Müdrik adamlar barədə 1 Yalnız öz qəlbini Uca Olanın qanunu
üzərində
Düşünməyə həsr edən adam
Bütün qədimdə olanların hikmətini axtarar,
Peyğəmbərliklərin tədqiqi ilə məşğul olar.
2 Məşhur adamların söylədiklərini qoruyub
saxlayar,
Məsəllərin incəliklərinə nüfuz edər.
3 Məcazların gizli mənalarını tədqiq edər,
Məsəllərin müəmmaları üzərində çalışar.
4 Əsilzadələr arasında xidmət edər,
Başçıların önündə görünər.
Yadellilərin ölkələrinə səyahət edər,
Beləcə, insanlardakı yaxşını və pisi
imtahan edər.
5 Öz ürəyini səhər erkəndən
Onu yaradan Rəbbə yönəldər,
Uca Olanın önündə yalvarar,
Dua etmək üçün ağzını açar,
Öz günahlarından ötrü yalvarar.
6 Əgər əzəmətli Rəbb istəsə,
Bu adam dərrakə ruhu ilə dolacaq,
Dilindən müdrik sözlər töküləcək,
Duada Rəbbə şükür edəcək.
7 O, məsləhət verməkdə və bilikdə dürüst
olacaq,
Rəbbin sirləri üzərində dərindən
düşünəcək.
8 Öyrəndiyi təlimi nümayiş etdirəcək,
Rəbbin əhdinin Qanunu ilə öyünəcək.
9 Çoxları onun dərrakəsini mədh edəcək,
Bu, əsla unudulmayacaq,
Onun xatirəsi silinməyəcək,
Adı nəsildən-nəslə yaşayacaq.
10 Millətlər onun müdrikliyindən
danışacaq,
Camaat onun tərifini bəyan edəcək.
11 Yaşadıqca adı minlərlə addan daha
məşhur olacaq,
Öləndən sonra da adı yaşayacaq.
