Hər bir mahiyyət üçün onun nüsxəsini birmənalı təyin edən açar seçilməlidir. Açar bir və ya bir neçə atributdan ibarət ola bilər. Əgər mahiyyəti xarakterizə edən atributların içərisindən açar seçmək mümkün deyilsə, onda atributların tərkibinə açar kimi istifadə oluna bilən xüsusi atribut daxil edilir. Məsələn, müəssisədəki işçilər haqqında verilənlər bazasında «işçinin tabel nömrəsi», bank sistemində «əmanətçinin hesab nömrəsi» açar kimi istifadə oluna bilər. Əgər atributlar siyahısında həmin atributlar və ya açar kimi istifadə oluna bilən digər atributlar yoxsa, atributlar siyahısına süni olaraq nüsxələrin sıra nömrəsi atributunu daxil edib, ondan açar kimi istifadə edilə bilər. Müasir VBİS-lərdə bü əməliyyat avtomatik yerinə yetirilir.
Bəzi hallarda mahiyyəti təyin edən bir neçə açar ola bilər. Bu halda onlardan biri əsas (birinci) açar kimi təyin olunur, o biriləri isə mümkün açarlar hesab olunur. Əsas açar kimi uzunluğu ən kiçik olan atribut seçilir.
