Deuterokanonik kitabları Yoxlama versiyası

Emmaus döyüşü
1 Qorqiya beş min piyada və min seçmə
süvari götürdü. Qoşun gecə yola çıxdı ki,
2 Yəhudilərin   ordugahına   hücüm   edib
onlara qəflətən zərbə vursun. Yerusəlimdə
olan   iç   qaladakı   adamlar   onun   bələdçisi
idilər.   3 Yəhuda   bunu   eşidəndə   özü   və
cəsur   adamları   Emmausdakı   padşah
qoşununa   zərbə   vurmaq   üçün   hərəkətə
gəldilər;   4 bunu   düşmən   qoşunu   hələ
ordugahdan   uzaqda   olarkən   etmək
istəyirdi.   5 Qorqiya   gecə   Yəhudanın
ordugahına  gələndə   heç   kimi  tapmadı   və
onları   dağlarda   axtardı.   Çünki   söylədi:
«Bunlar   bizdən   qaçdılar».   6 Gün   çıxanda
Yəhuda   üç   min   adamı   ilə   düzənlikdə
göründü, amma istədikləri qədər qalxan və
qılıncları   yox   idi.   7 Onlar   bütpərəstlərin
ordugahını,   onun   möhkəm   və   müdafiəli
olduğunu,   süvarilərlə   əhatə   olunduğunu
gördülər;   bilinirdi   ki,   döyüş   üçün   yaxşı
təlim alıblar. 8 Onda Yəhuda onunla birgə
olan adamlara dedi: «Onların çoxluğundan
qorxmayın,   onların   həmləsindən   dəhşətə
düşməyin!   9 Yadınıza   salın,   Firon   öz
qoşunu   ilə   əcdadlarımızı   təqib   edərkən
onlar Qırmızı dənizdə necə xilas edildilər.
57

---

10 İndi   də   biz   göylərə   fəryad   edək   ki,
bəlkə, Rəbb bizə meyil edib əcdadlarımızla
bağladığı   əhdi   yada   salar   və   bu   gün   bu
qoşunu bizim qarşımızda darmadağın edər.
11 Onda bütün bütpərəstlər dərk edəcəklər
ki,   İsrailin   Satınalanı   və   Xilaskarı   var».
12 Yadellilər   başlarını   qaldırıb   qarşı
tərəfdən   onlara   doğru   irəliləyənləri
görəndə   13 ordugahdan   döyüşə   çıxdılar.
Yəhuda   ilə   olanlarsa   boru   çaldılar.
14 Qoşunlar   döyüşə   girdi.   Bütpərəstlər
məğlub olub düzənliyə qaçdılar. 15 Arxada
qalanların   hamısı   qılıncdan   keçirildi.
Qaçanları   Ğazeraya,   Edom   düzənliyinə,
Azota   və  Yamniyaya   qədər   təqib   etdilər.
Onlardan üç minə qədər adam həlak oldu.
16 Yəhuda və qoşunu onları təqib etməyi
dayandırıb   geri   qayıtdılar.   17 O,   xalqa
dedi:   «Qənimət   dalınca   düşməyin,   çünki
hələ qarşımızda döyüş var. 18 Qorqiya və
qoşunu   dağda,   bizim   yaxınlığımızdadır.
İndi   düşmənlərimizin   qarşısına   çıxıb
onlarla döyüşün, sonra isə cürətlə qənimət
götürərsiniz».   19 Yəhuda   sözünü   bitirən
kimi   dağın   arxasından   çıxan   bir   bölük
göründü.   20 Onlar   qoşunlarının   məğlub
olduğunu və ordugahlarının yandırıldığını
gördülər;   çünki   qalxan   tüstü   nə
olduğundan   xəbər   verirdi.   21 Bunu
anlayanda   böyük   dəhşətə   düşdülər.
Həmçinin Yəhudanın qoşununu düzənlikdə
döyüşə hazır vəziyyətdə görüncə 22 hamısı
qonşuluqdakı yadellilərin torpağına qaçdı.
23 Onda  Yəhuda   qənimət   üçün   ordugaha
döndü.   Çoxlu   qızıl-gümüş,   göy   və
bənövşəyi rəngdə parçalar, külli miqdarda
qiymətli əşya ələ keçirdilər. 24 Yəhudilər
geri   qayıdarkən   göylərin   Allahına   ilahi
oxuyub alqış etdilər, «ona görə ki yaxşıdır,
çünki məhəbbəti əbədidir». 25 O gün İsrail
üçün möhtəşəm qurtuluş oldu.