Azərbaycan Respublikası Təhsil Nazirliyi
Bakı Dövlət Universiteti
FƏLSƏFƏ KAFEDRASI
DOKTORANTURAYA QƏBUL PROQRAMI ÜZRƏ
TƏBİƏTİN FƏLSƏFƏSİ
ixtisas fənnindən
PROQRAM
BAKI – 2013
Tərtib edən: dos. H.Q.Məmmədov
Elmi redaktor: prof. Z.C.Hacıyev
Rəyçi: prof. Ə.B.Məmmədov
Təbiətin fəlsəfəsi.
1-ci Mövzu. Fəlsəfə dünyagörüşüdür
Fəlsəfəni öyrənməyin əhəmiyyəti. İnsanların həyatında və fəaliyyətində dünyagörüşünün rolu. Fəlsəfə dünya və insanın buradakı yeri haqqında düşünülmüş, sistemli və mötəbər biliklər sistemidir. Fəlsəfənin nəzəri elm kimi həll etdiyi əsas məsələlər. Dünyanın nəzəri mənzərəsinin anlaşılmasında fəlsəfənin yeri.
Dünyagörüşünün əsas səviyyələri: dünyaduyumu (dünyanı hiss etmə), dünyanı qavrama və dünyanı anlama. Fəlsəfə elmi dünyagörüşüdür. Fəlsəfi dünyagörüşünün əsas xüsusiyyətləri. Fəlsəfənin, mifologiya və dini dünyagörüşü ilə ümumi və fərqli cəhətləri.
Fəlsəfə «dünya-insan» münasibətləri sisteminin ən ümumi tərəfləri, varlığın və idrakın ümumi prinsipləri və qanunauyğunluqları haqqında elmdir.
«Dünya-insan» münasibətləri sisteminin əsas tərəfləri. Bu sistemin ontoloji, qnoseoloji, aksioloji və mənəvi-praktiki səpkiləri. Maddi ilə mənəvinin, obyektiv ilə subyektivin, materiya ilə şüurun münasibətlərinin fəlsəfədə mərkəzi yeri. Əsas fəlsəfi məsələlərin anlaşılmasında materializm və idealizmin mövqeyi.
Dostları ilə paylaş: |
