| Acıtərə-vəzəri – Кресс-салат – Lepidium sativum. Xaççiçəklilər (Cruciferae) fəsiləsindən uzunluğu 30-60 sm olan birillik bitkidir (Lepidium sativum). Yarpaqları şaxəli və ya bütöv, çiçəkləri ağ rəngdədir. Vətəni Iran hesab edilir. Acıtərə Qədim Misirdə, Yunanıstan və Romada istifadə olunan tərəvəzdir. Mülayim və isti iqlim olan rayonlarda yetişir. Yarpaqlarında kalium və kalsium duzları, yod və dəmir vardır. Bunun acı yandırıcı dadı tərkibindəki qlükotropeolin və lepidin qlükozidlərinin miqdarından asılıdır. Isti şitilliklərdə yetişən acıtərənin tərkibində 84,5 mq% C vitamini, 2,27 mq% karotin vardır. Açıq torpaqda yetişəndə isə müvafiq olaraq 164,7 və 3,76 mq%-dir. Yaşıl kütləni fermentləşdirdikdən sonra 0,115% efir yağı almaq mümkündür. Efir yağının əsasını benzil-xardal yağı təşkil edir. Toxumunda 22,8-25% yağ vardır.
Acıtərə müxtəlif salatlara, ət xörəklərinə və şorabalara qatılır. Təzə halda süfrəyə verilir. Pendirlə yeyildikdə iştahaçıcı qəlyanaltı hesab edilir.
Dostları ilə paylaş: |
