AMEA Mərkəzi Nəbatat Bağı, e-mail: lala_eko@mail.ru
Nəsli kəsilməkdə olan növlərin təbiətdə inkişaf xüsusiyyətlərinin və növmüxtəlifliyinin öyrənilməsi məqsədilə aparılan tədqiqat işlərinin bu bitkilərin qorunub saxlanmasında böyük əhəmiyyəti vardır. Azərbaycanın şimal-şərq hissəsində ətraf mühitə antropogen təsirin gücləndiyi şəraitdə Tulipa L. cinsindən olan nadir növlərin qorunması aktual problemlərdən biridir. Otlaq sahəsinə düşən mal-qaranın sayının tənzimlənməməsi, geniş ərazinin əkin və biçin üçün istifadəsi Tulipa eichleri Regel növünün təbii arealının azalmasına səbəb olmuşdur. Növün qorunmasının əsas üsulları kimi mədəni şəraitdə artırılaraq təbiətdə reintroduksiya vasitəsilə sayının bərpa edilməsi təklif olunur.
