GƏLİN BİR AZ DÜŞÜNƏK
Dostlarımdan birinin ad günü ilə bağlı məclisi idarə etmək mənə tapşırılmışdı. Təxminən dörd saat çəkən və çox maraqlı alınan bu ziyafəti səbənkarın işarəsilə yekunlaşdırmaq istəyəndə qonaqlardan biri ayağa qalxıb: “ Biz əylənməkdə davam edəcəyik , əgər sizin sözünüz tükənibsə, danışmaya da bilərsiniz” , – dedi.
Ona verdiyim cavabı poetik şəklə salaraq oxuculara təqdim etməyi özünə borc bilirəm, cünkü son vaxtlar cəmiyyətimizdə özünü belə aparanların sayı artır.
Şairin sinəsi söz xəzinəsi –
Sözə güvənəndə söz tükənərmi?
Dünyanı qızdırır şair nəfəsi,
Könül ocağında göz tükənərmi?
Səninçün səfərdir yolları keçmək,
Mənsə hər addımda iz axtarıram.
Harda olursansa sən yemək-içmək,
Mənsə bir gərəkli söz axtarıran!
Səni düşündürür qaynayan qazan –
Çünkü öz nəfsinin olmusan qulu.
Mənisə cəlb edir yaradan, yazan;
Kitaba, dəftərə verirəm pulu.
Öyrənməklə keçir şair həyatı,
Arıtək hər güldən bir şirə alır.
Nə qədər gəraylı, qoşma bayatı
Onun yaddaşına yazılıb qalır.
Ədəbi irsimiz çox zəngin, dərin!..
Bu irsi öyrənmək olubdur peşəm.
Yazmağım bir yana, neçə şairin
Yüzlərlə şeirini əzbərləmişəm.
Mən sözə vermişəm bil ki, qəlbimi –
Oraya düşən söz itəsi deyil.
Dursam danışmağa – səhərə kimi
Çıxışım, söhbətim bitəsi deyil!
Fəqət bu addımın nə mənası var?
Niyə insanların vaxtını alaq?
Sabahdan borc alır vaxtı adamlar –
Nə üçün bu qədər biz işsiz qalaq?
Yadların çoxalır qorumaq həvəsi,
Bir işi bitməmiş birini seçir.
Bizdəsə həyatın xeyli hissəsi
Elə məclislərdə, toylarda keçir.
Axı gərəklidir ömrün hər anı,
Ö, ömrə gəlməyir, ömürdən gedir.
Sakitcə öldürüb vaxtı, zamanı
İnsan öz ömürnə xəyanət edir.
Həyat verilməyib tək şənlik üçün,
Qısaldaq vaxtını toy- bayramların.
Sabahki işləri düşünək hər gün,
Bilək qiymətini ötən anların!
Dostları ilə paylaş: | 
