Əli Aslanoğlu Yovşanlıq şərqiləri Bakı 2009 Redaktoru: Firuz Mustafa Əli Aslanoğlu. Yovşanlıq şərqiləri

Katib: (gəlir)

Ayağa qalxın! Hakim gəlir!

Hakim: (İki məşvərətçi ilə birlikdə gəlir)

Oturun! Cənablar, bu gün baxacağımız işin məhkəmə iclasını açıq elan edirəm. Məhkəməyə məlumat vermək üçün söz ittiham­çıya verilir:

İttihamçı: (qalxıb əlini ədalət maşınının üstünə qoyaraq)

And içirəm ki, sözümdə heç bir qərəz olmayacaq. Əgər olsa, Ədalət maşını məni dayandırsın!

(sonra qovluğu götürüb vərəqləyərək oxuyur)

Haqq dərgahına bir neçə il ərzində daxil olmuş şikayət ərizə­lə­rinə müvafiq olaraq haqqın hüzuruna əcəl tamamı ilə göndə­ril­miş Zalım şahın məhkəməsi üçün aşağıdakı sənəd və materialları təqdim edirəm.

1. 
   Hələlik sağlıqda olan və ona görə də ruhlarının bu gün bu­raya şahid kimi çağırılması mümkün olmayan 77777 şikayət­çinin haqq maşınında qeydiyyata alınmış şikayətlərindən ümumi arayış şəklində çıxarış.
   
2. 
   7 il bundan əvvəl ölmuş, hazırda ruhu burada şahid kimi iştirak edən mərhum Məhəmməd kişinin 7 il öz baxılmasını göz­lə­yən ərizəsi.
   
3. 
   7 ay bundan əqdəm vəfat edib, hazırda cənnətdə məskun­laş­mış Əbdüləlinin ərizəsi. Bu gün ruhu burada iştirak edir.
   
4. 
   7 gün əvvəl qəza yolu ilə ömrünü tamama yetirmiş Firəngiz xanımın ərizəsi. Qeyd etməliyəm ki, Firəngiz xanımın cənnət və ya cəhənnəmdə daimi məskunlaşması bu günkü məhkəmə üzləş­məsi ilə əlaqədar olduğundan, o, hələlik cəhənnəm qapıları önün­də müvəqqəti sakin kimi yerləşdirilmişdir.