Əli Aslanoğlu

Yamandı, yalandı...
Qudurmuşun mırıltısı,

Yaltaq gülüş hırıltısı,

Evdə qarğa qarıltısı,

Həris gözün parıltısı

yamandı, yaman!
Göz yaşının şırıltısı,

Yoxsul qapı cırıltısı,

Boş mədənin qurultusu,

Hap-gopların gurultusu,

yamandı, yaman!
Döyülənin şappıltısı,

Yıxılanın tappıltısı,

Ağlayanınm zıqqıltısı,

Ağrıyanın zoqqultusu

yamandı, yaman!
Boş təhnənin taqqıltısı,

Sınan könül şaqqıltısı,

Qəfil ürək tappıltısı,

Bu dünyanın zıppıltısı

yamandı, yaman!
Ağır yükün boyunluğu,

Ciddiyyətin oyunluğu,

Qananların qoyunluğu,

Acgözlərin doyumluğu

yamandı, yaman!
Saxtakarın qəyyumluğu,

Cibi boşun soyumluğu,

Hər ölçünün boyumluğu,

Hər zurnanın toyumluğu

Yalandı, yalan!...

Yalandı, yalan!...

2001

Kaş öləydik üzüsulu
İnsan suyla qatmaqarış,

Çox söz gəzir aralıqda!

Gəzib baxsan qarış-qarış

Dastan yatır oralıqda!

Suyu dibdən bulandırıb

Orda balıq tutanlar var.

Yüz cür hiylə dolandırıb

Su altına yatanlar var!

Dərdin suya deyən də var,

Tapa bilmir özgə əlac!

Ağlın suyla yeyən də var,

Odur qalıb ac-yalavac!

Sudan susuz gələn də var,

Bu dağlarda, bu çöllərdə.

Suyla divar dələn də var,

Suya getməz keçəllər də!

Gönü suya verən də var,

Gözün suyun sıxan da var,

Susuz yuyub sərən də var,

Sudan quru çıxan da var!

Dartırıq ki, sudan çulu

Belimiz yağır olmasın!

Kaş öləydik üzüsulu,-

Qalana ağır olmasın!....

Xəyallar

Ötən günlərimi gəzib dolaşıb

Muncuq tək bir sapa düzən xəyallar!

Tufanlı dənizdə dalğalar aşıb

Mənsiz sahillərə üzən xəyallar!
Bir anda illəri-illərə qatıb

Bəxtəvər əliniz hər yana çatıb!

Yerdəki dərdimi bir yana atıb

Göydə şahin kimi süzən xəyallar!

Gah enib göylərdən, gah ucalırsız,

Gah gəlib beynimdə lövbər salırsız,

Gah da yoxa çıxıb itgin qalırsız,

Bilinmir yeriniz bəzən, xəyallar!

Qoymayın bu dövran sizi aldada,

Ömrümü, günümü verdiniz bada.

Fürsət düşən kimi keçib daldada

Bir ülvi məhəbbət gəzən xəyallar!