Bu iki qəzəl «Gülümsər» və «Könül» adları ilə «Ədəbiyyat qəzeti»ndə dərc olunmuşdur (9 may 1946, № 13). Son üç nəşrə salınmış bu iki qəzəli şair həmin illərdə bir neçə şirin qəzəl yazan Süleyman Rüstəmə ittihaf etmişdir. Bir avtoqrafda «Könül» qəzəlinin 1944-cü ilin fevralında yazıldığı göstərilir. Avtoqraflarda qəzəllərə ad verilmişdir. Burada son nəşrin mətnləri əsas götürülmüşdür.
ƏDHƏM «Yeni Füyuzat» jurnalı, 4, 11, 25 yanvar, 15 fevral 1911 (№ 1, 2, 4, 6). «A.Ş.» imzası ilə «Mərhəmətli Ədhəm» adı altında çap olunmuşdur. Bütün nəşrlərə daxil edilmişdir. Poemanın avtoqrafı saxlanmamışdır. Nəşrlərdə poemanın 1908-ci ildə yazıldığı qeyd olunur. Müəllif poemanı bir neçə dəfə nəşr etdirmiş (Bax: Ədhəm. Keçmiş həyat səhifələrindən, «İnqilab və mədəniyyət» jurnalı, 1935, № 6-7, s.8-10; Lövheyi-qürub. «Mərhəmətli Ədhəm» adlı hekayədən bir parçadır. A.Şaiqin «Milli qiraət kitabı», Bakı, 1922, s. 46; Eyni parça müəllifin «Qiraət kitabı»nda da çıxmışdır, Bakı, 1924, s.28-29) və üzərində işləmişdir. Burada son nəşrin mətni əsas götürülmüşdür.
