Deuterokanonik kitabları Yoxlama versiyası

Hikmətin mahiyyəti
22 Hikmətin nədən ibarət olduğunu,
Necə meydana gəldiyini indi bildirəcəyəm.
Sizdən heç bir şeyi sirr saxlamayacağam,
Hikmətin əzəldən mahiyyətini 
araşdıracağam.
Həqiqətdən kənara çıxmayaraq
Onun idrakını aşkar edəcəyəm.
23 Üzüntülü paxıllıqla yol yoldaşı 
olmayacağam,
Çünki onun hikmətlə heç bir əlaqəsi 
yoxdur.
24 Dünyanın xilası
Çox sayda müdrik insanın varlığına 
bağlıdır.
Bir xalqın rifahı
Padşahının dərrakəli olmasından asılıdır.
25 Beləliklə, mənim sözlərimdən öyrənin,
Onda siz fayda götürərsiniz.
7
1 Mən də hamı kimi ölümlü bir insanam,
Torpaqdan yaranan ilk varlığın 
nəslindənəm.
Ana bətnində bədən almışam,
2 Doqquz ay ərzində onun qanında surət 
aldım;
Kişi toxumu və evlilik yatağında olan həzz
bunun səbəbi oldu.
3 Doğulduğum zaman mən də hamı kimi
Nəfəs almağa başladım,
Hamı kimi dünyaya gəldim,
Hamı kimi ilk dəfə qışqırıb ağladım.
4 Qundağa bələnib qayğı ilə bəsləndim.
5 Çünki hər padşahın həyatı belə başlayıb.
6 Hamı üçün həyatın başlanğıcı və sonu 
eynidir.
7 Buna görə də mən dua etdim və mənə 
düşüncə verildi,
Mən çağırdım və üzərimə hikmət ruhu 
endi.
8 Mən onu hökm əsasından və taxtlardan 
üstün tutdum,
Onunla müqayisədə sərvəti heç nə hesab 
etdim.
9 Qiymətli daşı ona tay tutmadım,
Çünki onun qarşısında bütün qızıl
Heç bir dəyəri olmayan qumdur,
Gümüş isə onunla müqayisədə palçıqdır.
10 Mən hikməti sağlamlıq və gözəllikdən 
daha çox sevdim,
Onu işıqdan üstün hesab edərək seçdim,
Çünki onun nuru əbədidir.
11 Onun vasitəsilə bütün nemətlər,
Onun əli ilə tükənməz sərvət mənə nəsib 
oldu.
12 Mən hər şeydən ötrü sevinirdim,
Çünki hikmət onlara rəhbərlik edirdi.
Lakin mən bilmirdim ki, hikmət onların 
anasıdır.
13 Mən xeyrimi güdmədən öyrəndim,
Və paxıllıq etmədən verirəm,
Onun zənginliyini sirr saxlamıram.
14 Çünki hikmət insanlar üçün tükənməz 
xəzinədir,
Onlar onun təliminin bəxşişlərindən 
istifadə edərək
Allahla dost olmağa nail olurlar.