İkinci fəslin sonuncu bölməsində abreviatura yolu ilə yaranan pedaqoji terminlər təhlil edilmişdir. Pedaqogika terminologiyasında abreviaturalar da xüsusi rol oynayır. Son dövrlərdə ixtisar yolu ilə pedaqogika sahəsində bir sıra terminlər düzəldilmişdir. Qeyd edək ki, bu terminlər çoxkomponentli terminoloji birləşmələrin ixtisarı ilə düzəldilir. Terminin çox uzun olması onun işlədilməsi zamanı müəyyən çətinliklər yaradır. Onları aradan qaldırmaq üçün bəzi çoxişlək çoxkomponentli terminoloji birləşmələr ixtisar edilərək eyni anlayışı adlandıran yeni termin yaradılır. Məsələn, PISA (Program for International Student Assessment), TIMSS (Trends in Mathematics and Science Study-riyaziyyat və təbiət elmləri üzrə orta təhsilin keyfiyyətini qiymətləndirmə tədqiqatı), PIRLS (Progress in International Reading Literacy Study-oxunun və qavramanın keyfiyyətini tədqiq edən beynəlxalq qiymətləndirmə tədqiqatı) və s.
Pedaqoji terminologiyada sözlərin ilk hecalarının ixtisarı ilə də terminlər formalaşır. Bu cür terminlər həm pedaqogikanın elmi dilində, həm də danışıq dilində istifadə olunur. Məsələn, pedfak termini “pedaqoji fakültə” termin birləşməsinin komponentlərinin birinci hecaları əsasında formalaşmışdır. Yaxud da metodbirləşmə, metodkabinet kimi terminlər də eyni üsulla formalaşmışdır. Terminoloji birləşmədə komponentlərin sayı artdıqca struktur modellərin sayı da artır və onların deyilişini çətinləşdirir. Bu isə şübhəsiz ki, sintaktik yolla əmələ gələn ikikomponentli və çoxkomponentli pedaqogika terminlərinin müxtəlif struktur modellərinin təhlili və qısaltma terminlərin yaranma yollarını müəyyənləşdirməyə imkan verir.
