Günah barədə xəbərdarlıq 1 Övladım, əgər günah etdinsə, bunu daha
davam etdirmə,
Əvvəlki günahların üçün də bağışlanma
dilə.
2 İlanın əlindən qaçan kimi günahdan qaç,
Əgər ona yaxınlaşsan, səni sancar.
Onun dişləri aslanın dişləri kimidir,
Adamların həyatını məhv edir.
3 Qanunsuzluq ikiağızlı qılınca bənzəyər,
Onun vurduğu yaraya şəfa yoxdur.
4 Dəhşət və zorakılıq zənginliyi viran
qoyar,
Eləcə də təkəbbürlülərin evi viran qalar.
5 Yoxsulun dilindən çıxan yalvarışını
Allahın qulağı eşidər,
Onun barəsində qərar tez gələr.
6 Məzəmmətə xor baxan kəs günahkarın
izi ilə gedər,
Rəbdən qorxan şəxs ürəkdən peşman olar.
7 Dildən pərgar adam məşhur olar,
Amma düşüncəli kəs onun çaşmasını görər.
8 Özgəsinin pulu ilə özünə ev tikən adam
Öz məzarı üçün daş toplayan kəsə
bənzəyər.
9 Qanuna riayət etməyən adamların
toplantısı
Bir yumaq ip kimidir,
Onların axırı od alovudur.
10 Günahkarların yolu daş döşənərək
hamarlanmış bir yoldur,
Amma onun axırında ölülər diyarının
quyusu var.
