni tal-Proprjeta' Industrijali - Tieni Qari;
Mozzjoni mressqa mill-Kap ta' l-Oppożizzjoni dwar il-Liġi tal-VAT - Kontinwazzjoni.
MADAM SPEAKER: Rimarki, jekk jogħġobkom? L-Onor. Claude Muscat.
ONOR. CLAUDE MUSCAT: Madam Speaker, f'dan l-intervent tiegħi ta' llejla nixtieq ngħid xi ħaġa fuq servizz li għadu m'huwiex żviluppat f'pajjiżna, anzi mhux talli m'huwiex żviluppat talli wisq nibża' li r-regolamenti li għandna ma jippermettux li dan is-servizz jiżviluppa kif suppost. Għalhekk jien naħseb li wasal iż-żmien li wieħed jistudja l-possibbilta' li dan is-servizz jieħu spinta 'l quddiem.

Madam Speaker, hawn qed nirriferi għall-bżonn li f'Malta jkollna iktar open-air cafeterias jew restaurants, speċjalment fl-inħawi turistiċi, għax preżentement dawn il-postijiet huma limitati ħafna u wieħed ma jsibx minnhom għajr fi Pjazza Reġina l-Belt u fil-bajja tax-Xlendi ġewwa GĦawdex. Hemm bżonn li f'pajjiżna jkollna iktar postijiet bħal dawn, speċjalment meta għandna t-temp jippermetti, għax postijiet bħal dawn huma apprezzati ħafna kemm mil-Maltin u wisq iktar mit-turisti. Dan li qed ngħid wieħed jista' jikkonfermah mill-attendenza li jkun hemm fl-attivitajiet li jsiru matul il-perijodu tas-sajf mil-lukandi għar-residenti tagħhom.

Jien naħseb li meta wieħed isiefer japprezza ħafna dawk iż-żoni li jkunu allokati lil xi bar jew cafeteria jew restaurant, bħalma hemm fil-belt ta' Nizza li qiegħda fuq il-kosta tan-nofs inhar ta' Franza. La qed insemmi din il-belt, naħseb li jkun tajjeb jekk ngħid li meta darba jien żort dan il-post bqajt immeraviljat għax filwaqt li filgħodu kien hemm pjazza li stħajjiltha qisa l-pitkalija peress li kienet mimlija b'bejjiegħa tal-ħaxix din l-istess pjazza filgħaxija kienet tkun mimlija b'nies jieklu u jixorbu fl-apert. Dan qed ngħidu dwar il-belt ta' Nizza li għandha l-istess kondizzjonijiet ta' temp li għandna aħna imma hawnhekk ta' min iżid li anke f'pajjiżi li ma għandhomx it-temp daqshekk favur tagħhom, bħal ngħidu aħna Brussels fil-Belġju, għandek l-opportunita' li tieħu xi kafe' jew xi xarba fl-arja aperta billi meta tinżel it-temperatura jinxtegħlu l-heaters fuq il-bankina għall-kumdita' tal-klijenti. Meta wieħed jara affarijiet bħal dawn wieħed malajr jirrealizza kemm pajjiżna huwa nieqes minn dawn it-tip ta' postijiet.
Madam Speaker, jien nemmen li anke hawn Malta għandha ssir xi ħaġa biex jinħolqu postijiet bħal dawn għax minbarra li, kif diġa' għidt, dawn il-postijiet huma mfittxija ħafna kemm min-nies tal-lokal kif ukoll mit-turisti - speċjalment fix-xhur tas-sajf - dawn jipprovdu x-xogħol għal mijiet ta' studenti matul il-perijodu tal-vaganzi. GĦalhekk jiena nissuġġerixxi li l-kunsilli lokali, speċjalment dawk li l-lokal tagħhom huwa turistiku bħal, ngħidu aħna l-Belt, Birżebbuġa, Marsaskala, Marsaxlokk, il-Mellieħa, San Ġiljan, Tas-Sliema, San Pawl il-Baħar, Buġibba u l-Qawra jieħdu l-inizjattiva ħalli flimkien ma' l-Awtorita' ta' l-Ippjanar jistudjaw dawn il-possibbiltajiet. Peress li f'Buġibba bħalissa qed isir xogħol ta' upgrading, jiena nixtieq inkun naf jekk il-kumitat li qed jieħu ħsieb dan il-proġett għandux xi pjanijiet f'dan ir-rigward. Jien ngħid li huwa fl-interess tal-kunsilli lokali stess li jinħolqu dawn iż-żoni għax dan jista' jkun mezz li jirrendilhom xi forma ta' dħul, speċjalment meta nafu kif il-Gvern preżenti naqsilhom id-budget tagħhom.
Is-sitwazzjoni llum hija tali li ftit huma dawk l-istabbilimenti li għandhom il-permessi biex joħorġu mwejjed jew siġġijiet fuq il-bankini. B'kuntrast imbagħad, hemm ferm aktar stabbilimenti li m'għandhomx dan il-permess imma għax jafu li dan is-servizz huwa mfittex ħafna, speċjalment mit-turisti, dawn xorta joħorġu l-imwejjed u s-siġġijiet fuq il-bankina bir-riskju li jiġu mħarrkin mill-pulizija u bit-telf ta' ħin telgħin u niżlin il-qorti.
Madam Speaker, ġaladarba qed nitkellem fuq attivitajiet li jsiru fil-miftuħ nixtieq insemmi wkoll il-problema li qegħdin jiffaċċjaw ċerti setturi oħra nvoluti fil-kummerċ bħal, per eżempju, l-bejjiegħa tal-ħaxix u l-frott minn fuq it-trakkijiet. Il-biċċa l-kbira ta' dawn il-hawkers m'għandhomx il-permess biex joqogħdu f'post wieħed u allura meta fil-post li jkunu ma jkollhomx xerrejja dawn jridu bilfors jiċċaqalqu mill-post li jkunu fih. Jien naħseb li wasal iż-żmien li dan is-settur nagħtuh l-attenzjoni mistħoqqa speċjalment meta llum il-ġurnata għandna Segretarju Parlamentari responsabbli mis-Self Employed, sabiex wieħed jara x'jista' ssir biex jittaffew il-problemi li dawn qegħdin jiffaċċjaw fil-preżent. Is- suġġeriment tiegħi f'dan ir-rigward huwa sabiex isir studju mil-Land Department flimkien mal-kunsilli lokali ħalli dawn il-hawkers jingħataw b'kera xi sit permanenti u li dan isir bi qbil ma' kulħadd, jiġifieri anke mar-residenti fejn il-hawker ikun sejjer jingħata dan is-sit. B'hekk dan is-settur, li huwa importanti wkoll għall-ekonomija tagħna, jkun jista' jkompli jagħti servizz kif ukoll dawk li joperaw fih ikunu jisgħu jaħdmu u jaqalgħu l-għixien tiegħhom b'inqas inkwiet. Grazzi, Madam Speaker.
MADAM SPEAKER: Grazz. Aktar rimarki? L-Onor. Joe Cassar.
ONOR. JOE CASSAR: Madam Speaker, Artiklu 20 tal-Kostituzzjoni ta' Malta jgħid li l-Gvern għandu d-dmir li jinkoraġġixxi t-twaqqif ta' koperativi. Iżjed minn xprun ta' inċentiv, il-koperativi huma organizzazzjonijiet li jgħinu lill-ħaddiema jwettqu ħidmiethom f'ambjent li jixraq lill-bniedem. Koperativa hija xirka ta' nies li bil-ħila u bl-inizjattiva tagħhom jaħdmu lkoll flimkien f'għaqda u f'solidarjeta' biex imexxu prodott jew servizz u fl-istess ħin ikunu qed jgħinu l-ġid komuni. Il-Kostituzzjoni mhijiex qiegħda hemm sempliċement biex naqrawha u lanqas m'hi xi dizjunarju imma hija miklem li kulħadd irid jimxi fuqu f'għaqda sħiħa sabiex il-pajjiż jimxi 'l quddiem.
Dawk li huma f'koperativa huma kemm ħaddiema mal-koperativa kif ukoll wkoll is-sidien ta' dik il-koperativa. Ħaġa oħra hija li għall-koperativa l-għan soċjali huwa iktar importanti mill-għan ibbażat fuq il-qligħ. Issa f'pajjiżna hawn ħafna nies interessati fil-qasam tal-koperativi u kien għalhekk li l-Gvern Nazzjonalista emmen ħafna f'dan il-prinċipju u ħa diversi miżuri biex il-moviment koperativ ikompli jissaħħaħ. Filwaqt li qabel koperativa aktarx kienet tiġi assoċjata mal-qasam tal-biedja u s-sajd, il-Gvern Nazzjonalista firex dan il-konċett f'oqsma oħra billi twaqqfu koperativi tal-burdnara, tal-furnara, tal-minibuses, ta' l-accountants u l-managers u dan għamilnih għax aħna emminna li l-koperativi jistgħu jkunu wieħed mis-sisien ta' l-ekonomija tagħna. Il-Gvern Nazzjonalista tant emmen f'dan il-moviment tal-koperativi li kien ħa miżura biex il-qligħ tal-koperativi beda jiġi eżentat mit-taxxa tad-dħul kuntrarju għal każ ta' l-limited liability company li trid tħallas it-taxxa tad-dħul.
Miżura oħra li kienet saret kienet fir-rigward tal-ħlas tal-bolla, fejn il-Gvern beda joħroġ nofs il-bolla tal-bdiewa u s-sajjieda full-time li huma msieħba f'koperativi biex b'hekk, apparti li ngħatat għajnuna lil dawn l-oqsma partikolari, jsaħħaħ il-moviment koperattiv.
Kien ukoll sar tibdil fir-regolamenti li jikkonċernaw il-bord ċentrali tal-koperativi biex fejn qabel il-maġġoranza tal-membri tiegħu kienu appuntati mill-gvern din il-maġġoranza għaddiet għand il-membri tal-korperattivi biex b'hekk dawn setgħu jikkontrollaw il-bord huma stess.
Il-Gvern ta' qabel ħa passi biex dik il-parti tal-Liġi tal-Koperativi li titkellem dwar dik li tissejjaħ "Apex", u jiġifieri koperativa li tiġbor fiha l-koperativi l-oħra kollha - li kienet għadha ma daħlitx fis-seħħ fil-fatt tidħol fis-seħħ biex b'hekk, għall-ewwel darba, Malta setgħet tkun aċċettata fl-assoċjazzjoni internazzjonali tal-koperativi li għandha madwar 800 miljun membru f'207 organizzazzjonijiet minn 90 pajjiż.
Pass ieħor importanti li għamel il-Gvern ta' qabel kien it-twaqqif ta' unit li joffri appoġġ lill-koperativi li permezz ta' dan il-unit beda jingħata servizz ta' pariri b'xejn lill-membri tal-koperativi. Aħna dehrilna li l-għajnuna lill-koperativi m'għandix tingħata biss fi flus imma anke f'dawk li huma pariri u servizzi oħra bħal dawn.
Il-Gvern preċedenti kien qal: Għaliex dan il-konċett m'għandniex inkompluh ukoll fl-iskejjel? L-għan kien li minbarra li t-tfal ikunu aktar magħquda dan iservi wkoll biex 'l quddiem dawn it-tfal isibuha aktar faċli biex jidħlu fid-dinja tax-xogħol. Kien propriju għalhekk li ġie mniedi l-proġett SCOOPS, jiġifieri school coperatives, li bih it-tfal ta' l-iskejjel ġew organizzati biex bdew jagħmlu xi xogħol żgħir. Jien nista' ngħid li dan il-proġett irnexxa għax instab li kull wieħed mit-tfal għandu t-talenti tiegħu u b'dan il-mod huma segħu jgħaddu t-talenti tagħhom lil xulxin.
Twaqqaf ukoll il-kumitat konsultattiv tal-koperativi li kien magħmul minn entijiet soċjali li għandhom x'jaqsmu mas-servizz pubbliku.

Għall-ewwel darba f'Malta waqqafna koperativa bejn il-ħaddiema fil-garaxx tal-Gvern liema koperativa bdiet tagħti s-servizzi tagħha lill-kunsilli lokali u jirriżulta li l-membri tagħha għamlu qligħ sostanzjali.

Jidher li f'dawn l-aħħar sitt xhur ħafna minn dawn l-inizjattivi sfortunatament spiċċaw fix-xejn għax il-Gvern tal-lum ifforma biss tliet koperativi li l-ħidma fuq it-twaqqif tagħhom kienet kważi lesta mill-Gvern ta' qabel. Jirriżulta wkoll li ħafna nies li setgħu taw sehemhom fil-moviment koperativ ġew imwarrba mhux mill-Ministru konċernat imma minn xi ħaddieħor. Dan kien dnub għaliex illum qegħdin naraw il-moviment koperativ tant sejjer lura li jidher li Gvern lanqas kien intebaħ li jeżisti d-Dipartiment tal-Koperativi qabel nofs Frar li għadda meta f'daqqa waħda deher avviż fil-Gazzetta tal-Gvern li ndika t-tali ministru bħala responsabbli għall-koperativi. Kif jista' jkun li Gvern lanqas ikun jaf li għandna l-moviment koperativ! Meta jien għamilt din id-domanda lill-Prim Ministru t-tweġiba kienet li t-tali Ministru kien de facto responsabbli mill-koperattivi. Kieku l-Gvern kien wieħed serju kien ikun jaf x'inhuma r-responsabbiltajiet tiegħu! Jekk tassew irridu ndaħħlu l-parteċipazzjoni vera f'dan il-pajjiż jeħtieġ li l-ħidma fost il-koperativi tkompli f'kull qasam u mhux tiġi abbandunata minn ministeru li donnu lanqas biss jaf fejn qiegħed. Dan l-aspett qed narawh anke fil-mod kif qed jiġu mwieġba l-mistoqsijiet li jsiru hawn ġew fejn mhix qed tingħata informazzjoni imma qegħdin il-ħin kollu joħorġu stqarrijiet kontra tweġibiet u diskors li jkun għamel il-Ministru. Jiena jisgħobbija li wara ħidma kbira tul ħames snin sħaħ issa bil-mod il-mod dawn mhux talli qed ikissru l-moviment koperativ imma se jġibuh fix-xejn u dan meta l-koperativi huma għal qalb ħafna Maltin. Grazzi.
MADAM SPEAKER: Grazzi. L-Onor. Tony Abela.
ONOR. TONY ABELA: Madam Speaker, jien ma nistax ma nsemmix in-nuqqas serju ta' meta naħa tal-Kamra tkun taf li xi membru min-naħa l-oħra huwa marid ma jintużax l-etikett billi jekk ikun hemm bżonn bniedem għandu jibqa' pass lura u ma joqgħodx ifittex il-punto e virgola. Aħna naċċettaw ir-ruling li tagħti s-Sinjorija Tiegħek, pero' mil-banda l-oħra ma nistgħux ma nawgurawx fejqan ta' malajr lill-Onor. Eddie Fenech Adami kif ukoll li nirringrazzjawh talli kontra l-parir tat-tabib tiegħu ġie hawnhekk biex jaqdi dmiru lejn il-poplu u b'hekk ma jagħtix lok li l-Gvern jipprova jrazzan id-drittijiet li għandu kull membru ta' din il-Kamra. Issa ħalli niġi għal xi ħaġa differenti minn dan.
Madam Speaker, il-banek Maltin kull sena joħorġu rapporti tagħhom fejn jgħidu, fost affarijiet oħra, kemm qalgħu miljuni u kemm ix-shares tagħhom żdiedu fil-valur tagħhom. Sfortunatament jien smajt li biex jagħmel qligħ akbar, b'seħħ minn nhar il-Ħamis li ġej, il-Mid Med Bank qed jimponi li dawk li m'għandhomx kont kurrenti u jridu jħallsu xi kontijiet billi jużaw bank draft - anke għax xi kultant hekk titlob il-liġi - għandhom iħallsu Lm1, liema ħlas sas-sena l-oħra kien ta' 25c li mbagħad kien żdied għal 30c. L-istess bank qed jgħid ukoll li jekk bniedem jagħmel query fuq il-kont tiegħu u jinstab li dak li jkun ma jkollux raġun dan se jkollu jħallas is-somma ta' Lm2 għal dik il-query. L-istess bank qed jgħid ukoll li jekk bniedem ikun jabita f'ċertu area, allura l-bank qed jippretendi li dan l-individwu għandu jżomm il-kontijiet tiegħu fil-branch ta' dik l-area. Jiena ma nħossx li din hija xi ħaġa tajba għaliex spiss jiġri li meta bniedem ikollu kont bankarju, mingħajr ma jrid u kultant anke minħabba l-mod kif huwa jagħmel in-negozju tiegħu, jinħoloq ċertu rapport bejnu u bejn il-manager u l-istaff tal-branch li fih ikollu l-kont tiegħu. Allura jaf jiġri li jekk dan il-bniedem ikollu opinjoni differenti jew karattru differenti minn min ikun qed imexxi l-branch tal-lokalita' tiegħu dan se jsib ruħu f'pożizzjoni li jew irid ibiddel il-bank jew inkella, jekk ma jkunx jista' jinqeda, jżomm il-flus taħt il-maduma!
Madam Speaker, l-ewwel punt li rrid nagħmel huwa li l-Gvern stess jitlob li ċerti ħlasijiet li jridu jsiru lilu, speċjalment lill-Commissioner of Inland Revenue f'kuntratti u f'mod ieħor, għandhom isiru permezz ta' bank draft, biex imbagħad min-nhar il-Ġimgħa tal-ġimgħa d-dieħla - għaliex il-Ħamis se tkun festa - lil kull min se jmur jagħmel bank draft għand il-Mid-Med Bank dan se jżidlu l-ammont ta' charges bi 333%. Fl-opinjoni tiegħi, din hija sitwazzjoni li għandha tiġi riveduta mill-aktar fis possibbli.
It-tieni punt li rrid inqajjem hu li nhar it-Tnejn wara nofsinhar mort sa Tas-Sliema fejn rajt li l-car-park reġa' qiegħed miftuħ u dan f'ġieħ l-omnipotenza u t-tolleranza tal-Planning Authority! Il-ġimgħa l-oħra ħadt pjaċir nara f'gazzetta partikolari ritratt tas-sid tal-kumpannija li bniet il-car-park ixejjer minn ġol-karozza tiegħu għaliex il-car-park reġa' nfetaħ. Jien nispera li ma jerġax ikun hemm xi persuna li terġa' tipprova tagħmlilna xi ċajta ta' l-ewwel ta' April billi terġa' tagħlaq dan l-imbierek car-park f'Tas-Sliema! Ta' min jgħid ukoll li filwaqt li dan il-car-park kien għadu magħluq, tliet kwarti tan-naħa ta' Tower Road, Bisazza Street, Tigne' Street u postijiet oħra f'Tas-Sliema għamlulhom id-double yellow lines u minħabba f'hekk kif ukoll minħabba l-konferenza wieħed ma setax jipparkja. Kif diġa' għidt, peress li dan il-car-park kien magħluq biex wieħed imur Tas-Sliema kellu jew jipparkja Tigne' ġewwa nett jew inkella jħalli l-karozza f'post ieħor u jidħol sal-parti ċentrali ta' Tas-Sliema, bix-xarabank. Madam Speaker, jiena ngħid li n-nies li bnew il-car-park - u nies oħra bħalhom - ma ħaqqhomx min jagħlqilhom il-bieb f'wiċċhom imma ħaqqhom tifħir u minn hawn ngħid li min fil-Planning Authority għalaq dan il-car-park għal darba, tnejn u tlieta ħaqqu l-kundanna ta' kull Malti għaliex dawn, jew bi qżież jew għal xi raġuni oħra, qegħdin iżommu lill-Maltin li għandhom mentalita' ta' intrapriża milli jagħtu servizz lill-poplu kemm bl-ideat tagħhom kif ukoll bi flushom.
Madam Speaker, it-tielet punt li xtaqt inqajjem huwa li ftit wara l-ftuħ ta' dan il-Parlament kont għamilt diversi domandi lill-Ministru għax-Xogħlijiet Pubbliċi u Kostruzzjoni fejn indikajt li l-Manikata, li taqa' taħt il-Kunsill Lokali tal-Mellieħa, tinsab fi stadju prekarju f'dak li għandu x'jaqsam ma' infrastruttura. Għal domanda minnhom il-Ministru Buhagiar weġibni li ċerta triq ma setgħetx issir minħabba li l-angolu tal-pendil tat-telgħa li tlabt biex tiġi rranġata kien iżjed milli suppost ikun. Fil-fatt dan m'huwiex minnu għax meta qabbadt nies - bi spejjeż tiegħi - sabiex ikejlu kemm jiġi l-angolu ta' din it-triq vis a vis t-triq l-oħra, irriżulta li t-triq li tagħti minn Manikata Road għal Triq Mejjiesa bħala angolu hija wisq iżjed baxxa mit-triq li hemm fil-wied li jagħti minn ħdejn il-pumping station għal ħdejn l-iskola tal-Mellieħa. Dan huwa raħal żgħir ta' bdiewa u kulma qegħdin jitolbu dawn ir-residenti hu li biex jgħaddu minn dawn it-toroq m'għandux bilfors ikollhom xi Land Rover. Dawn jixtiequ li t-toroq ma jkunux skond id-daqqa tal-lum - qed insibu l-ħofor kullimkien! - u qegħdin jitolbu li dawn jitranġaw, titranġa l-wesgħa li hemm fi Triq il-Knisja l-Qadima u li tiġi rranġata wkoll il-pjazza li hemm quddiem il-knisja. Dan mhux xi xogħol kbir u għalhekk nitlob lill-Ministru biex meta jitlesta x-xogħol li qed isir f'Buġibba jibgħat lil dawk il-500 ruħ jew 600 ruħ biex jagħmlu x-xogħol li hemm bżonn isir fil-Manikata. Jiena ninsab żgur li fi tlett ijiem dawn kapaċi jlestu x-xogħol kollu għax fil-fehma tiegħi lanqas ġimgħa xogħol m'hemm. Għalkemm dan huwa post żgħir ninsab ċert li ladarba jiġi rranġat dan ir-raħal jista' jkun xempju ta' kif għandhom ikunu t-toroq fagħna.
Madam Speaker, punt ieħor li rrid nagħmel huwa rigward il-hawkers tal-ħaxix fejn naqbel ħafna ma' dak li għadu kif qal l-Onor. Claude Muscat, jiġifieri li hemm bżonn tispiċċa d-diskriminazzjoni li qed issir fejn b'atteġjament politiku ċerti nies jitħallew ibiegħu filwaqt li oħrajn qegħdin jitkeċċew minkejja li kollha ma jkollhomx permess ta' fixed hawkers. Fir-Rabat u fil-kumplament ta' dak id-distrett hemm min jagħmel dan it-ttip ta' xogħol u jiena jidhirli li sakemm wieħed iżomm il-post fejn ikun nadif dan ma jkun qed jagħmel xejn ħażin ħlief li jsebbaħ b'dik il-wirja ta' frott sabiħ. Jekk il-pulizija se toqgħod tissikka fuq dawn l-affarijiet aħna nafu li hemm ħafna nuqqasijiet oħra x'tara. Per eżempju, ftit ilu bniedem ġie mtella' l-qorti u ssentenzjat għax, skond il-pulizija, volontarjament ikkawża iżjed minn Lm50 spejjeż fuq karrozza ta' ħaddieħor. L-istess spettur li tella' lil dan il-bniedem imbagħad naqas milli jtella' l-qorti wkoll lil dik il-persuna li sofriet l-ispjejjeż meta din ipproduċiet l-irċevuti bla VAT. Pero' aħna nafu li dik il-persuna li pproduċiet l-irċevuti bla VAT għandha lil xi ħadd jiġi minnha fil-Pulizija. Mela minkejja li Mr "X" offra li l-ispejjeż li kien għamel f'dik il-vettura jitranġaw a spejjeż tiegħu b'inqas minn Lm50 - jiġifieri ma kienx hemm il-każ li dan jittella' l-qorti - xorta waħda ttieħdu passi kontra tiegħu, mentri lil min ipproduċa l-irċevuti mingħajr VAT ma ttieħdu ebda passi bil-qorti kontra tiegħu. Qed insemmi dan il-każ għax huwa każ li diġa' nqata'. Dan juri li sfortunatament f'ħafna każijiet mhux qed issir ġustizzja kif suppost. Jekk il-Kummissarju jistaqsini biex ngħidlu min hu l-ispettur konċernat jien mhux se ninkwieta biex ngħidlu anzi lest li ngħidlu barra minn din il-Kamra biex jekk għandu jieħu xi azzjoni kontra xi ħadd jeħodha.
Jien naħseb li fuq dawn il-punti żgħar li semmejt f'dawn l-għaxar minuti li kelli għad-dispożizzjoni tiegħi għandhom jittieħdu passi immedjati, speċjalment rigward ir-reviżjoni tal-bank charges li se jiġu ntrodotti mil-ġimgħa d-dieħla,. Aħna ngħidu lin-nies biex iħallsu l-kontijiet tagħhom lill-Gvern permezz ta' bank drafts biex issa l-bank se jimponi fuqhom taxxa ġdida ta' 300% u iżjed milli kienu jħallsu qabel! Grazzi, Madam Speaker.
MADAM SPEAKER: Grazzi. Sar il-ħin. Il-Kamra hija aġġornata għal nhar il-Ġimgħa, 25 ta' April fid-9.00 a.m., bl-aġenda kif komunikata mill-Viċi Prim Ministru.
Fid-9.30 p.m. l-Kamra aġġornat mingħajr ma saret il-mistoqsija.