Qədim yenə salındı ki, şümşad yenə şad ola.
Orta əsrlərin Nəsimi, Xətai, Füzuli, Qövsi, Vaqif və başqaları Bürhanəddin şeirinin gözəlliklərindən, sadə, aydın dil-üslub xüsusiyyətlərindən öyrənmiş, müəyyən şeirlərinə cavab və nəzirələr yazmışlar.
Qazi Bürhanəddinin:
Gəl, gəl ki, səndən özgə bir dərdim şəfası yox,
Dərdim dəxi yox isə bu işin səfası yox-
mətləli qəzəlinə Nəsimi aşağıdakı misralarla başlayan şeirini yazmışdır:
Gəl, gəl bəri ki, sövmü salatın qəzası var,
Sənsiz keçən zəmani-həyatın qəzası var.
Şairin:
Necə ki, şüəra zülf ilə xali dedilər
Nurani görməyibən onları xali dedilər-
Beyti ilə başlayan şeirinə Nəsimi „Dedilər“ rədifli şeirini həsr etmişdir.
Qazi Bürhanəddin Azərbaycan türkcəsində yaranmış şeirimizin güclənməsində, ədəbiyyatda dünyəvi, real duyğuların təsvirinin geniş vüsət almasında xüsusi xidmətləri olan ustad sənətkarlardan biridir. Bütün sonrakı dövr anadilli şeirimizin inkişafında şairin təsiri aydın hiss olunmaqdadır.
Dostları ilə paylaş: |
