Galata'da, Haseki Sultan evkafına ait evin, burada mektep ve çeşme yapmak isteyen Gümrük emini Hasan'ın mülk evi ile istibdaline dair hüküm

17/261/1186 İstanbul'da, Fenerkapısı yakınında icâreteyn usulü ile eve tasarruf eden zimmi kadın ve bu evin yarısını isteyen damadı arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Dimitra gelüp dâmâdı Londri nâm zimmî mahrûse-i mezbûrede (boş) evkãfından Fener kapusı kurbında icâre-i mu‘accele ve müeccele ile mutasarrıf olduğı vakf menzilün nısfını bana ferâğat itmen gerek idi diyü hilâf-ı şer‘ rencîde itmeğle şer‘le görilmek üzre yazılmışdur.

[Fî] evâsıt-ı L sene [1]105 [5-14 Haziran 1694]

17/270/1231 İstanbul'da, Sultan Mehmet câmi‘ ve imâreti evkafına ait İstanbul'daki Alacahamamı'nın daha yüksek bir kira bedeli öneren Hacı Veli'ye kiralandığına, eski kiracı veya başkasının buna aykırı müdahalesinin önlenmesine dair hüküm.

İstanbul kãimmakãmına ve kãdîsına hüküm ki:

Kıdvetü’l-emâsil ve’l-akrân el-Hâcc Velî zîde kadruhû Dergâh-ı mu‘allâma arz-ı hâl idüp İstanbul'da vâkı‘ merhûm Sultân Mehmed Hân tâbe serâhu câmi‘-i şerîf ve imâret-i âmireleri evkãfı musakkafâtından olup mahrûse-i İstanbul'da vâkı‘ Alaca hammâm dimeğle ma‘rûf hammâm senede kırk bin akçe icâre ile Hâcı Mehmed nâm kimesnenün üzerinde olup izdiyâdı ile virilmek vakfa enfa‘ olmağla senede on iki bin akçe izdiyâd ile senevî elli iki bin akçe icâre olmak üzre yüz beş senesi Ramazân'ı gurresinden üç sene bir tahvîl ile on bin akçesi âhar icâre-i mu‘ayyenesine sarf bâkï kırk ikişer akçe ki üç senede cem‘an yüz yiğirmi bin akçeye(?) ber vech-i tahvîl vakfa teslîm idüp mütevellî-i vakf Abdurrahmân zîde mecduhû tarafından mühürlü virilen temessük mûcebince emr-i şerîfüm virilüp odun ve âteştâb(?) vesâir masrafa(?) dört yüz guruş harc eylemişiken mezbûr Hâcı Mehmed hilâf-ı inhâ fuzûlî bilâ temessük zabt idüp gadr itmeğle yedinde olan temessüki ve mukaddemâ virilen emr-i şerîfüm mûcebince mezbûr el-Hâcc Velî'nün on iki bin akçe(?) vakfa sa‘y(?) ve nef‘i olmağla mütevellî temessüki mûcebince zabt itdürilüp merkúm el-Hâcc Mehmed'i ve âharı dahl ü ta‘arruz itdürilmeye diyü(?) hüküm yazılmışdur.

Fî evâil-i L sene [1]105 [26 Mayıs-4 Haziran 1694]

17/280/1783 Hayreddin Paşa evkafının mütevellisi ve vakıftan vazife talep edenler arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Hayreddîn Paşa evkãfınun mütevellîsi İbrâhîm gelüp vakf-ı mezbûr müstağallâtı kurâ ve mezâri‘ olmayup nükúd ve müstağallât olup vakfda müsâ‘ade yoğiken âhardan (boş) ve (boş) nâm kimesneler mücerret(?) vazîfe talebiyle rencîde itmeleriyle fetvâ-yı şerîfe mûcebince şer‘le görilmek içün yazılmışdur.

[Fî] evâsıt-ı L sene [1]105 [5-14 Haziran 1694]

17/301/1368 Borcunu ödemeyen Beypazarı'nda sakin seksen beş cemaatinin mütekaidi Hacı Ramazan'ın İstanbul'a ihzarına dair hüküm.

İstanbul'da sekbânbaşısına hüküm ki:

Esir(?) Alî gelüp Beğbâzârı sâkinlerinden seksen beş cemâ‘atinün mütekã‘idlerinden Hâcı Ramazân zimmetinde bir senelik icâresinden yüz kîle mahsûli olup virmekde te‘allül itmeğle tarafından mübâşir gönderüp ahvâlleri şer‘le görilmek içün Âstâne'ye ihzâr itdüresin diyü Yeniçeri ağası Hâcı Abdullâh'a mühürlü mektûb virilmeğle mûcebince hüküm yazılmışdur.

[Fî] evâhir-i N sene [1]105 [16-25 Mayıs 1694]

17/302/1371 Galata'da, Ağa Dimi(?) mahallesindeki vakıf evin tasarruf nöbetinin kendisine geldiğini söyleyen Fatma Hanım ve bu evi zorla zapteden şahıs arasındaki ihtilafın ilgili kadılıkta görülmesine dair hüküm.

İstanbul kãimmakãmına ve Haremeyn-i şerîfeyn evkãfınun müfettiş vekîline hüküm ki:

Fâtıma Hâtûn gelüp mahrûse-i Galata'da Ağa Dimî(?) mahallesinde vâkı‘ menzile mutasarrıfe olan vâlidesi Hümâ Hâtûn zikr olınan menzilün tevliyet ve süknâsın vâkıfun utekãsına ve utekãsınun evlâdına ve evlâd-ı evlâdına vakf ve şart idüp mutasarrıfiken müteveffiye olup nevbet-i tasarruf mezbûreye intikãl ve ber mûceb-i şart-ı vâkıf mutasarrıfe iken ecânibden (boş) nâm kimesne teğallüben zabt idüp ziyâde gadr itmeğle yedinde olan fetvâ-yı şerîfe mûcebince amel olınmak yazılmışdur.

Fî evâhir-i N sene [1]105 [16-25 Mayıs 1694]

17/302/1375 Muhasebesi görüldüğünde vakfa hıyaneti zahir olmayan İstanbul, Eyüp ve Üsküdar'daki evkafların mütevellisinin tekrar muhasebe teklifi ile rahatsız edilmemesine dair hüküm.

İstanbul kãimmakãmına ve kãdîsına hüküm ki:

İstanbul ve Eyyûb ve Üsküdar'da vâkı‘ evkãflarun mütevellîsi Mehmed gelüp vakf-ı merkúm İstanbul kãdîsı nezâretinde olmağla muhâsebesin görüp vakfa hıyâneti zâhir olmayup dahl olınmak îcâb itmez iken mücerred ta‘cîz içün tekrâr muhâsebe teklîfi ile te‘addî itmeğle hilâf-ı şer‘ ve muğãyir-i şart-ı vâkıf dahl ü te‘addî olınmamak üzre yazılmışdur.

[Fî] evâhir-i N sene [1]105 [16-25 Mayıs 1694]

17/311/1410 Müstedam Çavuş vakfından ödünç aldığı akçe karşılığında Sancaktar Hayreddin mahallesindeki mülk evini rehin koyup borcunu edaya razı olan şahıstan mütevellinin faiz namıyla haksız yere akçe talep etmemesine dair hüküm.

İstanbul kãimmakãmına ve kãdîsına hüküm:

Avadik nâm zimmî gelüp bundan akdem müteveffâ Müstedâm Çâvûş vakfı mütevellîsi Mustafâ'dan zimmetinde olan mâl-i vakfdan iki yüz guruş istikrâz ve mukãbelesinde Sancakdâr Hayreddîn mahallesinde mülk menzilini rehn vaz‘ idüp düyûn-ı sahîha-i şer‘iyyeden şer‘an zimmetine lâzım geleni edâya râzî iken mütevellî ribâ nâmıyla bilâ mesâğ dört yüz seksen guruşın almış iken hâliyâ bîvech-i şer‘î akçe taleb itmeğle murâfa‘a olınduklarında hükm olınduğı guruş hükm birle hüccet virilmişiken tekrâr nizâ‘ itmeğle fetvâ-yı şerîfesi mûcebince yazılmışdur.

Fî evâil-i L sene [1]105 [26 Mayıs-4 Haziran 1694]

17/312/1418 İstanbul'da, Sultan Mehmet vakfından ilk düşen mahlulün talebeden Seyit Nesim? Abdülkadir'e verilmesine dair hüküm.

İstanbul'da Sultân Mehmed mütevellîsine hüküm ki:

Seyyid Nesîm(?) Abdülkãdir gelüp talebe-i ulûmdan olup cihet-i ma‘îşetde zarûreti olduğın bildürüp düşen mahlûlden kendüye vazîfe ve fodula virilmek bâbında hüküm recâ itmeğin sen ki mütevellî-i mezkûrsun ibtidâ düşen mahlûl mezbûra virilmek içün yazılmışdur.

Fî evâil-i L sene [1]105 [26 Mayıs-4 Haziran 1694]

17/323/1461 İstanbul'da, Reisülküttap Mustafa Efendi vakfına ait evin emsal kirasını ödeyen kiracıyı, mütevellinin ziyade kira talebiyle incitmemesine dair hüküm.

İstanbul kãimmakãmına ve kãdîsına hüküm ki:

Seyyid Abdurrahmân arz-ı hâl idüp mahrûse-i İstanbul'da vâkı‘ müteveffâ Reîsülküttâb Mustafâ Efendi vakfından icâre-i mu‘accele ile mutasarrıf olduğı vakf mezilinün ecr-i misle mu‘âdil icâresin virmeğe râzî iken mütevellîsi (boş) nâm kimesne kanâ‘at itmeyüp ecr-i mislinden ziyâde icâre talebiyle rencîdeden hâlî olmamağla şeyhülislâm fetvâ-yı şerîfesi mûcebince yazılmışdur.

Fî evâil-i L sene [1]105 [26 Mayıs-4 Haziran 1694]

17/324/1464 Hayreddin Paşa evkafı parasının zayi olma ihtimali sebebiyle hakim oyu ile vakfa yararlı akara tebdil eden mütevelliye kimsenin müdahale etmemesine dair hüküm.

İstanbul monlâsına:

Müteveffâ Hayreddîn Paşa evkãfınun evlâdiyyet ve meşrûtiyyet üzre mütevellîsi olan İbrâhîm gelüp vakf-ı mezbûrun nükúdı zâyi‘ olmak ihtimâli olmağla re’y-i hâkim ile vakfa nâfi‘ akãra(?) tebdîl eylemek murâd eyledükde ba‘zı kimesneler mâni‘ olup te‘addî eyledükleri ve yedinde fetvâ-yı şerîfesi olduğın bildürüp hüküm recâ itmeğin şer‘le görilmek içün.

Fî evâil-i L sene [1]105 [26 Mayıs-4 Haziran 1694]

17/330/1495 İstanbul'da, Hocapaşa diye meşhur Hoca Üveys evkafının tevliyetinin Küçük evkaf defterlerindeki kayıtlara göre mescit imamına ait olduğuna dair hüküm.

İstanbul kãimmakãmına ve kãdîsına hüküm ki:

İstanbul'da vâkı‘ müteveffâ Hâce Üveys el-meşhûr bi Hâce Paşa evkãfınun meşrûtiyyet üzre mütevellîsi ve mescid-i şerîfinün imâmı (kesik) zîde takvâhû gelüp vâkıf-ı mezbûr tevliyetün zabtın vakfiyye-i ma‘mûlün bihâsında mescid-i mezbûrda imâma vakf ve şart idüp şürûtı(?) üzre kendüye tevcîh olınup Mâliyye tarafından berât virilüp hâlâ üzerinde iken vâkıf-ı mezbûrun câmi‘-i şerîfi imâmı Hasan nâm kimesne hilâf-ı şart-ı vâkıf ve bilâ berât tevliyet-i mezbûr bana meşrûtadur diyü dahl itmekden hâlî olmayup te‘addî eyledüğin bildürüp bilâ berât ve hilâf-ı şart-ı vâkıf dahl ü ta‘arruz itdürilmeyüp men‘ olınmak içün hüküm recâ itmeğin Küçük evkãf defterlerine nazar olındukda tevliyet-i mezkûr mescidi imâmına meşrûta ve ber vech-i meşrûta olduğı mastûr bulınmağın berâtı mûcebince zabt itdürilmek içün yazılmışdur.

Fî evâsıt-ı L sene [1]105 [5-14 Haziran 1694]

17/332/1505 İstanbul'da, Selime Hatun vakfına ait eve icâreteyn usulü ile tasarruf eden kadın ve evin kendisine istiğlâl edildiğini iddia eden şahıs arasında birkaç kez dinlenip kadın lehine sonuçlanan Divanın yeniden İstanbul kadılığında görülmesine dair hüküm.

İstanbul kãimmakãmına ve kãdîsına hüküm ki:

Mahmiyye-i mezbûr sâkinelerinden Emine Hâtûn gelüp mahmiyye-i mezbûre (silik) mahallesinden Selîme Hâtûn vakfınun vakfiyye-i ma‘mûlün bihâsında mukayyed akãrâtından icâre-i mu‘accele ve müeccele ile (silik) olduğı vakf menzil içün Hâcı Mustafâ nâm kimesne bana istiğlâldür diyü iddi‘â idüp bundan akdem üç(?) def‘a murâfa‘a-i şer‘ oldukda iddi‘âsı lağv olup men‘ olınmışiken tekrâr Mahmûd Paşa nâibinden bir tarîkile hüccet (...) hilâf-ı şer‘ nizâ‘dan hâlî olmaduğın bildürüp Rûmili kãdîaskerüm Sâdık Mehmed i‘lâmıyla mûcebince şer‘le görilmek içün yazılmışdur.

Fî evâhir-i L sene [1]105 [15-23 Haziran 1694]

17/332/1509 İstanbul'da, Sultan Mehmet hamamına bitişik vakıf evin kime şart edildiğine ilişkin taraflar arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Hâce Paşa imâmı ve mütevellîsi Mustafâ gelüp vakfun akãrâtından mahmiyye-i mezbûrede merhûm Sultân Mehmed hammâmına muttasıl vakf menzilinde âharun alâkası yoğiken vâkıf-ı mezbûrun câmi‘-i şerîfi(?) imâmı olan Monlâ(?) Hasan bana meşrûtadur diyü hüccet alup zabt itmeğle şer‘le görile diyü yazılmışdur.

Fî evâhir-i L sene [1]105 [15-23 Haziran 1694]

17/344/1569 Galata'ya bağlı Kuruçeşme'deki Esiri Mehmet Efendi evkafına ait evin emsaline eş kirasını vermeğe razı olan Yahudi ve ziyade kira isteyen vakıf mütevellisi arasındaki ihtilafın ilgili kadılıkta görülmesine dair hüküm.

belgesi bulunamadı
Galata kãdîsına hüküm ki:

Çaki nâm zimmî gelüp Galata muzâfâtından Kuruçeşme'de vâkı‘ Esîrî Mehemmed Efendi evkãfından icâre-i müeccele ile mutasarrıf olduğı yahûdî hânenün harâba müşrif olıp üç akçe icâreden ziyâde tahammüli olmayup ve bu zikr olınan yahûdhânenün ecr-i misle mu‘âdil icâresin virmeğe râzî iken vakf-ı merkúm mütevellîsi olan Mustafâ nâm mütevellî ecr-i misle mu‘âdil icâreye kanâ‘at eylemeyüp yevmî onar akçe icâre alurum diyü hilâf-ı şer‘ rencîde itmeğle ehl-i vukúf ve bîgaraz müslimîn ile kıbel-i şer‘den üzerine varılup keşf ve hüccet ve ihkãk-ı hakk olınmak üzre hükm recâ itmeğin şer‘le görile diyü yazılmışdur.

Fî evâsıt-ı L sene [1]105 [5-14 Haziran 1694]

17/346/1583 İstanbul'da, Yakup Ağa mahallesindeki mülk evin sahibi Ayşe ve bu evi "evkafadandır" diye zapteden Medine evkafı mütevellisi arasındaki ihtilafın ilgili kadılıkta görülmesine dair hüküm.

İstanbul kãdîsına ve kãimmakãmına hüküm ki:

Ya‘kúb Ağa mahallesinde sâkine Âyişe gelüp otuz seneden mütecâviz İvaz nâm kimesne hüccet ile mutasarrıf olduğı mülk menzilin Medîne evkãfı mütevellîsi (boş) nâm kimesne evkãf-ı merkúme vakfındandur diyü bilâ isbât bin yüz (boş) senesinde alup zabt itmeğle hüccet ve fetvâ-i şerîfe mûcebince şer‘le görilmek içün yazılmışdur.

[Fî] evâsıt-ı L sene [1]105 [5-14 Haziran 1694]

17/347/1586 İstanbul'da, Süleymaniye vakfından ilk düşen mahlülden birkaz akçenin Şeyh İbrahim'e verilmesine dair hüküm.
İstanbul'da Süleymâniyye mütevellîsine hüküm ki:

Şeyh İbrâhîm'e ibtidâ düşen mahlûlden birkaç akçe arz eyleyesin diyü yazılmışdur.

[Fî] evâsıt-ı L sene [1]105 [5-14 Haziran 1694]

17/381/1692 İstanbul'da, Haseki Sultan vakfına ait Eski Bezzazistan yakınındaki odanın kiracısı ve bu odayı başkasına satan vakıf mütevellisi arasındaki ihtilafın ilgili kadılıkta görülmesine dair hüküm.
İstanbul kãimmakãmına ve kãdîsına hüküm ki:

El-Hâcc Mehmed gelüp İstanbul'[da] merhûme Haseki Sultân'un vakfiyye-i ma‘mûlün bihâsında mukayyed akãrâtından Bezzâzistân-ı atîk kurbında icâre-i müeccele ve mu‘accele ile mutasarrıf olduğı bir bâb odanun ecr-i misle mu‘âdil icâresin vakf-ı merkúm tarafına edâ ider iken vakf mütevellîsi bin yüz (boş) senesinde (boş) nâm kimesne[ye] bey‘ idüp gadr itmeğle temessüki mûcebince hüküm recâ itmeğin şer‘le görilmek içün yazılmışdur.

Fî evâhir-i L sene [1]105 [15-23 Haziran 1694]

17/388/1774 İbrahim Paşa-yı Atik evkafına ait Saraçhane yakınındaki hamamın eski kiracısı Abdi üzerinde olduğuna dair hüküm.

İstanbul kãimmakãmına ve mollasına hüküm ki:

Hâcı Mehmed gelüp İbrâhîm Paşa-yı Atîk evkãfından Serrâchâne(?) kurbında vâkı‘ hammâmı mütevellîsinden îcâr idüp taht-ı îcârında(?) iken Abdî nâm kimesne mukaddemâ benüm taht-ı îcârumda(?) idi diyü fetvâ-yı şerîfe mûcebince şer‘le yazılmışdur.

Fî evâhir-i L sene [1]105 [15-23 Haziran 1694]

17/393/1793 Saruhan sancağında, Halime Hatun evkafının mütevellisi ve nazırı olan Ümmühani ve Ayşe'ye karşı, tevliyetten pay iddia eden Ali ve kız kardeşinin, "muhadderât"dan olan bu kadınları incitmemek için vekilleri ile murafaa olunmalarına dair hüküm.

İstanbul kãimmakãmına ve kãdîsına hüküm ki:

Saruhan sancağında müteveffiye Halîme Hâtûn evkãfından(?) mütevelliyesi Ümmühânî nâm hâtûn ve nâzırı Âyişe nâm hâtûn gelüp tevliyeti ve nez[â]reti evlâdına meşrûta olmağla âhardan Alî ve kız karındaşı Rahîme(?) evlâdındanız diyü hisse iddi‘â ve murâfa‘adan men‘ olınmışiken ve mezbûretân muhadderâtdan olmağla ve vekîl-i şer‘îleri Yûsuf ile murâfa‘a olup ızrâr kasdıyla rencîde olınmamak bâbında hüküm recâ itmeğin zevci(?) hâzır olmadukça rencîde olınmamak içün yazılmışdur.

Fî evâhir-i L sene [1]105 [15-23 Haziran 1694]

17/395/1808 Haremeyn evkafına ait İstanbul'da Dervîş Ali mahallesinde mutasarrıfe olduğu evdeki payını kardeşine ferağ eden kadın ve bunlara ferağ belgesini vermeyen mütevelli arasındaki ihtilafın ilgili kadılıkta görülmesine dair hüküm.

İstanbul kãdîsına hüküm ki:

El-Hâcc Şa‘bân gelüp bunun kız karındaşı (boş) nâm hâtûn Haremeynü’ş-şerîfeyn evkãfından mahrûse-i İstanbul'da Dervîş Alî mahallesinde mutasarrıfe olduğı vakf menzilinden hissesin buna bin akçe[ye] ferâğat idüp bu dahi semeni olan meblağ-ı mezbûrı bi’t-temâm teslîm mezbûre hâtûn ile hâlâ vakfun mütevellîsi olan (boş) nâm kimesneden varup ferâğat temessükin taleb eyledükde virmekde te‘allül üzre olduğın ve bu bâbda fetvâ-yı şerîfesi olduğın bildürüp şer‘le görilmek içün hüküm yazılmışdur.

Fî evâhir-i L sene 1105 [15-23 Haziran 1694]

17/397/1818 İstanbul'da, Mihrişah Hatun evkafı eski mütevellisinin fahiş noksanla kiraladığı vakıf dükkanların emsal değerine göre yeniden kiralanmasına dair hüküm.

İstanbul kãimmakãmına ve kãdîsına hüküm ki:

Mahmiyye-i mezbûrda(?) Mihrişâh Hâtûn evkãfınun mütevellîsi İbrâhîm arz-ı hâl idüp vakf-ı mezbûrun sâbıkã mütevellîsi olan (boş) nâm kimesne vakf-ı mezbûrun dekâkînin ecr-i mislinden noksân-ı fâhiş ile âhara îcâr idüp vakfa gadr olmağla şeyhülislâm fetvâsı mûcebince ecr-i misli ile îcâr olınmak içün hüküm yazılmışdur.

[Fî] evâhir-i Şevvâl sene [1]105 [15-23 Haziran 1694]

17/398/1820 İstanbul'da, istiğlâl ettiği mülk evi için kira namıyla fazladan para ödetilen şahıs ve suçladığı mütevelli arasındaki ihtilafın ilgili kadılıkta görülmesine dair hüküm.

Âstâne kãimmakãmına ve İstanbul kãdîsına hüküm ki:

(Boş) nâm kimesne gelüp İstanbul'da vâkı‘ (boş) evkãfı mütevellîsi (boş) nâm kimesne istiğlâl eyledüği mülk menzili içün ecr-i mislinden ziyâde icâre nâmıyla bin yüz (boş) senesinde (boş) guruşın alup gadr itmeğle şer‘le görilmek içün yazılmışdur.

[Fî] evâhir-i L sene [1]105 [15-23 Haziran 1694]

17/406/1859 Ferruh Kethüda evkafına ait Hâslar kazası, Taşlıburun'daki yerlere mutasarrıf olan sadrazam Kara Mustafa Paşa'nın oğlu müteveffa Yusuf Bey'in küçük oğullarının ölümü üzerine anılan yerlerin iki payının vakfa intikal ettiğini bildirip zaptetmek isteyen vakıf mütevellisine engel olunmamasına, buna karşı çıkan küçüklerin vasisinin "rikâb-ı hümâyûna" ihzar olunmasına dair hüküm.

Kãimmakãm paşaya ve İstanbul kãdîsına hüküm:

Müteveffâ Ferruh Kethudâ evkãfınun mütevellîsi muhadderâtdan Âyişe Hânım gelüp evkãf-ı mezbûre akãrâtından Hâslar kazâsında Taşlıburun dimeğle ma‘rûf mahallde vâkı‘ icâre-i mu‘accele ve müeccele ile akãrâta mutasarrıf olan müteveffiye vezîr-i a‘zam-ı sâbık Kara Mustafâ Paşa'nun oğlı müteveffiye Yûsuf Beğ sağïre oğulları (boş) ve (boş) nâm sağïrler fevt olup zikr olınan akãrun iki hissesi vakfa intikãl itmeğle vakf içün zabt murâd eyledükde eytâm-ı mezbûrenün vasîleri olan Hamdî Efendi dimeğle ma‘rûf kimesne zikr olınan akãr vakfa intikãl itmez hâlâ vasî olduğum sağïrlere intikãl ider diyü yedinde olan temessükleri ihfâ eyledüğinden gayri azl oldukda hâlâ yirine vasî olan Mahmûd Çâvûş dahi bîvech-i şer‘î mâni‘ olup te‘addî üzre olduğın bildürüp vakf-ı mezbûrun hissesine düşen her ne ise şer‘ ve kãnûn üzre temessükleri ile ihzâr-ı şer‘ ve temessükleri mühürlenüp icrâ-yı hakk olına bîvech-i şer‘î te‘allül ider ise Mahmûd Çâvûş rikâb-ı hümâyûnuma ihzâr olınmak içün yazılmışdur.

Fî evâhir-i L sene [1]105 [15-23 Haziran 1694]

17/413/1898 Çöplüce'de(?), Mahmut Ağa vakfı tevliyetinin Mehmet'e zaptettirilmesine dair hüküm.
İstanbul kãimmakãmına ve kãdîsına hüküm ki:

Mehmed gelüp Çöplice'de(?) vâkı‘ Mahmûd Ağa tevliyeti ulûfesi tevcîh olınup berât-ı şerîfüm virilmeğle mûcebince zabt itdürilmek içün hüküm yazılmışdur.

Fî evâil-i Za sene 1105 [24 Haziran-3 Temmuz 1694]

17/419/1930 Beşiktaş'taki bostanın sahibi kadın ve burayı zaptedip başkasına kiralayan Hasan Paşa mütevellisi arasındaki ihtilafın ilgili kadılıkta görülmesine dair hüküm.
İstanbul kãimmakãmına ve monlâsına hüküm ki:

Hadîce Hâtûn arz-ı hâl ider mahrûse-i İstanbul'da Beşiktaş'da olan bostânın Hasan Paşa mütevellîsi zabt ve Sâliha nâm hâtûna îcâr itmeğle şeyhülislâm fetvâsı ve hüccet-i şer‘iyyesi mûcebince şer‘le yazılmışdur.

Fî evâil-i Za sene [1]105 [24 Haziran-3 Temmuz 1694]

17/429/1978 İstanbul'da, Dülbendci mescidinde imam olanlara şart edilmiş vakıf evi zaptetmek isteyen mescit imamı ve bu evde mülkiyet iddia eden ölen mescit müezzininin mirasçıları arasındaki ihtilafın evkaf müfettişince çözülmesine dair hüküm.

Mahrûse-i İstanbul'da şeyhülislâm nezâretinde olan evkãf müfettişi (boş) zîde ilmuhûya hüküm ki:

Mahrûse-i mezbûrede vâkı‘ Dülbendci mescidinün imâmı Mustafâ gelüp mescid-i mezbûrda süknâsı imâm olanlara meşrûta vakf olan menzili alup meşrûtiyyet üzre zabt murâd eyledükde mescid-i mezbûrda müezzin iken vefât iden İbrâhîm'ün veresesinden Halîl nâm kimesne ile zevcesi menzil-i merkúm mûrisimüz müteveffâ-yı mezbûrun mülkidür bize intikãl ider diyü nizâ‘ itmeleriyle şeyhülislâm fetvâ-yı şerîfe[si] mûcebince şer‘le görilmek içün yazılmışdur.

Fî evâil-i Za sene [1]105 [24 Haziran-3 Temmuz 1694]

RAS17VF06
RAS18VF07

18/15/68 İstanbul'da, Mimar Sinan-ı Atik evkafının işlerini görüp vazifelerini veremediğinden şikayetçi oldukları mütevellisine, hepsinin razı olduğu düzgün bir kimsenin kãimmakãm olarak atanmasını isteyen mürtezikanın iddiası doğru ise mütevelli vekili tayin edilmesine dair hüküm.

İstanbul'da müfettiş vekîli olan (boş) zîde ilmuhûya hüküm ki:

Mahrûse-i mezbûrede vâkı‘ müteveffâ Mi‘mâr Sinân-ı Atîk evkãfınun mürtezikası Dergâh-ı mu‘allâma gelüp vakf-ı mezbûrun evlâdiyyet ve meşrûtiyyet üzre mütevellîsi olan Ömer nâm kimesne yüz yaşını mütecâviz pîr ü ihtiyâr ve bîşu‘ûr olmağla umûr-ı vakfı görüp gözetmeğe iktidârı olmayup ve üç seneden berü mürtezikanun vazîfeleri virilmeyüp umûr-ı vakf muhtell ü müşevveş olmağla şart-ı vâkıf üzre umûr-ı vakfı ve îrâd [u] mesârifi mu‘tâd üzre görüp mürtezika-i vakfun vazîfeleri virilmek üzre cümlenün muhtârı ve müstakïm kimesne mütevellî ve³³ kãimmakãmı nasb olınmak bâbında hüküm recâ eyledükleri ecilden mürtezikaya gadri vâkı‘ ise taraf-ı şer‘îden vekîl nasb olınup şart-ı vâkıf icrâ olınmak içün hüküm yazılmışdur.

Fî evâil-i Za sene [1]105 [24 Haziran-3 Temmuz 1694 ]

18/22/101 İstanbul'da, Balat'taki Hacı Mustafa evkafına ait evi mülkleri olduğu iddiasıyla zaptedenler ve bu evi vakıf adına talep eden mütevelli arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Mahrûse-i İstanbul'da Balat dâhilinde müteveffâ Hâcı Mustafâ evkãfınun evlâdiyyet ve meşrûtiyyet ve berât-ı şerîfümle mütevellîsi olan Mehmed gelüp vakf-ı mezbûrun icâre-i mu‘accele ve müeccele ile elli beş seneden mütecâviz cânib-i vakfdan tasarruf olınagelen bir bâb vakf menzili biz âhar diyârda iken Hasan Ağa oğulları (boş) ve (boş) nâm kimesneler mülkiyyet üzre zabt idüp hâlâ gelüp vakf olmak üzre da‘vâ eyledükde mezbûrlar biz ol menzili mukaddemâ mutasarrıf olan Serkis nâm zimmîden mülkiyyet üzre iştirâ eyledük diyü hevâlarına tâbi‘ kimesneler ile yekdil olup nizâ‘ eyledüklerin bildürüp ve bu bâbda şeyhülislâmdan fetvâ-yı şerîfesi ve hüccet-i vâkıfe-i ma‘mûlün bihâsı(?) olmağla mûcebince şer‘le görilüp menzil-i merkúm vakfiyyet üzre zabt itdürilmek bâbında emr-i şerîfüm recâ itmeğin şer‘le görile diyü yazılmışdur.

Fî evâil-i Za sene 1105 [24 Haziran-3 Temmuz 1694]

18/25/117 Üsküdar'da, Hacı Ahmet Paşa evkafının nazırı ve bunun hakkını vermeyip vakıf gelirini yemekle suçladığı vakıf görevlileri arasındaki ihtilafın ilgili kadılıkta görülmesine dair hüküm.

İstanbul kãimmakãmına ve Üsküdar nâibine hüküm ki:

Medîne-i Üsküdar'da vâkı‘ Doğancılar hayrâtından(?) müteveffâ Hâcı Ahmed Paşa evkãfınun evlâdiyyet ve meşrûtiyyet üzre berât ile n[â]zırı olan Âyişe nâm hâtûn gelüp bunun ceddi mezbûr selâtîn-i mâzıyye temlîki ile defterde mukayyed evkãfdan hâsıl olan gallesinün izdiyâdı vakfiyye-i ma‘mûlün bihâsında evlâd-ı vâkıf beynlerinde taksîm olınmak üzre şart ve ta‘yîn olınmışiken hâlâ vakf-ı merkúm mütevellîsi olan Mehmed Sâdık ve vekîli Kaya Hânım ve kâtibi ile yekdil olup ekl itmeğle buna vesâir evlâda bir nesne virmeyüp bundan akdem emr-i şerîfüm virilüp şer‘le görildükde zimmetlerinde küllî izdiyâd zuhûr itmeğle cânib-i şer‘den hüccet ve mümzâ ve mahtûm muhâsebe(?) defteri virilüp mezbûrlar mücerred hakkın ketm ve (kesik) zabtına mâni‘ olup te‘addî itmeleriyle hüküm recâ itmeğin şart-ı vâkıf mûcebince şer‘le görile diyü yazılmışdur.

Fî evâil-i Za sene [1]105 [24 Haziran-3 Temmuz 1694]

18/32/153 Galata'da, Kurşunlu mahzen kapısı dahilinde vakfedilen iki mahzenin kiralarını hak kazananlara veren mütevelli ve mahzenleri mülkiyet üzere zaptetmek isteyen vakfedenin mirasçıları arasındaki ihtilafın ilgili kadılıkta görülmesine dair hüküm.

İstanbul kãimmakãmına ve Galata kãdîsına hüküm ki:

Hâcı Hüseyin gelüp bundan akdem müteveffâ el-Hâcc Mustafâ nâm kimesne hâl-i hayâtında medîne-i Galata'da Kurşunlı mahzen kapusı dâhilinde vâkı‘ iki kıt‘a mülk mahzenleri tescîl-i şer‘î ve teslîm ile’l-mütevellî birle vakf ve hâsıl olan icâresin Kur’ân-ı azîmü’ş-şân tilâvetine şart idüp vech-i meşrûh üzre vakfiyyeti vakfiyye-i ma‘mûlün bihâsında mastûr u mukayyed olmağla bu tevliyeti hasebiyle zikr olınan mahzenlerin icârelerin şart-ı vâkıf üzre ta‘yîn olınan kurrâya virür iken müteveffâ-yı mezbûrun veresesinden (boş) ve (boş) nâm kimesneler biz müteveffâ-yı mezbûrun vakfını tutmayup ol mahzenleri alup mülkiyyet üzre zabt ve icâresin kabz iderüz diyü hilâf-ı şart-ı vâkıf te‘addî itmeleriyle sen ki vezîr-i müşârun ileyh ve mevlânâ-yı mûmâ ileyhsin şer‘le görmenüz üzre yazılmışdur.

Fî evâil-i Za sene [1]105 [24 Haziran-3 Temmuz 1694 ]