Luk : i-lah-uva hung guilhung chengse sutdohna mi tamtah-in abol pan banguvin

Luk 17:30 Mihem Chapa kiphon-doh nikho jong chuti ding ahiye.
Luk 17:31 Hiche nikhoa chu inchunga uma insunga thilkeo kilah din kum-lhah da hen, chule loujaova um jong hung kile kit da hen.
Luk 17:32 Lot jinu chu geldoh-un.
Luk 17:33 Koi hile kihinso noma chun athilo ding, athiloa chun hinna anei ding ahi.
Luk 17:34 Kaseipeh nahiuve, hiche jan chuleh jalkhun khat’a lumkhom te ni jong khat kilaa khat kidalha ding ahi.
Luk 17:35 Numei chang goikhom te ni jong khat kilaa khat kidalha ding ahi, ati.
Luk 17:36 Loujaova bung pasal te ni jong khat kilaa khat kidalha ding ahi” ati.
Luk 17:37 Amahon adonbut’un ajah a, “Hoikom hintem Pakai?” atiuleh; aman ajah-uva, “Thilong lupnaa chu muthong kikhom ding ahi,” ati.
Luk 18:1 Lhadah louhel’a tantih neilouva atao jing theina din Jesun aseijuite chu thulem khat ahil’e.
Luk 18:2 “Khopi sung khat’ah Pathen ging lou mihem jong jalou thutan khat aume.
Luk 18:3 Hiche khopi sunga hin meithainu khat jong acheng’in, thutanpa henga ahung jin, ‘Kakihehpi sangin them nei-chanin, atijie.
Luk 18:4 Phat chom khat chun aman don louvin akoinan, chom khat jouvin, ‘Pathen kagin daa mihem kajabol lou vangin
Luk 18:5 hiche meithainun eisuhgim jing jeh hin athem channa ding gelpeh tange, achutilou le hung jingin tin eisuh lung gim jing ding ahi,’ tin aseiye,” ati.
Luk 18:6 Pakaiyin aseiben, “Midih lou thutanpan ipi aseiyam ngaiyun.
Luk 18:7 Sun le jan’a ahenga tao jing jeng alhenchomte chu Pathenin kithopi ding ngongkai louhel’a achunguva thu adih a atanpeh lou ding ham?
Luk 18:8 Najah-uva kasei ahi, aman ngong-kai louhel’a amaho them achansah loi ding ahi. Hijongle Mihem Chapa ahung teng leiset chunga tahsan hung toh nantem?” ati.
Luk 18:9 Jesun mi ama bou them kichan-a midang jouse isah louho din hiche thulem hi aseiyin:
Luk 18:10 “Mi ni Houin a tao dingin achetou lhonin, khat chu Pharisee ahin, khat chu Kaidong ahi.
Luk 18:11 Phariseepa adingin chamtah-in hitin ataove,’ ‘Pathen keima midang banga milop, kitahna bei, chonthanghoi, chule hiche Kaidong-pa tobang khu kahi loujeh-in Nangma kathangvah-e.
Luk 18:12 Hapta khat sungin nivei an ka-ngol jin, kalamdoh jat hopsoma hop khat kape jingin ahi,’ ati.
Luk 18:13 “Kaidongpa vang chu gamla thimtah a adingin, dah a van lam jong ve-ngam louvin, adip alai akidop’in, ‘Pathen neilungset’in keima michonse kahibouve,’ ati.
Luk 18:14 Kaseipeh nahiuve, Phariseepa sangin hichepa joh hi them achang-in a-inlama achesuh tai; ajeh chu koi hileh ama kichoi sang chu kisunem ding, ama kisunem chu kichoi sang ding ahi,” ati.
Luk 18:15 Miphabep’in achateu chunga Jesun khut angap din ahinpuiyui Seijuiten amun aphoh-uve.
Luk 18:16 Ahin-la Jesun chapang ho akouvin, “Chapang ho chu kahenga hungsah-un, kham dauvin, Pathen lenggam chu hitobang ho ding bou ahi.
Luk 18:17 Sumil hih-un, chapang thilsan banga Pathen lenggam sang lou chu lut lou ding ahi,” ati.
Luk 18:18 Judate vaihom khat’in Jesu adongin, “Houhilpha, tonsot hinna kanei theina dia ipi kabol dmg ham?” atileh;
Luk 18:19 Jesun ajah a, “Ibol’a ‘Apha’ neiti ham? Pathen tilou apha aumpoi.
Luk 18:20 Thupeh chengse nahet chu me. ‘Mito jong hih-in, tol that hih-in, gucha hih-in, jouthun het-tohsah-in pandan, nanu napa jabol’in,’ kiti chu,” ati.
Luk 18:21 Aman, “Kakhangdon laiya pat hicheng hi kanitsa ahitai,” ati.
Luk 18:22 Jesun hichu ajah phat’in, “Nalhah samna khat aum nalaiye, nanei chengse joh-in lang sum chu vaichate petan, chutile vana gou nanei ding ahi; chuteng hungin neijuiyin,” ati.
Luk 18:23 Hiche hi ajah phat’in mihao tah ahijeh-in alung nom mo lheh jenge.
Luk 18:24 Jesun alung himo natsatje amu phat’in, “Sum haoho dinga Pathen lenggama lut ding iti hahsat hitam!
Luk 18:25 Mihao Pathen lenggama lut sangin heobil homa sa-ngongsang lut ding abaijoi,” ati.
Luk 18:26 Hiche thu ja hon, “Achutile koi huhhinga umjou ding ham?” atiuve.
Luk 18:27 Jesun, “Mihem dinga himo thil jouse Pathen din ahitheisoh keiye,” ati.
Luk 18:28 Peterin, “Ven, keihon kanei jouseu dalhaa nang kijuita,” ati.
Luk 18:29 Jesun ajah-uva, “Tahbeh a kaseipeh nahiuve, koi hijongle Pathen lenggam jal’a in le lou ji le cha, sopi u le nao, nu le pa dalha jouse
Luk 18:30 koi ahin tukhanga ajat tamjo cheh mu lou ding le ahung lhung ding khanga tonsot hinna kimu lou ding aumpoi,” ati.
Luk 18:31 Jesun som le ni atumin apuidoh-in ajah-uva, “Ven, Jerusalem ijon touvun, chule Mihem Chapa thudol’a Themgao ho lekhabu kisun chengse guilhung ding ahi;
Luk 18:32 ajeh chu Ama chidang nam-dangte khut’a pehdoh a um ding, tot nopna aneiyuva, a-eng eng a abol diu, chule chil aset khum diu ahi;
Luk 18:33 avoh-uva atha diu, ahivanga nithum ni leh thoudoh kit ding ahi,” ati.
Luk 18:34 Seijuiten aseiho hi khat cha jong ahechen theipouve. Ajeh chu akisei ho hi amaho dia kisel-guh ahin, hijeh chun ipi kiseipen ahiding ahedoh theipouve.
Luk 18:35 Jesu Jericho khopi ahung nai chun, lamlen panga mitcho khat touvin khut adoi.
Luk 18:36 Mitchopan lampia mipi kitol husa ajah phat’in ipi thu ahi ding adonge.
Luk 18:37 Mihon Nazareth Jesun ahinjotpa ahi, aseipeh-uve.
Luk 18:38 Aman ahinsamin, “David Chapa Jesu, keima neilungset’in,” ati.
Luk 18:39 Amasanga chehon umthip beh dia haphoa apho vangun aman ahasap cheh-in, “David Chapa, neikhoton,” ati kit’e.
Luk 18:40 Jesu ading denin mipa chu ahinpui diuvin aseiye. Mitchopan ahin naiphat’in ajah a,
Luk 18:41 “Ipi eibolpeh leh nati ham?” atileh; aman, “Pakai, kho neimusah-in,” ati.
Luk 18:42 Hichun Jesun ajah a, “Mu tan. Natahsanin nadamsah ahitai,” ati.
Luk 18:43 Apettah chun mitchopan kho amutan, Jesu ajuiyin Pathen athangvah tai. Mipin hichu amu-phat’un Pathen athangvah cheh-uve.
Luk 19:1 Jesu Jericho alut’in kho-sung ajotpeh-e.
Luk 19:2 Khosunga hin Zacchaeus kiti kaidong pasal khat achengin, ahaova hao ahiye.
Luk 19:3 Amahin Jesu chu amu nom lheh-in, ahinla mi nem ahijeh-in mipin alen amupha poi.
Luk 19:4 Hijeh chun analhai masan, amuteina din ahungna ding lampia chun theiba chung khat’a anakaldoh-e.
Luk 19:5 Jesun hikom chu ahinphah phat’in agada-doh leh amun, “Zacchaeus, hung kumlha loiyin, tunia na-in’a ka-lhun tei ding ahi,” ati.
Luk 19:6 Zacchaeus, chu kinloi tah-in ahung kumlhan kipah tah-in Jesu alamtoi.
Luk 19:7 Mipin amu’vin, “Hiche michonsepa in’a khu lhung din ache taget’e,” tin aphuntauve.
Luk 19:8 Zacchaeus vang chu adingin Pakai jah a, “Ven, Pakai kanei chengse akeh khat vaichate peng ting, ada acham louva mi kalah-peh aum jongleh ajat lin leng’e,” ati.
Luk 19:9 Hichun Jesun ajah a, “Tunin hiche insunga huhhingna ahung lhungtai, ama jong hi Abraham chilhah ahiye.
Luk 19:10 Ijeh-inem itile amangsa holdoh a huhhing dia Mihem Chapa hung ahi,” ati.
Luk 19:11 Jesu Jerusalem ahung lhung deh deh tan, mihon ma Pathen lenggam hung lhung jeng dia agel jeh-uvin Aman thulem khat ahil’in,
Luk 19:12 “Milun tah khat leng tha neina gakisana hung kile kit din khol-gamla tah a cheding agon;
Luk 19:13 asohte som khat akouvin Mina khat cheh apen ajah-uvah, ‘Kahung kile kit kah-in kivei nan ana-mangun,’ ati.
Luk 19:14 Ahinla agam miten ama ahot bol’in anunga palai asol’uvin, ‘Hichepa hi kachunguva leng chang din kadeipouve,’ agati-sah-ui.
Luk 19:15 “Ama leng tha neina kenga ahungkile kit phat’in kivei dinga apeh asohte chengse ijat cheng aveikan’u ahet nom jeh-in gakou khom din thu apei.
Luk 19:16 Ahung ma-sapan, ‘Pakai, nang Mina khat chu Mina som kalhinsah-e,’ ati.
Luk 19:17 Aman ajah a, ‘Nabolpha lheh-e, sohpha nahi! Themcha chunga tahsan thei nahijeh-in khopi som chunga tha neiyin pang tan,’ ati.
Luk 19:18 Ani lhinnapa ahungin, ‘Pakai, nang Mina khat chu nga kasosah-e,’ ati.
Luk 19:19 Aman, ‘Nang jong khopi nga chunga vaipo ding nahi,’ ati.
Luk 19:20 “Thumnapa ahungin, ‘Pakai, nang Mina chu ponin kajel’in kakoi hen hiche hi ahi,
Luk 19:21 ajeh chu nakoi-na louva loidoh theiya, natuna louva atdoh thei, acham louva mi lahpeh jeng nahijeh-in nangma kakichai,’ ati.
Luk 19:22 Aman, ‘Soh gilou! Nakamsoh a nathu katan ding ahi. Kakoina louva kalahdoh theiya, katuna louva ka-at theiya, acham louhel’a mi kalahpeh thei nahet ahiye ong?
Luk 19:23 Chuti-an ibol’a kasum chu sumkholpungnaa nakoida ham? Koile chun kahung kile teng ken apung puma kilah thata dinga!’ ati.
Luk 19:24 “Akoma ding ho jah a chun, ‘Mina khat chu lahpeh-un lang Mina som neipa chu gapeuvin,’ ati.
Luk 19:25 Mihon, ‘Pakai, aman Mina som khat jen neina chu,’ atiuleh;
Luk 19:26 Aman, ‘Kaseipeh nahiuve, aneiya chu kipeh ben tin, anei louva chu anei chasun jong kilahpeh ding ahi.
Luk 19:27 Chule achunguva lengvaipo dinga eideimo hiche migilou melmate hi kakoma hinkai lut’uvin kamitmun that gam’uvin,’ tin aseiye,” ati.
Luk 19:28 Jesun hiche aseijou hin amasan Jerusalem ajon toutai.
Luk 19:29 Olive thinglah kiti mol’a Bethphage le Bethany aphah konin seijui ni asol’in,
Luk 19:30 “Namasang jon lhona kho’a khun lut lhon le chun koimacha tou khahna louhel sa-ngan nou kihen khat namu lhon ding ahi; sut lhan hinkai lhonin;
Luk 19:31 mi khattouvin najah lhona, ‘Ibol’a nasut lhon ham?’ atileh; ‘Pakaiyin aman nom’e,’ ti lhontan,” ati.
Luk 19:32 Solle te ni ache lhon leh ijakai asei bangin agatoh lhone.
Luk 19:33 Sa-ngan nou chu asut lhon leh aneiten, “Ibol’a sa-ngan nou chu nasut lhon ham?” tin adongui.
Luk 19:34 Amanin, “Pakaiyin aman nom’e,” ati lhone.
Luk 19:35 Hichun Jesu henga ahinkai lut lhonin, chuin sa-ngan nou chunga aponsil jouseu aphasoh phat’un Jesu chu achunga adom doh tauve.
Luk 19:36 Jesu ahung chun lampi chunga aponsil jouseu aphauvin ahi.
Luk 19:37 Jesun khopi ahinphah ding kon, Olive mol’a kumlhahna ahung geiyin seijui mipin abonchauvin tha neitah a thil kibol amu cheng-seu jeh chun ogin sang tah-in asam-un kipah thanom tah-in Pathen vahchoinan
Luk 19:38 hitin aseiyui: “Pakai min a hung lengpa anun nom’e; Van’a cham leng hen, chungnungpena loupina hihen,” atiuve.
Luk 19:39 Mipi lah a Pharisee mi phabep chun Jesu jah a, “Houhil, naseijuite phoh-in,” atiuve.
Luk 19:40 Jesun adonbut’in, “Najah-uva kasei ahi, hite ho thip leu song ho aojah jeng diu ahi,” ati.
Luk 19:41 Ahung naijep jep’a khopi amu phat’in Jesun akachamin,
Luk 19:42 “Ohe, nangin tunia hi lung monna thei ngaichat nakihet hitave leh! Tunla namuthei tapoi!
Luk 19:43 Namelmaten nahin umkhuma, galpal nakai khum’uva, akimvel lhung keiya natin chah niu hung lhung ding;
Luk 19:44 huhhing dia nakivil nikho nahet loujeh a nangle na-sunga nachate kisugam ding, song khat chunga khat kise-thom beihel’a alha diu ahi,” ati.
Luk 19:45 Jesu Houin a alut’in thiljoh ho anodoh panin ajah-uvah,
Luk 19:46 “Hiti hin, ‘Ka-in chu taona in kiti ding ahi,’ tin akisun me, nang hon la gucha michomho kikholnan nasem-doh tauve,” ati.
Luk 19:47 Jesun niseh-in Houin a thu ahiljin, Thempu pipu ho le Danthu themho, chule mipi lamkaihon vang ama suhmangna ding ahol jingui.
Luk 19:48 Ahivangin la mipin athu-hil lung lut tah a angai lhihgeh jeh-un alonaje ding aholdoh thei-pouve.
Luk 20:1 Ni khat Jesun Houin a mipi thu ahila Kipana Thupha aseiphong pet’in, Thempu pipu ho le Danthu themho chule upaho ahungun,
Luk 20:2 ajah a, “Ipi thu neinaa hicheng hi nabol’a, kon hiche thu neina hi napeh ham, neiseipeh tem’un?” atiuve.
Luk 20:3 Jesun ajah-uva, “Kenjong thu khat dongunge, neiseipeh-uvin;
Luk 20:4 John Baptist chu van’a kon ha mihema kon ham?” atileh;
Luk 20:5 amaho akihouvun, “Eihon, ‘Van’a kon ahi,’ tileu hen la, ‘Chuti-an ibol’a natahsan louvu ham?’ tiget’in tin,
Luk 20:6 ‘Mihema kon ahi,’ tijong leu hen, mipin John chu Themgao khat’a atahsan cheh jeh-un, songin eiselo-bep’un tin,”atiuve.
Luk 20:7 Hijeh chun, “Hoiya hung kon ham kahepouve,” atiuve.
Luk 20:8 Hichun Jesun ajah-uva, “Kenjong ipi thu neinaa thil hicheng kabol seipeh pouvinge,” atitai.
Luk 20:9 Jesun mipi chu hiche thulem hi ahil panin, “Mi khat’in lengpilei abol’in, aleilhouho abolsah-in phat sotpi um din kholgama achetai.
Luk 20:10 Aga lhun phat donin lengpiga ahinpohsah diuvin aleilhouho henga soh khat asol’e; ahinla aleilhouhon sohpa chu avouvin khut gohkeovin asolmang tauve.
Luk 20:11 Soh khatma asol kit leh; ama jong hi avouvin, noise tah-in abol’un khut gohkeo man asolmang kit tauve.
Luk 20:12 Soh thum lhinnapa asol kit leu leh, amahon amavouvin ahinleh doh kit tauve.
Luk 20:13 Lengpilei neipan, ‘Ipi kalo ding hitam? Kachapa chang khatseh hi sol tange, amahi jabol teiyunte,’ ati.
Luk 20:14 aleilhouhon achapa amu phat’un akihou lhiuvin ‘Hichepa hi agoulo dingpa ahi, agou ichan theina diuvin ama hi thatdoh jengu hite,’ akitiuve.
Luk 20:15 Hijeh chun ama chu lengpilei polama alehdoh-un athat tauve. Hiche lengpilei neipa chun amaho hi i-lotan tem?
Luk 20:16 Ama hunga hiche lengpilei lhouho chu asuh manga, lengpilei chu midang apeh ding ahi,” ati. Hichu ajauvin amahon, “Achuti louleh!” atiuve.
Luk 20:17 Jesun amaho chu aven, “Ahile, ‘Insa hon deimoa apaiyu song chu, In ning khomdet penin apangtai,’ tia Pathen lekhabua kisun chu ipi kiseina ba ham?
Luk 20:18 Koi hileh hiche song chunga chukha chan chu kitah ngem’a chule songin alhah den jong chu adelngem ding ahi,” ati.
Luk 20:19 Hiche thulem hi amaho gotna asei aheuvin Danthu themho le Thempu pipu hon hichepet tah a chu Jesu chunga khut lhah din agouvin, ahinla mipi akichauve.
Luk 20:20 Amahon Jesu chu athuseiya kipalsah a, mat ding gamvaipo tha neina le athu noiya peh theina dingin phat kitup kom achang lhiuvin, chonpha lhemin changlhi phabep achinsah-ui.
Luk 20:21 Changlhi ho hin Jesu jah a, “Houhil, nathusei le namihilna hi adih-in, maipha velouvin Pathen lampi dihtah a na-hil kaheuve;
Luk 20:22 Caesar kai kapeh-u hi dan ngai himong nam?” tin adongui.
Luk 20:23 Jesun alungthim bol’u ahen ajah-uvah,
Luk 20:24 “Denarii khat neivet-sah temun, koi lim hiya koi min chong am?” atileh;
Luk 20:25 amahon, ‘Caesar’a,” atiuve. Hichun Aman “Chuti ahile Caesar’a chu Caesar peuvin, Pathena chu Pathen petau,” ati.
Luk 20:26 Mipi maiya athuseiyin aman thei tapouve; adonbutna ma chu adatmo lheh jengun athip beh tauve.
Luk 20:27 Mithi thokit tahsan lou Sadducee phabep ahungun Jesu jah a,
Luk 20:28 “Houhil, Mose’n ‘Pasal khattou ji neiya cha hing man louva athi leh, ajinu meithai chu asopipan akichenpia asopipa chi akhai peh ding ahi,’ tia eisutpeh-u ahi.
Luk 20:29 Pasal sagite aum’un, a-upapenin ji aneileh cha hing louvin athitai.
Luk 20:30 Ani lhinna pan jong,
Luk 20:31 thum lhinna pan jong, aban ban-in amanu chu jin anei cheh-un, asagiuvin cha hinglouvin athisoh tauve.
Luk 20:32 Achaina keiyin numeinu jong chu athitai.
Luk 20:33 Chuti ahijeh chun mithi thokitnaa hiche nu chu koipen ji hiding hitam?” tin adongui.
Luk 20:34 Jesun amaho jah a, “Hiche khanga mite hi akichengun, kicheng din jong akipeuve,
Luk 20:35 thinaa kona thoudoh, ahung lhung ding khang mu dia kilomho vang chu akicheng pouvin, kicheng din jong akipeto tapouve.
Luk 20:36 Ahimongin amaho chu athi thei tapouvin, Vantilte tobang ahiuvin, thinaa kona thoudoh kit’a Pathen chate hiuva ahitai.
Luk 20:37 Chule mithiho thodoh tahbeh hi Mose’n lham-buh thua chun Pakai chu Abraham Pathen, Isaac Pathen chule Jacob Pathen ahidol kichentah-in aphonge.
Luk 20:38 Pathen chu mithiho Pathen ahipon, mihing ho Pathen ahibouve; ijeh-inem itile Ama koma mi jouse ahing cheh-e,” ati.
Luk 20:39 Danthu themho phabep’in, “Houhil nasei dih lheh jenge,” atiuve.
Luk 20:40 Ajeh chu thu dang adoh ngamlouvu ahitai.
Luk 20:41 Jesun ajah-uva, “I-atileh mihon Messiah chu David guiya peng ding ahi, tia aseiyu ham?
Luk 20:42 David jengin jong labua chun, ‘Pakaiyin ka-Pakai jah a Kajet lama tou jingin
Luk 20:43 Namelmate chengse Nakeng chotpha kaneisah masangsen,’ tin aseibouve.
Luk 20:44 David amatah-in ‘Pakai’ asah leh iti aguiya peng hithei ding ham?” ati.
Luk 20:45 Jesun mi jouse jah din aseijuite henga,
Luk 20:46 “Ching theiyun, Dan thepna sangkhol chol ki-ah a vah le nom, kailhang dunga mi salam ding deiya, Houthua kikhopna in dunga touna phapen, gol-vahna mun’a munpha pen lo nom,
Luk 20:47 meithaiho thil le lo bahgam, mi mu dia sottah tah taoji hoa konin kihong phauvin; amaho hi them-mona chungnung chang diu ahi,” ati.
Luk 21:1 Jesu adadoh leh mihao hon sumkholna sunga thilto alhah lut’u amui.
Luk 21:2 Meithai vaicha khat’in jong paisa khat toh kikot, sumsan nongsi ni alhah lut amun ahi.
Luk 21:3 Hijeh chun, “Tahbeh a kasei-peh nahiuve, hiche meithai vai-chanu hin midang jouse sangin atam lhah lutjoi;
Luk 21:4 Ijeh-inem itile midang hon aneival ato’u ahin, hichenu vang hin avaichat lheh vanga akivah hingna aboncha ato-doh ahitai,” ati.
Luk 21:5 Mi phabep’in Houin thudol, insong hoitah tah le abang dunga kitepna thilto kijempol ho thudol akihou lim’uve. Jesun
Luk 21:6 “Hiche nakihou lim nau thil ho hi, phat khat teng song khat chunga khat kise-thom him him um louhel’a kisuchim ding ahi,” ati.
Luk 21:7 Mihon Jesu jah a, “Houhil, thil hicheng chu itih le hung gui-lhungin tem? Ahung guilhun ding phat melchihna itobang bang hi ding ham?” tin adongui.
Luk 21:8 Aman, “Lhep lhah puimanga naum louna diuvin ching theiyun. Ajeh chu Keima min a mi tampi hunguva, ‘Kei ama kahi,’ chule, ‘Phat tepsa chu ahung naitai,’ ati diu ahin, amaho jui hih-uvin.
Luk 21:9 Thunoh baotam le gal kisat najah tengu leh tija hih-un, amasa hitobang ho hi soh tei ding ahin, ki-chai pai jeng lou ding ahi,” ati.
Luk 21:10 Ajah-uvah, “Nam khat le nam khat kidouva, lenggam le lenggam kidou ding;
Luk 21:11 ling nasatah kihot’a, muntin a gamna hise langa kel lha ding, van’a kona jong tijatna kidang dang le melchihna tampi hung soh ding ahi.
Luk 21:12 Thil hichengse hi asodoh ma-sanga mihon nachunguva khut alhah-uva, nabol genthei diu, Houthua kikhopna in dunga nakai lut’uva songkul’a nakhum diu; Keima min jal’a leng ho le gam-vaipo ho angsunga nakai lut diu ahi.
Luk 21:13 Hitia min nabol pet’u hi nang ho dia hettohsah a napan nau phat pha tah hi ding ahi.
Luk 21:14 Nakihon nau thu seina dia nalung kham louna diuvin kigosan um’un,
Luk 21:15 ajeh chu namelmateu khat chan jong anelkhup thei lou thu le chihna nakipe diu ahi.
Luk 21:16 Nu le pa, sopi pasal ho, phunggolpi ho, golle paite napedoh-uva hung panga, nalah-uva konkhat jong nathasah diu ahi,
Luk 21:17 chutia chu Keima min jal’a japi hot’a naum dingu ahi.
Luk 21:18 Hijongleh nalu’va samjang khat jong mangthah lou ding ahi.
Luk 21:19 Thoh hat vanga naki-hinso dingu ahi.
Luk 21:20 “Galmiten Jerusalem aum-kimvel namu tengu akisuhmangna ding anaidol nahet diu ahi.
Luk 21:21 Chutengleh Judea gama um ho molsang lama jam’u hen, khopi sunga um hon dalhau hen, gam-chang noiya um ho khopi sunga lut dau hen;
Luk 21:22 ijeh-inem itile Pathen lekhabua kisun chengse guilhunna dinga hiche nikho ho hi talen matsahna ahi.
Luk 21:23 Ohe, hiche nikholaiya numei gaiya leh nao noichep neiho ada nahiuve! Ajeh chu gamsunga gentheina nasatah lhunga chule mite chunga hi lung-satna chu ding ahiye.
Luk 21:24 Chemjam hema lou diu, chitin namtin lah a gal-hinga min akai mang diu, chi-dang namdangte phat kiteppeh kichai kahsea Jerusalem hi chi-dang namdangten kengchot pha anei diu ahi.
Luk 21:25 “Nisa le lha chule ahsitea kona melchihna hung um ding, Twikhanglen kitum le kinon gin jeh a leiset chung cheng namtin vaipi hesoh genthei diu ahi.
Luk 21:26 Vannoiya hung lhung ding kichat tijat umtah thil ho jeh a mihemte haisam diu ahi, ajeh chu van’a thahatna chengse kihot lingsoh ding ahitai.
Luk 21:27 Chutah le mihon Mihem Chapa chu tha neitah le loupi tah a meiloma hung amu diu ahi.
Luk 21:28 Thil hichengse hi ahung sopat teng khodah-in chung lam veuvin, ijeh-inem itile najalen nadiu ahung naiye,” ati.
Luk 21:29 Jesun ajah-uva thulem khat aseiyin, “Theichang phung le thingphung dang khu vetemun.
Luk 21:30 Ajih adotdoh namu tengu nipi naije nahe jenguve.
Luk 21:31 Hitobanga chu thil hichengse aso teng, Pathen lenggam hung nai nahet jeng diu ahi.
Luk 21:32 Tahbeh a kaseipeh nahiuve, hichengse hi aso masangsea hiche khang hi kichai lou ding ahi.
Luk 21:33 Van le leiset mang ding ahin, kathusei ho vang mang lou ding ahi.
Luk 21:34 “Kiging jingun, achutiloule motneh neh le jukham nom, hinlai lungkham nan nalungu alo’a, hiche nikho chu phulou helouva hung lhunga,
Luk 21:35 thang kipel banga vannoi mijouse chunga hung lhung phung jeng ding ahi.
Luk 21:36 Thilsoh hichengsea hi hoidoh theina ding thahat nanei-na diu leh Mihem Chapa angsunga nadin theina diuvin hah jingun lang tao jinguvin,” ati.
Luk 21:37 Jesun sun leh Houin a thu ahiljin, nilhah-in apotdoh-in Olive thing ke-na molsanga aga gehjie.
Luk 21:38 Mipi abonchan jingpi tah-in athouvun Houin a athuhil ngai dingin ahunguve.
Luk 22:1 Kalchuh kut kiti cholsolou changlhah kut anaitai.
Luk 22:2 Thempu pipu ho le Danthu themhon Jesu thana thei ding, lampi ahol’un, ahinla mipi aki-chauvin ahi.
Luk 22:3 Som le ni toh kisimtha, Iscariot kitipa Judas lung sunga Satan alut’in,
Luk 22:4 hijeh chun achen Jesu matsah theina ding thu Thempu pipu ho leh Houin ngah sepai lamkaiho toh akihousom tauve.
Luk 22:5 Amaho akipah-un sum peh din atep tauve.
Luk 22:6 Judas anomin, Jesu chu mipi kitit loupet cha amaho peh doh a matsah theina ding phat gomkom ave lhi jinge.
Luk 22:7 Kalchuh kut kelngoi thana ding, cholsolou changlhah kut nikho ahung lhungtan,
Luk 22:8 hijeh chun Jesun Peter le John asol’in, “Che lhonin lang kalchuh kut an i-neh theina diuvin ana go lhonin,” ati.
Luk 22:9 Amanin ajah a, “Hoikoma gago lhon leng nadeiyem?” tin adong lhone.
Luk 22:10 Aman ajah lhona, “Khopi sung nalut lhon teng leh leibela twi hinpua mi khat nato lhon ding ahin, ama chu’ alutna in chan gei-yin jui lhonin,
Luk 22:11 chutengleh a-in neipa henga, ‘Houhil’in najah a, “Kaseijuite toh kalchuh kut an kaneh khom diu indan chu hoikom ham?” tin nadonge,’ gati lhonin.
Luk 22:12 Chuteng aman indan chungnung lentah, gotsadem khat navetsah lhon ding ahin, hikoma chun ana-go lhontan,” ati.
Luk 22:13 Amani ache lhon leh ijakai asei bang bangin agatoh lhonin, kalchuh kut an nehna ding agago lhontai.
Luk 22:14 Aphat lhinin Jesu ankonga atou leh aseijuiten aumpiuve.
Luk 22:15 Aman ajah-uva, “Kathoh gim masanga nang ho toh hiche kalchuh kut an hi neh khom ding katup jing ahi;
Luk 22:16 ijeh-inem itile najah-uva kasei ahi, Pathen lenggama akibolna jeh hi agui lhun masanga kaneh kit lou ding ahitai,” ati.
Luk 22:17 Hichun khon khat alan, athangvah jouvin, “Hiche hi kilah-un lang donkhom’uvin;
Luk 22:18 ajeh chu kaseipeh nahiuve, Pathen lenggam ahung lhun kahsea lengpigatwi hi kadon kit louhel ding ahitai,” ati.
Luk 22:19 Chuin changlhah alan, athangvah jouvin, ahehbal bal’in amaho apen, “Hiche hi nang ho dia kipedoh katahsa ahi. (Keima neihet jingna dingun neuvin,” ati.
Luk 22:20 Hitobang chun aneh jouvin khon jong chu alan, “Hiche hi nang ho dia kilhoh lha, kathisana kisemdoh kitepna thah ahi.)
Luk 22:21 “Ahinla ven, eipedoh-a pang-pa khut chun dokhanga ankong eisokhompi;
Luk 22:22 Mihem Chapa vang chu akigonpeh banga chetei ding ahin, hijongle apedoh a pangpa chu Ohe, ada na’e!” ati.
Luk 22:23 Hichun alah-uva koipen chun hitobang hi abol ding seijuite akidongto tauve.
Luk 22:24 Seijuite lah a koi alenpena kisei ding thua kinelna asohdoh tai.
Luk 22:25 Jesun ajah-uva, “Chitin nam-tin lah a leng ho amiteu chunga Pakaiyin apangun, chule achung-uva thuneiho’ jong khu phatna bol akitiuve.
Luk 22:26 Nang ho lah a vang chutilou ding ahi; nalah-uva a-upa jep chu adongjo banga na-um’uva, ankong phunga toupa jong lhachaa pangpa banga nakigel diu ahi.
Luk 22:27 Ankong phunga toupa le lhachapa hoijoh lenjom? Ankong phunga toupa lenjo hilou ham? Ahile Keila nalah-uva lhachan kapangin ahi.
Luk 22:28 “Nang ho hi hahsa kathohna chan a eiumpi jing nahiuvin,
Luk 22:29 ka-Pan Keima lenggam eipeh banga Kenjong nang ho hi