Кяримбяйли ширин ханым

NƏ QANAD AÇMISAN SEVDALI ÜRƏK?

Nə qanad açmısan sevdalı ürək?

Gəzirsən diləkli çağlar içində.

İşvəli, qəmzəli, ədalı ürək,

Fələk peymanını bağlar içində.
Dolub boşalırsan buludlar təki,

Əyilmək bilmirsən palıdlar təki,

Düşübdü üstünə ən ağır çəki,

Dünyanın sitəmi ağlar içində.

Hey haray çəkdikcə, bağrı taladın,

Üstümə min acı-ağrı qaladın,

Sən ki, basılmayan uca qaladın,

Nəş’əni bəs nədir dağlar içində?

Yerləri, göyləri hey dolaşırsan,

Sellərə qoşulub aşıb-daşırsan,

Yenə kainatla pıçıldaşırsan,

Qalmısan meşələr, bağlar içində.

Qəlbi zamanımdan niyə qopardın?

Özünlə zirvəyə, dağa apardın,

Bir vaxt bu sinəmdə tufan qopardın,

İndi də küləyin çağlar içində.

Səni tapmaq üçün mən gedim hara?

Gəzirəm dünyanı nə sora- sora?

Özün de dərdimə eyləyim çara,

Qoyma gözlərimi ağlar içində.

Keşikçi olmusan göyün üzünə,

Dönmüsən buludun axan gözünə,

Necə salım səni bu yer üzünə?

Asılıb qalmısan tağlar içində.

İlahi eşitmir bu dil duvamı,

Ürək, necə udum sənsiz havamı?

Tərk edib getmisən könül yuvamı,

Səni necə tapım sağlar içində?

9. 01. 2003

NƏ GƏZİRSƏN ZARI-ZARI

Nə gəzirsən zarı-zarı?

Könül, sənə baxan yoxmu?

İlhamının var qubarı,

Qəmi yerə çaxan yoxmu?
Nə əsmərsən tüllər təki?

Açılmısan güllər təki,

Köz üstündə küllər təki,

Bağrına od yaxan yoxmu?

Mən atəşəm, yan tüstümə,

Qəm kor olsun, qoy tüstümə,

Götür qələm, gəl üstümə,

Sənə ögey baxan yoxmu?

Könül, ələm guşəsiyəm,

Mən kədərin nəş’əsiyəm,

Həqqın vuran tişəsiyəm,

Əllərini sıxan yoxmu?

Sevdaların ötüşərlər,

Ürəyimlə bitişərlər,

İmdadıma yetişərlər,

Acıları yıxan yoxmu?

Könül, sənin dadın məndə,

Duyğulara adın məndə,

Batdın qaldın duman, çəndə,

Qənşərinə çıxan yoxmu?

Şadimanı al köksünə,

Təbimizdən yer diksinə,

Nə söyləyir yad əksinə?

Ağza qıfıl taxan yoxmu?

9. 01. 2003

QƏLBİM HƏMDƏM ARAR DİLLƏR İÇİNDƏ

Tənhalıq – nə qədər ağırdı bu ad?

Qoparar içərdə min cürə fəryad,

Gözlərim arayar könlümə imdad,

Qalarsan ağrılı illər içində,

Qəlbin həmdəm arar dillər içində.

Bağrına tökülər dünyanın qəmi,

Ahın lərzə gələr tutar aləmi,

Sənə kədər verər ömrün hər dəmi,

Qalar odun, közün küllər içində,

Qəlbin həmdəm arar dillər içində.

Tənhalıq evinin yayı qış olar,

İnsan hənirtisi bir alqış olar,

Bu ömür bəxtinə nə qarqış olar?

Ürək haray çəkər tellər içində,

Qəlbin həmdəm arar dillər içində.

Saatlar tarıma çəkər əsəbi,

Hönkürər uşaqtək könlünün təbi,

Düşər gözlərindən yaşamaq dəbi,

Sükutun qırılar çöllər içində,

Qəlbin həmdəm arar dillər içində.
Ağlarsan hər gecə kor taleyinə,

Batarsan ələmin sərxoş meyinə,

Yer, göy nalə çəkər bu gileyinə,

Harayın qırılar yellər içində,

Qəlbin həmdəm arar dillər içində.
Dolanar belinə ələm qurşağı,

Dərd səni bürüyər başdan aşağı,

Əgər qismət olsa qocalıq çağı…

Sonatək batarsan göllər içində,

Qəlbin həmdəm arar dillər içində.
Tənhalıq, Şadiman, gəlməyir becə,

Boğar ürəyini həm gündüz, gecə,

Zərif könlün təki duyğular incə,

Qalarsan əlində sükutun necə?

Saralıb solarsan güllər içində,

Qəlbin həmdəm arar dillər içində.

8. 01. 2003

BİR OCAĞAM , KÖZ ÜSTÜNDƏ

Bir ocağam, köz üstündə,

İçimdəki külüm ağlar.

Alışaram söz üstündə,

Ürək zülüm-zülüm ağlar.
Sızlayaram dərdə, qəmə,

Ürək dözməz bu aləmə,

Düşər könül zilə, bəmə,

Ağzımdakı dilim ağlar.

Fəqanımı duymaz fələk,

Fəryadıma uymaz fələk,

Mənə nəş’ə qıymaz fələk,

Sinəmdəki telim ağlar.

Yazaram kor divanlardan,

Nalə çəkən ünvanlardan,

Haqqı satıb-sovanardan,

Qələm tutan əlim ağlar.

Ömür bəxtə bir zinətdi,

Vaxt əlində nə sürətdi?

Dünya cana bir minnətdi,

Bağrı dilim-dilim ağlar.

Ey Şadiman, ömür qaçar,

Əlimizdən anlar uçar,

Qalar qəlbin elə naçar,

Ötüb keçən ilin ağlar.

9. 01. 2003

QIRILIBDI QƏLBİN SİMİ

Qırılıbdı qəlbin simi,

Mizrab düşüb tel üstünə.

Ürək gözlər bircə himi,

Göz yıxılsın sel üstünə.
Dolub könlün asimanı,

İtiribdi din-imanı,

Yenə çəkib ox-kamını,

Bulud cumur yel üstünə.

Duyğularım oymaq-oymaq,

Altı pendir, üzü qaymaq,

Arzulardan olmur doymaq,

Səda düşüb el üstünə.

Canlar alan dünya nəçi?

Hardan-hara gedir köçü?

Karvan tutub könlün içi,

Yük əyilib bel üstünə.

Arzularım yolun azır,

Şadimana namə yazır,

Dərdlərimə məzar qazır,

Torpaq çıxıb bel üstünə.

3. 02. 2003
GÖR İLHAM NƏ FƏRMAN EDİR?
Bulud-bulud diləklərim,

Baş içində duman edir.

Qopanda sərt küləklərim,

Rüzgarımı yaman edir.

Ömür uçur anlar üstə,

Oda düşür canlar üstə,

Hərdən zildə, hərdən pəstə,

Nə müddətdi olub xəstə,

Ürəyim ah-aman edir.

Fikirlərlə dolaşıram,

Qanadlanıb dağ aşıram,

Ayla, illə yollaşıram,

Hər nə edir zaman edir.
Ömür-həyat bir nağıldı,

Başa – sultan, şah ağıldı,

Sabah gəldi, gün dağıldı,

Vaxt saatla peyman edir.

Cana məlhəm xoş günümüz,

Şadlığımız, düyünümüz,

Batsa içdə səs-ünümüz,

Ürək Rəbbə iman edir.

Ey Şadiman, külə köz ver,

Misralara görən göz ver,

Qoyma yansın dilə söz ver,

Gör ilham nə fərman edir?

3. 02. 2003

NƏ NAZİLDİN TELLƏR TƏKİ

Nə nazildin tellər təki?

Qoyma ömrü yolda, könül.

Rüzgar ğüdən yellər təki,

Qalma qeylü-qalda, könül.
Gəldin mənə yuxu kimi,

Məst eləyən qoxu kimi,

Fələyin kam oxu kimi,

Çıxıb qalma kolda, könül.

Qəlbdən qopan aha döndün,

Gah alışdın, gah da söndün,

İlhamımla bir döyündün,

Gəzdin sağda, solda, könül.

Can mülkümü əsdirirsən,

Sevda yolun kəsdirirsən,

Vüsalımı küsdürürsən,

Gözüm qalıb yolda, könül.

Səni tənə mələk bildim,

Atəşini dilək bildim,

Hər qəmzəni kələk bildim,

Olma min bir halda, könül.

Canıma ah sarıyarsan,

Qəmə düşüb qarıyarsan,

Şadimanı arıyarsan-

Arı təki balda, könül.

2. 02. 2003

ÜRƏYİ AĞLADIR İÇİN-İÇİN…

Sinəmdə talan olmuş ürəyim,

Başımın üstündə naləsi viran edən fələyim.

Bağrımın odunda alışıb yanan ilham mələyim,

Pərən-pərən duyğularım baş-başadır,

Bu beşğünlük ömür mənə tamaşadır.

Dünyanın acıları könlümdən keçir,

Bağrımın başını oraq zəmi biçən təki biçir.

Bütün kədərlər ürəyimdən qan içir,

Ağladır məni hönkür-hönkür,

Duyğuları qüssələrə bükür.

Bilməm, qədərim nədən könlümü belə yaratdı?

Onu fırtınalar içinə atdı.

Niyə bu adamlar kimi ola bilmirəm?

Göründüyüm təki qala bilmirəm.

Üzüm gülür, qəlbim ağlayır,

İçimdə kədər acıları çağlayır.

Viranə duyğular könlümə dolaşır,

Qəlbimin göyləri bulaşır.

Bir məkan arayıram tənhalığa qapılmaqçın,

Özümlə, sözümlə birlikdə yenidən tapılmaqçın.

Əlçatmaz, ünyetməz göylərə əl açıram,

Hərdən özümdən də qaçıram…

Bu başsız diləklərdən qurtulmaqçın,

Dünyanın nəş’ələrinə qatılmaqçın.

Ürəyimi ağlamaq tutur,

Canımı atəşə atır,

Adamların kədərlərinə,

Sinələri viran edən qədərlərinə,

Vaxtsız gələn ölümlərə,

Dünyanı parçalayan bölümlərə,

Üsyan dolaşır içimdə,

Kimsə kədər görməyib bu biçimdə.

Zamanın ahlarından qurtulmaqçın,

Yenidən cahana atılmaqçın,

Canım qalmayıb,

Elə bir ünvanım qalmayıb,

Qəmlərə bulaşmayım,

Ağrı-acıyla ulaşmayım.

Kədərsiz dünyanın dadı yoxdu, bəlkə,

İlahi salır adamı bərkə,

Sınağa çəkmək üçün,

Təmizləmək üçün insanın için-

Ürəyi ağladır için-için…

24. X11. 2002