Luk : i-lah-uva hung guilhung chengse sutdohna mi tamtah-in abol pan banguvin

Luke

Luk 1:1 I-lah-uva hung guilhung chengse sutdohna mi tamtah-in abol pan banguvin,

Luk 1:2 athilsoh kipat’a pat amit tah a mua athu lhachaa pang hon eihil bangun,
Luk 1:3 michungnung Theophilus, athilsoh ho hi ken jong kahet themsa banga ban neicha le kitoh tah a hinsutdoh peh ding kadeiye;
Luk 1:4 chutileh nakiseipehsa thilsoh ho hi nahet chet thei ding ahi.
Luk 1:5 Judea gama Herod lengpa vai-poh laiyin Abijah themput dol’a thempu, Zechariah kiti khat aume. Ajinu chu Aaron chilhah ahin, amin Elizabeth akiti.
Luk 1:6 Anupa lhonin Pathen vet dia midih gel, nolnabeiya Pakai thupeh jouse le chondan chengse nit bukimsoh ahilhone.
Luk 1:7 Elizabeth achinjeh-in cha vang anei lhonpon, teh la atehse lheh lhontai.
Luk 1:8 Thempu chon ngaiya Zechariah loiho panna ding nikhon, Pakai Houin thenga lut’a gimnamtui lhutnam na dia
Luk 1:9 vang kisan chu Zechariah chunga achuh khah jeh-in aman Pathen angsunga themput kin anabol’in ahi.
Luk 1:10 Gimnamtui kilhut-nam laisen mipi polama adingun ataovui.
Luk 1:11 Hichun Zechariah henga Vantil khat ahung kilah-in, gimnamtui kilhut namna maicham jet lama chun ahung dinge.
Luk 1:12 Vantil amu phat’in Zechariah alungkhamin ki-jong akichai.
Luk 1:13 Ahinla Vantil chun ajah a, “Zechariah, kicha hih-in, nataona akisangin, najinu Elizabeth-in chapa khat ahin’a, amin John nasah ding ahi;
Luk 1:14 kipah thanom lheh in natin, chule ama penjal’a mi tampi kipah diu ahi.
Luk 1:15 Ajeh chu ama hi Pakai mitmua nasatah hiya, leng-pitwi hihen khamna thei ju hijong-leh adon louhel ding, apenlhah a pat Lhagao Theng dimset ding ahi.
Luk 1:16 Chule Israelte tamtah Pakai a-Pathenu henga alepui lut kit ding ahi.
Luk 1:17 Elijah Themgao Lhagao le thahat aken’a, Pathen sol lea panga, mipate lunggel chate lama aheidoh a, thua nung loute chihna thudih agelsah-a Pakai dia miho kigosa-dema akoipeh ding ahi,” ati.
Luk 1:18 Zechariah chun Vantil jah a, “Keila kateh lheh tan, kajinu jong tehsesa ahitan, cha kanei mong lhon ding chu iti kahet thei ding ham?” atileh;
Luk 1:19 Vantil’in, “Keima hi Pathen angsunga ding jing Gabriel kahin, hiche Thupha hi najah a seipeh dia eihinsol ahi.
Luk 1:20 Ven, hichengse hi akitep phat cha hung guilhung tei ding ahin, kaseipeh natahsan loujeh a aguilhun nikho geiya paomoa naum ding ahitai,” ati.
Luk 1:21 Mipin Zechariah chu a-ngah jingun, munthenga achuti sotden adatmo lheh jengui.
Luk 1:22 Ahungdoh phat’in apaomo tan, muntheng sunga mu nei ahi mihon aheuvin, aman jong thilsoh umchan chu akhut’in athon, paomon aumtai.
Luk 1:23 Chuin thempu kin abol chaisoh phat’in Zechariah in lama ahung kile kittai.
Luk 1:24 Nikho phabep nungin ajinu Elizabeth chun nao avop tan, lha nga sungin akiselgun, hiti hin,
Luk 1:25 “Teh nunga Pakaiyin nao eivopsah a, japi maiya kajachatna lahmang peh eigot ahi,” ati.
Luk 1:26 Elizabeth gai kal lhagup lhin nan Vantil Gabriel chu Pathena konin Galilee gam Nazareth khoa
Luk 1:27 David chilhah Joseph toh kicheng dia kitepsa nu-ngah Mary henga akisol’e.
Luk 1:28 Vantil chu alut’in ajah a, “Nun nomin sah chungnung nu, Pakaiyin naumpi jinge!” ati.
Luk 1:29 Mary chu alung kichi-ah lah jengin, ipi thudol’a kilemna ahiding giltah-in agel’e.
Luk 1:30 Hichun Vantil’in ajah a, “Mary kicha hih-in, Pathen lungdei namui.
Luk 1:31 Nagaiya chapa khat nahin ding, amin Jesu nasah ding ahi.
Luk 1:32 Ama thupi tah hiya Chungnungpen Chapa kitia, Pakai Pathenin apu David laltounaa atou-sah ding ahi.
Luk 1:33 Jacob chilhah te chunga lengvai pontin, alenggam chun beitih neita lou ding ahi,” ati.
Luk 1:34 Ahinla Maryn Vantil jah a chun, “Iti cha kanei thei ding ham, keila pasalto kakitimat khapon?” atileh;
Luk 1:35 Vantil’in ajah a, “Lhagao Theng nachunga hung chun tin, Chungnungpen tha neinan nahinle-khu ding, hijeh a hi apeng ding naosen theng chu Pathen Chapa kiti ding ahi.
Luk 1:36 Nanulamnu Elizabeth-in jong teh nungin chapa khat avop’in, achinga kiseinu agaiyin lhagup alhingtai;
Luk 1:37 ajeh chu Pathen dingin imacha ahimopoi,” ati.
Luk 1:38 Chuphat’in Maryn, “Ven, Pakai nalhachanu kei, nasei bangin kachunga guilhung hen,” ati. Hichun Vantil’in Mary adalhatai.
Luk 1:39 Hichelai hin Mary akipat pai-yin Judea thinglhang gam khopi khat’ah thanom tah-in achei.
Luk 1:40 Zechariah in’a alut’in Elizabeth salam agabol’e.
Luk 1:41 Mary salam chu Elizabeth-in ajah pet tah-in a-oisunga naocha akichomin, Elizabeth chu Lhagao Theng adimtai.
Luk 1:42 Chuin Elizabeth chun othongin asamin, “Numei jouse lah a nun nom nu, nanaobu sunga um jong anun nome!
Luk 1:43 I-atileh ka-Pakai hingnu lom lom kahenga hung jeng hitam!
Luk 1:44 Ajeh chu salam thu nasei kajah jah chun ka-oisunga naocha kipah-in akichom jenge.
Luk 1:45 Ahenga Pakai thusei guilhung ding tahsan nu anun nome,” ati.
Luk 1:46 Hichun Maryn aseiyin: “Kahinkhon Pakai kachoi, an’in,
Luk 1:47 Eihuhhing Pakai Pathen chunga Kalhagao akipah-e.
Luk 1:48 Ajeh chu alhacha nu lhasam tah eigeldoh-in, Ven, tua pat akhang khanga miten Nun nom nua eisei diu ahitai.
Luk 1:49 Ijeh-inem itile Hatchungnungin thil nasatah eibolpeh-in, Amin jong athenge.
Luk 1:50 Ama gingte chu Akhang khangin alungset jinge.
Luk 1:51 Aban thahat ajesal’in thanei tah-in thil abol’in, Alunggel’uva kiletsah hoithote athecheh soh tai.
Luk 1:52 Vaihom thanei tah ho alaltouna konin aloilhan Tahlel chagate achoisangtai.
Luk 1:53 Agilkelte antui tuiyin avah van, Mihaote khutgoh keovin asolmang’e.
Luk 1:54 Alhacha Israel henga akitepna, I-pu i-pateu Abraham le achilhahte henga aseisa,
Luk 1:55 Tonsot kumkboa alungset long lou chu Ageldoh jing jenge,” ati.
Luk 1:56 Mary chu Elizabeth koma lha thum jen anichongin, chuin in lama akile kittai.
Luk 1:57 Elizabeth naoso phat alhingin chapa khat ahingtai.
Luk 1:58 Aheng akom ho leh aphung gol hon Pakaiyin nasatah a Elizabeth alungset hi ajauvin, akipapi cheh-uve.
Luk 1:59 Niget lhin nin naosen chep tan din ahungun, apa min putsah a Zechariah hisah ding agouve.
Luk 1:60 Ahinla anun ajadan, “Amin John kiti ding ahibouve,” ati.
Luk 1:61 Amahon Elizabeth jah a, “Naphung sunguva chutobang min neikha bon um louva,” atiuve.
Luk 1:62 Chuphat’in mihon apan ipi asah nom chu mit heiyin adongui.
Luk 1:63 Zechariah chun asutna ding pheng khat athumin, “Amin John ahi,” tia ajih leh abonchan adatmo soh hel’uve.
Luk 1:64 Hichepet tah chun Zechariah apaodoh jeng thei-yin, Pathen avanchoiye.
Luk 1:65 Aheng akom jouse akichauvin, hiche thu-soh hi Judea thinglhang gamsung athangsoh tai.
Luk 1:66 Athusoh japha chanin alungthim’ah, “Hiche naosen khu ipi hungsoh ding ham?” ati cheh-ui. Ajeh chu Pakai ban thahat’in naosen chu aumpi jinge.
Luk 1:67 Naosen pa Zechariah Lhagao Theng adimin gaothu aseitai:
Luk 1:68 “Pakai, Israel Pathen vahchoiyute, Aman amite akithopin jalenna amusah tai.
Luk 1:69 Alhacha David insunga konin Huhhing hattah khat saki bangin atungdoh tai.
Luk 1:70 Hiche hi masang laiya Athemgao theng ho kama aseisa ahi.
Luk 1:71 Imelmateu le eihot bolteu khut’a kona Eihuhdoh jing diuva thu atepsa ahin;
Luk 1:72 I-pu i-pateu alungset tei tei ding, Akitepna theng suhmil lou dia aseisa ahi.
Luk 1:73 I-pu luiyu Abraham henga kihahsel’a, Imelmateu khut’a kona eihuhdoh diu,
Luk 1:74 Gin neilouva Ama kin ibol theiyuva,
Luk 1:75 Ihinkho lhumkeiyuva dih tah a akin ibol diu ati ahi.
Luk 1:76 Naosen nang jong Chungnungpen- Pa Themgao nakitia, Pakai masanga chea alampi nasempeh ding;
Luk 1:77 Amite hi achonsetnau ki-ngaidama Huhhingna chang dia naseipeh ding ahi.
Luk 1:78 I-Pathenu hi lung nemtah lungset them ahin, Thina muthim jing lah a touho chunga
Luk 1:79 Nisa loupi tah avahsah a, Chamna lampi jon’a akijotsah diu ahi,” ati.
Luk 1:80 Naosen chu ahung khang khangin tahsa le lhagaova hattah ahitai. Israelte henga lhang phonga akilah masangsen gamthip lah jenga apansai.
Luk 2:1 Hiche lai chun Caesar Augustus in leiset chung cheng mi jouse simtoh a min sutdoh din thu apei.
Luk 2:2 Hiche hi min kisim masah pen ahin, hichepet hin Quirinius Syria gamvaipon apange.
Luk 2:3 Mihem jouse ama ama khopi cheh a min kisut din acheuve.
Luk 2:4 Joseph jong David insung chilhah ahijeh-in Galilee gam Nazareth khoa konin Judea gam David khopi, Bethlehema achetouve.
Luk 2:5 Min kisut dia ache hin ajihol Mary gai hamset chutoh alhon’e.
Luk 2:6 Chu-koma aum pet lhonin Mary navah phat alhing’in,
Luk 2:7 achapa masapen ahingtai. Jin lhun in’a amani ding mun onlou jeh-in Maryn naosen chu ponin ajel’in gan ankong-ah alup-sah-e.
Luk 2:8 Hiche gama chun kelngoi ching phabep loujaova ageh-un, janin kelngoi hon ngah akilha lhauve.
Luk 2:9 Chuin Pakaiya kon Vantil khat akom’uva ahung dingin, Pakai loupi nan akimvel’u asalvah soh jenge; amaho akicha behseh jengun ahi.
Luk 2:10 Vantil chun ajah-uvah, “Kicha hih-un, ajeh chu ven, nang ho dia hachangpa kipana Thupha kahin-poh peh nahiuvin, mi jouse kipana hi ding ahi.
Luk 2:11 Ijeh-inem itile tunin nang ho din David khopia huhhingpa Pakai Messiah chu apengtai.
Luk 2:12 Naphot chetna diu chu: naosen pon’a kijel’a gan ankong sunga lum nagamu diu ahi,” ati.
Luk 2:13 Phot lot louvin Vantil chutoh vanmi janelten Pathen avahchoiyun hiti hin,
Luk 2:14 “Chungnungpena Pathen loupi hen, Leiset’a alungdei mite chunga cham leng hen,” atiuve.
Luk 2:15 Vantilte chu van lam jona akile kit phat’un kelngoi ching ho khat le khat akihouvun, “Bethlehema cheu hitin Pakaiyin eihetsah-u hiche thil-soh hi gaveu hite,” akitiuvin ahi.
Luk 2:16 Kinloi tah a acheu leh Mary le Joseph toh naosen gan ankonga lum chu agamu’ve.
Luk 2:17 Amu phat’uvin naosen chung chang thudol ajah-uva kisei chengse chu miho aseipeh tauve.
Luk 2:18 Ajah-uva kelngoi ching ho thusei japha chanin kidang asa lheh jengun,
Luk 2:19 Maryn vang hichengse chu achingin alung gil’in agel jinge.
Luk 2:20 Kelngoi ching hon akiseipeh bang-uva thil amu jeh-un Pathen choiat le thangvah thon akile kittauve.
Luk 2:21 Niget lhin nin naosen chep tan phat ahitan, naobua akijil masanga Vantil’in amin asahsa Jesu asah tauve.
Luk 2:22 Mose Danthu dungjuiya kisuh theng phat alhinin Jesu chu Pakai henga din Jerusalema ahinpui touvui.
Luk 2:23 Pakai Danthua, “Naobu tumkeh masa pasal tapou Pakaiya atheng ding ahi,” tia kisei bangin,
Luk 2:24 chule Pakai Danthua kisei, “Vakhu kop khat ahiloule vapal nou ni ham,” kiti dungjuiyin kilhaina bol din agouve.
Luk 2:25 Ven, Jerusalema chun amin Simeon kiti pasal khat, midih le hougut tah, Israel kilhatdoh ding ngah jinga um ahin; Lhagao Theng vop,
Luk 2:26 Pakaiya kon Messiah amu kahsea thilou dia Lhagao Thengin aphondoh mi khat aume.
Luk 2:27 Simeon chu Lhagaovin Houin’a ahinpui lut’in, Danthua kisei banga naosen Jesu kin bolpeh lou khoh ho bolpeh dia anu le apan ahinpui lut lhon phat’in
Luk 2:28 Simeomin naocha chu aki-pomin, Pathen vahchoiyin aseiye:
Luk 2:29 “Pakai tua hi nasei banga Nalhachapa lung monga neilhadoh ahitai;
Luk 2:30 Ijeh-inem itile kamit tah-in Nahuhhingna kamutai.
Luk 2:31 Hiche hi namtin mitmua Gontohsa nakoi,
Luk 2:32 Chiding namdangte henga nadei chu vah a kiphongdoh a Namite Israel loupina dia nabol ahi,” ati.
Luk 2:33 Naosen chung changa Simeon thusei chu anu le apan adatmo lheh jeng lhone.
Luk 2:34 Simeonin amaho phatthei aboh-in, anu Mary jah a, “Ven, hiche naosen hi Israel sunga mi tamtah kipal lhuhna ding le hindohna dia kitung, nahsah moa kikoiji ho khel’a melchihna pang ding,
Luk 2:35 nang jeng jong nalung chang chemjama kidotpai abahsah a, mi tamtah lunggil selguh geiya aphondoh ding ahi,” ati.
Luk 2:36 Asher phunga Phanuel chanu Anna themgaonu chu aji nei nunga ajipa toh kum sagi seh bou cheng khom lhona, tehse lheh jeng,
Luk 2:37 kum som get le li meithaiya um, Houin dalha khalou, sun le jan’a Pathen kinbol’a pang, an ngol’a tao jing jeng ahi.
Luk 2:38 Hiche-pet tah hin ahungin Pathen athang-vah-in, Jerusalem lhatdoh ding kat jingte jah a naosen thudol hi aseipeh tai.
Luk 2:39 Pakai Danthua kisei kinkhoh jouse abol chai phat’un Galilee gama akhou Nazareth a ahung kile kittauve.
Luk 2:40 Naosen chu akhang khangin ahatdoh tan, aching lheh jengin, Pathen phattheinan aumpi jinge.
Luk 2:41 Jesu nu le pa kumseh leh kalchuh kut’a din Jerusalema acheji lhone.
Luk 2:42 Jesu kum som le ni alhinin angaiya kalchuh kut mang din achetou kit’uve.
Luk 2:43 Kut kichaiya in lam ahinjot phat’un chapang Jesu chu Jerusalema aumdenin, anu le apanla ahedoh lhonpoi.
Luk 2:44 Amanin mihon lah a chedanin agel lhonin nikhat nilhum keiyin ahung tauve; chuin aheng akomte leh akihetpi ho lah a Jesu ahol lhon leh
Luk 2:45 amudoh jou lhon tapoi. Hijeh chun Jerusalema ahung hol lhontai.
Luk 2:46 Nithum nungin Houin sunga agamudoh lhonin, houhilte lah a anatouvin, athuseiyu angaiyin dong jong adongjie.
Luk 2:47 Athusei japha chanin achih dan le athu donbut themdol chu kidang asa-lheh jenguve.
Luk 2:48 Anu le apan amu-doh lhon chun adatmo lheh jeng lhonin, anun ajah a, “Naosen, idia neihitibol jeng lhon ham? Veta, napa le ken lung dongtah-in kahol hol lhone,” ati.
Luk 2:49 Aman ajah lhona, “Idia neihol khoh lhon ham? Ka-Pa insunga kaumtei ding nahet lhon lou ham?” atipeh-e.
Luk 2:50 Ajah lhona asei chu ahedoh thei lhonpoi.
Luk 2:51 Chuin amani toh lhonin Nazareth khoa ahungin athu thu lhonin anunge. Anun thilsoh chengse hi alung gil’in aching jinge.
Luk 2:52 Jesu chu tahsa le chih nan akhang tou touvin, Pathen le mihem deiyin aumtai.
Luk 3:1 Tiberius Caesar lengchan kal kum som le nga lhin chun Pontius Pilate’n Judea gam vai apon, Herod’in Galilee gambih vai apon, asopipa Philip’in Iturea le Trachonitis gambih vai apon, Lysanias chun Abilene gambih vai apon,
Luk 3:2 Annas le Caiaphas Thempulenin apang lhone. Hichepet hin gamthip’a um Zechariah chapa John henga Pathenin thu ahinsei-tai.
Luk 3:3 John Jordan luipang gamkol’a achelen, mihon lung aheiyuva baptize chang diu, chuteng achonset’u ki-ngaidam ding thu alhangsamlei.
Luk 3:4 lsaiah themgao lekhabua chun akisunin: “Gamthip’a khosam ogin khat’in, Pakai lampi semtoh-un lang, Alamlen semjangsan koiyun.
Luk 3:5 Damkom jouse kidip chama, Mol le lhang jouse kilai cham ding, Lamkon jouse kisujanga aboh laise jong kisunam ding ahi.
Luk 3:6 Chutengleh tahsa mihing jousen Pathen huhhingna amudoh cheh diu ahi,” akiti.
Luk 3:7 Ahenga baptize chang dia hung ho jah a chun Johnin, “Vo gulse son ho, ahung lhung ding lunghanna jamdohna ding thu namop’u chu koiham?
Luk 3:8 Nachonset lung nakhel’u phot chet nan nachon nauvin phongun; ‘Abraham chilhah kihina chu,’ tin kisong hih-un; ajeh chu Pathenin hiche song ho hi alah a Abraham chilhah a asemdoh thei ahi.
Luk 3:9 Thingphungbul tin’a heicha kiphutsoh ahitan, aga phalou thingphung jouse kiphuh lhua meilhum sunga kileh lutsoh ding ahi,” ati.
Luk 3:10 Mipin John chu adongun, “Achutile ipi kabol diu hitam?” atiuleh;
Luk 3:11 aman ajah-uvah, “Sangkhol chol ni neiyan aneilou hop hen anneh neiyan jong chutiman bol hen,” ati.
Luk 3:12 Kaidong ho geiyin ahenga baptize chang din ahungun ajah a, “Houhil iti kachon diu ham?” tia adoh-u leh,
Luk 3:13 Johnin ajah-uvah, “Nakiteppeh kalval’un lah dau-vin,” ati.
Luk 3:14 Sepaihon jong, “Iti kachon diu ham?” tin adongun, aman ajah-uva, “Sum hihen ipi hijongle alam louvin koima ima lahpeh dauvin, nasandoh jat jat’in lung lhaiyuvin,” ati.
Luk 3:15 Mipin alungthimuva John akatjingu Messiah hitheiya agel laitah-un,
Luk 3:16 Johnin adonbut’in ajah-uvah, “Ken twiya baptize kachansah bou nahiuvin, keisanga hatjo khat ahunge, kei hi akeng-chot khao sut lham dia kilom jong kahipoi, aman Lhagao Theng le meikonga baptize nachansah diu ahi.
Luk 3:17 Akhut’a chang japna achoi-yin, phol’a chang jap ngimsel’in tin, chuteng achangtah ho changsal’a akhum tup ding, asi chengse vang mit theilou meilhum sunga agovam ding ahitai,” ati.
Luk 3:18 Johnin tilkhouna tamtah toh thon mipi chu Kipana Thupha aseiphongpeh-e.
Luk 3:19 Gambih vaipoa pang Herod jong chu asopipa Philip jinu Herodias akichenpi jeh le thilse dang tampi aboljeh-in aphoh-e.
Luk 3:20 Hichea hin Herod chun John hi songkul’a akhumin thilse khoh cheh khat abolbe kit’e.
Luk 3:21 Miho baptize achansah phat’un Jesu jong baptize achange. Chuin atao leh van akihongin,
Luk 3:22 Lhagao Theng tahsa vouvin vakhu bangin achunga ahung leng lhan, van’a konin ogin khat’in, “Kadeitah kachapa nahin, na-chunga kalung alhai ta-ngeiye,” ati.
Luk 3:23 Anatoh kipat chun Jesu kum som thum bang alhingtan, mi ngaiton ama chu Joseph chapa ahi. Joseph chu Eli chapa ahi;
Luk 3:24 Eli chu Matthat chapa ahin, Matthat chu Levi chapa ahi; Levi chu Melchi chapa ahin, Melchi chu Jannai chapa ahi; Jannai chu Joseph chapa ahin,
Luk 3:25 Joseph chu Mattathias chapa ahi; Mattathias chu Amos chapa ahin, Amos chu Nahum chapa ahi; Nahum chu Esli chapa ahin, Esli chu Naggai chapa ahi;
Luk 3:26 Naggai chu Maath chapa ahin, Maath chu Mattathias chapa ahi; Mattathias chu Semein chapa ah’ui, Semein chu Josech chapa ahi; Josech chu Joda chapa ahin,
Luk 3:27 Joda chu Joanan chapa ahi; Joanan chu Rhesa chapa ahin, Rhesa chu Zerubbabel chapa ahi; Zerubbabel chu Shealtiel chapa ahin, Shealtiel chu Neri chapa ahi;
Luk 3:28 Neri chu Melchi chapa ahin, Melchi chu Addi chapa ahi; Addi chu Cosam chapa ahin, Cosam chu Elmadam chapa ahi; Elmadam chu Er chapa ahin,
Luk 3:29 Er chu Joshua chapa ahi: Joshua chu Eliezar chapa ahin, Eliezar chu Jorim chapa ahi; Jorim chu Matthat chapa ahin, Matthat chu Levi chapa ahi;
Luk 3:30 Levi chu Simeon chapa ahin, Simeon chu Judah chapa ahi; Judah chu Joseph chapa ahin, Joseph chu Jonam chapa ahin, Jonam chu Eliakim chapa ahin,
Luk 3:31 Eliakim chu Melea chapa ahi; Melea chu Menna chapa ahin, Menna chu Mattatha chapa ahin, Mattatha chu Nathan chapa ahin; Nathan chu David chapa ahi;
Luk 3:32 David chu Jesse chapa ahin, Jesse chu Obed chapa ahi; Obed chu Boaz chapa ahin, Boaz chu Salmon chapa ahi; Salmon chu Nahshon chapa ahin,
Luk 3:33 Nahshon chu Amminadab chapa ahi; Amminadab chu Admin chapa ahin, Admin chu Arni chapa ahi; Arni chu Hezron chapa ahin, Hezron chu Perez chapa ahi; Perez chu Judah chapa ahin,
Luk 3:34 Judah chu Jacob chapa ahi; Jacob chu Isaac chapa ahin, Isaac chu Abraham chapa ahi; Abraham chu Terah chapa ahin, Terah chu Nahor chapa ahi;
Luk 3:35 Nahor chu Serug chapa ahin, Serug chu Reu chapa ahi; Reu chu Peleg chapa ahin, Peleg chu Eber chapa ahi; Eber chu Shelah chapa ahin,
Luk 3:36 Shelah chu Cainan chapa ahi; Cainan chu Arphaxad chapa ahin, Arphaxad chu Shem chapa ahi; Shem chu Noah chapa ahin, Noah chu Lamech chapa ahi;
Luk 3:37 Lamech chu Methuselah chapa ahin, Methuselah chu Enoch chapa ahi; Enoch chu Jared chapa ahin Jared chu Mahalaleel chapa ahi; Mahalaleel chu Kenan chapa ahin,
Luk 3:38 Kenan chu Enosh chapa ahi; Enosh chu Seth chapa ahin, Seth chu Adam chapa ahi; Adam chu Pathen chapa ahi.
Luk 4:1 Jordan luiya konin Jesu Lhagao Theng dimset’in ahung kile kit’in, lhagaovin gamthip’a apuilut’in,
Luk 4:2 nisom li sungin Diabol lhep patep’in aga-ume. Nisom li sunga imacha nelou ahin, akhonnan agilkeltai.
Luk 4:3 Hichun Diabol’in ajah a, “Pathen Chapa nahileh hiche song hi changlhah sosah-in.” ati.
Luk 4:4 Jesun adonbut’in, “Pathen lekhabua kisun chu, ‘Mihem hi changlhah keova hing theilou ding,’ kiti ahi,” ati.
Luk 4:5 Diabol’in Jesu apuitouvin mitphet kah louvin vannoi mihem chenna lenggam jouse avetsah-in,
Luk 4:6 “Hicheng chunga thu neina le aloupina abonchan napenge, ajeh chu kapeh nom nom kapeh dia eikipe-ah ahitai.
Luk 4:7 Hijeh a chu naboh khup’a chibai neiboh leh aboncha nanga hi ding ahi,” ati.
Luk 4:8 Jesun adonbut’in, “Pathen lekhabua, Pakai na-Pathen chibai naboh a Ama kinbou nabol ding ahi,’ tin akisune,” ati.
Luk 4:9 Jerusalema apui kit’in Houin tingvuma adinsah-in ajah a, “Pathen Chapa nahileh hikoma kon hin chomlha jengin;
Luk 4:10 ajeh chu Pathen lekhabua, ‘Pathenin Avantilte hinsol peh-in tin Amahon nachang nauvinte,
Luk 4:11 Chule akhut’uvin nadom nauvinte; Achutiloule songa nakeng kisuh khah get’in nate,’ tin akisune,” ati.
Luk 4:12 Jesun adonbut’in, “Pathen lekhabua, ‘Pakai na-Pathen nalhep patep lou ding ahi,’ tin akiseiye,” ati.
Luk 4:13 Diabol’in Jesu alhep patepna ding achaisoh phat’in phat khat’a din adalhatai.
Luk 4:14 Jesu Lhagao thahat kengin Galilee lama ahung kile kittai. Chuin Ama thudol gamsunga akithangsoh tai.
Luk 4:15 Houthua kikhopna in tin’a miho ahil len, mihon Ama aseipha soh keiyui.
Luk 4:16 Ahung seiletna Nazareth khoa Jesu ahungin, achon na ngai bangin Choldo nin houthua kikhopna in’a achen, Pathen lekhabu sim dingin adingdoh tai.
Luk 4:17 Hichun Isaiah Themgao lekhajol apeuvin, lekhajol alhap lhah a amudohna laiya chun,
Luk 4:18 “Pakaiya kon Lhagao kachunga aumin, Tahlelte henga Kipana Thupha seipeh ding, Sohchangte lhadohna thu seipeh a, Mitcho ho khomuna ding seipeh ding, Nehchintoa um ho lha-ong ding seipeh a,
Luk 4:19 Pakai deilhen kum seipeh dinga thao einu ahitai,” tin akisun’e.
Luk 4:20 Jesun lekhajol chu ajeldoh-in lhachapa apen atoutai. Hichun houthua kikhopna insunga um mi jousen Ama avesoh keiyui.
Luk 4:21 Jesun ajah-uva, “Hiche najah-u Pathen lekhabua thu hi tunia guilhung ahitai,” tin aseipantai.
Luk 4:22 Mihon Ama aseipha soh keiyun, akamsungsoh thu ngei ngei ho jeh chun kidang asalheh jengui. “Hichepa hi Joseph chapa hilou haimo?” atiuve.
Luk 4:23 Jesun ajah-uva, “Thuchih a kisei, ‘Louthem nangma kiboldam in,’ kiti hi naseiyuva, ‘Nakho-sunga jong Capernauma thil kidang kibol kajah ho’u tobang bol tang-em,’ neiti khum diu hina hi,” ati.
Luk 4:24 Aman, “Dih tah a kaseipeh nahiuve, Themgao chu akhosunga i-kisahji lou mong ahinai.
Luk 4:25 “Ahinla dihtah a kaseipeh nahiuve, Elijah nikho laiya vankot akikhaa kumthum le lhagup gotwi kanjeh a gamsung pumpia kel laiyin Israelte lah a meithai numei tamtah aum vangun
Luk 4:26 Elijah chu amaho khat cha henga akisolpoi, Sidon gama Zarephath khoa meithainu koma akisoljo bouve.
Luk 4:27 Elisha themgao khangin jong Israelte lah a miphah tampi aum nan, khat cha jong suh thengin aumpoi, Syria mi Naaman suh thengin aume,” ati.
Luk 4:28 Jesu thusei ajah-u chun houthua kikhopna in’a um chengse alung hang behseh jengun,
Luk 4:29 akipat-doh-un khosunga konin Jesu alhoh doh-uvin, achen nau molvum, koldeh a sot lhah dingin agouve.
Luk 4:30 Ahinla Jesu akah lah-uva akihehdoh-in ache mangtai.
Luk 4:31 Jesu Galilee gama Capernaum khoa ahung suh-in, Choldo nin miho thu ahil leh;
Luk 4:32 athuhil tha neije chu mihon kidang asa lheh jengui.
Luk 4:33 Houthua kikhopna in’a chun lhagaoboh vop pasal khat aumin, amahin oging tah-in ahin-samin,
Luk 4:34 “Vo Nazareth Jesu, i-lo ding neigot ham? Eisu manguva hung nahim? Koi nahi kahenai, Pathen solchah theng chu nahi,” ati.
Luk 4:35 Jesun haphon aphoh-in, “Thip’in! Mipa a kon chun hung doh-in!” atileh; thilhan mipa chu a-angsung laitah-uva aheh lhun ima suse louvin asunga konin ahung potdohtai.
Luk 4:36 Mihon adatmo soh keiyun, “Ipipen asei khum hitam? Thu neitah le thahat tah a lhagaoboh ho thu apeh le ahungdoh doh jengui,” tin akihouvui.
Luk 4:37 Hiti hin akimvel gamkol’ah Jesu thudol akithangsohtai.
Luk 4:38 Jesun houthua kikhopna in dalhan Simon in-ah aluttai. Simon nupanu hatah-in khosih nat’in ana nan, mihon Jesu henga aseipeh-ui.
Luk 4:39 Jesu amanu jalkhun panga ading-in khosih nat chu haphoa apho leh, akhosih chun alhan, amanu athou paiyin amaho jenlen apangtai.
Luk 4:40 Nisa lhumin hivei chom chom veiya damlou neihon Jesu henga ahinpuiyun, Aman achung cheh-uva khut angamin abol damsoh keiye.
Luk 4:41 Mi tamtah sunga konin thilha ho apotdoh-uvin, “Pathen Chapa nahi,” tin asamui. Jesun amaho chu haphon aphoh-in apaopoh sahpoi, ijeh-inem itile amahon Messiah ahi ahe cheh-ui.
Luk 4:42 Khovah phat’in Jesu apotdoh-in munthip lai khat’ah achetai; ahinla mipin Ama ahol hol jengui. Hiti hin ahenga ahunguvin adalhah louna dingun alhotauve.