Ekologiya - bioloji elmlər sisteminə daxil olub, fauna və floranın daxili əlaqə və münasibətlərini, həmçinin insanlarla təbiət arasında qarşılıqlı təsirin qanunauyğunluqlarını öyrənir.
Ekologiya və səhiyyə. Sağlam, təmiz ekologiya insanların sağlam orqanizmə malik olması üçün təbii və ən zəruri amildir. Və əksinə, çirkli, zəhərli ekologiya hər gün artan, qarşısını almaqda səhiyyənin çətinlik çəkdiyi xəstəliklər yaradır.
Ekologiya və mədəniyyət. Ekologiyanın təmizliyi xalqın mədəni inkişafından çox asılıdır. İnsana xidmət üçün kəşf edilən hər yeni ixtiranın tətbiqi zamanı ekoloji amil nəzərə alınmırsa, bu cür mədəni nailiyyət ekologiyaya və əslində birbaşa insanlığın özünə qarşı çevrilmiş olur.
Ekologiya və iqtisadiyyat. Ölkənin iqtisadi inkişafını təmin etmək, əhalinin maddi tələbatlarını ödəmək üçün təbii amillərdən kortəbii istifadə, sənaye müəssisələrində ekoloji tarazlığın nəzərə alınmaması ekologiyaya zərər vuran ən ağır sahədir. İqtisadi nailiyyət ekologiyanın pozulması ilə əldə edilirsə, bu, müvəffəqiyyət deyil, itirməkdir.
