Kitabın məzmunu: 1:1–2:70 Çətinliklər və Mattatiyanın üsyanı
3:1–9:22 Yəhudada Makkabinin rəhbərliyi
9:23–12:53 Yonatanın rəhbərliyi
13:1–16:24 Şimonun rəhbərliyi
1
Böyük İsgəndər 1 Belə oldu ki, Kittim torpağından gələn
Makedoniyalı Filip oğlu İsgəndər Farsların
və Midiyalıların padşahı Daranı məğlub
etdi. Bundan sonra onun yerinə padşah
oldu; əvvəlcə Yunanıstan üzərində padşah
olmuşdu. 2 O, çoxlu müharibələr apardı,
möhkəm qalaları zəbt etdi və yer üzünün
padşahlarını öldürdü. 3 Beləcə, yer üzünün
hüdudlarına qədər gedib çoxlu millətdən
qənimət əldə etdi. Dünya onun önündə aciz
qaldı; onda o qürurlandı və ürəyi
məğrurluqla doldu. 4 O, çox güclü qoşun
topladı, ölkələri, millətləri və hökmranları
özünə tabe etdirib onlardan xərac almağa
başladı. 5 Bunlardan sonra İsgəndər yatağa
düşdü və öləcəyini hiss etdi.
6 Cavanlığından bəri onunla birgə böyüyən
adlı-sanlı xidmətçilərini çağırdı və hələ sağ
ikən öz padşahlığını onların arasında
böldü. 7 İsgəndər on iki il padşahlıq
etdikdən sonra öldü. 8 Onun xidmətçiləri
hər biri öz torpağını idarə etməyə başladı.
9 İsgəndər öləndən sonra onların hamısı
başına tac qoydu. Onlardan sonra oğulları
da uzun illər boyu belə etdilər və yer
üzündə pisliyi artırdılar.
