Кяримбяйли ширин ханым

Bu həyat sandığım dərman neyləsin?

Bulma, ey Şadiman, dərdinə çarə,

Hər yarə içindən açar min yarə,

Gəlməz eylədiyin məlhəmlər karə,

Həkimlər arayan şəfa nəkarə?

Fələkdən gələnə loğman neyləsin?

10. X. 2003
QAYTARA BİLMƏYİRƏM
Hər axşam sübhə qədər çırpınıram, yataqda -

Yuxu gəlsin gözümə bir çarə bilməyirəm.

Gecənin zülmətiylə oynaşırlar otaqda,

Ürəyimi yerinə qaytara bilməyirəm.

Asimana üz tutur ulduzlarla öcəşir,

Göylə yer arasında salır lap haray-həşir,

Kilidlənir boğazım bütün vücudum üşür,

Ürəyimi yerinə qaytara bilməyirəm.

Anlarımın başına döyür dəli zamanım,

Heç bir şeyə qalmayır bu dünyada gümanım,

Əlim üzülür haqdan hıçqırır ah, amanım,

Ürəyimi yerinə qaytara bilməyirəm.

Göylərə əl açıram Tanrıma yalvarıram,

Bütün ümidlərimi saatıma sarıram,

Tənim çırpınır, ahla ələmləri arıram,

Ürəyimi yerinə qaytara bilməyirəm.

Ağlım haray qoparır, fəryadıma can deyir,

Bu necə fırtınadı, bu necə fəqan deyir?

Gəl sinəmin içinə yad yer nə ünvan deyir?

Ürəyimi yerinə qaytara bilməyirəm.

Boşa çsıxır savaşım, donur gözdə qan yaşım,

Əyilib köks üstünə əzabdan dərdli başım,

Qopub təndən, İlahi, axı əziz sirdaşım,

Ürəyimi yerinə qaytara bilməyirəm.

10. X. 2003
QƏM QAPISI BAĞLIDI

Qəm qapısı bağlıdı,

Gəl ona açar salma.

Ömür Rəbb nağılıdı,

Ürəyinə çox alma.
Keçən günü ötürdün,

Qayıtmağı gumansız.

Vaxtını boş itirdin,

Özün oldun amansız.

Ağlını çox yükləmə,

Baş bədəndən balaca.

Ürəyini təkləmə,

Bədən cana bir baca…

Ömür su təki axar,

Tutub saxlamaq olmaz.

Ötən günlər qəlb yıxar,

Dünya heç kəsə qalmaz.

Ağladan güldürmədi,

Ələmə möhtac olma.

Qəm kimi öldürmədi,

Dərdə belə ac olma.

Çoxu bunu unudur -

Hər doğulan öləcək.

Dünya belə qan udur,

Axır zaman gələcək.

Sanma, Şadiman dəli,

Dəyirmanda söz üyür.

Başıma Tanrı əli-

Yazmasam hər gün döyür.

26.05.2002
CAN SƏNƏ BAĞLIDI ELƏ, AY ÜRƏK
Niyə yarı yolda qoyursan məni?

Ağlayıb-sızlama belə, ay ürək.

Dərdimi dağ edib oyursan məni,

Vermə ümidimi yelə, ay ürək.

Mən həyat aşiqi, sən bağrı xəstə,

Qoymusan ömrümü niyə can üstə?

Ağlımı qul etdim mən sənin üstə,

Saldın duyğuları çölə, ay urək.

Hər qəmi əritdin qəlb ocağında,

Hissim düşüb qalıb dar bucağında,

Ağlı atıb-tutdun hey qucağında,

Ahın haray saldı telə, ay ürək.

Arzular könlümə düzülüb çin-çin,

Niyə uçurursan yuvamın için?

Qoyub taleyimi yarıda neçin?

Verirsən ömrümü selə, ay ürək.

Hələ neçə misram ağızda qalıb,

Təbimin dediyi kağızda qalıb,

Yenə ağrılarla üstümü alıb,

Salırsan dərdimi dilə, ay ürək.

Mən sevda gülüyəm bu gülşənlərin,

Dildə şərqisiyəm könlüşənlərin,

Qəfildən üstümü alıb çənlərin,

Bəyaz şeh ələyir telə, ay ürək.

Salma Şadimanı yatağa vaxtsız,

Gətirmə məzarı otağa vaxtsız,

Qoyma xəzan düşsün qəlb tağa vaxtsız,

Can sənə bağlıdı elə, ay ürək.

20. 07. 2003
QƏM TUTDU ƏTƏYİMİ
Ömrün payızı yetmiş bir yarpağa dönmüşəm,

Ovxalanır ürəyim saplağından yağıtək.

Dumanları dönməyən əngin dağa dönmüşəm,

Dərd könlümdən süzülür dodağıma ağıtək.

Yeri, göyün ahını məkan edibdi qəlbim,

Dünyanın fəryadından gör nə çəkir ürəyim?

Zamanı kor bəxtinə sükan edibdi qəlbim,

Anlarımı şir təki dişə çəkir ürəyim.

Çırpınıram könlümün sevda duyğularında,

Hissim sinəmə dustaq, ağlım başıma yükdü.

Çarpışıram özümlə çılğın uyğularımda,

Ürəyimin ağrısı ürəyimdən böyükdü.

Üzülüb əlim yerdən, göylərə əl açıram,

Bu soyuq baxışlardan qorumaqçın gözümü.

Bə’zən elə olur ki, özümdən də qaçıram,

Könlümün alovları közə basır özümü.

Əcabə, nə sitəmdi mənə edir bu fələk?

Çalxadır gözlərimdə yatmış dərya yaşımı.

Sinəmə ocaq çatır hər divanə bir dilək,

Yatağım tonqal olur, hara qoyum başımı?!

Çırpınıram gecəmlə gündüzümün əlində,

Elə bil bu vücudum bəşərdən yaranmayıb.

Gah fırtına, gah həşir ürəyin hər telində,

Hansı ocaq könlümün atəşindən yanmayıb?!

Məni sən yaratmısan, İlahi, bu ah nədi?

Bağrımı silkələyir yerin-göyün naləsi.

Hər əzabdan doğulan bu boyda günah nədi?

Misralardan qan içir təbimin piyaləsi.

Eyləmədin könlümə qismət şadimanlığı,

Boğdun ələm içində hər cürə istəyimi.

Dilim Tanrı söylədi, ürəyim imanlığı,

Mən şadiman dedikcə qəm tutdu ətəyimi…

13. 09. 2003
DİLƏ GƏLDİ ÜRƏYİMDƏ DUYĞULAR
Dilə gəldi ürəyimdə duyğular,

Oxu, könlüm, oxu səsin çağlasın.

Məhəbbətdən sehirləşir uyğular,

Oxu, könlüm, qaranlıqlar ağlasın,

Oxu, könlüm, oxu səsin çağlasın.
Bir tənimdi, bir ruhumdu, bir də sən,

Söylə mənə ya göydə, ya yerdəsən?

Öt bülbültək, əyilmə heç dərdə sən,

Oxu, könlüm, nəş’ə qəmi dağlasın.

Oxu, könlüm, oxu səsin çağlasın.
Səndən əziz, səndən pünhan kimim var?

Təbim adlı dəryalarda gəmim var,

Ürək telin əsdirən bir dəmim var,

Oxu, könlüm, haqq şər yolun bağlasın,

Oxu, könlüm, oxu səsin çağlasın.
Mən səninlə ilhamıma yetmişəm,

Dərin-dərin fəzalarda ötmüşəm,

Ulduzların arasında itmişəm,

Oxu, könlüm, vaxt sənə əhd bağlasın,

Oxu, könlüm, oxu səsin çağlasın.
Əzəldən gündən candı möhnət yuvası,

Ona məlhəm İlahinin duvası,

Getməz başdan eşq, məhəbbət havası,

Oxu, könlüm, xeyr şəri dağlasın,

Oxu, könlüm, oxu səsin çağlasın.
Şadimanı məmnun etdi diləyin,

İlham adlı o şahanə mələyin,

Sevdasından doğulmusan fələyin,

Oxu, könlüm, təb misranı bağlasın,

Oxu, könlüm, oxu səsin çağlasın.

13. 09. 2003

EY ŞAMLAR AŞİQİ
Ey şamlar aşiqi, gözəl pərvanə,

Gəl belə dolanma çıraq başına.

Sinəmdən od tökür könül divanə,

Aləmi hönkürdən varaq başına.

Mən ki, əhli-qələm, sən eşqə sultan,

Qəlbimin atəşin alova tutan,

Ayıltma gecəni uyusun yatan,

Özünü od-közün içinə atan-

İkimiz ocağın duraq başına.
Səni candan əziz sandım özümə,

Səntək oda düşüb yandım özümə,

Demə leylalığı belə üzümə,

Gəl tök atəşindən uyan gözümə,

Bir yerdə dəlitək vuraq başına.
Pərvanə, odlara tutma canımı,

Dəli həsrətimə gəl tut anımı,

Bu düşğün könlümlə qur dövranımı,

Qaldıraq göylərə eşqin şanını,

Bir xəta yetişər iraq başına.
Gələnlər dünyaya divanə gəldi,

Rəbbin ayırdığı ünvanə gəldi,

Gəlib bir-birindən lap canə gəldi,

Etdiyi bəlalar dövranə gəldi…

Könlüm atəşindən imanə gəldi,

Vurma tellərinin daraq başına.

Şadiman sevdana oldu mübtəla,

Qoyma ürəyini haxlasın bəla,

Mən yandığım təki sən də yan hala,

Yapma həsrətindən kədərə qala,

Gəl tökmə aləmi soraq başına.

12. 09.2003

BƏLALI TALE
Başına döndüyüm bəlalı tale,

Niyə ürəyimi pərişan etdin?

Mən necə unudum bu halı tale?

Sinəmə qəm oxun nə nişan etdin?

Ağrılar içində qalmışam naçar,

Ələmin qapımı bağlayıb-açar,

Sonsuz əzabına olmuşam düçar,

Canım tən evindən qırılıb qaçar,

Onu dərdə atdın, dərdi şan etdin.
Əzəldən belədi, bəlkə kainat,

Ağlayana qəmdi, gülənə büsat,

Gah zəhər, gah baldı əfsanə həyat,

Doğuldum zülümə düşdüm neçə qat…

Məni bu dünyada peşiman etdin.
De niyə üzümə, tale, gülmədin?

Ağrım ərşi yaxdı, bilə bilmədin,

Axan göz yaşımı niyə silmədin?

Nə ömrə yar oldun, nə də ölmədin,

Haqqın ətəyində hey iman etdin.
Ağladım, sızladım mən zarı-zarı,

Ələndi başıma ələmin qarı,

Ömrüm çiçəklərdən süd yıgan arı,

Günlərim xəlbirdə ələnən darı,

Üyütdün illəri, vaxta man etdin.
Şadiman biçarə, əlində xəstə,

Nə bəlalar çəkdim mən sənin üstə?

Düşüb yataqlara qaldım can üstə,

Ya mənə həyat ver, ya ömrü istə!

Bəsdir ürəyimi dəyirman etdin.

24. 08. 2003

GƏLDİ ÖMRƏ YUXU KİMİ
Gəldi ömrə yuxu kimi,

Mənim könlüm, mənim könlüm.

Ətri bir xoş qoxu kimi,

Mənim könlüm, mənim könlüm.

Yeri, göyü qan eylədi,

Fələk eşqin şan eylədi,

Dərdə, qəmə şan eylədi,

Mənim könlüm, mənim könlüm.

Acılardan talan oldu,

Ağrı dönüb ilan oldu,

Sitəmlərə elan oldu,

Mənim könlüm, mənim könlüm.

Gəldim yəqin bu dünyaya,

Düşmək üçün aha-vaya,

Fəryadından əydi qaya,

Mənim könlüm, mənim könlüm.
Şadimanı peşman etdi,

Hər günün yaman etdi,

Hər ağrıya iman etdi,

Mənim könlüm, mənim könlüm.

23.08.2003
SİZ EY HARAYIMI DUYAN ADAMLAR
Siz ey harayımı duyan adamlar,

Qəm qəlbi sinədən asdı, neyləyim?

Ürəyə düz qiymət qoyan adamlar,

Dərdə gündüz, gecə yasdı, neyləyim?

Acılar taxtımda sultanım oldu,

Nəş’ənin yerini tutanım oldu,

Kimsə deyə bilməz xoş anım oldu,

Bəxtin dəmir üzü pasdı, neyləyim?

Hər qəmi çəkməyə güc hardan tapım?

Tapıb ələmimin sinəsin çapım,

Beşgünlük ömrümü əlindən qapım,

Bu dəli ürəyə fəryadmı yapım?

Görənlər desinlər rastdı, neyləyim?
Şadiman ahına olub mübtəla,

Tutubdu könlünü dərd tutan bəla,

Getmədi ürəklə heç zaman yola,

Qəlbi tutub küncə basdı, neyləyim?

21. 08. 2003
MƏNİ QƏMƏ TUTAN ZAMAN
Məni qəmə tutan zaman,

Saatıma aman yoxmu?

Başı ahla qatan zaman,

Söylə səndə iman yoxmu?

Dərdim qaya, daş əritdi,

Gözlərimdə yaş əritdi,

Ağla yuva-baş əritdi,

Etmədiyin yaman yoxmu?!…

Ömürləri aldın qaçdın,

Təni qəbrə saldın qaçdın,

Özünlə tək qaldın qaçdın,

Bu dərdlərə dərman yoxmu?

Hey çapırsan göy atınla,

Yelə bənzər saatınla,

Nur çeşməsi həyatınla,

Bəşərə bir loğman yoxmu?!

Yuvan soyuq, canım isti,

Ömrü ötən anlar kəsdi,

Başdan-başa anın nəsdi,

Ayaq saxla qaçma bəsdi,

Heç hökmünə fərman yoxmu?

29. 08. 2003

DƏRD MƏNİ ÇƏKDİ KAMINA
Dərd məni çəkdi kamına,

Döndüm gecələr şamına,

Ağladım dedim hamına,

Könlümü aha bələdi,

Üstümə hicran ələdi.
Hey ağrı doğdu anımdan,

Qəlbə qidamı qanımdan?

Qopa bilmədim canımdan,

Taladı könlü hər qatı,

Bula bilmədim nicatı.
Aləm haraydan oyandı,

Sinəsi qəmə boyandı,

Zaman diksinib dayandı,

Ağrıma sultan olandan,

Mənimtək tənha qalandan.
Dərdə mübtəla olmuşam,

Özünə bəla olmuşam,

Uçquna düşmüş yolmuşam,

Olub zamana araba -

Bayquşlar sevən xaraba.

29. 08.2003 / Gəmidə

ELƏ AĞLAYIRAM DƏRDLƏR İÇİNDƏ
Elə ağlayıram dərdlər içində,

Hali-fəqanıma yananım yoxdu,

Ürəyim hıçqırır niyə, neçində?

Tənhayam, qəribəm amanım yoxdu.

Canın harayına könül ah çəkir,

Hərə bu dünyada bir günah çəkir,

Gecənin zülümün sübh, sabah çəkir,

Daha bir xoş gələn zamanım yoxdu.

Mənə ələm verir bacı, qardaşım,

Axır bağırıma qanlı göz yaşım,

Olmadı həyatda bir can sirdaşım,

Könlümə dərd verdi, of yar-yoldaşım,

Kəsilib taqətim, amanım yoxdu,
Bütün diləkləri paraladılar,

Səadət yolumu qaraladılar,

Sinəmin içini yaraladılar,

Bağrımın yarasın araladılar

Bu qalan ömrümə gümanım yoxdu.
Göylərə, yerlərə üsyan edirəm,

Ürəyi ahlarla büryan edirəm,

Ağrımı sinəmə həyan edirəm,

Məni sevənlərə bəyan edirəm…

Ürəyim ağlayır loğmanım yoxdu!

7.X1. 2003 / Pirallahı

KÖNLÜMƏ GÖZÜMÜN YAŞLARI AXIR
Könlümə gözümün yaşları axır,

Ürəyim çırpınır sel arasında.

Bağrımda göylərin şimşəyi çaxır,

Mizrabım hıçqırır tel arasında.

Səmaya buludlar axnaşır yenə,

Qəzəbdən şimşəklər çaxnaşır yenə,

Asiman gurşadı dağ aşır yenə,

Duman fəryad çəkir yel arasında.

Rüzgar dönüklüyün göstərir bizə,

Payızın xəzanı çıxıbdı dizə,

Duyğum hicran dolu bir sınıq kuzə,

Loğmanı tapılmaz el arasında.

Bədən doğulanın sağkən can kürkü,

Soyuğu üşüdür, istisi bürkü,

Dünyanı titrədən ömrün yükü,

Qalıbdı kürəklə bel arasında.

Nədir, Yaradanım, verdiyin əzab,

Vücudum dözməyir, eyləməyir tab,

Zamanın əlində zəhər dolu qab,

Qədəhi fırlanır il arasında.

Qopur, ey Şadiman, könüldən səda,

Hər ağrı alışan bağrıma nida,

Canım ürəyimdən tapmayır qida…

Çırpınır dodaqla dil arasında.

2. X11. 2003

QUL ETMƏ MƏNİ
Dərd yıxıb sinəmi taladı, Allah,

Hər ağrı-acıya yol etmə məni.

Könlümə hicranı qaladı, Allah,

Hicranı yumağa sel etmə məni.

Min günah işlədir hər gələn zaman,

Qopur bağırımdan necə ah, aman,

Ömür bir cəngavər, dünya ox, kaman,

Bu oxa-kamana tel etmə məni.

Haqdan o tərəfdə görmürəm həyat,

Günaha batıbdı doğulan min qat,

Anların yükünü çiyininə çat,

Vaxtıma əyilən bel etmə məni.

Duyğum ürəyimə xalı toxuyur,

Saat qulağıma anın oxuyur…

Savaşan rüzgarım lap qan qoxuyur,

İlahi, bu qana göl etmə məni.

Şadiman yalvarır dərd ona yağı,

Qapımdan kəsilməz əli-ayağı,

Səndə tapdım, Rəbbim, könlə dayağı,

Şeytana, iblisə qul etmə məni.

2. X11. 2003
QUŞ OLUB UÇA BİLMİRƏM
Dərd məni sinəmdən asıb,

Quş olub uça bilmirəm.

Özün bu köksümə qısıb,

Əlindən qaça bilmirəm,

Quş olub uça bilmirəm.
Döndərib ağaca məni,

Başında ağ taca məni,

Özünə möhtaca məni,

Əlindən qaça bilmirəm,

Quş olub uça bilmirəm.
Dərd məni çəkib kamına,

Deyir ki, yoxam hamına,

Gözətçi qoyub damına-

Hardadı baca, bilmirəm?

Quş olub uça bilmirəm.
Nəş’əmi alıb gizləyir,

Könlünə salıb gizləyir

Mənimlə qalıb gizləyir,

Ondan baş aça bilmirəm,

Quş olub uça bilmirəm.
Şadiman ahu balası,

Könlümün yandı talası,

Sinəmə zindan - qalası,

Qapısın aça bilmirəm,

Quş olub uça bilmirəm.

26. X11. 2001

GÖZÜMÜN YAŞINI GURŞADLAR YUYUR
Mən qəmə mübtəla, qəm mənə əsir,

Əsir olduğumtək zülüm də kəsir,

Könlümün ağzını müsibət kəsir,

Hər dərd ürəyimdə tufandı uyur,

Gözümün yaşını gurşadlar yuyur.
Azıb səhralarda ömür karvanı,

İtirib tapmayır cana ünvanı,

Bitib-tükənməyir fələk divanı,

Dərdin ağrısını çəkənlər duyur,

Gözümün yaşını gurşadlar yuyur.
Mən miskin olmuşam ona nə vaxtdı?

Qurub ürəyimdə hicranlar taxtdı,

Ala bilməyirəm əlindən baxtı,

Edir ürəyimçin hər dərdə buyur,

Gözümün yaşını gurşadlar yuyur.
Heç nəyi özünə man bilmir dərdim,

Ömrümdən ötəni an bilmir dərdim,

Bu tənin sahibin can bilmir dərdim,

İblis fitnəsinə, fe’linə uyur,

Gözümün yaşını gurşadlar yuyur.

25. 02. 2002

ƏLƏM BOSTANIYAM - XƏZANI GƏLMƏZ
Ələm bostanıyam - xəzanı gəlməz,

Ora qəm tumunu əkən, neyləsin?

Hicran qəlbə düşdü heç və’də ölməz,

Orda dərd sarayın tikən, neyləsin?

Hər yanım fəqandı, hər yanım nalə,

Ürəyim qan içir əldə piyalə,

Bağrım qana batan qırmızı lalə,

Bu ağrı-acını çəkən, neyləsin?

Sitəmlər içində can verirəm can,

Hali-pərişanəm ürək yarımcan,

Tənimdə əsirdi bu biçarə can,

Bəbəyə yaşımı tökən, neyləsin?

Ağladıb güldürür hey zalım zaman,

Bağrım mizrab olub, ürəyim kaman,

Boğur vücudumu, Allah, ah-aman,

Bu könül mülkümü sökən, neyləsin?

Fələk heç bulmadı mən biçarəni,

Vurdu yarə üstdən qəlbə yarəni,

Ötdü il tapmadım könlə çarəni,

Zaman arabasın çəkən, neyləsin?

Binadan olmuşam ələm vurğunu,

Odur ki, çəkirəm öylə ağrını,

Qəm quşu edibsə Xuda bağrını,

Tale bağçasında səkən, neyləsin?

Artır günbəgündən könül divanı,

Uçurdur gurşadlar gözdə yuvanı,

Yollarda yorğundur ömur karvanı,

Üstünə buludtək çökən neyləsin?

Şadiman dərd əkdi, qəm barı oldu,

Hər tağın ələmi nübarı oldu,

Ömür ki, zamana dən, darı oldu-

Həyat tarlasına tökən neyləsin?

24. 02. 2002

SÖZLƏRİM HÖNKÜRƏR
Çiçəyi üşüyən bahardı könlüm,

Günəşi axtarır yel arasında.

Ağrıya, acıya nahardı könlüm,

Gözləri çırpınır sel arasında.

Əsir taleyimə xəzan küləyi,

Elə məcnun edib dərdə ürəyi,

İlham bu sinəmin ülkər mələyi,

Mizrabı hönkürür tel arasında.

Çağladar bu tale, bəxt Şadimanı,

Hər doğulan misra dini, imanı,

Ağlayan sətirlər kəsər amanı,

Sözlərim hönkürər el arasında.

30. 03. 2003
SƏSİ DÜŞÜB BAŞIMA
Könlün yenə səsi düşüb başıma,

Hey sızlayır ürəyimin telləri.

Duman çöküb gözü udan yaşıma

Göy titrədir başım üstə yelləri.

Çin gəzirəm bu ələmi biçməyə,

Axan qanın qurtum-qurtum içməyə,

Dəli təki çırmanıram keçməyə,

Boğur məni gur bulanıq selləri.

Zaman könlün diləyini duymadı,

Qapısından girməyə an qoymadı,

Yalquzaqtək ac qarını doymadı,

Aldı, uddu bu ömürdən illəri.

30. 03. 2003


ÖZÜMÜ HEÇ YERDƏ TAPA BİLMİRƏM
Hər dərdin ağrısı düşüb ürəyə,

Ağrıdan, acıdan qopa bilmirəm.

Arxanın zərbəsi dəyir kürəyə,

Ömür yollarında çapa bilmirəm.

Bəxtimin sarayı titrəyir, əsir,

Şıltaq anlarımtək elə tələsir,

Sübhün qapısını zülmətlər kəsir-

Kərpicin divara yapa bilmirəm.

Kədərim başımdan sel təki aşır,

Aşdıqca bulaqtək qaynayır, daşır,

Bu kor taleyimlə hey pıçıldaşır,

Qoyduğu qanundan sapa bilmirəm

Gecəni gündüzə qatıb gedirəm,

Bu dərdi özünə satıb gedirəm,

Ay təki, gün təki batıb gedirəm,

Özümü heç yerdə tapa bilmirəm.

30. 03. 2003
ÜRƏYİM DOLUBDU YAZ BULUDUTƏK
Ürəyim dolubdu yaz buludutək,

Yağmağa bir məkan, an axtarıram.

Qalmışam könlümlə, qələmimlə tək,

Donmuş damarıma qan axtarıram.

Yanıram şam təki başdan ayağa,

Ömür dəryasında döndüm mayağa,

Dəli duyğularım düşüb ayağa,

Dərdin dağıtmağa şan axtarıram.

Qalmışam ürəklə qəm arasında,

Gözlərim boğulur nəm arasında,

Zülmətim tellənir dəm arasında,

Gecədən qaçmağa dan axtarıram.

Divara yapılmış, döyülmüş daşam,

Buludlar gözündən tökülən yaşam,

Başı bədənindən üzülmüş quşam,

Çırpınan tənimə can axtarıram…

Verib kədərlərim qəlblə baş-başa,

Yenə çarpışmada Şadiman, haşa,

Girib ilhamımla könlüm savaşa,

Araya düşəcək qan axtarıram.

31. 03. 2003

İBLİSİ TAXTINDAN YIXMAQ İSTƏRƏM
İçimdə ələmlər verib baş-başa,

Onun fitvasından qorxmaq istərəm.

Ömür ötəridi, dünya tamaşa,

Ən şiş zirvəsinə qalxmaq istərəm.

Səmanın buludu hönkürən zaman,

Küləklər əlinə alır ox, kaman,

Yağışa, yağmura verməyib aman,

Göydə şimşəklərtək çaxmaq istərəm.

Ürəyin üstünü alanda ələm,

Ərşi ağladanda yanıqlı naləm,

Könül fəqanıma gələndə aləm,

Köksünü yandırıb yaxmaq istərəm.

Sel təki coşanda təbi-təvanım,

Başlar bağırıma dəli divanım,

Haqqa açılanda şeir ünvanım…

Dəryanın qoynuna axmaq istərəm.

Gecələr gözümdə yuxu azanda,

Könlüm uyğulara quyu qazanda,

Misranı qələmə əlim yazanda,

İlhamın fövqünə qalxmaq istərəm.

Axışıb qəlbimə dolan duyğular,

Gətirər sinəmə min bir qayğılar,

Artar zamanıma bitməz sayğılar,

Duyğumu anlara taxmaq istərəm.

Həyat da gözəldi, dünya da gözəl,

Bunların fövqündə Tanrıdı əzəl,

Cahanı yaşadar ağıl və düz əl!

Mən bu gerçəkliyə baxmaq istərəm.

Şadiman, arama zamanda suçu,

Vur, elə sınsın ki, şeytanın qıçı!

İnsana bağlıdı pisliyin ucu…

İblisi taxtından yıxmaq istərəm.

15. 04. 2003
BU DÜNYANI QANAD BİLDİM
Bu dunyanı qanad bildim,

Qanadımı dəldi getdi.

Harayını fəryad bildim,

Ürəyindən güldü getdi.

Zamanına ömrü qoydum,

Surətinə baxdım uydum,

Dərd oxuyla könlü oydum,

Hər acımı bildi getdi.

Doğulmuşam, var olmuşam,

Sevgisinə yar olmuşam,

Duyduqca ah-zar olmuşam,

Günü vaxta ildi getdi.

Saatlarım zor altında,

Duyğum qaldı kor altında,

Ömrüm yandı qor altında,

Ocağımda küldü getdi.

Bəslər qəlbi quzu kimi,

Sevdasının nazı kimi,

Könlün sınıq sazı kimi,

Necə ağlar dildi, getdi?

Dünya haqqın mələyidi,

Ömrün həyat diləyidi,

İnsanlığın ürəyidi…

Hər ölənlə öldü getdi.

14. 03. 2003