Galata'da, Haseki Sultan evkafına ait evin, burada mektep ve çeşme yapmak isteyen Gümrük emini Hasan'ın mülk evi ile istibdaline dair hüküm

36/509/3022 İstanbul'da, Balatkapısı dışında Karabaş mahallesinde binası Koca Yusuf evkafına ait iki Yahudi evinin yanan çatısını eskisi gibi yapmak isteyen vakıf mütevellisi ve buna mani olan vakfedenin mirasçıları arasındaki ihtilafın usulüne uygun olarak çözülmesine dair hüküm.

İstanbul kãdîsına ve Haremeyn ve şeyhülislâm nezâretinde olan evkãf müfettişi vekîllerine hüküm ki:

Şeyhülislâm es-Seyyid Feyzullâh edâma’llâhu [te‘âlâ] fezâiluhûnun taht-ı nezâretinde olan evkãfdan müteveffâ Koca Yûsuf Efendi evkãfınun meşrûtiyyet üzre mütevellîsi olan Ahmed zîde kadruhû gelüp mahrûse-i İstanbul'da Balat kapusı hâricinde Karabaş mahallesinde vâkı‘ arsası Ayasofya vakfından birinün yüz yiğirmi ve biri yüz akçe mukãta‘alı iki bâb yehûdîhâne müteveffâ Yûsuf Efendi'nün vakfiyye-i ma‘mûlün bihâda mukayyed evkãfından olup zikr olınan yehûdihâneler bundan akdem muhterik oldukda arsası mukãta‘alu olduğı hüccet olınup eser-i binâ ve enkãzı mevcûd olmağla ke’l-evvel binâ itmek istedükde müteveffâ Yûsuf Efendi'nün dîğer oğulları ve kızları ol yehûdîhânelerün arsa ve binâsı dahi mukãta‘alu olmak üzre bize intikãl ider diyü ol yehûdîhânelerin binâsına mümâna‘at eyledüklerin bildürüp siz ki mûmâ ileyhimsiz mahall-i nizâ‘un üzerinde evlâd-ı vâkıf muvâcehelerinde yedinde olan hüccet-i şer‘iyye mûcebince husûs-ı mezbûrı hakk ve adl üzre tefahhus ve hilâf-ı şer‘ te‘addîleri men‘ olınmak bâbında hükm-i hümâyûnum recâ eyledüği ecilden vech-i meşrûh üzre şer‘le görilmek içün yazılmışdur.

Fî evâhir-i Za sene [1]113 [20-29 Nisan 1702]

36/580/3 Eyüp'te, Defterdâr Mahmut Efendi evkafının yeni ve eski mütevellisi arasındaki vakıf parası hususundaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Medîne-i Ebâ Eyyûb el-Ensârî aleyhi’r-rahmetü’l-Bârî'de vâkı‘ Defterdâr-ı sâbık müteveffâ Mahmûd Efendi'nün evkãfı mütevellîsi (boş) zîde kadruhû gelüp kazâ-i mezbûrda sâkin vakf-ı mezbûr mütevellîsi olan (boş) nâm kimesneden makbûzı olan mâl-ı vakfı tevliyeti hasebiyle taleb eyledükde mezkûr zemân-ı tevliyetümde nükúd-ı vakfı i‘mâl itmeyüp asl-ı mâldan mürtezikaya vazîfeleri içün (boş) guruş virdüm diyü hilâf-ı şer‘-i şerîf nizâ‘ eyledüğin ve bu bâbda da‘vâsına muvâfık şeyhülislâmdan fetvâ-yı şerîfesi mûcebince hüküm recâ itmeğin fetvâsı mûcebince amel olınmak içün yazılmışdur.

Fî evâil-i Z sene [1]113 [29 Nisan-8 Mayıs 1702]

36/583/4 Eğin kazasına bağlı İliç köyünün vergilerine vakfedilmiş parayı harcayan Haçok zimminin Edirne'ye ihzarına dair hüküm.

İstanbul kãimmakãmına hüküm ki:

Eğin kazâsına tâbi‘ İliç nâm karye zimmîleri gelüp karye-i merkúmenün vâkı‘ olan tekâlîflerine mevkúf akçeden hâlâ İstanbul sâkinlerinden Haçok nâm zimmî zimmetinde dört yüz seksen guruş mâl-ı vakf olmağla mesfûr Haçok meblağ-ı merkúmı ekl ü bel‘ idüp vakfa ve bunlara gadr eyledüğin ve şâhidleri dahi Edirne'de olduğın bildürüp mesfûr Haçok Edirne'ye ihzâr olınmak bâbında emr-i şerîfüm recâ eyledüğin ecilden vech-i meşrûh üzre ihzâr olınmak üzre yazılmışdur.

Fî evâsıt-ı Z sene [1]113 [9-18 Mayıs 1702]

37/5/9 Üsküdar'da, Babüssaade ağası İsmail Ağa zaviyesinin şeyhi ve zaviye fukarasının ihtiyaçlarını görmemek, zaviyenin muhtaç yerlerini onarmamakla suçladığı vakıf mütevellisi arasındaki ihtilafın usulüne uygun olarak çözülmesine dair hüküm.

İstanbul Haremeyn-i şerîfeyn evkãfı müfettişi vekîli olan (boş) zîde ilmuhûya hüküm ki:

Üsküdar'da vâkı‘ müteveffâ Bâbü’s-sa‘âde ağası İsmâ‘îl Ağa zâviyesinün bi’l-fi‘l şeyhi olan Seyyid Mehmed zîde salâhuhû gelüp vâkıf-ı mezbûr zâviyesinde haftada iki gice it‘âm-ı ta‘âm olınmak içün vakfiyye-i ma‘mûlün bihâsında yevmî on beş akçe şürût ve ta‘yîn eyleyüp vakfun müsâ‘adesi var iken hâlâ vakf-ı mezbûr mütevellîsi olup İstanbul'da sâkin (boş) nâm kimesne şart-ı vâkıf mûcebince zâviye-i mezbûre fukarâsınun ta‘âmı ve şem‘ ve revgan bahâsı virmeyüp ve zâviyenün ta‘mîre muhtâc olan mahallerin ta‘mîr itmeyüp te‘addî eyledüğin bildürüp nâzır-ı vakf sarây ağası ma‘rifetiyle şer‘le görilmek içün yazılmışdur.

Fî evâil-i B sene 1114 [28 Mayıs-6 Haziran 1702]

37/6/11 İstanbul'da, Eşkinci Bali vakfının uzun süredir mütevelli vekili olan şahıs ve kendisinin mütevelli vekili olduğu iddiasıyla bunu inciten kimse arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Mahrûse-i İstanbul sâkinlerinden Mehmed gelüp mahrûse-i mezbûrede vâkı‘ müteveffâ Eşkinci Bâlî vakfınun ber vech-i meşrûta mütevelliyesi olan Sâliha nâm hâtûn tarafından on iki seneden mütecâviz mütevellî vekîli olup her sene nâzır-ı vakf ma‘rifetiyle şer‘le muhâsebesi görilüp yedine mümzâ ve mahtûm muhâsebe defterleri virilüp bir vechile dahl olınmak îcâb itmez iken hâlâ eşirrâdan Ebû Ahmed oğlı dimeğle ma‘rûf Mustafâ nâm kimesne ben mütevellî vekîli oldum yedünde olan muhâsebe defterlerinde ba‘zı mevâddı tutam diyü bîvech-i şer‘î rencîdeden hâlî olmaduğın bildürüp te‘addîsi şer‘le men‘ u def‘ olınmak içün yazılmışdur.

[Fî] evâil-i B sene1114 [28 Mayıs-6 Haziran 1702]

37/23/80 İstanbul'da, Sultan Selim evkafının ilk düşen mahlulünden talebe-i ulumdan Mehmet'e iki çift fodula verilmesine dair hüküm.

İstanbul'da Sultân Selîm evkãfı mütevellîsine hüküm:

Talebe-i ulûmdan Mehmed gelüp mezkûr fakïru’l-hâl olmağla her vechile mahall ve müstahıkk olmağla istid‘â-yı inâyet recâ itmeğin sen ki mûmâ ileyhsin düşen mahlûlden iki çift fodula(?) arz eylemek içün yazılmışdur.

Fî evâil-i B sene [1]114 [28 Mayıs-6 Haziran 1702]

37/57/235 İstanbul'da, Süleymaniye'de, Katip Şemseddin mahallesinde Hacı Hamza vakfına ait arsası mukataalı dört odanın ikisine mutasarrıf olan şahıs ve kendisine şart edilmiş bir odanın kirasını bundan isteyen mahalle imamı arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Mahrûse-i İstanbul'da sâkin Ahmed nâm kimesne gelüp mahrûse-i mezbûrede Süleymâniyye'de Kâtib Şemseddîn mahallesinde vâkı‘ müteveffâ el-Hâcc Hamza'nun arsası mukãta‘alu dört bâb hucerâtdan üçünün tasarrufı atîkalarından Şirin ve Hûrşîd ve Bülbül nâm câriyelerine ve evlâd-ı evlâdına ve ba’de’l-inkırâz Medîne-i münevvere fukarâsına vakf ve hücre-i râbi‘anun meremmâtından fazlası mahalle-i mezbûre mescidinde imâm olanlara cüz-i şerîf tilâvet itmek üzre şart ve ta‘yîn olınup lâkin zikr olınan hucerât harîkde bi’l-külliye muhterik vakfdan ta‘mîre müsâ‘ade olmayup ve evlâd-ı ütekã dahi münkariz olmağla bu ol hucerâtdan ikisinün arsasın mütevellîsinden istîcâr ve mâlıyla ta‘mîr idüp mutasarrıfiken mescid-i mezbûrda imâm olanlara meşrûta vakf olan hücre-i râbi‘a âharun eline düşmeğle hâlâ mescid-i mezbûrda imâm olan (boş) nâm kimesne kendüye meşrûta olan hücrenün icâresin hâlâ arsasına mutasarrıf olandan taleb itmeyüp mücerred ol hucerâtun cümlesi muhterik olmazdan mukaddem el-Hâcc Hamza vakfından idi diyü hücre-i râbi‘adan ta‘yîn olınan icâresin bunun mâlıyla binâ eyledüği hücrelerden taleb idüp te‘addî eyledüğin ve da‘vâsına muvâfık şeyhülislâmdan fetvâ-yı şerîfe virildüğin bildürüp mûcebince amel olınup men‘i bâbında hüküm recâ itmeğin hilâf-ı şer‘-i şerîf ve muğãyir-i şart-ı vâkıf dahl ü ta‘arruz olınmamak içün emr-i şerîf yazılmışdur.

Fî evâsıt-ı B sene [1]114 [7-16 Haziran 1702]

37/58/239 İstanbul'da, Hacı Rıdvan vakfı mütevellisi ve vakfa ait Sultan Bayezid-i Cedit mahallesindeki evin kendi mülkünde olduğunu iddia eden kadın arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Müteveffâ Hâcı Rıdvân vakfınun evlâdiyyet ve meşrûtiyyet üzre mütevelliyesi olan Emine ibnet-i Tayyib vakf-ı mezbûr akãrâtından İstanbul'da Sultân Bâyezîd-i Cedîd mahallesinde vâkı‘ vakf menzile mutasarrıfe olan Havvâ nâm hâtûn vakfa âid icâreyi virmeyüp mülkiyyet iddi‘âsıyla fuzûlî sâkin olmağla bundan akdem murâfa‘a-i şer‘ olduklarında vakfiyyeti şer‘an sâbit olmağla iki yüz altmış guruş icâre-i mu‘accele virüp yevmî bir akçe müeccele virmek üzre istîcâr ve yedine memhûr temessük virilmişiken hâlâ şirrete sâlike olup temessüki ahz ve icâre-i mu‘accele olmak üzre virdüği meblağ-ı merkúmı girü taleb ve te‘addîden hâlî olmaduğın bildürüp ol bâbda hüküm recâ itmeğin sen ki vezîr-i müşârun ileyh ve Mevlânâ-yı mûmâ ileyhsin muktezâ-yı şer‘-i şerîf üzre görüp ihkãk-ı hakk eylemenüz içün yazılmışdur.

Fî evâsıt-ı B sene [1]114 [7-16 Haziran 1702]

37/62/252 Kırk üçüncü bölüğün yeniçerileri odaları ihtiyar ve fukarası, ve bunların vakıf parasını yemekle suçladıkları vakıf mütevellisi arasındaki ihtilafın ilgili kadılıkta görülmesine dair hüküm.

Âstâne kãimmakãmına ve İstanbul kãdîsına hüküm ki:

Dergâh-ı mu‘allâm yeniçerilerinden odalarından kırk üç bölüğün ihtiyâr ve fukarâsı gelüp oda-i mezbûrun nâzırı oldukları nükúd ve vakfa bin yüz iki senesinde mahrûse-i İstanbul'da sâkin (boş) nâm kimesne mütevellî oldukda on bir kîse akçe ile zimmet olan mâl-ı vakfun rehînleri teslîm olınmışiken mütevellî-i mezkûr neferâtından birkaç kimesneler ile yekdil olmağla mâl-ı vakfun iltizâmını ekl ü itlâf itmeğle muhâsebesin görmek istedüklerinden ancak bir kîse akçe kaldı mâ‘adâ mesârifinüze sarf eyledüm ve yedümde hüccetüm dahi vardur diyü hilâf-ı şer‘ nizâ‘ idüp gadr eyledüğin bildürüp şer‘le muhâsebesin görilüp ekl ü itlâf eyledüği mâl-ı vakf zuhûra getürilmek bâbında hüküm recâ eyledükleri ecilden sen ki vezîr-i müşârun ileyh ve Mevlânâ-yı mûmâ ileyhsin muhâsebesi şer‘le görilüp ihtimâm olınmak içün hüküm yazılmışdur.

Fî evâsıt-ı B sene 1114 [7-16 Haziran 1702]

37/97/391 Süleymaniye câmi‘ ve imâretinden vazifeli Ama Ahmet'in yanan bir çift fodula tezkiresinin yenilenmesine dair hüküm.

İstanbul'da merhûm Sultân Süleymân câmi‘-i şerîf ve imâret-i âmiresi mütevellîsi (boş) zîde mecduhûya hüküm ki:

A‘mâ Ahmed nâm kimesne Dergâh-ı mu‘allâma gelüp vâkıf-ı müşârun ileyhün imâret-i âmirelerinden almak üzre bir çift fodulaya tezkire ile mutasarrıfiken ihrâkda zâyi‘ olduğın bildürüp ol bâbda hüküm recâ itmeğin sen ki mütevellî-i mezbûrsun mezkûrun tezkiresi muhterik olmağla bir çift fodulasınun tezkiresin virmek içün yazılmışdur.

Fî evahir-i B sene 1114 [17-26 Haziran 1702]

37/103/418 Sultan Süleyman evkafının mahlulünden Dervîş Ama Ahmet'e günlük iki çift fodula ile bir aş verilmesine dair hüküm.

İstanbul'da merhûm Sultân Süleymân evkãfı mütevellîsi vekîline hüküm ki:

İstanbul sâkinlerinden Dervîş Ahmed A‘mâ nâm kimesne gelüp fakïru’l-hâl kesîrü’l-iyâl olup mahall-i merhamet olmağla istid‘â-yı inâyet itmeğin sen ki mütevellî vekîli mezbûrsun imâret-i âmireden ibtidâ düşen mahlûlinden yevmî iki çift fodula ve bir aş virmek üzre arz eylemek içün yazılmışdur.

Fî evâhir-i B sene [1]114 [17-26 Haziran 1702]

37/108/447 Sultan Süleyman evkafının mahlulünden Şeyh Mehmet'e on akçe verilmesine dair hüküm.

İstanbul'da Sultân Süleymân evkãfı mütevellîsine hüküm ki:

Şeyh Mehmed zîde salâhuhû gelüp fakïru’l-hâl olup medâr-ı ma‘âşda küllî muzâyakası olduğın bildürüp evkãf-ı merkúmeden kendüye birkaç akçe vazîfe virilmek bâbında hüküm recâ itmeğin sen ki mütevellî-i merkúmsın ibtidâ düşen mahlûlden mezbûre on akçe arz eylemek içün yazılmışdur.

Fî evâil-i Ş sene [1]114 [21-30 Aralık 1702]

37/101/408 Süleymaniye câmi‘ evkafının mahlulünden Hacı Hasan'a iki çift fodula ile bir aş verilmesine dair hüküm.

İstanbul'da Sultân Süleymân câmi‘i evkãfı mütevellîsi vekîline hüküm ki:

Hâcı Hasan gelüp mahrûse-i mezbûrede müşârun ileyhün imâret-i âmiresinde aş ile bir iki çift fodula virilmek bâbında inâyet recâ itmeğin sen ki mütevellî vekîli mezkûrsun düşen mahlûlden arz eylemen içün yazılmışdur.

Fî evâhir-i B sene [1]114 [22-31 Aralık 1701]

37/149/600 İstanbul'da, Pirinççi Ahmet Paşa evkafı mütevellisi ve vakfa ait odaların kira bedellerini yüksek bulan kiracıları arasındaki ihtilafın usulüne göre çözülmesine dair hükm.

Mahrûse-i İstanbul'da şeyhülislâm nezâretinde vâkı‘ evkãf müfettişi vekîli mevlânâya hüküm:

Müşârun ileyhün nezâretinde olan evkãfından İstanbul'da vâkı‘ Pirinçci Ahmed Paşa evkãfı mütevellîsi Ahmed gelüp vakf-ı mezbûr akãrâtından mahrûse-i mezbûrede vâkı‘ Pirinçci Ahmed Paşa odaları dimeğle ma‘rûf odalarun yevmî ikişer akçe icâre-i mu‘accelesi cüzhânlara ta‘yîn olınmışiken müste’cirleri tahammüli yokdur diyü bundan akdem nizâ‘ ve şer‘le keşf olındukda ol mikdâr icâre ecr-i misli olup tahammüli olmaduğın(?) ihbâr eylemişler iken hâlâ yiğirmişer akçesin tenzîl itdürdün diyü te‘addî ve vakfa ve mezra‘aya gadr eyledüklerin bildürüp şer‘le teveccüh iden icâresi alıvirilmek bâbında emr-i şerîfüm recâ itmeğin sen ki Mevlânâ-yı mûmâ ileyhsin şer‘le görilüp i‘lâm eylemek içün yazılmışdur.

Fî evâsıt-ı Ş sene [1]114 [31 Aralık 1702-9 Ocak 1703]

37/131/526 Sultan Süleyman evkafından Ama Mustafa'ya verilen tezkirenin mahalline kaydedilerek tayin olunan fodula ile aşın kendisine teslimine dair hüküm.

İstanbul'da merhûm Sultân Süleymân evkãfı mütevellîsine hüküm ki:

A‘mâ Mustafâ gelüp imâret-i mezbûreden bir çift fodula ve bir (...) aşun müteveffâ A‘mâ Îsâ mahlûlinden kendüye tezkiresi virilmeğle elinde olan tezkiresi mahalline kayd ve mûcebince fodula ve aşın virilmek bâbında inâyet recâ itmeğin sen ki mütevellî-i mûmâ ileyhsin vech-i meşrûh üzre olan tezkiresin mahalline kayd ve ta‘yîn olınan fodulasın ve aşın virmek içün yazılmışdur.

Fî evâil-i Ş sene 1114 [21-30 Aralık 1702]

37/156/627 İstanbul'da, Balaban Ağa mahallesinde Piri Paşa vakfı odalarının kiralarını ödeyegelen kiracıları ve bunları ziyade kira bedeli talebiyle inciten vakıf mütevellisi arasındaki ihtilafın igili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Balaban Ağa mahallesinde vâkı‘ müteveffâ Pîrî Paşa vakfı odalarınun müste’cirleri gelüp bunlar taht-ı icârelerinde olan odalarun yevmî (boş) akçe icâre-i müeccelelerin cânib-i vakfa virüp kusûrları yoğiken vakf-ı merkúm mütevellîsi olan (boş) nâm kimesne ziyâde talebiyle dahl ü rencîde eyledüğin bildürüp şer‘le görilüp icrâ-yı hakk olınmak bâbında hükm-i hümâyûnum recâ itmeğin sen ki vezîr-i müşârun ileyh ve Mevlânâ-yı mûmâ ileyhsin şer‘le görilmek emrüm olmışdur diyü yazılmışdur.

Fî evâsıt-ı Ş sene 1114 [31 Aralık 1702-8 Ocak 1703]

37/170/687 Hâslar kazasına bağlı Baba Nakkaş zaviyesinde, vazifeleri karışık olan Defterdâr Mehmet Efendi evkafının hesaplarının görülüp vakfedenin şartının icra olunmasına dair hüküm.

Âstâne'de müfettiş-i evkãf vekîli olan mevlânâya hüküm ki:

Hâslar kazâsında vâkı‘ Baba Nakkãş zâviyesi evkãfınun mütevellîsi olan el-Hâcc Hasan nâm kimesne Dergâh-ı mu‘allâma gelüp zâviye-i mezbûrede Defterdâr-ı sâbık Dervîş Mehemmed Efendi evkãfınun îrâd ve vezâyifi muhtell ve müşevveş olmağla ma‘rifet-i şer‘le tefahhus ve zâyi‘ ve telef olan mâl-ı vakf zuhûra getürilüp sebt-i defter ve şürût-ı vakf icrâ olınmak bâbında hükm-i hümâyûnum recâ itmeğin vech-i meşrûh üzre şer‘le görilüp şart-ı vâkıf icrâ olınmak içün hüküm yazılmışdur.

Fî evâhir-i Ş sene [1]114 [9-18 Ocak 1703]

37/174/706 İstanbul'da, Sultan Selim evkafının mahlulünden Şeyh Seyit Abdülkadir'e iki çift fodula verilmesine dair hüküm.

İstanbul'da Sultân Selîm evkãfı mütevellîsine hüküm ki:

Sâdât-ı kirâmdan Şeyh Seyyid Abdülkãdir gelüp mezkûr sâdât-ı kirâm ve ulemâ-i meşâyihden olup ehl-i iyâl ve vech-i ma‘âşda küllî zarûreti olmağla vakf-ı mezbûrun izdiyâdı olup düşen mahlûlden takãss olınmak üzre iki çift fodula virilmek içün bundan akdem emr virilmişiken bu âna değin virilmedüğin bildürüp istid‘â-yı inâyet itmeğin ahkâm kaydına mürâca‘at olındukda vech-i meşrûh üzre emr virildüği mastûr u mukayyed bulınmağla mukaddemâ virilen emr mûcebince amel olınmak içün yazılmışdur.

Fî evâsıt-ı Ş sene [1]114 [19-28 Ocak 1703]

37/175/708 İstanbul'da, Fatih Sultan Mehmet evkafından Şeyh Seyit Abdülkadir'e tevcih edilen vazife ile fodulanın bu ana kadar verilmediği anlaşıldığından, verilmesine dair hüküm.

İstanbul'da merhûm Ebu’l-feth Sultân Mehmed Hân evkãfı mütevellîsine hüküm ki:

Sâdât-ı kirâmdan Şeyh Seyyid Abdülkãdir gelüp mezkûr ulemâdan olup her vechile mahall-i inâyet olmağla evkãf-ı mezbûreden düşen mahlûlden yevmî yiğirmi akçe vazîfe ile beş çift fodula virilmek üzre mukaddemâ emr virilmişiken bu âna gelince virilmedüğin bildürüp istid‘â-yı inâyet itmeğin ahkâm kaydına mürâca‘at olındukda vech-i meşrûh üzre emr virildüği mastûr u mukayyed bulınmağın mukaddemâ virilen emr mûcebince amel olınmak içün yazılmışdur.

Fî evâsıt-ı Ş sene [1]114 [19-28 Ocak 1703]

37/178/719 İstanbul'da, mutasarrıfı olan Bazaz adlı zimmiden bir vakf değirmeni alan kadın ve değirmeni ferağ eden şahıs arasındaki ihtilafın ilgili kadılıkta görülmesine dair hüküm.

Âstâne kãimmakãmına ve İstanbul kãdîsına hüküm ki:

Neslihân nâm hâtûn gelüp mahrûse-i İstanbul'da (boş) vakfında bir bâb vakf değirmânı mahrûse-i mezbûrede sâkin mutasarrıfı Bazaz nâm zimmî üç yüz guruş bedel mukãbelesinde mütevellî temessüki ile buna ferâğ eyledükden sonra beher mâh yedişer buçuk guruşa bundan îcâr-ı vâkıfeleri mürûrında meblağ-ı mezbûrı kabz ve firâr idüp icâre zimmetinde kalmağla şer‘le icrâ-yı hakk olınmak içün hüküm yazılmışdur.

Fî evâsıt-ı Şa‘bân sene 1114 [19-28 Ocak 1703]

37/195/780 İstanbul'da, Pirinççi Ahmet Paşa evkafı mütevellisi ve vakfa ait odaların kira bedellerini yüksek bulan kiracıları arasındaki ihtilafın usulüne göre çözülmesine dair hükm.

İstanbul'da şeyhülislâm evkãfı müfettişi vekîline hüküm ki:

Müşârun ileyhün nezâretinde olan evkãfda İstanbul'da vâkı‘ Pirinçci Ahmed Paşa evkãfınun mütevellîsi Ahmed gelüp vakf-ı mezbûr akãrâtından mahrûse-i mezbûrede vâkı‘ Pirinçci Ahmed Paşa odaları dimeğle ma‘rûf odalarun yevmî ikişer akçe icâre-i mu‘accelesi cüzhânlara ta‘yîn olınmışiken müste’cirleri tahammüli yokdur diyü bundan akdem nizâ‘ ve şer‘le hakk olındukda ol mikdâr icâre ecr-i misli olup tahammüli olduğın müslimîn ihbâr eylemişler iken hâlâ yiğirmişer akçesin tenzîl itdürdük diyü te‘addî ve vakfa ve mürtezikaya gadr itmeleriyle şer‘le görilüp teveccüh iden icâresi alıvirilmek içün yazılmışdur.

Fî evâhir-i Ş sene [1]114 [29 Ocak-7 Şubat 1703]

37/200/806 İstanbul'da, Sultan Süleyman vakfı mahlulünden günlük on beş akçe vazifenin ulemadan Halil'e verilmesine dair hüküm.

İstanbul'da Sultân Süleymân mütevellîsine hüküm:

Ulemâdan Hâlîl gelüp medâr-ı ma‘işeti olmayup her vechile mahall-i merhamet olmağla istid‘â-yı inâyet itmeğin sen ki mütevellî-i mezbûrsun düşen mahlûlden yevmî on beş akçe vazîfe olınmak üzre arz virmek içün yazılmışdur.

Fî evâhir-i Ş sene [1]114 [29 Ocak-7 Şubat 1703]

37/203/818 İstanbul'da, Ahırkapı yakınında Bayrâm Paşa diye maruf vakıf sarayda bir hissenin mutasarrıfı olan küçüğün ölümü üzerine hissenin kendisine intikal ettiğini iddia eden şahıs ve buna mani olan vakıf mütevellisi arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm ki:

Alî gelüp sâbıkã Kapuağası olan müteveffâ Gazanfer Ağa'sınun hemşîrezâdesi olup müteveffâ-yı mezbûr mahmiyye-i İstanbul'da Âhûrkapu kurbında tescîl-i şer‘î ve teslîm-i ile’l-mütevellî birle vakfiyye-i ma‘mûlün bihâsından evlâdına ve evlâd-ı evlâdına vakf ve şart eyledüği Bayrâm Paşa sarâyı dimeğle ma‘rûf sarâyında bir hisseye mutasarrıf olan (boş) nâm sağïre fevt olup şart-ı vâkıf mûcebince yedinde tasarruf buna intikãl itmeğle zabt murâd eyledükde vakf-ı mezbûr mütevellîsi (boş) nâm kimesne fuzûlî zabtına mâni‘ olup te‘addî eyledüğin ve bu bâbda da‘vâsına muvâfık fetvâ-yı şerîfesi olduğın bildürüp mûcebince şer‘le görilüp şart-ı vâkıf mûcebince isâbet iden hissesine dahl ü ta‘arruz olınmamak bâbında hüküm yazılmışdur.

[Fî] evâhir-i Ş sene [1]114 [29 Ocak-7 Şubat 1703]

37/220/891 İstanbul'da, Yenibağlar yakınında Keçeci Piri mahallesi ahalisi ve vakıf malını yemek, mescide akan vakıf suyunu başkasına satmakla suçladıkları vakıf mütevellisi arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına hüküm:

Mahrûse-i İstanbul'da Yenibâğlar kurbında vâkı‘ Kîçeci Pîrî mahallesi ahâlîsi gelüp sen ki Mevlânâ-yı mûmâ ileyhsin mahalle-i mezbûrede vâkı‘ nâzırı olduğun (boş) mescid-i şerîf vakfınun mütevellîsi olan mahrûse-i İstanbul'da sâkin Abdullâh nâm kimesne mâl-ı vakfı ekl ü bel‘ eyledükden gayri yüz seneden mütecâviz mescid-i mezbûra cereyân iden vakf suyını el-Hâcc Hasan nâm kimesneye bey‘ idüp te‘addî ve cemâ‘at-i müslimîne muzâyaka virüp ve vakfa gadr eyledüğin bildürüp şer‘le görilüp şart-ı vâkıf icrâ olınmak bâbında emr-i şerîfüm recâ itmeğin şer‘le görilmek içün yazılmışdur.

Fî evâhir-i Ş sene [1]114 [29 Ocak-7 Şubat 1703]

37/227/922 İstanbul'da, atasının vakfettiği bostanın gelirinin evladın aslahı olması sebebiyle kendisine intikal ettiğini iddia eden kadın ve vakıf gelirine ortak olmak isteyen kimse arasındaki ihtilafın ilgili kadılıkta görülmesine dair hüküm.

İstanbul kãimmakãmına ve kãdîsına [hüküm ki]:

Mahrûse-i İstanbul sâkinelerinden Fâtıma nâm hâtûn gelüp ceddi mahrûse-i mezbûrda vâkı‘ mutasarrıf olduğı bostânınun gallesin vakfiyye-i ma‘mûlün bihâsında aslah evlâdına vakf ve şart idüp bu aslah evlâddan olmağla ber mûceb-i şart-ı vâkıf mutasarrıfe iken aslah evlâddan olmayan (boş) nâm kimesne hilâf-ı şart-ı vâkıf galleye müşâreket itmek isteyüp te‘addî eyledüğin ve bu bâbda şeyhülislâmdan da‘vâsına muvâfık [fetvâ-yı] şerîfesi olduğın bildürüp mûcebince amel olınup hilâf-ı şart-ı vâkıf te‘addîsi men‘ u def‘ olınmak bâbında hüküm recâ itmeğin fetvâ-yı şerîfe mûcebince amel olınmak içün yazılmışdur.

Fî evâil-i N sene 1114 [19-28 Ocak 1703]

37/282/940 İstanbul'da, Çadırcı Hacı vakfında cüzhanlık eden kimsenin hakkı olan vazifesinin kendisine alıverilmesine dair hüküm.

İstanbul kãdîsına hüküm:

Mustafâ gelüp bu mahrûse-i İstanbul'da vâkı‘ müteveffâ Çadırcı Hâcı vakfından almak üzre yevmî (boş) akçe vazîfe ile cüzhân olmağla edâ-yı hıdmet idüp hıdmeti mukãbelesinde berâtı mûcebince müstahıkk olduğı vazîfesin vakf-ı merkúm mütevellîsi Çadırcı Mehmed'den taleb eyledükde virmekde te‘allül üzre olmağla hıdmeti mukãbelesinde müstahıkk olduğı vazîfesi alıvirilmek içün yazılmışdur.

Fî evâil-i N sene [1]114 [19-28 Ocak 1703]

37/232/941 Kendisine babasınca şart edilen vakıf gelirini talep eden kadın ve bunun tayin olunan parasını eksik vermeye kalkan vakıf mütevellisi arasındaki ihtilafın usulüne göre çözülmesine dair hüküm.

İstanbul'da vâkı‘ müfettiş-i evkãf vekîline hüküm:

Müteveffâ Koca Yûsuf Efendi dimeğle ma‘rûf kimesnenün kerîmesi Emetullâh nâm hâtûn gelüp babası müteveffâ-yı merkúm evkãfınun hâsıl olan gallesin vakfiyye-i ma‘mûlün bihâsında evlâdına yevmî otuzar akçe şart ve ta‘yîn itmişiken mahrûse-i mezbûrede sâkin evkãf-ı mezbûre mütevellîsi olan Ahmed nâm kimesne vakfiyyeyi ta‘cîz ve şart-ı vâkıf mûcebince hissesini temâmen virmeyüp onar akçe teklîf idüp gadr murâd eyledüğin bildürüp sen ki Mevlânâ-yı mezkûrsun şer‘le görüp şart-ı vâkıf mûcebince hissesi temâmen alıvirüp ihkãk-ı hakk olınup gadr olınmamak içün yazılmışdur.

Fî evâil-i N sene [1]114 [19-28 Ocak 1703]

37/256/1046 İstanbul'da, Keçeci Piri mahallesindeki Hacı Piri mescidi nükud vakfının mütevellisi ve mescit imamı arasındaki ihtilafın ilgili kadılıkta görülmesine dair hüküm.

Kãimmakãm paşaya ve İstanbul kãdîsına hüküm ki:

Mahrûse-i İstanbul'da Kîçeci Mîrî¹⁰² mahallesinde Hâcı Mîrî¹⁰³ mescidinün nükúd-ı mevkúfesinün berât-ı şerîfümle mütevellîsi olan Abdullâh nâm kimesne gelüp vâkıf-ı mezbûr üç vaktde mescid-i merkúmda imâm olanlara yevmî ikişer akçe vazîfe şart ve ta‘yîn itmişiken hâlâ imâm olan Mehmed nâm kimesne hilâf-ı şer‘-i¹⁰⁴ vâkıf yevmî on yedişer akçe vazîfe taleb ve cebren alduğından mâ‘adâ benüm ve müezzin olan Mustafâ nâm kimesne dahi hilâf-ı şart-ı vâkıf ziyâde vazîfe talebiyle te‘addî vü rencîde eyledüklerin ve bu bâbda da‘vâsına muvâfık şeyhülislâmdan fetvâ-yı şerîfe virildüğin bildürüp mûcebince amel olınup men‘ u def‘ olınmak bâbında hüküm recâ eyledüği ecilden hilâf-ı şart-ı vâkıf te‘addî olınmaya diyü yazılmışdur.

Fî evâsıt-ı N sene 1114 [29 Ocak-7 Şubat 1703]