Şimonun rəhbər olması 1 Şimon Trifonun Yəhudeya torpağına
hücum edib oranı viran qoymaq üçün
çoxsaylı qoşun topladığını eşitdi. 2 O,
xalqın lərzə və qorxu içində olduğunu
görəndə Yerusəlimə getdi. Xalqı topladı.
3 Adamları ruhlandırıb onlara dedi:
«Özünüz bilirsiniz ki, mən, qardaşlarım və
atamın evi bu qanunlar və məbəd üçün
nələr etmişik. Şahidi olduğumuz
müharibələr və əziyyətlər də sizə
məlumdur. 4 Elə bu səbəbdən bütün
qardaşlarım İsrail uğrunda həlak oldular,
tək mən qaldım. 5 İndi də bütün zülm
dövründə öz canımı əsirgəmək qoy
məndən uzaq olsun, çünki mən
qardaşlarımdan artıq deyiləm. 6 Heç nəyə
baxmayaraq, mən millətimin, məbədin və
arvad-uşaqlarınızın qisasını alacağam.
Çünki bütün millətlər düşmənçilikləri
səbəbindən bizi məhv etmək üçün
toplaşdılar». 7 Bu sözləri eşidən kimi
xalqın ruhu alovlandı. 8 Onlar uca səslə
cavab verdilər: «Yəhudanın və qardaşın
Yonatanın yerinə sən bizim rəhbərimizsən.
9 Bizim döyüşlərimizi sən apar, sənin
dediyin hər şeyi edəcəyik». 10 Şimon
döyüşməyi bacaran bütün adamları topladı,
Yerusəlimin divarlarını tikib qurtarmağı
sürətləndirdi və hər tərəfdən onu
möhkəmləndirdi. 11 O, Avşalom oğlu
Yonatanı və onunla birlikdə kifayət qədər
qoşunu Yafoya göndərdi. Yonatan Yafoda
olanları oradan qovub, özü orada qaldı.
