Elm İşığı İslam İnqilabının Böyük Rəhbəri həzrət Ayətullah Seyid Əli Xameneinin elm və elm istehsalı barədə çıxışlarından seçmələr

Qərbin elm mərkəzlərinin İslam fəlsəfəsinə diqqəti

İslam fəlsəfəsinin varlıq aləminin və fəlsəfənin mühüm məsələlərində çox əhəmiyyətli sözləri var. Bu gün dünyanın mühüm beyin mərkəzlərinin çoxunda İslam fəlsəfəsi hörmətə və diqqətə layiq bir fenomen kimi müzakirə olunur. Məşhur universitet müəllimlərindən biri - adını çəksəm, hamınız onu tanıyarsınız. Allah rəhmət eləsin! Dəyərli universitet müəllimlərindən idi; həm humanitar elmləri bilirdi, İslam fəlsəfəsini oxumuşdu, həm də Qərb elmlərini, Qərb fəlsəfəsini, ədəbiyyat və tarixi öyrənmişdi və xarici dilləri mükəmməl bilirdi – vəfatından bir neçə il öncə yaradıcılıq məzuniyyəti çərçivəsində səhv etməsəm, bir müddət Avropada qalmışdı. O, İrana qayıdanda bizim dostlarımıza demişdi və onlar da mənə söylədilər ki, bu gün humanitar elmlərə və fəlsəfəyə dair məşhur elm mərkəzləri və universitetlər Şeyx Ənsari və Molla Sədra kimi şəxsiyyətlərə təşnədirlər.

Şeyx Ənsari İslam hüqunun nümayəndəsidir, Molla Sədra da İslam fəlsəfəsinin. Bunlar - Şeyx Ənsari və Molla Sədra orada çox da tanınmasalar da, şübhəsiz ki, hər ikisi İslam dünyasının dahilərindəndir. Onlarla tanış olan hər bir kəs qarşılarında hörmət və təzim hissi keçirir. Biz bu böyüklərin qədrini bilmirik. İslam fəlsəfəsinə, Molla Sədra fəlsəfəsinə, mərhum Əllamə Təbatəbainin və bu sahələrdə işləyənlərin tədqiqatlarına universitet proqramlarında diqqət yetirilməlidir.²³⁰