Jurnalistika standartları

JURNALİST ARAŞDIRMASI

Biz cəmiyyət maraqları baxımından jurnalist araşdırması aparırıq. Belə araşdırmaların hamısını bizim müxbirlər gerçəkləşdirir. Onlar xidmət direktoruyla sıx əməkdaşlıq şəraitində bu işi görürlər. Həmin direktorlar da gərəkəndə “Azadlıq/Azad Avropa Radiosu”nun regional direktor və ya hüquqşünaslarıyla məsləhətləşirlər.

Biz açıq şəkildə “Azadlıq/Azad Avropa Radiosu”nun jurnalistləri olduğumuzu bildirir və qanuni yollarla məlumat toplamağa çalışırıq. Çalışırıq ki, məlumat qaynaqları bizimlə könüllü əməkdaşlıq etsin. Biz hər hansı hiyləyə əl atmır, tutalım, müsahibə almaq üçün qaynağımızı yalandan dilə tutub, qapını açmağa və bizi evə buraxmağa məcbur etmirik. Tam tərsinə, ictimai yerdə - evindən çıxdığı, yaxud evinə qayıtdığı zaman qaynaqdan müsahibə almağa çalışmalıyıq.

Biz qanunu pozmuruq və jurnalist araşdırması apararkən, hər hansı qanunazidd hərəkətlərə yol vermirik.

Biz yalançı şahidlərdən istifadə etmirik. Korrupsiya əməlini araşdıran hər hansı QHT gizli agentdən yararlanıb sonra nəticəsini bizimlə bölüşürsə, həmin agentin xəbərlədiyi məlumatı çap və ya translyasiya edə bilərik. Ancaq özümüz QHT-ləri yalançı şahiddən faydalanmağa meylləndirmir, pul, avadanlıq, məsləhətlərlə belə təşəbbüslərə yardım etmir və digər üsullarla da QHT-lərin gizli araşdırmalarına qatılmırıq.

Yüksək ictimai maraq doğuran mövzuları işlərkən, jurnalistlərimiz öz iş yerinə münasibətdə “soruşmadılarsa söyləmə” siyasətinə dayanaraq, ətrafdakılarda özləri haqqında, sadəcə, adi vətəndaş təsəvvürü yarada bilərlər. Məsələn, sürücü vəsiqəsi verilərkən rüşvət alınmasının mümkünlüyünü araşdıran jurnalist həmin vəsiqəni almaq istəyən sadə vətəndaş rolunu oynaya bilər. Ona üz tutub jurnalist olub-olmadığını soruşsalar, o, jurnalist kimliyini və araşdırdığı mövzunu açıqlamalıdır.

Jurnalist araşdırması gedişində qaynaqlarımıza yalnız güvənliklərini orumaq qaçılmaz olanda anonim qalmağı təklif edirik (BAX: ANONİMLİK). Ancaq bu halda da qaynağımızın hansl mövqeni tutduğunu və onun məlumatına niyə güvəniləcəyini publikaya açıq şəkildə çatdırırıq.

Gizli kamera və səs yazısından yararlanarkən, “Azadlıq/Azad Avropa Radiosu”nun qaydalarını rəhbər tuturuq (Bax: GİZLİ KAMERALAR).

“Azadlıq/Azad Avropa Radiosu”nun hər hansı jurnalist araşdırması yalnız müvafiq xidmət direktorunun bilgisi və razılığı çərçivəsində dərc edilir və efirə çıxarılır. Zəruri hallarda daha öncə “Azadlıq/Azad Avropa radiosu”nun hüquqşünaslarından da məsləhət alınır.

Bu paraqrafda əksini tapan qaydalardan hər hansı yayınma baş redaktorla razılaşdırılmalıdır.