Elektr energiyasın sheklew hám óshiriw tártipleri haqqında

Elektr energiyasın sheklew hám óshiriw tártipleri haqqında

Sheklew degenimiz bul-shártnamada názerde tutılǵan ilájlardı ámelge asırıw aqıbetinde belgili bir wakıt aralıǵı dawamında, sonday-aq elektr tarmaqlarında fors major xalatlar sebepli bolǵan avariyalıq rejimler waktında tutınıwshıǵa shártnamada belgilengen elektr energiyası yaki kuwattı jetkerip beriw muǵdarınıń kemeyiwi.

Elektr energiyasın sheklew, sonday-aq tutınıwshılar júklemeleri grafiklerin tártipke salıw is-ilájların ámelge asırıw, sheklewler boyınsha dúzilgen grafikke muwapıq «Ózbekenergo» MAK hám oǵan qaraslı aymaqlıq kárxanalar tárepinen tastıyıqlanǵan tártipte ámelge asırıladı.

Quwat hám elektr energiyası tutınıwın sheklew hám óshiriw grafikleri tutınıwshılar tárepinen aymaqlıq elektr tarmaqları kárxanası menen birgelikte islep shıǵıladı, jergilikli mámleketlik xákimiyat uyımları menen kelisiledi, «Ózbekenergo» MAK hám oǵan qaraslı aymaqlıq kárxanalar tárepinen tastıyıqlanadı hám energosistemada quwat hám energiya jetispegen jaǵdaylarda engiziledi.

Sheklew hám óshiriw grafikleri energosistemada elektr energiyası hám quwat jetispegen jaǵdaylarda elektrostanciya hám elektr tarmaqları úskeneleriniń jol qoyıp bolmaytuǵın sharayatlarda islewiniń aldın alıw, avariya júzege keliwiniń aldın alıw hám de tutınıwshılardıń tártipsiz óshiriliwin boldırmaw ushın dúziledi.

Elektr energiyasın sheklew hám óshiriw grafikleri usı jıldıń 1-oktyabrinen keyingi jıldıń 1-oktyabrine shekemgi aralıqqa dúziledi hám grafiklerge kirgizilgen barlıq tutınıwshılar ushın orınlaw májbúriy esaplanadı.

Grafikler tómendegi túrlerde dúziledi:

-energosistemada janılǵı hám gidroresurslar jetispegende, elektr energiyasın sheklew grafigi;

-energosistemada quwat jetispegende, quwattı sheklew grafigi;

-elektr energiyası hám quwattı sheklew grafiklerin engiziw ushın waqıt bolmaǵan jaǵdaylarda júzege kelgen quwat jetispewshiligi aqıbetinde, avariyanıń aldın alıw ushın qollanılatuǵın quwat boyınsha óshirip engiziw grafigi;

-ayırıqsha awır avariyalıq rejimlerde, elektr energiyasın turaqlı jetkerip beriw buzılıwınıń aldın alıw maqsetinde, tutınıwshılardı óshiriwdiń arnawlı grafikleri islep shıǵıladı. Bunday jaǵdaylarda tutınıwshılarǵa elektr energiyasın jetkerip beriw avariyalıq bronǵa shekem shekleniwi múmkin. Bul grafik boyınsha óshiriw waqtında járdemshi stanciyalar hám liniyalar arqalı rayon, qala aymaqları tolıǵı menen óshiriledi.

Esletpe: Elektr energiyasın sheklew boyınsha tolıq maǵlıwmat Ózbekistan Respublikası Ministrler Kabinetiniń 2009 jıl 22- avgust kúngi 245-sanlı qararı menen tastıyıqlanǵan «Elektr energiyasınan paydalanıw qaǵıydaları»nıń X-bap 149-154 bántlerinde kórsetilgen.