Luk : i-lah-uva hung guilhung chengse sutdohna mi tamtah-in abol pan banguvin

Luk 12:27 Lily pah ho khu iti khan ham ngaitou-tin; natong jong ahipouvin, thil khuijong anipouve; ahinla kasei-peh nahiuve, Solomon jeng jong athil loupi cbengsea akijep vangin hiche ho khat sangin akijemhoi joupoi.
Luk 12:28 Pathenin hitobanga tunia loujaova keh jing teng meilhum sunga kileh lut tading hampa bon achuti jep hoi leh, vo tahsan lhom ho, nang ho ichan geiya nakhoh-sah-uva nihchen ponsil napeh diu hitam!
Luk 12:29 Hijeh a chu neh le don ding gel’a nalunggim louhel diu ahi.
Luk 12:30 Vannoi namtinin hichengse hi abol’u ahin, nang ho ding vang na-Pauvin ahesoh nai.
Luk 12:31 Alenggam joh hol masauvin, chuteng hichengse jong nakipehbe nauvinte.
Luk 12:32 “Kicha hih-un hon lhom ho, nang ho na-Pauvin lenggam napeh nom’ui.
Luk 12:33 Nanei chengse joh-un lang vaichate to nan neiyun, guchan anailutna thei lou, nget’in jong asuhset thei louna vana kemlouva akikholna din sum bei theilou sumbom kisemun.
Luk 12:34 Ajeh chu nagou umnaa chu nalungthimu jong cheng jing ding ahi.
Luk 12:35 “Nakong kigah-un nathaomei devah jingun.
Luk 12:36 Kichen golvahna ahung kilea kot akiu leh honpeh dia apu hung ding kho the ngai-geh miho tobang hiuvin.
Luk 12:37 Apupa ahung kit teng kiging jinga um ahung tokhah lhacha ho chu anun nom’ui. Tahbeh a kaseipeh nahiuve, apun kong kigah-in tin, amaho ankong phunga atousah a, amatah ajenleuva pang ding ahi.
Luk 12:38 Jan khangkimin hung hen, jinglam nidan thumin hung jong leh, kiging jinga um atokhah ho chu nun nom ahiuve.
Luk 12:39 Inneipan gucha hung ding phat heleh a-in chu aphetvang sah louhel ding kichen-tah-in naheuve.
Luk 12:40 Naginchat loupet tah-uva Mihem Chapa hung ding jeh-in nang ho jong Kigingsa demin umun,” ati.
Luk 12:41 Peterin, “Pakai, hiche thulem hi keiho dia naseiha, mipi jah dia nasei ham?” tin adonge.
Luk 12:42 Pakaiyin, “Tahsan um le miching, apun aphat cha soh dang ho neh le chah hoppehji dia anganse ding neiching mi chu koi hintem?
Luk 12:43 Apu inlama ahung teng anatoh pet atokhah soh chu anun nom’e,
Luk 12:44 Dihtah a kaseipeh nahiuve, ama chu apun anei jouse chunga vaipoa apansah ding ahi.
Luk 12:45 Amavang sohpa khat hin, ‘Kapu ahung gei lheh tai,’ tihen lang soh pasal ho le numei ho vopan hen, aneh nom nehen adon nom don kham leh,
Luk 12:46 hiche soh chun agel loupet tah le ahet loupet tah a apu hunga ama chu tumni aso ding, tahsanbei ho toh kibanga abolding ahi.
Luk 12:47 “Apu dei chengse hea, ahivanga adei banga gonpeh lou, toh jong tohpeh loupa chu tamtah vei kijep ding ahi;
Luk 12:48 amavang apu dei helouva kivoh lo na thei boldohpa chu kivo lhomjo ding ahi. Tamtah kipea chu tampi kibeng ding, thil tamtah a ki-nganse paa kona jong tampi ki-ngeh ding ahiye.
Luk 12:49 “Leiset’a mei hal’a hung kahi, hung kadoh jeng ta leh kati nave!
Luk 12:50 Keiman baptize chan ding khat kaneiyin, akimolso kah a iti kaning noh hitam!
Luk 12:51 Leiset’a chambol’a hunga neigel’um? ahipoi, kaseipeh nahiuve, kikhenna boljoh kahi-bouve.
Luk 12:52 Ajeh chu tua pat mi nga chenna insung chu kikhentel’a, mi thumin ni adouva, nin thum adou ding;
Luk 12:53 pan achapa adouva, chapan pa adou ding; nun chanu adouva, chanun nu adou ding; tehpin amou nu adouva, mou nun tehpi adou ding ahi,” ati.
Luk 12:54 Jesun mipi jah a, “Lhum lama meilom kikhom namu tengu ‘Go ju ding ahi,’ natipai jengun, jujong ajuji nai.
Luk 12:55 Lhang lam hui nun namu tengu ‘Sa ding ahi,’ natiuvin, sajong asai.’
Luk 12:56 Vo mipha lhem ho, leiset gongso le vantham-jol um chan bon nasuhto theiyu leh iti tulai thil um chan nasuhto thei louvu ham?
Luk 12:57 “Ibol’a thildih bolje kihil lou nahiuvem?
Luk 12:58 Nahehpa toh thutanpa heng najot lhon teng le lampia kihouchampi din gel’in, ajo le thutanpan vaibol henga napehdoh a, vaibol pan songkul’a nakhum ding ahi.
Luk 12:59 Kaseipeh nahi, nabat jat nasah thenghel masanga nahung potdoh thei louhel ding ahi,” ati.
Luk 13:1 Hichepet tah chun mi phabep ahungun Pilate’n Galilee miho athaa athisanu doihouna thil toh achopel thu Jesu jah a aseiyui.
Luk 13:2 Jesun ajah-uva, “Hitobang thi gentheiya athijeh-uva chu Galilee “midang ho sanga chonsejoa nagel’ uvem?
Luk 13:3 Ahipoi, najah-uva kasei ahi, lung nahei louvu leh amaho banga namanthah soh hel diu ahiye.
Luk 13:4 Ahiloule Siloam intingvum achima adel lih mi som le get ho chu Jerusalema cheng midang jouse sanga chonsejoa nagel’uvem?
Luk 13:5 Ahidehpoi, kaseipeh nahiuve, lung nahei louvu leh amaho banga chu namanthah cheh diu ahiye,” ati.
Luk 13:6 Jesun miho chu hiche thulem hi aseipeh-in, “Mi khat’in alengpi leiya theichang phung khat aneiyin, aga ahung hol leh amupoi.
Luk 13:7 Aman honbolpa jah a, ‘Kumthum alhing-tan, hiche theichang phung hi ka-hungvet leh aga khat cha kamudoh-poi, hijeh chun phuh lhu tan, leiset pamaisah a ikhoh a kihoi hoi ding ham?’ atileh;
Luk 13:8 honbolpan adonbut’in, ‘Pakai, tukum jong hoita din’ keiman akimvel laiying ting leiphatna lou sung nange;
Luk 13:9 chujou teng ahung ga nah leh aphan, aga lou vang leh phuh lhu tan nate,’ tin aseiye’ ati.
Luk 13:10 Choldo nin Jesun Houthua kikhopna in khat’a thu ahil’e.
Luk 13:11 Hichun ven, hikoma hin kum som le get lhagao boh vop’a chatmo numei khat aumin, amanu hi ating bong ahin, achama ding jang theilou ahi.
Luk 13:12 Jesun amudoh phat’in akoulut’in ajah a, “Numei, nacha-monaa kona kilhadoh nahitai,” a tin;
Luk 13:13 achunga khut a-ngap leh, apettah chun ading jang paiyin, Pathen athangvah tai.
Luk 13:14 Jesun Choldo nia mi abol-damjeh-in Houthua kikhopna in vaihompa alung himon, mipi jah a, “Natohna ding nigup jen uma chu, hungun hiche sung chun kiboldam-sah tau, Choldo nin vang hung dauvin,” ati.
Luk 13:15 Amapa donbut nan Pakaiyin aseiyin, “Mi pha lhem ho, nang hon Choldo nia nabongchal’u hihen na-sa nganu hijongleh nalhadoh jiuva, twi donsah dia twikhuh geiya nakaijiu hilou ham?
Luk 13:16 Achuti-leh hiche Abraham chilhah numei, Satanin kum som le get ahen hi akihennaa kona Choldo nia lhadoh ding hilou ham?” ati.
Luk 13:17 Jesun hiche asei hin ama douho ajahchau-vin, mipi vang thil loupi tah tah abol ho jeh-in akipah cheh-uve.
Luk 13:18 Jesun, “Pathen lenggam chu ipi toh katekah ding ham?
Luk 13:19 Min honsunga atheji ankam mu tobang vang ahi; ankam mu chu ahung khangin, thingphung te aphan, abah lah a chunga leng vachate geiyin ageh theiye,” ati.
Luk 13:20 Jesun, “Pathen lenggam chu ipitoh katekah ding ba ham?
Luk 13:21 Pathen lenggam chu suhlou chang changbonga kisem changlhah dan-thum noiya numeiyin avuiya achan-soh kahsea akoi chol tobang ahi,” atikit’e.
Luk 13:22 Jesun khopi chengse le khote chengse ajotsoh keiyin, Jerusalem lam ajot pumin thu ahilpeh-e.
Luk 13:23 Mi khat’in ajah a, “Pakai, mi themcha bou huhhinga um ding hitam?” tin aseiye. Aman ajah-uva,
Luk 13:24 “Kotjima lut ding gel khoh-un, ajeh chu kaseipeh nahiuve, mi tampin lut agot diu, lut thei lou ding ahiuve.
Luk 13:25 Inneipu akipatdoh a kotpi akha tengleh polama pansan kot kiuvun, ‘Pakai, kot neihonun,’ tijong leu chun, aman, ‘Nang ho kahepouve, hoiya hungkon nahiuvem?’ tia asei ding,
Luk 13:26 chutengle nang hon, ‘Keihon na-angsunga an kinea twi kidona, nangin kakholai lamlen dunguva thu hil lea,’ nati diu ahi.
Luk 13:27 Hijongleh aman najah-uva, ‘Nang ho kahe khapoi, hoiya hungkon nahiuvem? Thil gilou bolte, neidalha loiyun,’ ati ding ahi.
Luk 13:28 Abraham ,Isaac chule Jacob chule Themgao dang jouse Pathen lenggama aum namu diu, nang ho vang polama na-um’uva hikoma chu ka le hagel um ding ahi.
Luk 13:29 Niso lam, nilhum lam, sah le lhanga kona miho hunga Pathen lenggama ankong aum diu ahi.
Luk 13:30 Chule ven, anukhah abang masan tin, amasa kon khat nukhah ding ahiuve,” ati.
Luk 13:31 Hichepet hin Pharisee mi phabep Jesu henga anungun, “Hikoma konin potdoh-in nakhol-jin ban kijintan, Herod-in tha din nagoi,” atiuve.
Luk 13:32 Jesun ajah-uva, “Cheuvin hiche se-al chu gaseipeh-un, ‘Kei-man tuni le jinga thilha ho kano-doh a, mi kadamsah ahin, nithum lhin ni vang leh kanatoh molso tange,’ ati tin.
Luk 13:33 Kakholjin vang tuni le jing chule thaini geiya kachepeh ding ahinai, ajeh chu Jerusalem khopama Themgao mah thah ngai-lou ahi.
Luk 13:34 “Vo Jerusalem, Jerusalem, Themgao ho thatgama, ahenga kisol ho songa seplih, ahpin anoute lhaving noiya ahuikhom banga ijat vei nachate huikhom dia kagot hitam, ahinla nangin nadeipoi.
Luk 13:35 ven, na-in’u chu thip del’a kida-lhah peh ding nahiuve. Kaseipeh nahiuve, ‘Pakai min a hungpa chu anun nom’e,’ nati phat’u hung lhun kahsea neimu kit lou diu ahitai,” ati.
Luk 14:1 Choldo nin Jesu Pharisee vaihom khat in’a an ne din achen, amahon ave lhi jingui.
Luk 14:2 Hichun ven, amasanga thongpoh-veiya na mi khat aume.
Luk 14:3 Hichea hin Jesun Danthu hilthem ho le Pharisee ho jah a, “Choldo nia mi damsah ngai ham hilou ham?” atileh;
Luk 14:4 amaho athip beh-uve. Aman mipa chu atuh-in aboldam phat’in asolmangtai.
Luk 14:5 Jesun amaho jah a, “Choldo nin nachapau ha nabong-chal’u ham twikul sunga lhalut taleh nagakaidoh jeng lou diu ham?” atileh;
Luk 14:6 amahon adonbut thei tapouve.
Luk 14:7 Mi kikouhon touna pha pha akilhenu amu phat’in Jesun ajah-uva thulem khat aseiyin,
Luk 14:8 “Mi khattouvin moupui golvahnaa na-hung kouvu leh, toumun phapena tou dauvin. Inneipa chun nang sanga thupijo midang akou mai thei ahi,
Luk 14:9 nani lhona koupa chu hunga najah a, ‘Hichepa hi toumun ot’in,’ ati ding; chuteng nalungdon man’a toumun nu nungpena natou lo ding ahi.
Luk 14:10 Hijeh chun nakikou teng toumun nukhahpena touvin, chutileh nakoupa hunga, ‘jol, toumun sangjep’a kikhangdoh-in’ ati ding ahi. Chutengle natoupi cheng-se maiya jabolna nachan ding ahi;
Luk 14:11 ijeh-inem itile mi ama le ama kichoisang chan kisu nem’a, ama le ama kisu nem chan chu choi-sanga um ding ahi,” ati.
Luk 14:12 Aman inneipa jah a jong “Jan an neh khom hihen golvah hileh nabol teng najol nagol le nasopi, naphung nachang le naheng nakom mihao ho jeng koudan, koule chun amahon lekou kit’un tin nasahdoh diu ahi.
Luk 14:13 Neh khom nabol teng vaichate leh tikim loute chule mit cho elbai ho bou kouvin,
Luk 14:14 chutile anun nom nahi, ajeh chu amahon nalepeh lou diu ahin, midih thodoh kit ni leh nakilepeh ding ahi,” ati.
Luk 14:15 A-ankong umpi ho khat’in hiche hi ajah phat’in Jesu-jah a, “Pathen lenggama an nedingpa chu anun nom’e,” ati,
Luk 14:16 Jesun ajah a, “Pasal khat’in golvah loupitah abol’in mi tamtah akouve.
Luk 14:17 Golvah kipat phat’in akikousa ho henga asohpa asol’in, ‘Hung tauvin thil ijakai akigong-toh tai,’ agatisah-e.
Luk 14:18 Ahinla amahon, ahilelnau khat cheh aseiyin, amasapan, ‘Lou khat kachon kaga-vet lou akhoh-e, kiphatlam thu kasei jeh-in neilha ongin,’ atin;
Luk 14:19 khat’in jong, ‘Bongchal to-nga kachon, hicheng chu gapatep kagoi, kiphatlam thu kasei jeh-in nei lha ongin,’ atin;
Luk 14:20 khatpa man, ‘Tu le lea jinei kahin, hung thei ponge?’ ati.
Luk 14:21 “Sohpa ahungin apu jah a hichengse hi aseitai. Hichun innei-pu alung hangin sohpa jah a, ‘Potdoh loiyin, kholai lamlen dung le khopi veng ningkoi dunga vaicha genthei le tikimlou, mitcho eilbai ho gakoutan,’ ati.
Luk 14:22 Sohpan, ‘Kapu, nasei bangin kabol’in, ahivangin mun a-ong nalaiye,’ ati.
Luk 14:23 Inneipun sohpa jah a, ‘Potdoh-in lang lam-lhong dung le daipama um ho ka-in dimset din gakoutan.
Luk 14:24 Kaseipeh nahi, aki kouho khat chan jong kagolvah an atep khah louhel diu ahi,’ gatin tin aseiye,” ati.
Luk 14:25 Mi tamtah-in akilhonpi pet’un Jesu akiheiyin ajah-uvah
Luk 14:26 “Ka-henga hunga anu apa, ajinu le achate, asopi pasal ho le numei ho chule ama hinkho geiya itcha louva bol lou mi chu kaseijui hithei lou ding ahi.
Luk 14:27 Athingpel kiput’a eijui lou chu kaseijui hithei louhel ding ahi.
Luk 14:28 “Nang ho koipen hi insang sah ding go’a aman lut ding jat su to masa lou na-um um? Asa nom chun ajo na kham sum anei aneilou avet toh masah ding ahi,
Luk 14:29 chutilou-vin abul phutdoh hen joulel taleh amupha chanin tot nopna aneiyuva,
Luk 14:30 ‘Hichepan in sah din apanin ajoulel ta ong,’ ati diu ahi.
Luk 14:31 “Ahiloule midangto kidou ding sepai sangsom seh neiya lengpan ama sat dia sepai sang som ni toh hungkonpa chu atinjou atinlel ding touva ageltoh masah lou ding ham?
Luk 14:32 Ajo lou ding leh palai asol’a leng chompa gamla tah a aumpet’a kichamna thu agaseisah ding ahi.
Luk 14:33 Hitobanga chu nang ho lah a jong anei agou chengse dalha lou chu kaseijui hithei louhel ding ahi.
Luk 14:34 “Chi hi thilpha ahi, amavang a-al hi al ta hih leh iti ki-alsah kit ding ham?
Luk 14:35 Leining din jong leiset semphatna din jong pannabei ahitai. Chuteng mihon apaimangji tauve. A-ngaina ding nakhang neiyan ngai hen,” ati.
Luk 15:1 Kaidong ho le chonsehon athuhil ngai din Jesu ahin nailut’ui.
Luk 15:2 Pharisee ho le Danthu them ho aphun’un, “Hichepan michonse ho aloiyin aneh khompi,” atiuve.
Luk 15:3 Hichun Jesun ajah-uva thulem khat aseiyin:
Luk 15:4 “Nalah-uva khat’in kelngoi jakhat neihen lang khat mansah leh, aman som ko le ko chu gamthip’a adalhah a amangpa chu amu kahsea agahol lou ding ham?
Luk 15:5 Amudoh teng lengkouva apun kipah thanom tah a
Luk 15:6 in’a ahung teng jongleh agol apai, aheng akom akoukhomin ajah-uva, ‘Neikipa piuvin, kakelngoi mansah chu kamudoh tai,’ ati.
Luk 15:7 Kaseipeh nahiuve, hitobang hin lunghei ngai cha lou midih som ko le ko chunga sangin michonse khat lunghei jeh-in van’a kipa thanop um ding ahi,” ati.
Luk 15:8 “Numei khat’in dangka som neihen lang khat mansah leh, thaomei kidet’a, muntheh kipat’a amudoh kahsea in theh a ahol hoi jeng lou ding ham?
Luk 15:9 Amudoh phat’in agol apai, aheng akom akoukhomin, ‘Kasum mansah chu kamudoh tai, neikipa piuvin,’ ati.
Luk 15:10 Kaseipeh nahiuve, hitobang hin michonse khat lunghei jeh-in Pathen Vantilte lah a kipa thanopna aume,” ati.
Luk 15:11 Jesun, “Pasal khat’in chapa ni aneiye.
Luk 15:12 Anaopan apa jah a, ‘Hepa, gou kachan ding chu neipetan,’ atin, hijeh chun apan agou chu achate ni ahoppeh tai.
Luk 15:13 Ni phabep jouvin chapa neojopan anei jouse achomkhomin kholgam la tah a ache mangin, chukoma chun anei jouse aning anop’in agamange.
Luk 15:14 Anei jouse aneh jousoh hel tah-in hiche gamsunga chun kel nasatah ahung lhan, aman neh le chah angaicha pantai.
Luk 15:15 Hijeh chun achen agam miho khat agabel’in, mipa chun alouva vohchate vah din asol-tai.
Luk 15:16 Hichea chun vohchate an neh chu neh jenga oiva ding ago lheh-in, koiman la neh ding apepoi.
Luk 15:17 Chutah chun ahung khangdoh lap’in, ‘Kapa thalah sohten neh le chah khujat neng jeng junga neiyuva, kei hikoma kel thi dinga um kahim!
Luk 15:18 Kipatdoh ing ting kapa henga cheng ting ajah a, “Hepa, van douna le nangma dounan ka-chonsetai,
Luk 15:19 nachapa tidin jong kakilom tapoi, nasoh thalah ho khat bangin neisemtan,” gatinge,’ ati.
Luk 15:20 Akipatdoh-in apa heng jonin achetai. “Gamla tah ahung gei nalaiyin apan agalmun, alaina behseh jengin, alhaijel’in akoiyin achop chuh chuh tai.
Luk 15:21 Achapan ajah a, ‘Hepa, van douna le nangma dounan kachonsetai, nachapa tidin jong kakilom tapoi,’ atileh;
Luk 15:22 apan asohte jah a, ‘Von phapen tah galauvin vonpeh loiyun, khutjem bupeh-un, kengchot sepeh loiyuvin.
Luk 15:23 Bong-nou thaotah chu gaman’un lang that loiyun, neu hitin kipa thanop bol’u hite,
Luk 15:24 ajeh chu hiche kachapa hi athisa hing kit’a amangsa kimu-doh kit ahitai,’ ati. Hiti hin kipa thanop abol’uve.
Luk 15:25 “Ahin a chapa aupajo loukon-pa chu ahung vailhunin inlam ahung naijep jep leh tumging kitum leh mi lamgin ajan,
Luk 15:26 soh ho khat akouvin adonge.
Luk 15:27 Sohpan ajah a, ‘Nasopipa chu ahung lhungtai, hijeh a chu napan hing le dama amukit jeh a bongnou thaotah chu athapeh ahi,’ ati.
Luk 15:28 “Hichun apa ahung potdoh-in ajol jol jenge.
Luk 15:29 Aman apa adon-but’in, ‘Ven, kum hijat hin soh bangin na katohpeh-in, khatvei jeng cha jong nasei ngailouvin kaumpoi, ahinla kagol kapaite toh kakipa thanop khomna din kelnou khat jeng cha jong neithapeh khah-poi.
Luk 15:30 Ahinla hiche nachapa, notiho toh nanei nagou chengse sumang-pa, ahung phat’in bongnou thaopen nathapeh-e,’ ati.
Luk 15:31 Apan ajah a, ‘Chapa, nangma kakoma um jing nahin, kanei aboncha nanga ahi.
Luk 15:32 Hiche nanaopa hi athisa hingdoh kit, amangsa kimudoh kit ahijeh a ikipa thanop diu mong ahibouve,’ tin ajol’e,” ati.
Luk 16:1 Jesun seijuite jah a, “Mihao khat’in neiching khat aneiye. Neichingpan anei aman chatvai jeh-in min aheh-in ahi.
Luk 16:2 Mihaopan ama chu akouvin ajah a, ‘Nachung chang thu kajah hi ipi iti ham? Nanei chinjat sutoh loiyin tukal neichinga napan theilou ding ahi,’ ati.
Luk 16:3 Hichun neichingpa akigel’in, ‘Kapun kaneichin, eilahpeh dingla ahitan, ikati ding hitam? Loubol’a lei lai ding la kathan ajoupon, khutdo ding jong kajah achai.
Luk 16:4 “Kaneichin kahai teng mihon a-in’uva eilhunsahna diu bol ding khat kahetai,’ atin;
Luk 16:5 apupa sumba ho akouvin, amasapen pa jah a, ‘Kapu sum ijat nabat’em?’ atileh;
Luk 16:6 aman, ‘Thao ate-na dim jakhat,’ ati. Aman ajah a, ‘Nathil simna hinchoiyin, tou loiyin ate-na som nga bou sunin,’ ati.
Luk 16:7 Chuin achom-dang khat jah a, ‘Nangin la ijat nabat nah laiyem?’ atileh; aman, ‘Suhlou chang ate-na jakhat,’ ati. Aman ajah a, ‘Nathilsimna hin-lan, som get bou sunin,’ ati.
Luk 16:8 Hichun chondih lou neichingpan ching theitah a thil aboljeh-in apupan apahchai; ajeh chu hiche khang mite hi akibahpi hou lah a khovah chate sangin achingjo’uve.
Luk 16:9 “Kaseipeh nahiuve, leiset gouvin gol le pai semun, gou abei-teng mihon tonsot chenmuna na-lhunsah diu ahi.
Luk 16:10 Thil neochaa kitah lou mi chu thil lenpia jong kitah lou ahiye.
Luk 16:11 Leiset gouva bon tahsan naum louvu leh gou tahbeh chu kon nachinsah diu ham?
Luk 16:12 Midang gou neichinga nakitah louvu leh nang ho gou ding kon napeh diu ham?
Luk 16:13 “Insung lhacha khatseh-in pi-pu ni ajenkop theipoi; jenkop taleh khatjoh ahot’a khatjoh angailut ding, ahiloule khat chu akolchah joh a khat chu donlouva akoi ding ahi. Nang ho Pathen le sum soh a napankop thei lou diu ahi,” ati.
Luk 16:14 Sum ngailu Pharisee hon Jesu thusei ho ajauvin anelpeh khum’uve.
Luk 16:15 Jesun ajah-uva, “Nang ho hi mihem mitmua them kichan-loi nahiuvin, Pathenin vang nalung-thimu ahenai; ijeh-inem itile mihemte lah a sang tah a kijabol chu Pathen mitmua thet umtah ahibouve.
Luk 16:16 “John khang geiya chu Danthu le Themgaoho thu che ah ahi. Ama hunga pat Pathen lenggam Thupha kiseiphong a ahin, amitakip’in asunga thahat san’a lut tei agouve.
Luk 16:17 Danthua lekhajem khat paidoh sangin van le lei kitol-mang abaijoi.
Luk 16:18 “Koi hile ajinu daa achom khat kichenpi chan mito jong ahin, chule ajipan adasa numei kichenpi jong mito jong ahi.
Luk 16:19 “Mihao khat hin, ponsandup le tupat ponnem jeng asil jin, niseh-in aning anop’in aum jin ahi.
Luk 16:20 Apum changa phah mivaicha Lazarus kiti chu akotbul’a alumin,
Luk 16:21 mihaopa ankong dokhang chunga lhajah anmal chu aducha tun tun jenge; akhoh cheh kit chu, uicha-ten atipat laiho chu aleh-uvin ahi.
Luk 16:22 “Chujouvin mivaichapa chu athin, Vantilten Abraham jet lama din apotauve. Mihaopa jong athin avuitauve.
Luk 16:23 Aman Damuna gim genthei athohna konin chunglam avet leh gamla tah a Abraham amun, ajet lama Lazarus jong amui.
Luk 16:24 Akouvin ajah a, ‘Kapa Abraham, neikhoton, Lazarus hin-sol’in akhut jungin twi ga dekot hen lang kalei beh eihung dedap peh hen, ajeh chu hitobang mei-kou lah a gim genthei thoh-in kaum tai,’ ati.
Luk 16:25 “Abrahamin, ‘Chapa, naleiset hinkhon thilpha chengse namun, Lazarus chun thilse amui, tun aman hikoma nom asan, nangma chukoma gim genthei thoh-in naume.
Luk 16:26 Hiche kal jong chun i-kah-uva onghom lentah akikhang-in, hikoma kona nang ho hinjon nom jong hung theilou ding, chukoma kona jong koima hilama hung galkai thei lou dinga kibol ahi,’ ati.
Luk 16:27 Aman, ‘Hepa achutileh Lazarus chu ka-inkote henga nasol-na din kataove,
Luk 16:28 ajeh chu sopi pasal nga kaneiyin, Lazarus chehen lang amaho chu gahil chah masa-leh kati, achuti louleh hiche Da muna hi hung kit diu ahitai,’ ati.
Luk 16:29 “Abrahamin, ‘Ahilchah diu-vin Mose le Themgaoho aneiyui, amaho hil ngai tauvinte,’ ati.
Luk 16:30 Ahinla aman, ‘Ahipoi kapa Abraham, mithi lah a kona mi khat che le bou lung ahei diu ahi,’ ati.
Luk 16:31 Ahinla Abrahamin ajah a, ‘Amahon Mose le Themgaoho thu angailouvu leh mithi lah a konin mi khat thoudoh kit jong leh kithu nundeh pouvinte,’ tin aseiye,” ati.
Luk 17:1 Jesun aseijuite jah a, “Kipal lhuhna thei thil chu soh thei ahinai, ahin kipalna bol chu ohe ada ahi!
Luk 17:2 Ama chun hitobang aneocha ho khat akipal lhuhsah sangin a-ngonga sumhei song lentah ki-opeh hen lang Twikhanglena kileh lut le phajo ding ahi.
Luk 17:3 Ching theiyun! “Nasopi achonset leh phoh-in, lung ahei leh ngaidamin.
Luk 17:4 Ni khat sunga nachunga sagi vei; chonse hijongleh, nahenga ahunga sagi vei jen, ‘Kalung kaheiye,’ atileh na-ngaidam tei ding ahi,” ati.
Luk 17:5 Solchah hon Pakai jah a, “Katahsanu khansah ben,” atiuve.
Luk 17:6 Pakaiyin, “Nang hon tahsan-na ankam mu tebep neiyun lang, hiche thing theimi khu, ‘Kibotdoh-in lang Twikhanglen lailunga ki-phut lut’in,’ tijong leu chun nathuu ngai jenginte.
Luk 17:7 “Nalah-uva mi khat’in loubol’a pang ham, kelngoi ching ham soh khat neileh, ahung vailhun teng ajah a, ‘Hung loiyin ankong hung ki-um loiyin,’ ti nan tem?
Luk 17:8 Chu-sanga ajah a, ‘Kajan an neh ding gon, natai kigah-in lang kaneh kachah sungsen neijenin, chujou teng nangin nen natin don nan nate,’ atijoh lou ding ham?
Luk 17:9 Hi-chepa chun asohpan asei sei abol-peh jeh a chu apachat hinam?
Luk 17:10 Hitobanga hi nang hon jong nakiseipeh chengse nabol jou tengu jongleh, ‘Soh mai mai kahiuve, keihon katoh ding dol bep bou katoh-u ahi,’ tiuvin,” ati.
Luk 17:11 Jesu Jerusalema achen Samaria le Galilee kah ahopeh-e.
Luk 17:12 Kho khat’a alut leh miphah som khat’in analamtouve. Miphah ho chu gamla thima adingun,
Luk 17:13 “Pipu, Jesu neikhotouvin,” tin asamuve.
Luk 17:14 Jesun amaho amu phat’in ajah-uva, “Cheuvin lang Thempu ho gakivetsah tauvin,” ati. Acheu leh adamthengsoh tauve.
Luk 17:15 Alah-uva khat chun adamtheng akihet phat’in ahung kile kit’in oging tah-in Pathen athangvah-in,
Luk 17:16 chule Jesu kengbul’a amai asulut’in athangvah tai. Ama chu Samaria mi ahi.
Luk 17:17 Jesun adonbut’in, “Miphah som jen kisutheng hilou ham? Mi ko hoilamba hitam?
Luk 17:18 Hiche chidang namdangpa tilou khat cha jong Pathen thangvah dia hung kile lou hiuvem?” ati.
Luk 17:19 Chule khatpa jah a chun, “Thouvin lang chetan, natahsanin nadamsah ahitai,” ati.
Luk 17:20 Pharisee hon Jesu jah a Pathen lenggam hung lhung ding phat adoh nauva aman, “Pathen lenggam chu melchih theiyin ahungpoi.
Luk 17:21 Koiman, ‘Ven, hikom-’ah aume,’ ahiloule, ‘Khukoma aume,’ atilou ding ahi. Ijeh-inem itile ven, Pathen lenggam chu nalah-uva aumtai,” ati.
Luk 17:22 Jesun seijuite jah a, “Ni khatle Mihem Chapa nikho namu nom lheh diu, ahivanga namu thei lou diu ahi.
Luk 17:23 Mihon najah-uva, ‘Ven, khu koma aume,’ atiuva, ‘Ven, hikoma aume,’ atiu jongle chedauvin, anung del hih-un;
Luk 17:24 ajeh chu kolphen kolmong lang khat’a pat kolmong lang khat geiya vanthamjol asalvah jeng banga Mihem Chapa hung ni jong leh chuti ding ahi.
Luk 17:25 Amavang amasa hesoh genthei tampi athoh a, hiche khang mite not thap’a um tei ding ahi.
Luk 17:26 Noah nikholai bang a Mihem Chapa nikho ho jong chuti ding ahi.
Luk 17:27 Mihon aneuvin adonun, akichengun, Noah kong sunga alut ni geiyin kicheng din akipetouvin, chutah-in twisang ahung lenin abonchauvin asumangtai.
Luk 17:28 Hitobang hin Lot nikho laiyin jong mihon aneuvin adonun, thil achou-vin, hon abol’uvin in asauvin,
Luk 17:29 Sodom khoa Lot apotdoh nikhon vang vana konin meikou le kat ahung julhan abonchauvin asumangtai.