Elm İşığı İslam İnqilabının Böyük Rəhbəri həzrət Ayətullah Seyid Əli Xameneinin elm və elm istehsalı barədə çıxışlarından seçmələr

İnkişaf üçün möhkəm insanların zəruriliyi

Siz əziz cənablar - istər məmurlar, istər elmi şura üzvləri bütün səyinizi ölkənin inkişafına sərf etməli və dayanmamalısınız. Ölkənin inkişafa, inkişafın da möhkəm və güclü insanlara ehtiyacı var. Möhkəm və güclü insanlar mənəvi bünovrə baxımından möhkəm olanlardır və təbii ki, bu möhkəmlik imanla, mənəviyyatla, amallara könül verməklə və məqsədləri unutmamaqla əldə edilir. Tədqiqat və elm də inkişaf üçün vacib vasitələrdir.¹¹⁹

Çətin elmi tədqiqatlarda imanın həvəsləndirici olması

Ölkəmizdə başqa bir müsbət amil vardır və o, dindarlıqdır. Son onilliklərdə, xüsusən də on doqquzuncu əsrdən bu yana dindarlığın elmə və elmi inkişafa mane olduğunu təlqin etməyə çalışmışlar. Lakin həqiqət bunun əksinədir. Elmi inkişafın bir növ imana ehtiyacı var. Laqeyd, özbaşına, tüfeyli, nağd və şəxsi gəlirin ardınca qaçan adətən çətin elmi tədqiqatla məşğul olmur. Əgər iman insanın qəlbinə hakim olsa, bu onun çətin elmi tədqiqata sarı getməsinə kömək edər. Çünki elmi tədqiqat işi şirin olmaqla yanaşı, həm də çətindir, problemləri var. Görürsünüz ki, bir bazar dəllalı nə qədər qazanır, alim isə belə deyil. Alimin qanı qarala bilər ki, məsələn, məişət imkanları aşağıdır, lakin qəlbində nəyin bahasına olursa-olsun, bu vəziyyətini o alverçinin vəziyyəti ilə dəyişməyə razı olmaz. Əsla mümkün deyil desinlər ki, sən elmini ver, onun pulunu al və o da razı olsun; yəni elmin qədrini alim bilir. Deməli, elmi işlə məşğul olmağın əziyyəti, bəzən məhrumluğu və problemləri var. Əgər insanın qəlbinə iman hakim olsa, onun bu çətin yolu qət etməsinə kömək edər.¹²⁰