NV-nin ekoloji təhlükəsizliyi dedikdə onun normal istismar şəraitində hərəkət iştirakçıları və ətraf mühitə zərərli təsirinin azaldılması xüsusiyyəti başa düşülür. Avtomobillərin və digər nəqliyyat vasitələrinin ekoloji təsirlərinin azaldılması onların konstruktiv xüsusiyyətlərindən, onlarda istifadə olunan yanacaq, yağlama materiallarının nə dərəcədə səmərəli və səliqəli istifadə olunmasından asılıdır. Yanacağın mühərrikdə yanması zamanı çox sayda (200-dən artıq) zərərli maddə yaranır. Yanma prosesi nə qədər mükəmməl olarsa, yanacağın tərkibi, avtomobil aqreqatlarının texniki vəziyyəti və konstruktiv səviyyəsi nə qədər yüksək olarsa ətraf mühitin mühafizəsi bir o qədər yaxşı təmin olunar, avtomobilin ekoloji təhlükəsizliyi yüksək olar. Bu cür maşınlar ətraf mühiti az çirkləndirir. Çünki onların konstruksiyasında ətraf mühiti çirkləndirən elementlərin miqdarı minimuma endirilir.
