Hacı Əhməd-Cabir Hacı İsmayıl oğlu

Qədr gecəsi
“Qurani Kərim”in Qədr gecəsində nazil olması, əl-Qədr surəsində buyurulmuşdur. Surədə buyurulduğu kimi:

“Qədr gecəsi (savab cəhətdən) min aydan daha xeyirlidir! (O Ramazan ayının on doqquzuna, iyirmi birinə, iyirmi üçünə, iyirmi beşinə, bir rəvayətə görə isə iyirmi yeddisinə təsadüf edir)”. (əl-Qədr, 97/3).

Qədr gecəsi və orucluq haqqında hədislər
Əbu Hüreyrədən (A.o.r.): Peyğəmbər (s.ə.v.) buyur­muşdur:

1. 
   “Kim ki, Qədr gecəsinə inanaraq (onun böyük­lüyünü, ehtiva etdiyi savab və bağışlanma imkanlarını) düşünərək keçirərsə, onun bütün günahları bağışlanar”.
   
2. 
   “Kim ki, Ramazan orucunu inanaraq və (onun savab və rəhmət amilini) nəzərə alaraq tutarsa, bütün keçmiş günahları əfv edilər”.
   
3. 
   “Sizin hər hansı biriniz müsəlmanlığını yaxşı yerinə yetirərsə, hər etdiyi bir savabın əvəzinə ona on qatı yazılır. Bu, yeddi yüz dəfəyə qədər artır. Hər etdiyi günah (isə ancaq) bir günah (olaraq) yazılır”.
   
4. 
   “Oruc bir qalxandır! (Həmin günlərdə) heç kim çirkin söz danışmasın, özünü nadan kimi aparmasın, bir adam onunla döyüşmək istəyərsə və ya onu söyərsə, iki dəfə “Mən orucam!” deyin. Nəfsim əlində olana (Allaha) and içirəm ki, oruc olanın ağız qoxusu Allahın dərgahında müşk qoxusundan da yaxşıdır! Yeməkdən, içməkdən və şəhvətindən mənə görə əl çəkin… Oruc Mənim üçündür. Onun mükafatını Mən verəcəyəm. Bir savab əvəzinə on savab verilib hesablanacaq”.
   
5. 
   “Kim Allahın yolunda iki axca (belə) xərclə­yərsə, Cənnət qapılarından ona; “Ey Allahın qulu, bu bir xeyirdir!” - deyə nida gələcək, əgər o, namaz qılan olarsa, namaz qapısından çağırılar, mücahid olarsa, cihad qapısından çağırılar, oruc tutandırsa, (Reyyan) qapısından çağırılar, zəkat verəndirsə, zəkat qapısından çağırılacaqdır”.
   
6. 
   “Ramazan ayı girəndə Cənnətin bütün qapıları açılır…”.
   
7. 
   “Ramazan girəndə səma qapıları açılır, Cəhənnəm qapıları bağlanır və şeytan isə zəncirlənir”.
   
8. 
   “Kim ki, Qədr gecəsi (ona) inanıb, (ülviyyətini) nəzərə alaraq, əhya edərsə, onun günahları bağışlanar…”.
   
9. 
   “Kim ki, Ramazan orucunu, (ona) inanaraq və (mükafatını) nəzərə alaraq tutarsa, onun keçmiş günahları əfv edilir”.
   
10. 
    “Allahın yalan sözdən və onu işlətməkdən çəkinməyən şəxsin yeməkdən və içməkdən əl çəkməsinə ehtiyacı yoxdur”.
    
11. 
    “Adəm oğlunun hər əməli onun özü üçündür. Tək­cə oruc müstəsnadır… Şübhəsiz ki, o, Mənim üçün­­dür. Və onun mükafatını (şəxsən) Mən verəcə­yəm. Oruc tutanın iki sevinci (anı) vardır ki, onlarla kö­nülü şad olur: iftar etdiyi zaman sevinməsi və Rəb­binə qovuşacağı zaman oruc tutduğuna görə sevin­məsi”.
    
12. 
    “Ayı görən kimi oruc tutun və təzə ayı görən kimi (də orucu) qurtarın! Sizə gizli qalarsa, Şaban ayını otuz (günə) tamamlayın!”.
    
13. 
    “Kimsə unudaraq yeyib-içərsə, orucunu axıradək davam etdirsin. Çünki onu Allah yedirib-içirmişdir”.
    
14. 
    “Sizin hər biriniz cümə günü qətiyyən oruc tutmasın, amma ondan bir gün əvvəl və ya bir gün sonra tutsun…” (Əlbəttə ki, bu Ramazan ayının cümə günlərinə aid deyil – Ə.C.Ə.).
    
15. 
    “Iki oruc və iki alış-veriş qadağan edilir: Ramazan bayramı ilə Qurban bayramında oruc tutmaq… Əl toxundurmaqla yaxşıca baxmadan, seçmək imkanı və sərbəst olmayan alış-veriş, Munabaza etmə (görmədən alıb-satma)…”.
    
16. 
    “Kim ki, Ramazana (gecələrinə) inanıb və (savabını dərk edib) səhərə qədər oyaq qalarsa, (bütün) onun keçmiş günahları bağışlanar”.
    
17. 
    “Kim ki, Qədr gecəsinə, (ona) iman gətirərək (və əzəmətinə) əhya edərsə, (bütün) keçmiş günahları ona bağışlanar”.
    
18. 
    “Peyğəmbər (s.ə.v.) hər Ramazanın (son) onuncu günü (başlayanda) etikafa girərdi. Vəfat etdiyi ildə isə etikafda iyirmi gün qalmışdır”.
    
19. 
    Dostum (s.ə.v.) mənə üç şeyi tövsiyə etmişdi: “Hər ayda üç gün oruc… Iki rükət duha namazı… Yatmazdan əvvəl vitr namazı qılmaq…”.
    

20. Ey millət! Allahın ayı sizə tərəf üz tutub gəlmişdir (Biharul-ənvar).

21. Əziz Peyğəmbərimiz (s.ə.v.) hər vaxt Ramazan ayı yaxınlaşanda buyurardı: - Sübhənallah. Nə qədər böyük bir ayı qarşılamağa gedirsiniz və nə qədər əzəmətli bir ay sizə tərəf gəlir (Biharul-ənvar).

22. Əgər insan Ramazan ayında nə etməli olduğunu bilsəydi, arzu edərdi ki, ilin hamısı Ramazan olsun (Biharul-ənvar).

23. Səma qapıları, yəni Allahın rəhmət qapıları Ramazan ayının əvvəl gecəsində açılar və axır gecəsinədək bağlanmaz (Biharul-ənvar).

24. Ramazan ayı elə bir aydır ki, əvvəli rəhmətdir, ortası məğfirət (bağışlanma), axırı isə Cəhənnəm odundan qurtulmaq (Biharul-ənvar).

25. Ramazan ayına ona görə Ramazan deyilib ki, bu ay günahları yandırar (Kənzül-ümmad).

26. Ramazan ayı gələndə Cəhənnəm qapıları bağlanır. Cənnət qapıları açılır və şeytanlar zəncirlənir (Biharul-ənvar).

27. Əgər bir nəfər Ramazan ayında bağışlanmasa, hansı ayda bağışlanar? (Biharul-ənvar).

28. Oruc tutun, sağlam olarsınız. Mədə bütün xəstəliklərin evi, oruc isə dərmanıdır (Biharul-ənvar).

29. Bir gün Həzrət Muhəmməd (s.ə.v.) minbərə çıxdı və buyurdu: - “Amin”. Sonra bunun səbəbini belə açıqladı: “Ay camaat! Həzrət Cəbrayıl mənim yanıma gəlib dedi: - Ey Muhəmməd (s.ə.v.), kim Ramazan ayını dərk etsə və bağışlanmamış ölsə, Allah-Təala onu öz rəhmətindən məhrum edər” (Biharul-ənvar).

30. Həqiqi bədbəxt o şəxsdir ki, bu əzəmətli ayda Allahın bağışlanmasından məhrum qala (Biharul-ənvar).

Peyğəmbərimiz (s.ə.v.) buyurmuşdur:

1. 
   “Cənnətdə Riyan (sirab olmuş) adlı bir qapı var. Oradan yalnız oruc tutanlar daxil olacaq”. Şeyx Sə­duq hədisin şərhində yazır: “Cənnətə belə bir ad oruc tutanın daha çox susuzluqdan əziyyət çəkdiyi üçün verilmişdir. Oruc tutanlar bu qapıdan daxil ol­duqları zaman elə sirab olarlar ki, bir daha su­sa­mazlar”.
   
2. 
   “Əgər ümmətim Ramazan ayının orucunun nə qədər fəzilətli olduğunu dərk etsəydi, ilin bütün günlərini oruc tutmaq istərdi”.
   

Əmirəl-möminin Imam Əli (ə) buyurmuşdur:

1. 
   “Allah-Təala orucu insanlarda sağlam bədən və sağlam ruh tərbiyə olsun deyə, vacib etmişdir”.
   
2. 
   “Insan Ramazan ayında yemək-içməkdən uzaq olduğu kimi, bütün haramlardan da uzaq olmalıdır”.
   
3. 
   Səhabələri Peyğəmbərdən (s.ə.v.) soruşur: “Şeytanın bizdən uzaq olması üçün nə etməliyik”?. O Həzrət buyurur: “Oruc tutmaq şeytanın üzünü qaraldır, Allah yolunda sədəqə vermək belinə qırar, Allaha xatir sevmək və davamiyyətli halda əməli-saleh işlər görmək quyruğunu kəsər, Allahdan bağışlanmağı diləmək ürəyinin damarını qırar”.
   

Aişədən (A.o.r.):

1. 
   Qureyşilər cahiliyyə (dövründə) Aşura günü oruc tutardılar. Allahın elçisi (s.ə.v.) də Ramazan orucu fərz qılınanadək həmin gün oruc tutulmasını əmr etmiş və belə buyurmuşdur: “Istəyən onu (Aşura orucunu) tutsun, istəməyən tutmasın!”.
   
2. 
   Bilal gecə (sübh çağı) azan oxuduğu zaman Allahın elçisi (s.ə.v.) belə buyurdu: “Ibn Ümmi Məktum əzan oxuyana qədər yeyin-için. Çünki o, Fəcr (vaxtı) çatanadək azan oxumur…”.
   
3. 
   “Peyğəmbər (s.ə.v.) oruc olarkən öpərdi və qucaqlayardı. Onun şəhvəti hamımızın şəhvətindən çoxdur. Çünki oruc olarkən, cinsi əlaqədən başqa, öpmək və qucaqlamaq kimi hallar orucu pozmur”.
   
4. 
   “Peyğəmbər (s.ə.v.) Ramazanda (əlaqədən sonra) sübh (çağına qədər) yatır və (o, səhər) yuyunub orucunu tuturdu”.
   
5. 
   Həmzə b. Amr əl-Əsləmi (çox oruc tutan bir şəxs idi) Peyğəmbərdən (s.ə.v.) soruşdu: “Səfərdə oruc tutummu?. “Istəyirsən tut, istəyirsən tutma! (sərbəstsən)” deyə buyurdu».
   
6. 
   Allahın elçisi (s.ə.v.) buyurmuşdur: “Kim oruc borcu olduğu halda ölərsə, valisi (himayəçisi) onun yerinə tuta bilər”.
   
7. 
   “Allahın elçisinin (s.ə.v.), Ramazan ayını çıxmaq şərtilə bir ay ərzində oruc tutduğunu heç görməmişəm. Şaban ayında tutduğu orucdan da artıq oruc tutduğunu görməmişəm (yəni Ramazan orucundan sonra, gün hesabı ilə, ən çox oruc tutduğu ay Şaban ayı idi…)”.
   
8. 
   “Allahın elçisi (s.ə.v.) Aşura günü oruc (tut­mağı) əmr etmişdir. Ramazan (orucu) fərz edilən kimi (Aşu­ra günü orucunu) istəyən tutdu, istəməyən tut­madı”.
   
9. 
   “Allahın elçisi (s.ə.v.) Qədr gecəsinin Ramazanın son on günündə olmasına əmin idi və belə buyurmuşdu: “Qədr gecəsini Ramazanın son on günündə axtarın!””.
   
10. 
    “Peyğəmbər (s.ə.v.) (son) on gün girdiyi vaxt Hizarını bağlayardı (yəni, zövcələrinə yaxınlaşmazdı). Gecəni oyaq keçirər və ailə üzvlərini də oyadardı”.
    
11. 
    “Peyğəmbər (s.ə.v.) məsciddə yanında oturduğum vaxt, başını mənə tərəf əyərdi, mən də heyzli olduğum halda onun başını darayardım”.
    
12. 
    “Peyğəmbərin (s.ə.v.) bədəni bədənimə mən heyzli olduğum vaxt dəyərdi. O, etikafda olduğu zaman başını məsciddən çıxarardı və mən heyzli olduğum halda onun başını yuyardım”.
    
13. 
    “Peyğəmbər (s.ə.v.) vəfat edənə qədər Ramazanın son on günündə etikafa girərdi. Sonra onun ardınca zövcələri də etikafa girərdilər”.
    
14. 
    Allahın elçisi (s.ə.v.) buyurmuşdur: “Qədr gecəsini Ramazanın son on günündəki tək (gündə) axtarın!”.
    

Iman Sadiq (ə) buyurmuşdur:

1. 
   “Allah-Təala Tövratı Ramazan ayının 6-da, Incili Ramazan ayının 12-də, Quranı isə Qədr gecəsində nazil etmişdir”.
   
2. 
   “Oruc tutmaq tək insanın özünü yemək-iç­mək­dən saxlaması deyil”. Bir vaxtlar Həzrət Isanın (ə) anası Həzrəti Məryəm dedi: “Allaha xatir oruc tutmağı nəzr etdim. Yəni Allaha pərəstiş etməkdən savayı ağzıma söz alıb danışmayacağam”. “Oruc tutduğunuz zaman dilinizi haramdan qoruyun (qeybət etməyin, yalan danışmayın və s.), oruc tutduğunuz zaman gözünüzü haramdan qoruyun, haram şeylərə baxmayın. Bir-birinizlə çəkişməyin, bir-birinizə həsrəd aparmayın”.
   
3. 
   Ravi (A.o.r.) rəvayət edir ki: “Hişan ibn Həkəm Iman Sadiqdən (ə) orucun nə üçün vacib olduğunu soruşur. Imam Sadiq (ə) cavabında buyurur: “Oruc Allah tərəfindən varlı ilə kasıb bərabər olsun və varlı yoxsulun il boyu keçirdiyi aclıq və susuzluq hisslərini keçirməsi üçün vacib edilmişdir. Çünki varlılar, adətən, istədiklərinə sahib olarlar. Allah-Təala bəndələri arasında bərabərlik bərqərar olmasını və varlıların yoxsullara rəhm etmələrini istəyir””.
   

Imam Rza (ə) buyurmuşdur: “Insanlar oruc tutmağa əmr olunmuşlar ki, aclıq və susuzluğun nə olduğunu dadıb, onun vasitəsilə Axirət dünyasının yoxsulluq və çarəsizliyini dərk etsinlər”.

Talha b. Ubeydullahdan (A.o.r.): Saçları bir-birinə qarışmış bir (bədəvi) ərəb Allahın elçisinin (s.ə.v.) yanına gəlib ondan: “Allah mənə aid nəyi fərz etmişdir?” - deyə soruşdu. Peyğəmbər (s.ə.v.): “Beş dəfə namazı! Əlavə də qıla bilərsən!” - deyə buyurdu.

“Oruca aid nəyi fərz etmişdirsə mənə bildir!”.

“Ramazan orucunu! Əlavə oruc da tuta bilərsən! (yəni nafilə oruc da tuta bilərsən!)” - deyə buyurdu.

Ibn Ömərdən (A.o.r.): Peyğəmbər (s.ə.v.) Aşura orucu tutardı və (onu tutmağı) əmr etmişdi. Ramazan orucu (Allah tərəfindən) vacib edilən kimi, Aşura orucu tutulmadı.

Səhldən (A.o.r.): Peyğəmbər (s.ə.v.) buyurmuşdur: “Cənnətdə “Ər-Reyyan”Ü adlı bir qapı vardır. Qiyamət günü o qapıdan ancaq oruc tutanlar girəcək, onlardan başqa isə heç kim girə bilməz!”.

Əbu Bəkir (A.o.r.) demişdir: “Ata-anam sənə qurban olsun, Ey Allahın Elçisi, beləcə ayrı-ayrı qapılardan çağrılmaq zəruridirmi? Kimsə bu qapıların hamısından (eyni vaxtda) çağrıla bilərmi?”.

“Bəli! Ümidvaram ki, sən onlardan olacaqsan…”.

Ibn Ömərdən (A.o.r.): “Onu (ayı) gördüyünüz vaxt oruc tutun, onu gördüyünüz vaxtda da orucu açın, görməsəniz, onu (ayı) təxmin edin” (və ya başqa bir hədisdə deyildiyi kimi, otuz gündə tamamlayın).

Abdullahdan (A.o.r.): Peyğəmbərlə (s.ə.v.) bir yerdə idik. Belə buyurdu: “Evlənməyə gücü çatan şəxs, evlənsin. Çünki o (evlilik) gözü haramdan çəkindirən ən gözəl vasitədir. Fərci (cinsiyyət orqanını) də (haramdan) ən yaxşı qoruyandır… Buna gücü çatmayan şəxs isə oruc tutmalıdır. Çünki orucun şəhvəti söndürən bir gücü vardır…”.

Abdullah b. Ömərdən (A.o.r.): Allahın elçisi (s.ə.v.) Ramazan haqqında söhbət edərək belə buyurdu: “Ayı görməyincə oruc tutmayın və onu görməyincə orucluqdan çıxmayın! Əgər görə bilməsəniz, (o zaman) onu (yaxşı-yaxşı) hesablayın (təxmin edin)!”.

Abdullah b. Ömərdən (A.o.r.): Allahın elçisi (s.ə.v.) buyurmuşdur: “Ay iyirmi doqquzuncu gecə (çıxır). Onu görməyincə oruc tutmayın. Əgər görə bilməsəniz, sayı otuza çatdırıb (oruc tutun)!”.

Ibn Ömərdən (A.o.r.): Peyğəmbər (s.ə.v.) buyur­muşdur: “Şübhəsiz ki, biz yazıb-oxumağı bilməyən bir millətik, yazmırıq, hesablamırıq…”. Ay barədə: Belədir-elədir… Onun gah iyirmi doqquz, gah da otuz (gün) olduğunu nəzərdə tutun…

Səhl b. Saddan (A.o.r.): Ailə üzvləri ilə birlikdə sahura qalxırdım və sonra isə Allahın elçisi (s.ə.v.) ilə səcdələrə (namaza) çatmaq üçün tələsirdim.

Zeyd b. Sabitdən (A.o.r.): Peyğəmbərlə (s.ə.v.) sa­hura qalxdıq (yeyib-içəndən) sonra namaza durduq. So­ruşdum ki: “Əzanla obaşdan arasında nə qədər var?”. Buyurdu ki: “50 ayə (oxunacaq) qədər (bir vaxt)”.

Abdullahdan (A.o.r.): Peyğəmbər (s.ə.v.) iftar etmədən orucu tutmuşdur; insanlar da belə etdilər. Sonra bu onlar üçün çətin olduqda Allahın Elçisi (s.ə.v.) (bunu) onlara qadağan etdi. Dedilər: “(Axı) sən belə edirsən!”.

“Mən sizin kimi deyiləm, şübhəsiz ki, mən həm yedirilirəm, həm də içirdilirəm” - deyə buyurdu.

Ənəs b. Malikdən (A.o.r.): Peyğəmbər (s.ə.v.) buyurmuşdur: “Sahur edin. Şübhəsiz ki, sahurda bərəkət vardır”.

Ibn Abbasdan (A.o.r.): deyib ki, “Peyğəmbər (s.ə.v.) oruc olduğu halda qan aldırmışdır”.

Ibn Abbasdan (A.o.r.): Allahın elçisi (s.ə.v.) Ramazanda Məkkəyə səfərə çıxdı. Məkkəyə çatdığı zaman (camaatla birgə) orucunu dayandırdı (yəni səfərdə olduqları üçün oruc tutmadılar).

Əbu Dərdadan (A.o.r.): Peyğəmbər (s.ə.v.) ilə isti bir gündə səfərə çıxdıq. Elə isti idi ki, adam günəşin yandırıcı şüasından qorunmaq üçün əli ilə başını tuturdu. Aramızda Peyğəmbərlə (s.ə.v.) Ibn Rəvahadan başqa oruc tutan bir adam yox idi.

Cabir b. Abdullahdan (A.o.r.): Allahın elçisi (s.ə.v.) bir səfərdə idi. Böyük bir izdiham gördü. Bir nəfərin üstünə kölgə salmaq (üçün örtük) çəkilmişdi. Peyğəmbər (s.ə.v.): “Bu nədir belə?” - deyə soruşdu.

“Oruc tutmuş bir nəfərdir!” - dedilər.

“Səfərdə oruc tutmaq təqvaya aid deyil!” - deyə buyurdu.

Ənəs b. Malikdən (A.o.r.): “Biz Peyğəmbərlə (s.ə.v.) səfərə çıxardıq; nə oruc tutan tutmayanı, nə də oruc tutmayan tutanı məzəmmət etməzdi…”.

Əbu Said əl-Xudridən (A.o.r.): Peyğəmbər (s.ə.v.) buyurmuşdur: “Qadın aybaşı olduğu zaman namaz qılmır, oruc tutmur, elə deyilmi? Bax bu, onun dində nöqsan olmasıdır”.

Ibn Abbasdan (A.o.r.): Bir nəfər Peyğəmbərin (s.ə.v.) yanına gəlib dedi: “Ey Allahın elçisi, anam, bir aylıq orucu qaldığı halda vəfat etdi. Olar ki, onun əvəzinə, orucun qəzasını mən tutum?”.

“Bəli, Allahın borcunu ödəməyə ən layiq olan (budur)!” - deyə Peyğəmbər (s.ə.v.) buyurdu.

Səhl b. Saddan (A.o.r.): Allahın elçisi (s.ə.v.) buyurmuşdur: “Iftarda tələsdikcə, insanlar xeyirlədir”.

Ibn Abbasdan (A.o.r.): Allahın elçisi (s.ə.v.) buyurmuşdur: “Ramazandan başqa, heç bir ayda tam oruc tutmayıblar”.

Abdullah b. Əmr bin Aslan (A.o.r.): Allahın elçisi (s.ə.s.) bizə gəldi və belə buyurdu: “Şübhəsiz ki, qonağının sənin üstündə haqqı var. Zövcənin də sənin üstündə haqqı var”.

“Davud (ə) orucu necədir?” - (deyə ondan) soruşdum.

“Dəhril (zamanın) yarısı qədər, (yəni bir gün oruc tutardı, bir gün tutmazdı) deyə buyurdu”.

Abdullah b. Ömərdən (A.o.r.): Peyğəmbər (s.ə.v.) buyurmuşdur: ”Hər ayda üç gün oruc tut!”.

Əbu Səyyiddən (A.o.r.): Peyğəmbər (s.ə.v.) Ramazan bayramı ilə Qurban bayramında oruc tutulmasını qadağan etmişdir.

Ibn Ömərdən (A.o.r.): Qurban bayramının birinci üç günündə oruc tutmağa icazə verilmədi. Ancaq qurban tapmayan adama izn verilmişdir.

Səlim atasından (A.o.r.): rəvayət edir: Peyğəmbər (s.ə.v.) buyurmuşdur: “Aşura günü istəyən (adam) oruc tuta bilər…”.

Sələmətə b. Əl-Əkvədən (A.o.r.): Allahın elçisi (s.ə.v.) Əsləm qəbiləsindən olan bir nəfərə hamıya bunu elan etməyi əmr etdi: “Hər kim yeyibsə, günün qalanını oruc tutsun, yeməyibsə, orucunu tutsun. Çünki bu gün Aşura günüdür”.

Ibn Ömərdən (A.o.r.): Qədr gecəsi Peyğəmbərin (s.ə.v.) səhabələrinin bir hissəsinə (ayın) son yeddi günündə göstərildi. Bunu izah edərək Allahın elçisi (s.ə.v.) buyurmuşdur: “Görürəm yuxunuz son yeddi günə uyğun oldu. Belə olduğu halda, kim onu axtarırsa, son yeddi gündə axtarsın”.