Qiymət - yerinə yetirilmiş tapşırığın dəqiqliyi və düzgünlüyünün, şagirdlərin fəallıq və müstəqillik dərəcəsinin göstəricisidir. Qiymətləndirmə təlim işinə xasiyyətnamə verməkdir.
Qiymətləndirmədə aşağıdakı cəhətlər nəzərə alınmalıdır.
biliyin həcmi nəzərə alınmalıdır;
biliyin dərk edilmə səviyyəsi nəzərə alınmalıdır;
biliyin tətbiq edilməsi nəzərə alınmalıdır;
biliyin ifadə olunması nəzərə alınmalıdır.
Azərbaycan Respublikası Nazirlər Kabinetinin 13 yanvar 2009-cu il tarixli 9 nömrəli qərarı ilə "Azərbaycan Respublikasının ümumi təhsil sistemində Qiymətləndirmə Konsepsiyası" təsdiq edilmişdir. Həmin Konsepsiyaya görə müəyyən edilmiş yeni qiymətləndirmə sistemi aşağıdakıları təmin edir:
təhsildə müsbət dəyişikliklərin aparılması üçün mühüm vasitə rolunun yerinə yetirilməsini;
təhsilin keyfiyyəti üçün əsas göstərici olan "şagirdin təlim nəticələri" haqqında etibarlı məlumat verilməsini;
qiymətləndirmə vasitəsilə şagirdin bilik və bacarıqları haqqında kifayət qədər məlumat əldə edildikdən sonra fənn kurikulumlarında və dərsliklərdə müvafıq dəyişikliklərin aparılmasını;
təhsildə olan bəzi neqativ hallara qarşı mübarizə vasitəsi funksiyasını;
qiymətləndirməyə yeni yanaşmaların, yaddaşa əsaslanan qiymətləndirmənin əksinə olaraq, məntiqi təfəkkür vərdişlərinin inkişafına xidmət etməsini.
