Dh. Umvm. 65/57 Şehremâneti Heyet I Tahrîriyye Müdîriyeti Tahrîr Şu‘besi Aded: 434

1041_32

DH. UMVM. 165/57_1

Şehremâneti

Heyet i Tahrîriyye Müdîriyeti

Tahrîr Şu‘besi

Aded: 434

Dâhiliye Nezâret i Celîlesi Cânib i Sâmîsine

Ma‘rûz ı çâker i kemîneleridir

Ortaköy’de Mecidiye mahallesinde kâ’in ve Ermeni kilisesine â’id arsaya ba‘zı Ermeni muhâcirleri tarafından baraka inşâ edilmekde olduğu görülmesi üzerine âlât ve edevâtın müsâderesiyle berâber Beşiktaş Polis Merkezi’ne de mürâcaat edilmek sûretiyle bunun hedmine tevessül edilmiş ise de mezkûr barakada Amerika Cumhuriyeti himâyesinde bulunan muhâcirîn iskân edileceği cihetle hedmine kilise heyeti tarafından mümâna‘at olunduğu Beyoğlu şu‘be i idâriyyesinden vârid olan tezkirede bildirilmesi üzerine mahallen icrâ etdirilen tahkîkât netîcesini mübeyyin alınan raporda ânifü’l arz kilisenin arkasındaki takrîben yirmi beş metre murabba‘ı mahal üzerine üzeri muşamma‘lı eski ve paslı gaz tenekelerinden vücûda getirilen barakada Harput’un Çemişkezek kazâsından üç Ermeni âilesinin ikâmet etdirildiği ve kilise meclis i cismânî a‘zâsından lede’s suâl Ermeni muhâcirleri çadırlara ve kilise ve mekteblere muvakkaten iskân edilmiş ise de bir tarafdan tedrîcen gelmekde olan muhâcirîne artık yer kalmadığı ve Muhâcirîn Müdîriyetince on çadırdan başka çadır verilemediği ve ânifü’l arz üç Ermeni â’ilesi içün vücûda getirilen o barakanın hedmi husûsunun mevsim i sayfa ta‘lîk edilmesi beyân olunduğu tasrîh kılınmış olmağla arz ı keyfiyete ictisâr olunur. Ol bâbda emr ü fermân hazret i veliyyü’l emrindir.

Fî 13 Rebîü’l evvel sene [1]340 ve

Fî 14 Teşrîn i Sânî sene [1]337

Şehremîni

Bende

İmzâ