Кяримбяйли ширин ханым

AH, ÖMÜR AĞACIM PAYIZA DÜŞÜR

Ah, ömür ağacım payıza düşür,

Saralıb tökülür yarpaqlar bir-bir,

Saat əqrəbiylə anlar döyüşür,

Zaman gün ələyir əlində xəlbir.

Dəmlər ulduz-ulduz parlayır sönür,

Hər ulduz içindən bir atəş çıxır.

Süd təki səhərlər gecəyə dönür,

Vaxtı öz taxtından öz əli yıxır.

Gah şirin, gah acı min bir xatirə,

Beynimə yük olur, dilim dolaşır.

Sığmayır vərəqə, nə də sətirə,

Xəyallar çeşmətək qaynayıb daşır.

Ömür bir yellənçək oturan uçur,

Hər anın içindən min zərbə çıxır.

Dəvətək yol gedir, tər puçur-puçur,

Yollar yox, o özü yolları yıxır.

Dünyaya gələli rahatlığım yox,

Doğumnan ölümün arasındayam.

Sevinc bir zərrədi, əzablarım çox,

Bilmirəm, dünyanın harasındayam?

10. 03. 2006

MƏN DƏ MİLLƏTƏ SAY OLDUM

O vaxt ki, mən uşaq idim,

Ürəyi, könlü dağ idim,

Kefi-damağı çağ idim,

Hələ vicdanı ağ idim,

Təbibsiz sapasağ idim,

Kör kimlərə tay oldum,

Mən də millətə say oldum.

Ötdü ömrüm, yamanım,

Düşdü suya samanım,

Açdı gözümü zamanım,

Batıb çirkaba amanım,

Getdi əldən din-imanım,

İllər ötükcə zay oldum,

Mən də millətə say oldum.
Qəlbimin küdrəti artdı,

Kinimin qüdrəti artdı,

Pisliyə niyyəti artdı,

Əlimin qarəti artdı,

Neçə hiyləyə çay oldum ?

Mən də millətə say oldum.

Haramı harama qatdım,

Hər arzu-kamıma çatdım,

Elə pul-paraya batdım,

Özümü çirkaba atdım,

Neçə cür qala ucaltdım,

İblisin içində yatdım,

Dillərə əcəb hay oldum,

Mən də millətə say oldum.

Cavanlıq keçdi yel kimi,

Çağladım dəli sel kimi,

Qırıldı günüm tel kimi,

Düşdüm əllərə bel kimi,

Baharım ötdü yay oldum,

Mən də millətə say oldum.

Payızım keçdi qabağa,

Son qoydu kefə-damağa,

Düşdüm yaxşıca ayağa,

Qalmadı guman dayağa,

Can getdi təndən vay oldum,

Mən də millətə say oldum.

Atdım Dərgaha əlimi,

Kəsdi danışan dilimi,

Sovurdu göyə külümü,

Soldurdu bağda gülümü,

Güldürdü mənə elimi,

Qəbirlə taybatay oldum,

Mən də millətə say oldum.
İndi lal ruhum qan ağlar,

Ötən illəri varağlar,

Mələklər haqqı sorağlar,

Çəkilər canıma dağlar,

Cənnəti üzümə bağlar,

Sağ ikən raybaray oldum,

Mən də millətə say oldum,
Şadiman indi biçarə,

Eləyə dərdə nə çarə?

Sala vicdanı açarə,

Gün hanı aha düçarə?

Günəş idim bir ay oldum,

Mən də millətə say oldum.

26. 04. 2006

ŞEYTAN ÖZÜ PULDU, PUL

Salır insanı oda,

Gətirir cana qada,

Ondan gəlir hər əda,

Verir hər şeyi bada,

Çatmaz heç kimə nida,

Ağıl qəlbə çuldu, çul,

Adam ona quldu, qul,

Şeytan özü puldu, pul.
Hər saat qan eyləyir,

Düzdür hər san eyləyir,

Şansıza şan eyləyir,

Lap yarımsan eyləyir,

Ağıl qəlbə çuldu, çul,

Adam ona quldu, qul,

Şeytan özü puldu, pul.
Salır dərdə insanı,

Başının tükü sanı,

Edir halbahal canı,

Qeylü-qaldı hər anı,

Əsir olmayan hanı?

Agıl qəlbə çuldu, çul,

Adam ona quldu, qul,

Şeytan özü puldu, pul.

Savaşı nə bitməyir,

Nə ürəkdən getməyir,

Nə başından ötməyir,

Hər ələ də yetməyir,

Ağıl qəlbə çuldu, çul,

Adam ona quldu, qul,

Şeytan özü puldu, pul.
Salır dunyaya şivən,

Heç olur onu sevən,

Kim desə ona güvən,

Olacaq cana güvən,

Ağıl qəlbə çuldu, çul,

Adam ona quldu, qul,

Şeytan özü puldu pul.
Eləyir min cür günah,

Qoparır sinədən ah,

Bir çoxuna qibləgah,

Açmayır onsuz sabah,

Agıl qəlbə çuldu, çul,

Adam ona quldu, qul,

Şeytan özü puldu, pul.
Eyləsən başa əta,

Yetirər ona xəta,

Aləmi qoyma qata,

Qatdı ki, aləm bata,

Qoymaz dadına çata,

Qan-qadadı saata,

O ziyandır həyata,

Ağıl qəlbə çuldu, çul,

Adam ona quldu, qul,

Şeytan özü puldu, pul.

Batdın günaha əgər,

Ürəyi min cürə gər,

Yığ qızıl, çək üzə zər,

Göyə, yerə Haqdı ər,

Dadına yetər məgər?

Sanasan özünü nər,

Tökəsən nalənə tər,

Ağıl qəlbə çuldu, çul,

Adam ona quldu, qul,

Şeytan özü puldu, pul.

Kişi saxla gödəni,

Fələk döyür gedəni,

Üzülsə haqqın dəni,

Cəhənnəm udar səni,

Yetirmə cana çəni,

Məzar alacaq təni,

Alçatma belə məni,

Ağıl qəlbə çuldu, çul,

Adam ona quldu, qul,

Şeytan özü puldu, pul.

Salma qəmə yetəni,

Rüşvət udar Vətəni,

Çoxdu ölüb-itəni,

Çalma-çapma ötəni,

Allah ütər ütəni,

Bəşər qəbrin bitəni,

Ağıl qəlbə çuldu, çul,

Adam ona quldu, qul,

Şeytan özü puldu, pul.
Şadiman çox ah-zarı,

Əgər kim yığsa varı,

Gətirər çoxlu darı,

Cana düşməndir, barı,

Ağıl qəlbə çuldu, çul,

Adam ona quldu qul,

Şeytan özü puldu, pul.

25. 04. 2006

ƏYİLİB DÜNYADA NİZAM-TƏRƏZİ

Əyilib dünyada nizam-tərəzi,

Heç kəs öz yükünə ağır deməyir.

Aləmi yıxmaqdı şeytan qərəzi,

Bir kimsə haqqını çağır deməyir.
Göyün bağırında açılıb yarə,

Yaradan ah tökür daşa, divarə,

Təmiz vicdanlarda qalıb avarə,

Heç kim göydən nalə yağır deməyir.

İnsan itiribdi özünü çoxdan,

Çıxıb yer kürəsi fırlanan oxdan,

Bizi ölçüyə sal, İlahi, yoxdan,

Nəfsə qul cib soyur, fağır deməyir.

Şadiman əllərin tutub dərgaha,

Onu batırmasın iblis günaha,

Sinədə ürəyi dönübdü aha,

Qanı fəvvarəyə bağır deməyir.

27. 04. 2006


GÖR NECƏ VAR OLMUŞAM ?
Dəmlərim həsrət dolu,

Lap biqərar olmuşam.

Bağlanıb ümid yolu,

Dərdimə yar olmuşam.

Bəbəklərim fəvvarə,

Axır daşa-divarə,

Edib qəmi avarə,

Nə günü zar olmuşam?!

Ürəyim ovalandı,

Ağrıya yuvalandı,

Dodağım duvalandı,

Əcəbcə xar olmuşam.

Zaman uçur yel kimi,

Ovxalanır tel kimi,

Axıb gedir sel kimi,

Mən ona dar olmuşam.

Hicranın üzü qarə,

Açıb könüldə yarə,

Yoxmu bir ona çarə?

Zarına kar olmuşam.

Şər oynayır Allahla,

Toyun qurur sabahla,

Ey Şadiman, bu ahla

Gör necə var olmuşam? !…

8.05.2006