Dh. İD, 0-2/54 Dâhiliye Nezâreti Muhâberât-ı Umûmiyye Dâ’iresi Şu‘be: Evrâk Numarası: 363

969_32

DH. İD, 30-2/54_1

Dâhiliye Nezâreti Muhâberât-ı Umûmiyye Dâ’iresi

Şu‘be: 4

Evrâk Numarası: 363

Târîh-i Tesvîd: 22 Kânûn-ı Evvel sene [1]328

Târîh-i Tebyîz: 26 Muharrem sene [1]331

23 Kânûn-ı Evvel sene [1]328

Huzûr-ı Âlî-i Cenâb-ı Sadâret-Penâhîye

Çapakçur kazâsı merkezi olan Çevlik kasabasında Ermeni milleti nâmına bir mekteb inşâsı için ruhsat i‘tâsı istid‘â olunmasıyla icrâ kılınan tahkîkât netîcesinde mahall-i mezkûrda mekteb inşâsında mahzûr olmadığı anlaşıldığına ve bu bâbdaki evrâkın gönderildiğine dâ’ir Bitlis Vilâyeti Meclis-i İdâresi'nden vârid olan mazbata merbûtâtıyla berâber takdîm kılındı. Îcâbının icrâ ve emr ü inbâsı merhûn-ı müsâ‘ade-i sâmiye-i fahîmâneleridir. Ol bâbda.

DH. İD, 30-2/54_3

Bitlis Vilâyeti

Tahrîrât Kalemi

Umûmî: 8197

Husûsî: 699

Hulâsa: Çevlik kasabasında inşâ olunacak mekteb hakkında

Dâhiliye Nezâret-i Celîlesine

Devletlü efendim hazretleri

Çapakçur kazâsı merkezi olan Çevlik kasabasında Ermeni cemâ‘ati nâmına bir mekteb inşâsı için ruhsat i‘tâsı hakkında takdîm kılınan 10 Teşrîn-i Evvel 1328 târîh ve 5376/363 numaralı mazbata îcâbının îfâ ve inbâ buyurulması Genç Mutasarrıflığı'nın iş‘ârı üzerine tekrâr arzolunur. Ol bâbda emr ü fermân hazret-i men lehü'l-emrindir.

Fî 27 Muharrem sene [1]332

ve

Fî 12 Kânûn-ı Evvel sene [1]329

Bitlis Vâlîsi

İmzâ

DH. İD, 30-2/54_2

Dâhiliye Nezâreti İdâre-i Umûmiyye

Evrâk-ı Umûmî Numarası: 699

Kalem Numarası: 1635

Târîh-i Tesvîd: 30 Kânûn-ı Evvel sene [1]329

Târîh-iTebyîz: 30 minh

Huzûr-ı Âlî-i Cenâb-ı Sadâret-penâhîye

Çapakçur kazâsı merkezi olan Çevlik kasabasında Ermeni cemâ‘ati nâmına bir mekteb inşâsı için ruhsat i‘tâsı hakkında mütekaddim 23 Kânûn-ı Evvel sene [1]329 târîh ve 3051 numaralı tezkire-i âcizî muktezayâtının tesrî‘-i icrâ ve inbâsı Bitlis Vilâyeti'nden bu kerre alınan tahrîrâtda izbâr kılınmakla îcâbının sür‘at-i icrâsı menût-ı müsâ‘ade-i sâmiye-i fahîmâneleridir. Ol bâbda.

DH. İD, 30-2/54_5

Bâb-ı Âlî

Dâ’ire-i Sadâret

Tahrîrât Kalemi

1816

Çevlik kasabasında inşâsına ruhsat verilmesi istid‘â olunan Ermeni mektebi hakkında

Dâhiliye Nezâret-i Celîlesine

Devletlü efendim hazretleri

23 Kânûn-ı Evvel sene [1]328 ve 30 Kânûn-ı Evvel sene [1]329 târîhli ve 3051 ve 1758 numaralı iki kıt‘a tezkire-i aliyyelerine cevâbdır. Çapakçur kazâsı merkezi olan Çevlik kasabasında Ermeni cemâ‘ati nâmına inşâsına ruhsat verilmesi istid‘â olunan mekteb hakkında ki evrâk ale'l-usûl Adliye ve Mezâhib Nezâret-i Celîlesi'ne tevdî‘ ve irsâl kılınmış olmasına binâ’en evrâk-ı mezkûre üzerine Ermeni Patrikhânesi'nden istifsâr-ı mütâla‘a edilib henüz cevâb alınamadığı ma‘a-hâzâ ahîren te’kîd olunduğundan cevâb-ı muntazarın vürûdunda lâzım gelen mu‘âmelenin îfâ ve inbâ olunacağı nezâret-i müşârün-ileyhâdan bu kerre bâ-tezkire cevâben iş‘âr kılınmışdır efendim.

Fî 25 Safer sene [1]332

Fî 11 Kânûn-ı Sânî sene [1]329

Sadr-ı a‘zam Nâmına

Müsteşâr

İmzâ

DH. İD, 30-2/54_4

Dâhiliye Nezâreti İdâre-i Umûmiyye

Evrâk-ı Umûmî Numarası: 1816

Kalem Numarası: 2044

Târîh-i Tesvîd: 12 Kânûn-ı Sânî sene [1]329

Târîh-i Tebyîz: 13 minh

Bitlis Vilâyet-i Aliyyesine

12 Kânûn-ı Evvel sene [1]329 târîhli ve 699 numaralı tahrîrât-ı aliyyeleri cevâbıdır. Çapakçur kazâsının merkezi olan Çevlik kasabasında Ermeni cemâ‘ati nâmına inşâsına ruhsat istenilen mekteb hakkında vukû‘ bulan istifsâra Ermeni Patrikliği'nden henüz cevâb alınamamış ve ahîren de te’kîd-i keyfiyyet edilmiş olduğu ve cevâb-ı muntazarın vürûdunda lâzım gelen mu‘âmelenin îfâ olunacağı Adliye ve Mezâhib Nezâret-i Celîlesi'nin iş‘ârına atfen ve cevâben bâ-tezkire-i sâmiye izbâr buyurulmuşdur. Ol bâbda.