ƏZİz bacima nəSİHƏT

Əziz bacım! Elə bilmə ki, örtünmək yalnız qadınlara aiddir. Xeyr, sadəcə fərq burasındadır ki, kişinin başıaçıq olması icazəli, qadınlarda isə qadağandır. Kişinin hicabı - gözlərini naməhrəmdən yummaq və örtülməsi vacib olan bədən üzvlərini gizlətməkdir. Qadın və kişilərin geyim formalarına qoyulan tələblərin əsas mahiyyəti ondan ibarətdir ki, onlar digərlərin nəzər-diqqətini özünə cəlb etməsin və insanda özünə qarşı ciddi münasibət yaratsın. Başqa sözlə desək, ətrafdakı insanların hüquqlarına təcavüz etməsin.

Əgər kişi və qadın kamil hicaba riayət edərsə, fəsadın da sayı azalar. “Nur” surəsinin 30-cu ayəsində buyurulur:

قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ

«Mömin kişilərə de ki, (başqalarının ayıb yerləri və yad qadının bədəni kimi baxılması haram olan şeylərlə qarşılaşanda) gözlərini yumsunlar və ayıb yerlərini (görünməkdən) qorusunlar. Bu onlar üçün daha pakdır. Həqiqətən Allah onların etdiklərindən xəbərdardır.»

Qadın üçün hər şeydən mühüm hicab və iffətdir. O, öz şəxsiyyətini dərk etsə, artıq oyun-oyuncağa və alış-veriş əşyasına çevrilməz. Nəticədə isə öz gözəlliyini çirkin adamların tamaşasından qoruyub saxlayar və yalnız ərinə məxsus olar.

Qadın və kişilər Allah-təalanın dinindən və Əhli-beytin (ələyhimussalam) yolundan uzaqlaşdıqca, onlara bəlalar gəlir və cəmiyyətdə pozğunluq yaranır. Kişilər evlənmir, qadınlar ərə getmir. Evlənənlər də, az müddət yaşayıb ayrılırlar. Çünki onların dünyaya məhəbbətləri, Axirət-Cənnət məhəbbətindən daha güclü olur. Bu cür qadınlar dünyanın keçici bər-bəzəyini və naz-nemətini, Axirətin əbədi həyatından üstün tuturlar. Əri üçün yox, yadlar üçün bəzənib-düzənən qadın, kimə lazımdır?

Əziz bacım! Yeri gəlmişkən bir ayənin təfsirinə işarə etmək istərdim. Qurani-Kərim buyurur:

هُنَّ لِبَاسٌ لَّكُمْ وَأَنتُمْ لِبَاسٌ لَّهُنّ

«Siz onların, onlar da sizin libasınızdır.»¹

Zövcənin libasa oxşadılmasında bir çox incə nöqtələr var:

1. Libas - forma, rəng və parça baxımından insana münasib olmalıdır. Zövcə də insanın oxşarı olmalı, onun fikri, əqidəsi, şəxsiyyəti ilə uyğun gəlməlidir.

2. Libas - zinət və aramlıq səbəbidir. Zövcə və övlad da ailədə aramlığın əsasıdır.

3. Libas - insanın eybini örtür. Ər-arvad da bir-birlərinin eyblərini, nöqsanlarını örtməlidirlər.

4. Libas - insanı istidən və soyuqdan qoruyur. Həyat yoldaşı da ailə ocağında istiliyi saxlamalıdır.

5. Libassızlıq - rüsvayçılıqdır. Subaylıq da azğınlıq və rüsvaylıq səbəbi olur.

6. Soyuq havada qalın, isti havada yüngül libasdan istifadə olunur. Ər-arvad da bir-birilərinin ruhi ehtiyaclarına münasib əxlaq və rəftarla cavab verməlidirlər. Əgər kişi əsəbidirsə, qadın onunla yumşaq rəftar etməlidir. Və əgər qadın xəstədirsə, kişi də onunla keçinməlidir.

7. İnsan öz libasını çirkabdan qorumalıdır. Həyat yoldaşları da bir-birlərini günaha batmaqdan hifz etməlidirlər.¹