Qızıl xəncər olma
Öz yolumda qəsdim qədər zillətəm!
Taleh günahkarmı, ya doğan anam?
Parçalanmış, tikələnmiş millətəm,
Od vuran lazımdı kabab tək yanam-
Bölünən, talanan Azərbaycanam!
Təpə olub cığır üstə dayanma-
Alçaqlar da gəlib keçər üstündən!
Bir vulkan ol, sakit-sakit oyanma,
Elə kükrə dağlar qorxsun tüstündən!
Heykəl yarat məğrurluğun büstündən!
Xoflanma düşməndən, olma ağbəniz!
Yarım sevincdənsə, dolu kədər ol!
Demirəm ümman ol, ya da ki dəniz,
Yatan şəhidlərin qanı qədər ol!
Yaralı pələngin canı qədər ol!
Sən elə qüdrət ol, güvənə bilim!
Sən elə nifrət ol, alasan qanı!
Qalmasın illərə acı nisgilim,
Lərzəyə salınsın düşmənin canı!
Tarixə həkk elə bu adı-sanı.
Qızıl xəncər olma, düşüb kitaba
İllər boyu muzeylərdə yatasan!
Taqət qalmayıbdı dözümə, taba,
Paslı tiyə ol da, bu gün batasan!
Bəlkə bu cür mətləbinə çatasan!
Yedi dünyanı
Yenə yerdə qaldı
yetimin ahı!...
Yenə çapdı, çaldı,
Xəsisin tamahı
yedi dünyanı!...
Leylacın naxışı,
Avamın ağzıayrıq baxışı,
yalançı vədlərin
sabahı yedi dünyanı!...
Mütilik zamanından,
“dinsizin imanı”ndan,
“cılızların əti”ndən,
“namərdin qeyrəti”ndən,
“arsızın həyası”ndan,
naqisin mayasından
tutulan bir siyahı
yedi dünyanı!
gidi dünyanı!
Dostları ilə paylaş: | 
