Luk : i-lah-uva hung guilhung chengse sutdohna mi tamtah-in abol pan banguvin

Luk 4:43 Ahinla Jesun ajah-uvah, “Kho dang danga jong Pathen lenggam Thupha hi kaseiphong tei tei ding ahi. Hiche dia chu hung kisol kahi,” ati.
Luk 4:44 Hijeh chun Judea gam Houthua kikhopna in hoa jong ahil lhanglei.
Luk 5:1 Jesu Gennesaret dil panga adin pet’in Pathen thu ngai nom hon akimvel’a aneh chinto jengui.
Luk 5:2 Jesun twipam chin’a kong ni kihen amui; ngaman kong neiho chu potdoh a len asoppet’u ahiye.
Luk 5:3 Jesu Simon kong’a alut’in twipam chin’a kona kong chu tol lut jep din asol’in, chuin atouvin kong’a pansan mipi chu thu ahiltai.
Luk 5:4 Athusei jouvin Simon jah a, “Twithuh laiya tol lut’in nga matna din len sep lhauvin,” atileh;
Luk 5:5 Simonin adonbut’in, “Pu, jan khovah hel’a imacha man lou kahiuvin, nang thupeh-in len sep tem unge,” atin,
Luk 5:6 len aseu leh nga tampi aman khauvin alen jouseu a-ehpai ding ahitai.
Luk 5:7 Hichun kong danga pang aloiten ahung kithopi diuvin agah jap’ui. Amaho ahungun kong te ni chu nga akhol dimset’un ahileh alhalut deh deh jenguve.
Luk 5:8 Athilsoh hi Simon Peterin amu-chet phat’in Jesu khomuh a aboh khup’in. “Pakai, neidalha jengin, michonse kahibouve,” atitai.
Luk 5:9 Peter le akiloipi chengsen nga chujat amat jengu chu kidang asa behseh jenguve.
Luk 5:10 Simon loite ni, Zebedee chapa te ni Jacob le John jong chutima chu ahilhone. Jesun Simon jah a, “Tija hih-in, tua lhah mi man’a napan ding ahi,” ati.
Luk 5:11 Amahon kong te ni chu vao-kama ahintoldoh-un ijakai ada-lhauvin Jesu ajuitauve.
Luk 5:12 Jesu khopi khat’a aumpet’in akhosunga chun apum changa phah pasal khat aumin, Jesu amudoh phat’in a-angsunga aboh khup’in amai tol’a asulut’in, “Pakai, nalung ahileh eisutheng thei nahi,” tin atao tai.
Luk 5:13 Jesun athamin ajah a, “Kalung ahinai, damtheng tan,” atileh; apet tah chun aphah atheng jenge.
Luk 5:14 Koima jah a asei louna din Jesun akham chah-in, “Chen, Thempu gakivetsah-in, nadam theng hettohsah nan Mose thupeh banga thilto ding gatoh tan,” tin asol’e.
Luk 5:15 Ahinla aumchan thudol aki-hathanjal cheh jengin athu ngai ding le aveiset kiboldamsah din mipi ahungbe cheh cheh jenguve.
Luk 5:16 AhinIa Jesu gamthip’a achangin achedoh jin agataojie.
Luk 5:17 Nikhat Jesun thu ahilpet’in Galilee gam le Judea gam khotin’a kon le Jerusalema hung kon Pharisee ho leh Danthu hil ho hikomma chun atouvui. Hichea chun Jesun mi adamsah theina din Pakai thahat’in aumpi.
Luk 5:18 Hichepet tah hin mihon pasal langthi khat alupna pumin ahinpu’vin, put lut paiya Jesu angsunga jam din ago’uve.
Luk 5:19 Japi jeh a aput lut thei louhel phat’un inchunga akaldoh-uvin cheh pheng vang kah a alupna pumin, mipi lailung, Jesu angsung dontah a agah khai lhauve.
Luk 5:20 Atahsanu amu phat’in Jesun mipa jah a chun, “Golpa, nachonset jouse ngaidam ahitai,” ati.
Luk 5:21 Athuseijeh chun Pharisee ho le Danthu themhon, “Hichepa hi koibep hiya Pathen taitomna thu asei hi nga na? Pathen tilou koi dangin chonset angaidam jou ding ham?” tin agel pantauve.
Luk 5:22 Agel’u hi Jesun ahedoh paiyin a jah -uva, “Ibol’a chutobang nagel’u ham ?
Luk 5:23 ‘Nachonset jouse ngaidam ahitai,’ ti leh, ‘Thouvin lamjot tan,’ ti hoijoh baijom?
Luk 5:24 Hoi hileh leiset chunga mihem Chapan chonset jouse ngaidamna thahat anei nahetna diuvin,” atin, langthipa jah a, “Kaseipeh nahi, thouvin, nalupna kilah-in inlama chetan,” ati.
Luk 5:25 Langthipa mipi maiya ahung dingdoh paiyin, alupna akilah-in inlam jonin achen Pathen athang-vah peh-e.
Luk 5:26 Mihon adatmo soh keiyuvin Pathen thangvah to thon, atija thei lheh jengun, “Tunin thil kidang datmo umtah imutauve,” tin aseiyui.
Luk 5:27 Hiche nung hin Jesu apotdoh leh kaidonna muna tou Levi, kai-dongpa, chu amudoh-in ajah a, “Neijuiyin,” ati.
Luk 5:28 Levin ijakai dalhan akipat’in Jesu ajuitai.
Luk 5:29 Levin a-in’a Jesu vah nan golvah lentah abol’in kaidong ho tampi le midang hon ankong aumpiuve,
Luk 5:30 Hichun Pharisee ho leh danthu them ho Jesu seijuite chunga aphun’un, “Ibol’a kaidong ho le chonsete toh naneh khomu ham?” atiuve.
Luk 5:31 Jesun amaho hi adonbut’in, “Adamin louthem angaipoi, adamlouvin bou angaiye
Luk 5:32 Keijong midihsa kouva hung kahipoi, chonsete lungheisah dinga hung kahibouve,” ati.
Luk 5:33 Mihon Jesu jah a, “John seijuihon an angol matchet’un taojong atao jiuvin, Pharisee seijuihon jong chutiman abol’ui; nang seijui-hon vang aneuvin adon’ui,” tin aseiyui.
Luk 5:34 Jesun ajah-uvah, “Kichen golvahnaa hung lha ho chu aji neipan aumpi pet’a an na-ngolsah theiyum?
Luk 5:35 Amavang alah-uva kona aji neipa kipui mang phat hung lhung ding ahin, hiche sungsea chu an angol diu ahinai,” ati.
Luk 5:36 Jesun amaho chu thulem khat jong aseipeh-in, “Koiman pon thah abot-eh jin ponlui behnan anei ngaipoi; behna taleh ponthah jong abo-eh ding ahin, cnule ponthah hal jong chu ponlui chutoh alhou kitoh ponte.
Luk 5:37 koiman lengpitwi thah jong savunpeng luiya akhum ngaipoi; khum taleh lengpitwi thah chun savunpeng atumkeh ding, lengpitwi moh lon kanga, savun-peng jong kisuh manglo ding ahi.
Luk 5:38 Hijeh a chu lengpitwi thah savun-peng thah a khum ding ahi.
Luk 5:39 Koiman lengpitwi lui adon nungin lengpitwi thah adon nompoi; ajeh chu, ‘Lengpitwi lui bou alhume,’ tin aseijie,” ati.
Luk 6:1 Choldo nia Jesun buleijao ajotnaa aseijuiten changvui asih-un, akinoiyun abah pantauve.
Luk 6:2 Hichun Pharisee ho phabep’in “Ibol’a Choldo nia bol ngailou abol’u ham?” atiuve.
Luk 6:3 Jesun amaho chu adonbut’in, “David le aloite agilkel’uva chu ipi abol’u nasim khah louvu ham?
Luk 6:4 David chu Pathen insunga alut’in Pathen umjing hetna changlhah kitoh, Thempu tilouvin aneh ngailou chu anen aloite jong apei,” ati.
Luk 6:5 Ajah-uvah, “Mihem Chapa hi Choldo ni Pakai ahi,” ati.
Luk 6:6 Choldo nidang khat man Jesu Houthua kikhopna in’a alut’in thu agahil’e. Hikoma chun pasal khut jetlam ngoi khat ana umkhai.
Luk 6:7 Danthu them ho le Pharisee hon ahehset theina diuvin, Choldo nia mi aboldam aboldam lou achang lhiuve.
Luk 6:8 Jesun alungthimu ahen khutlang ngoipa jah a chun ‘Kipat-doh-in alailunga hung dingin,” atileh; ama akipatdoh-in ading tai.
Luk 6:9 Hichun Jesun ajah-uva, “Kadoh nahiuve, Choldo nia apha le ase hoijoh bol ngai ham? Huhhing ding ha suhmang ding ham?” ati.
Luk 6:10 Jesun abonchauvin avegolsoh keiyin khutlang ngoipa jah a, “Nakhut lhangdoh-in,” atileh; alhandoh phat’in akhut adamhel’e.
Luk 6:11 Chutah chun amaho athangtom behseh jengun Jesu i-lo ding thu akihousom tauve.
Luk 6:12 Hichelai hin Jesu tao dingin molchunga achen, jan khovah gei-yin Pathen’ah ataove.
Luk 6:13 Khovah lhah phat’in aseijuite akouvin, alah-uva konin mi som le ni alhengdoh-in amaho chu amin’u solchah asah-e.
Luk 6:14 Amaho chu Peter asahpa Simon, asopipa Andrew, Jacob le John, Philip le Bartholomew,
Luk 6:15 Matthew le Thomas, Alphaeus cha Jacob, gam ngailu atiu Simon,
Luk 6:16 Jacob chapa Judas, chule amatsah a pangpa Iscariot Judas ahiuve.
Luk 6:17 Jesu amaho hitoh ahung kumsuh-in jangcham lai khat’a adinge; hia chun seijui tamtah le Judea gama kon, Jerusalema kon chule Tyre le Sidon twikol pang dunga hung mipi nasatah toh ahiu-vin,
Luk 6:18 abonchauva Jesu thuhil ngai nom le adammo veiset nau kibol-damsah dia hung ahiuve. Chule Lhagaoboh suh genthei ho jong aboldam soh keiye.
Luk 6:19 Jesu tahsaa kona thahat hungpot’a amaho adamsah theijeh chun japin Ama tham khah tei din ago’uve.
Luk 6:20 Jesu akhodah-in aseijuite aven aseiye: “Vaichate anun nom nahiuve, Ijeh-inem itile Pathen lenggam nang hoa ahi.
Luk 6:21 Tulaiya gilkelte anun nom nahiuve, Ijeh-inem itile nakivahva diu ahi. Tulaiya kapte anun nom nahiuve. Ijeh-inem itile nui ding nahiuve.
Luk 6:22 Mihem Chapa jal’a min nahot bol’uva, Migilouva nahouset, nadonda tengu leh anun nom nahiuve.
Luk 6:23 Hitia nahou niu chuleh kipah thanomin lam’un, ven, vana nasan diu tohman alen’e. Apu apateuvin jong Themgao ho hitobanga chu anabolsau ahi.
Luk 6:24 Ohe mihaoho ada nahiuve, Ijeh-inem itile hinkho nom naneitauve.
Luk 6:25 Ohe tulaiya oivaho ada nahiuve, Ijeh-inem itile gilkel nahin thoh diu ahi. Ohe tulaiya nuiho ada nahiuve. Ijeh-inem itile lunghema naka diu ahi.
Luk 6:26 Ohe mi jouse seiphat chang ho ada nahiuve. Apu apateuvin jong Themgao lhem ho chutia anaseiyu ahi.
Luk 6:27 “Kathu ngaiho kaseipeh nahiuve, namelmau ngailu’vin, nahot bolteu thilpha bolpeh-un,
Luk 6:28 nagaosapteu phatthei boh-un lang, nabolseteu taopeh-uvin.
Luk 6:29 Na-ngeiphe lang khat beng chu lang khat jong dopeh-in, nasangkhol len lahpeh a chu nasangkhol sung nung jong peh than.
Luk 6:30 Nahenga thil thum chan pen, mi lahsa nathil ipi hi-jongle nung thum kit hih-in.
Luk 6:31 Min iti bol le chun nadeiyam chutobang chun miho bol’in.
Luk 6:32 Na-ngailuteu bou na-ngailut’u leh ipi pachat nachan diu ham? Chonsete jengin jong angailuteu angailu’ve.
Luk 6:33 Nabolphateu jeng nabolphat’u leh ipi pachat nachan diu ham? Chonsete jengin jong chutia abol’u ahi.
Luk 6:34 Mukit ding nakinep nau miho bou napeh-u leh ipi pachat nachan diu ham? Chonsete jengin jong apeh jat amukitna diu chonseho henga apejiuve.
Luk 6:35 Amavang namelmateu ngailu’vin, thilpha bolpeh-un, mukit ding imacha gel louvin thil homun; chutile kipaman nasatah nasan diu, Chungnungpen chate nahi diu ahi; ajeh chu Ama chu khohsahna heloute le migiloute khoto them ahi.
Luk 6:36 Napau mi khoto them bangin mi khoto them’uvin.
Luk 6:37 “Mi oimo hih-un, chutile oimo nachan lou diu ahi; mi themmosah hih-un, chutile themmo nakichansah lou diu ahi; ngai damun, chutile ngaidam nachan diu ahi.
Luk 6:38 Peuvin chutile nakipe diu ahi; atena dimset, hongphal tah a kipea kiloh det kheh-a kison chah kheh alet lha hel’a kipe ding nahiuve; ijeh-inem itile mi natepehna ma maa nakitepeh diu ahi,” ati.
Luk 6:39 Jesun miho chu hiche thulem hi aseipeh-in: “Mitchon mitcho alamkai theiyem? Ani lhona kokhuh a lhalut lhon lou ding ham?
Luk 6:40 Ahilpa sangin seijui achungnung ngaipoi, akihil themsoh teng vang leh seijui tapou ahilpa tobang bang ahiji nai.
Luk 6:41 “Ibol’a nasopi mit’a bohsi chu namelchih keova, nang mit’a inkam tejen chu mulouva um nahim?
Luk 6:42 Namit’a inkam tejen mudoh louva nasopi jah a, ‘Sopi, namit’a bohsi chu neilahdoh sah-in,’ nati thei ham? Vo mipha lhem! Namit’a inkam tejen chu kilahdoh masah le chun nasopi mit’a bohsi chu kichentah a namuthei ding ahi.
Luk 6:43 “Thingphung phan gaphalou asep ngaipon, thingphung phalouvin jong gapha asep ngaipoi.
Luk 6:44 Hijeh chun thingphung agan akihei. Min lingphunga theichang ga aloupon, lingboh lah a jong lengpithei ga aloujipoi.
Luk 6:45 Miphan thilpha akholna alung gil’a konin thilpha asosah jin, misen thilse akholnaa konin thilse asodoh jie. Ajeh chu mihem lung gil’a kikhol chu athusei naa hung potdohji ahi.
Luk 6:46 “Kaseibon bol louva ibol’a, ‘Pakai, Pakai,’ neitiu ham?
Luk 6:47 Ka-henga hunga kasei ngaiya bol’a mi chu i tobang ham vetsah unge.
Luk 6:48 Ama chu lei thuh tah laiya abul songpi chunga tunga insapa tobang ahi. Twisang alet’a vadungin aso-khum vangin phatah a kisadet ahijeh-in hiche in chu asulong jou tapoi.
Luk 6:49 Koi hileh ja la ja naa bol lou chu abulpi bei leiset’a insapa tobang ahi. Vadungin asokhum teng hiche in chu alhupai jin, ain setdol chu amelse lheh jenge,” ati.
Luk 7:1 Jesun mipi aseipeh nom jouse aseisoh phat’in Capernaum khoa aluttai.
Luk 7:2 Sepai jalamkai khat hin sahtah soh khat aneiyin, asohpa hi ana lel lheh jengin athi pai ding ahitai.
Luk 7:3 Jesu thudol ajah phat’in sepai jalamkaipan Jesu chu hunga asohpa boldam din akou ding Juda mi upaho asol’e.
Luk 7:4 Upaho hi Jesu henga ahungun khohsah tah-in ataovun, “Hichepa hi nabol-peh dia kilom mong ahi;
Luk 7:5 ajeh chu ijat’u alungset’in Houthua kikhopna in jong eisah peh-ui,” atiuve.
Luk 7:6 Hijeh chun Jesu amaho toh ahung kilhontai. In kom ahung gei phat’in sepai jalamkaipan aloite asol’in ajah a, “Pakai, hung kigim-bol datan, ajeh chu ka-insung nahung lut ding hi kakilompoi.
Luk 7:7 Hijeh a chu katahsa tah a nahenga hung dia jong kilom kisalou kahi; thun seitho jongle chun kasohpa chu dam jeng nante.
Luk 7:8 Keijong mi thu noiya natong kahin, kanoiya natong sepaiho aum kit’e. Khat jah a, ‘Chen,’ katileh achen, achom khat jah a, ‘Hungin,’ katileh ahung-jin; kasohpa jah a jong, ‘Hiche bol’in,’ katileh aboljin ahi,” agati-sah-e.
Luk 7:9 Jesun hiche hi ajah phat’in amapa chu kidang asa behseh jengin, anung jui mipi lama akiheiyin, “Kaseipeh nahiuve, Israel lah a jong hitobang tahsan len kamudoh poi,” ati.
Luk 7:10 Ahung kisol ho in lama ahung kile kit’u leh sohpa chu adamsan agatoh tauve.
Luk 7:11 Hiche nung hin Jesu Nain khoa alut’in, aseijuite leh mi tampin akilhonpiuve.
Luk 7:12 Khopi dongkot phung agah phah konchan ven, mithilong khat ahung kipudoh-in, athipa chu anun chapa chang khatseh a anei ahin, anu jong meithaisa ahitai. Khopi sunga pat mipin meithainu chu ahin lhonpiu-vin ahi.
Luk 7:13 Pakaiyin meithainu hi amudoh phat’in alai natpin ajah a, “Kap hih-in,” ati.
Luk 7:14 Anai lut’in thilong kong atham leh alongpu ho ading tauve. Aman, “Vo gollhang, kaseipeh nahi, thoudoh tan,” atileh;
Luk 7:15 mithipa chu atoudoh paiyin thu aseiyin, chuin Jesun ama chu anu apetai.
Luk 7:16 Mi jouse atija behseh jengun Pathen avahchoiyun, “Pathenin amite ahung vil’in, i-lah-uva Themgao nasatah khat asohdoh tai,” atiuvin ahi.
Luk 7:17 Hiche Jesu chung chang thudol hi Judea gam pumpi le akimvel gamkol dunga akithangsoh heltan ahi.
Luk 7:18 Aseijuiten John jah a thilsoh hicheng hi aseipeh uleh Johnin aseijuite mi ni akouvin
Luk 7:19 Pakai henga asol’in, “Ahung ding chu Nang nahi hitam, ahiloule achom-dang khat ka-nga nah lai diu ham?” tin agadohsah-e.
Luk 7:20 Solle te ni Jesu henga ahung lhonin, “John baptist chun, ‘Ahung ding chu Nang nahi hitam, ahiloule achomdang khat ka-nga nah lai diu ham?’ tia dong dinga nahenga eihinsol lhon ahi,” ati lhone.
Luk 7:21 Hichepet tah a hi Jesun amaho, hivei chom chom veiho, lhagao gilou vop ho aboldama mitcho jong kho amusah ahi.
Luk 7:22 Hijeh chun Jesun solle te ni adonbut’in, “Kile kit’in John jah a chun nathilmu le najah lhon, mitchon kho amu’va, elbaiyin lam ajot’u, miphah ho suh thenga auma, na-ngongin kho ajah, mithisa kaithouva auma tahlelte Kipana Thupha akiseipeh hi gaseipeh lhonin;
Luk 7:23 chule keiya kipal lhuhna neilou mi chu anun nom ahi,” ati.
Luk 7:24 John solle te ni che nungin Jesun John thudol aseiyin, “Gamthip’a ipi vedia cheji nahiuvem’? Huiyin peng amut ling ham?
Luk 7:25 Ipi vedia ba chedohji nahiuvem? Ponnem sil mi ham? Ven, von hoitah a kivona nom satah a um ho chu leng inpi dunga aumbouvui.
Luk 7:26 Achutile ipi vetnoma ba chedohji nahiuvem? Themgao ham? Ahi, najah-uva kasei ahi, Themgao sanga thupijo ahiye.
Luk 7:27 Ama thudol hi, ‘Ven, kasolle Nang sangin kasol masai, Aman nachena lampi semsa anakoi ding ahi,’ tia kisun chu ahitai.
Luk 7:28 Kaseipeh nahiuve, numei sung peng cheh ahivangin John pen geiyin ama sanga lenjo aumpoi, ahinla Pathen lenggama aneopen ama sangin alenjo nalaiye.
Luk 7:29 Mipi le kaidong hon asei ajah phat’un, John baptist chansah dol’a baptize changsa ahijeh-un, Pathen apah chauve.
Luk 7:30 Pharisee ho le Danthu them hon vang John baptist khut’a baptize achan lou jeh-un adiuva Pathen thilgon chu apaitauve.
Luk 7:31 “Tukhang miho hi ipi to kitekah ding hitam? Itobang mi hiuvem?
Luk 7:32 Amaho hi kailhanga tou chapang ho khat’in achom khat jah a, ‘Kuli kamutpeh-u le la nalam pouvin, Lapi kasah-u jongle nakap deh pouve,’ tia kihouho bep ahiuve.
Luk 7:33 Ijeh-inem itile John baptist chu ahungin changlhah la nelou lengpitwi jong don louvin aum nan, ‘Thilhavop ahi,’ atiuvin;
Luk 7:34 Mihem Chapa ahungin changlhah anen lengpitwi adon leh, ‘Ven, neh hat le lengpitwi loppa, kaidong ho jolpa hi,’ atiuve.
Luk 7:35 Ahinla chihna chu achaten adihna aphot chet ahibouve,” ati.
Luk 7:36 Pharisee khat’in Jesu chu nehkhompi din akouvin, Ama Phariseepa in’a alut’in atoutai.
Luk 7:37 Hiche khopi sunga hin chonse numei khat aumin, Jesu Phariseepa in’a anne dia tou ahen songval bom khat’a thao namtui choiyin ahungin,
Luk 7:38 Jesu nung, akhotaljum koma adingin, akap’in akengphang chu amit lhin asop’in, chuin asamin atheh ngimin, achop’in thao namtui chu anui.
Luk 7:39 Neh khompi dia kou Phariseepan hiche hi amu phat’in alung sunga, “Hichepa hi Themgao ahinah le ahung thama numei khu itobang mi ahi hentin, chonse ahi-jong he nah ta,” tin agel’e.
Luk 7:40 Jesun ajah a, “Simon na-henga seinom khat kaneiye,” atileh; aman, “Seijengin Houhil,” ati.
Luk 7:41 Aman, “Mi nin sumpa hom mi khat sum abat lhone. Khat’in denarii ja nga aban, khat pan som nga abai.
Luk 7:42 Asah lel lhon phat’in aman abat lhon angaidamtai. Hiche te ni koijoh hin ama chu ha-ngailut jon tem?” atileh;
Luk 7:43 Simon in adonbut’in, “Atamjo angaidam-peh pa hinte kati,” ati. Jesun ajah a, “Naseidih lheh-e,” ati.
Luk 7:44 Numei-nu lam angan Simon jah a, “Hi-chenu hi ven! Na-ina kahung lut tan, kakeng silna din twibon neipe-poi; hichenu hin kakengphang te ni amit lhia asop’a asama atheh ngim ahi.
Luk 7:45 Nangin chop jong neichop pon, hichenu vang kahung lut’a pat tang louhel’in kakengphang te ni achop chop jenge.
Luk 7:46 Nangin kalu jengbon thao nu louva, hichenun kakengphang te ni geiyin thao namtui anui.
Luk 7:47 Hijeh a chu najah a kasei ahi, hichenun hi-banga angailutna hi achonset tampi ki-ngaidam phot chenna ahin, lhomcha ki-ngaidampeh chun angailu lhome,” ati.
Luk 7:48 Jesun amanu jah a, “Nachon-set chengse ki-ngaidam ahitai,” atipeh-e.
Luk 7:49 A ankong umpihon, “Chonset geiya ngaidam thei Ama hi koibep ham?” akitiuve.
Luk 7:50 Jesun numeinu jah a, “Natah-sanin nahuhhing ahitai, lung mong-in chetan,” ati.
Luk 8:1 Phat chom khat nungin Jesun khopi jouse le khote jouse aban banin achonlen, Pathen lenggam Kipana Thupha ahil lhang len, seijui som le nin jong alhon-piuve.
Luk 8:2 Numei phabep, lhagao gilouvop’a kona adamsah ho le natna chom choma kona adamsah hon jong alhonpiuvin, hiche ho lah a hin Magdalene “kiti Mary, asunga kona thilha sagi anodoh pehnu,
Luk 8:3 Herod neichingpa Chuza jinu Joanna, Susanna le adang ho tampi ahiuve. Numeiho hin Jesu le asei-juite chu amaho neiya konin ajen-jiuve.
Luk 8:4 Khopi jousea konin mi ahung hung jengun Jesu koma mi tamtah akikhomun ahileh Jesun thulemin thu khat aseiyin;
Luk 8:5 “Muchi thepa alouva muchi then akonin athe leh muchi phabep lamsih a achun, min achonlih-in, chunga leng vachaten akilodoh tauve.
Luk 8:6 Phabepma songlheo chunga achun, ahintheina ding leithao aum loujeh-in ahung kedoh vangin agop paijitan ahi.
Luk 8:7 Phabep jong ling lah a achun, ling hon adep lihji tauve.
Luk 8:8 Phabep vang leipha laiya achukhan, ahung khangdoh-in ajat jakhat chengin agai,” ati. Hicheng asei hin asamin, “A-ngaina ding nakhang neiyan ngai hen!” ati.
Luk 8:9 Hiche thulem hi ipi kiseina ham ,tin aseijuiten Jesu adongui.
Luk 8:10 Hijeh chun Aman, “Nang ho hi Pathen lenggam thuguh chengse het dia kipea nahitauvin, adang ho vangin vejong leu amuchet thei lou diu jajong leu ahet khen thei lou diu jeh a thulem jenga kiseipeh ahiuve,” ati.
Luk 8:11 “Thulem chu hiche kiseina ahi; muchi chu Pathen Thupha ahi.
Luk 8:12 Lamsih a chu kitiho chu Pathen Thupha jataa, ahivanga atahsan dauva huhhinga aum louna diuva, Diabol hunga alung gil’a Thupha chu alahmang pehji miho ahiuve.
Luk 8:13 Songlheo chung leipatnaa chu kitiho chu Thupha ajah tengu leh kipah tah a kisanpai jenga, ahivanga jungbei ahijeh-uva chom-khat tahsan jong le patepna phat ahung lhun phat le pul lhaji miho ahiuve.
Luk 8:14 Linglah a chu kitiho chu Thupha ajatauvin, ahinla hinkhoa lungkhamna tin cheng, haona le leiset nopsahna chengsen alonvuh a, aga pilhing thei louva um miho ahiuve.
Luk 8:15 Leipha laiya chu kitiho vang chu Thupha ajah tengu leh lungthim phatah le dihtah a kol-chah kheh a aga pilhin kahsea pangdet jing miho ahiuve.
Luk 8:16 “Koiman mei avah-in bel akhu ngaipon, jalkhun noiya jong atung ngaipoi. Ahung lut chanin meivah chu amusoh din thaomei akikhu khum jong ima aumpoi.
Luk 8:17 Ajeh chu khovah a kiphong-doh lou ding ima akiselguh aum-pon, phondoh a hetdoh lou ding akikhu khum jong ima aumpoi.
Luk 8:18 Iti najah-um ching theiyun; ajeh chu aneiya kipeh bea, aneilou chu aneiya agel chengse jong kilahpeh ding ahi,” ati.
Luk 8:19 Jesu nu le Jesu sopi pasal ho ahenga ahungu leh mipi jeh chun akom alut theipouve.
Luk 8:20 Mihon, “Nanu le nasopi pasal hon namu nomun pama adingui,” tin Jesu jah a aseipeh-ui.
Luk 8:21 Aman ajah-uva, “Kanu le kasopite chu Pathen thu jop’a bol ho chu ahiuve,” tin adonbut’e.
Luk 8:22 Nikhat Jesu aseijuite toh kong sunga alut’in, chuin ajah-uva, “Dil gallang khat’a galkaiyu hite,” atijeh chun akitol tauve.
Luk 8:23 Akitol-nauva Jesu a-ihmutai. Hichun hui-pi hattah-in dil chu anuh leh kong sung twi dimpai ding ahitan, seijuite akicha lheh tauve.
Luk 8:24 Seijuite ahungun Jesu athou khangun, “Kapu, kapu, amangthah kahi-tauve!” atiuvin ahi. Jesu athouvin huipi le twi kinonglai chu haphoa apho leh, huisepi chu athip’in, abeihel jenge.
Luk 8:25 Jesun ajah-uva, “Natahsanu hoilam, ba hitam?” atileh; amahon kidang asauvin ati-jauvin, khat’in khat jah a, “Hichepa pi hi hoi koi hitam, huipi leh twi kinong jeng jong apho leh athun anung jenge,” atiuve.
Luk 8:26 Jesu le seijuite chu Galilee to kigalsai Gerasa gamkol’a akitol lut tauve,
Luk 8:27 Konga ahung kumlhah lhah-in khopia hungkon pasal khat’in akimupin, ama chu phat sotpi thilhavop ahitan, pon pona sil lou, in’a cheng jong hilou lhan lah jenga cheng ahitai.
Luk 8:28 Amahin Jesu amudoh phat’in oging tah-in ahinsamin, “Pathen chungnungpen Chapa Jesu, itile nati ham? Na-henga katao ahi, neibol gim hih-in!” ati.
Luk 8:29 Ajeh chu Jesun lhagaoboh hi mipaa kona hung potdoh dia asol ahi. Tamtah vei lhagaoboh hin mipa chu amatjia, bul atuh-uva thih khaova ahen vangun, bul atumkeh-in akihenna abot tanjin, lhagaoboh chun gamthip laiya anolutji tai.
Luk 8:30 Jesun, “Namin ipi ham?” ati leh, asunga thilha tampi lut ahi-jeh-in, “Janel kahi,” tin adonbut’e.
Luk 8:31 Hichun noimigama asol louna diuvin Jesu henga atao tauve.
Luk 8:32 Vohcha tampi hon khat lhang chunga chu lha ahiuvin, vohcha ho sunga chu alutsahna diuvin thilha ho chu Jesu henga ataovu leh, anoppeh tai.
Luk 8:33 Thilha ho chu mipaa konin ahung potdoh-un, vohchate sunga alut’u leh, vohchate chu songkol’a alhai lhauvin twikhanglena alha lut’un athigamtauve.
Luk 8:34 Vohcha ching hon thilsoh hi amuphat’un ajam’uvin khopi sung le loujao dunga thu alhutsoh tauve.
Luk 8:35 Mipi athilsoh vedia Jesu henga ahungu leh, asunga kona thilha potdohna mipa chun pon kisil’a lung lima Jesu kengbul’a tou amu’vin, atijatauve.
Luk 8:36 Thilha voppa kidamsah amittah a muhon aseipeh-ui.
Luk 8:37 Akimvel Gerasa gamkol’a cheng jouse atija behseh jengun Jesu chu akom’uva kona potdoh din angeh-uvin ahi. Hijeh chun Jesu konga alut’in akile kittai.
Luk 8:38 Thilhaho potdohna pa chun Jesu koma aum jingna dia athumleh, aman asol’in ajah a,
Luk 8:39 “Na-in lama kile kit’in, Pathenin nabolpeh thil chu gasei-jon,” ati. Hijeh chun ama achen, Jesun abolpeh thil chu khopi sung thongsoh-in agaphongjal tai.
Luk 8:40 Jesu hung kile kit chu mipin ana ngah jingun alamtouve.
Luk 8:41 Hichun ven, Houthua kikhopna in vaipo Jairus kitipa chu ahungin, Jesu kengbul’a aboh khup’in a-in’a hungpeh din angeh tai.
Luk 8:42 Ajeh chu achanu khatseh, kum som le ni lhing bep chu alaichat chat’in ahi. Jesu achephat’in mipin aneh chinto jengui.
Luk 8:43 Numei khat hi kum som le ni athia long, anei chasuna louthem ho akijensah vanga koimachan ajen dam joulou ahitai.
Luk 8:44 Hichenu hi Jesu nung lama ahungin apon mongkai atham leh athi lon atang hel’e.
Luk 8:45 Hichun Jesun, “Koiham eitham’ah?” atileh; Koimachan kahi atipon, Peterin, “Pipu, mipin toma neh chinto jinga,” ati.
Luk 8:46 Ahivangin Jesun, “Mi khat’in eitham monge, ajeh chu keiya kona thilbol theina thahat apotdoh kahei,” atichang mel’e.