Aşağı ətraf əzələləri. Çanaq, bud, baldır və ayaq əzələlərinə ayrılır. Çanaq əzələləri çanaq sümüklərindən başlayıb, bud sümüyünə bağlanaraq bud-çanaq oynağında müxtəlif hərəkətlərin meydana çıxmasına imkan yaradırlar.
Bud və baldır əzələləri-bədənin şaquli vəziyyətdə saxlanmasında və dik yeriməkdə əsas rol oynadıqlarına görə uzun və böyük kütləli olurlar. Bu əzələlər budun və baldırın bükülmə, açılma və hərlənməsinə kömək etməklə yanaşı, həmçinin ayaq barmaqlarının bükülüb-açılmasında iştirak edirlər. Budda nəzərə çarpan əzələlərdən dördbaşlı, ikibaşlı, dərzi; baldırda ön, dal, qamış, barmaları açan, bükən, üçbaşlı və s. əzələləri göstərmək olar.
Ayaq əzələləri-ayaqaltı və ayaqarxası qruplara ayrılır ki, bunlar da barmaqların açılma, bükülmə, yaxınlaşma, uzaqlaşma və qarşılaşma hərəkətlərini icra edirlər.
