18 iyul, 2012
TÜKƏNMƏZ HƏVƏS
Nə böyük güc verib Tanrı adama,
Hər zərbə önündə vüqarla durur.
Özü də bilir ki, öləcək, amma,
Ömrün sonunadək yaradır, qurur!
22 mart, 2009
SƏNSİZ YAŞAMARAM
Bir parça odundan ocaq yaranmaz,
Hey çalış, zəhmətin gedəcək boşa.
Quş qalxıb səmada dövrə vurammaz,
Əgər qanadları olmasa qoşa.
Göz qoyun tək-tənha görünən Aya,
Sinəsi həsrətdir dənizə, çaya.
Nə qala yaranar, nə də ki qaya,
Bir daş qovuşmasa başqa bir daşa.
Canda tez yorulub, duran ürəkdir,
Onunçün dözmür ki, bircədir, təkdir.
İki göz gərəkdir, qulaq gərəkdir
Yorulmaq bilmədən düşünən başa.
Meylimi özgəyə sala bilmərəm,
Özgədən güc, qüvvət ala bilmərəm.
Mən sənsiz bircə gün qala bilmərəm,
Sən mənsiz nə qədər istəsən yaşa!
Dostları ilə paylaş: |
