Luk : i-lah-uva hung guilhung chengse sutdohna mi tamtah-in abol pan banguvin

Luk 8:47 numeinun aki-imthei louhel ding ahet phat’in kihot pum pumin ahungin Jesu angsung laitah a Jesu athamkhahna jeh ahil chenin, chule apettah a adamhel thu aphongdoh tai.
Luk 8:48 Hichun Jesun ajah a, “Chanu, natahsanin nadamsah ahitai, lung mongin chetan,” ati.
Luk 8:49 Jesun thu asei nalaiyin Houthua kikhopna in vaipopa in’a hungkon mi khat’in, “Nachanu athitai, Houhil chu sulung gim ta hih-in,” ati.
Luk 8:50 Asei hi Jesun ajan, “Olmo hih-in, tahsan poutan, chutile kihin-sah tei nante,” atipeh-e.
Luk 8:51 Jesu vaipopa in alhunin Peter le John chule Jacob, chapangnu nu le pa tilou midangin ajui lut ding anompoi.
Luk 8:52 Mipin chapangnu akau-vin, adip abeng beng jenguvin ahi. Jesun, “Kap hih-un, athi ahipoi, a-ihmu ahibouve,” ati,
Luk 8:53 Ahinla athi ahetjeh-un amoh nuisat tauve.
Luk 8:54 Jesun akhut’in amanin, “Boinu, thouvin,” tin akoutai.
Luk 8:55 Hichun alhagao ahung kile kit’in ahileh chapangnu athoudoh pai jenge. Chuin Jesun neh ding apeh diuvin aseiye.
Luk 8:56 Anu le apan kidang asa behseh jeng lhonin, ahivangin athilsoh chu koimacha jah a asei-poh louna diuvin Jesun akham chah kheh-e.
Luk 9:1 Jesun som le ni chu akoukhom-in thilhaho nodohna ding thu nei na le hivei chom chom boldamna thei thahat apei;
Luk 9:2 chuin amaho chu Pathen lenggam phongjal ding le adammo boldam din asoltai.
Luk 9:3 Ajah-uvah, “Lampi dunga din thil imacha, tenggol hihen, sakhao hileh, changlhah le sum jeng jong kiken dauvin, sangkhol jong tho ni ah dauvin.
Luk 9:4 Itobang in hijongle nalut nauva chun pansauvin, chua konin kipatdoh kit’uvin.
Luk 9:5 Nalhunsah lou ho vang chu khosung nadalhah tengule gihsal hetsah nan nakeng-phanguva leivui thing lha dentau-vin,’ ati,
Luk 9:6 Amaho akipatdoh-un akho khoa Kipana Thupha ahil lhang leuvin muntina ana aboldam’uve.
Luk 9:7 Gambih vaipo Herod chun na kitong thil kibol chengse ajan, mi kimkhat’in John athia kona thoudoh kit a aseijeh-un Herod alung gimin,
Luk 9:8 abangman Elijah hung kilah kit’in aseiyun, kon khat’in jong gol luilai Themgao ho khat pen thoudoh kit bangin aseiyui.
Luk 9:9 Herod chun, “John la alu katan tan, athudol kajah pa hi koiba hintem?” tin aseiyin mu-jong amu nom lheh-e.
Luk 9:10 Solchah ho ahung kile kit-un athilbol anatoh jouseu Jesu aseipeh tauve. Jesun amaho chu Bethsaida khopia atumin apuidoh tai.
Luk 9:11 Ahinla mipin amudoh-uvin anung ajuitau-ve. Jesun amaho jong hi alamdot cheh-in ajah-uvah Pathen lenggam thudol aseipeh-in, dam ding ngaicha chan aboldamin ahi.
Luk 9:12 Nisa alhumtel tul phat’in som le ni chu ahungun ajah a, “Eiho gamthip laiya um ihiuvin, akimvel kho dung le loujao dunga acheuva ge-na ding le neh le chah akiholna diuvin mipi hi solmang tan,” atiuve.
Luk 9:13 Jesun ajah-uvah, “Nang hon neh ding peuvin,” atileh; amahon, “Keihon changlhah pheng nga le nga ni val kinei louva, kacheuva mi hijatpi neh khop ding kaga choh diu ham?” atiuve.
Luk 9:14 Miho chu sang nga jen ahiuve. Jesun aseijuite jah a, “Miho hi som nga chengin aloi loiyin tousah-un,” atileh;
Luk 9:15 amahon hiti chun abonchan atousah tauve.
Luk 9:16 Chuin changlhah pheng nga le nga ni chu alan, van lam aven, phatthei aboh jouvin ahehbal bal’in mipi ang sunga luipeh din seijuite apetai.
Luk 9:17 Mihon avaset geiyin aneuvin, aneh moh alokhomu leh paipeh som le ni adimset’e.
Luk 9:18 Phat khat hi Jesu atuma ataopet’in seijuite ahung kikhomun, Aman ajah-uva, “Mipin Kei hi koi ahi, eitiuvem?” tin adonge.
Luk 9:19 Amahon, “John baptist,’ tiloi aumin, abangin, ‘Elijah ahi,’ atin, konkhatsen vang, ‘Gollui laiya Themgao ho khatpen thoudoh kit hiya chu,’ tin aseiyui,” atiuve.
Luk 9:20 Amaho jah a, “Nang hon koiba ahi neitiuvem?” atileh; Peterin, “Pathena hungkon Messiah nahi,” ati.
Luk 9:21 Hiche thu hi koima jah a asei louna diuvin Jesun seijuite ahil chah-in
Luk 9:22 “Mihem Chapan genthei tintang athoh a, upate le Thempu ho chule Danthu themhon apaidoh-uva atha diu, hijongleh nithum ni leh kaithouva um ding ahi,” tin aseiye.
Luk 9:23 Jesun miho jah a, “Keima eijui nom chu ama ki-ngaitoma niseh a thingpel kiput’a eijui ding ahi.
Luk 9:24 Ijeh-inem itile ama kihuhhing nom chun athilo ding, Keima jal’a thilo chun kihinsona anei ding ahi.
Luk 9:25 Ajeh chu min vannoi leiset pumpi neihen lang ahinkho kisuh mang leh ipi phatchompin tem?
Luk 9:26 Mi khattouvin Kei le kathu ajachatpi leh Mihem Chapan jong Ama loupina le Pa le Vantil Thengte loupina ahung teng ama chu ajumso ding ahi.
Luk 9:27 Dihtah a kaseipeh nahiuve, hikoma ding ho lah a mi phabep hi Pathen leng-gam amu kahseuva thina tep kha lou ding aum’uve,” ati.
Luk 9:28 Thu hicheng aseijou niget nungin Jesun Peter le John chule Jacob apuiyin tao din molchunga akaltouve.
Luk 9:29 Ataopet chun amaiso vou akikhel’in aponsil abanlot lot’in alhe lah lah jenge.
Luk 9:30 Ven, mi ni toh akihou lim’in, amani hi Mose le Elijahi ahin,
Luk 9:31 loupi tah-in ahung kilah lhonin, Jerusalema Jesu athia Pathen thilgon asuh bulhit ding thu akihouvui.
Luk 9:32 Peter le aloite ni chu a-ihmut soh ngui ngui jengun; ahung lipdoh phat’un Jesu loupina le akoma ding te ni chu amu’ve.
Luk 9:33 Mose le Elijah chun Jesu adalhah pet lhonin Peterin Jesu jah a, “Pipu, hikoma i-umu hi anom’e, Nang ding khat, Mose ding khat chule Elijah ding khat lhambuh thum song ung kate,” tin ipi aseilam helouvin aseiye.
Luk 9:34 Aman hiche aseipet chun meilhang khat’in ahinle khu’vin, meilhang lah a akitol lut jengu chun akichauve.
Luk 9:35 Meilhang lah a konin ogin khat hin, “Hiche hi kadei lhen Ka-Chapa ahi, asei ngaiyun,” ati.
Luk 9:36 Ogin kichai phat’in Jesu chu achangseh ahitai. Seijuiten athilmu hi hichepet hin koimacha seipeh louvin a-im chah kheh-uve.
Luk 9:37 Ajing nikhoa molchunga kona ahung kumsuh leh mi tamtah-in analamdot’uve.
Luk 9:38 Mipi lah a konin mi khat ahung pengjah-in, “Houhil, lungset’in kachapa neivetpeh-in, chapa chang khatseh a kanei ahin,
Luk 9:39 lhagao khat’in amatji teng phot lot louyin apengjah jin, aveilhuh teng chilphon alhan, lhalel lel’in alha jin, ama la abeipai ding ahijitai.
Luk 9:40 Naseijuiten eideldoh peh diuva ka-ngeh vangin anodoh joupouve,” ati.
Luk 9:41 Jesun adonbut’in, “Vo, tahsanna bei khang lamvai mite! Itih chan ka-umpia kakho ngai ding nahiuvem? Nachapa chu hikom’ah hinpuiyin,” ati.
Luk 9:42 Ahungpet tah-in thilhan aheh lhun avei ngoi jenge. Hichun Jesun lhagaoboh chu haphon aphoh-in, chapangpa chu aboldamin, apa koma anungsol peh tai.
Luk 9:43 Mihon Pathen Thahat chungnung chu ki-dang asalheh jenguve. Jesun athi ding asei masah kit Mihon athilbol kidang asah laitah-un Jesun aseijuite jah a,
Luk 9:44 “Hicheng thu ho hi nang ho dia kisei ahi, lung nachangin ngaiyun; Mihem Chapa hi mihemte khut’a pehdoh a um ding ahi,” ati.
Luk 9:45 Seijuiten asei chu ahechenpouve, ipi kiseina ahi ahetdoh louna diuva kiselpeh ahin; athusei doh chet ding la akichauvin ahi.
Luk 9:46 Seijuite lah a alenpen ding thua kinelna asohtai.
Luk 9:47 Jesun alung gil’uva akikal nau chu ahen, chapang khat akaiyin akoma atousah-e.
Luk 9:48 Chuin seijuite jah a, “Koi hijongle Keima min’a hiche chapang kisan chan chun Keima eisan ahin, Keima eisanga chun Eihinsolpa asan ahi; ajeh chu nalah-uva aneopen chu alenpena pang ding ahi,” ati.
Luk 9:49 Johnin adonbut’in, “Pipu, mi khat namin a thilha nodoh ka-mu’vin, keiho toh lhona nang najui loujeh-in kakhamtauve,” ati.
Luk 9:50 Jesun ajah a, “Kham dauvin, nadou lou pouvu chu nang ho lama pang ahi,” ati.
Luk 9:51 Jesu lah touva aumna ding phat anai jep jep phat’in Jerusalema che din akiheitai.
Luk 9:52 Jesun solle ho asol masan, amaho chu acheu-vin alhunna ding gonsa koipeh din Samaria miho kho khat’a alut’uve.
Luk 9:53 Samaria mihon Jesu chu Jerusalem jon a chego ahijeh-in asang tapouve.
Luk 9:54 Aseijuite ni Jacob le Johnin asandau hi amudoh lhon phat’in, “Pakai, vana kona meikou kakou lhah lhona kakahvamsah diu nadeiyem?” ati lhone.
Luk 9:55 Jesu akiheiyin amani chu haphon aphoh-e.
Luk 9:56 Chuin khodanga achetauve.
Luk 9:57 Alamjot laiyun pasal khat’in Jesu jah a, “Nache na chan a jui ing kate,” ati.
Luk 9:58 Jesun ajah a, “Gam-ui hon ko aneiyun, chunga leng vachaten jong bu aneiyui, Mihem Chapan vang alu ngapna ding mun jeng jong aneipoi,” ati.
Luk 9:59 Michom khat jah a jong, “Neijuiyin,” ati. Ahinla aman, “Pakai, amasan cheng ting kapa gavui ta dinge,” ati.
Luk 9:60 Jesun ajah a, “Mithi chu mithi kivui din dalhan lang, chen Pathen lenggam thu seiphongjon,” ati.
Luk 9:61 Midang khat’in jong, “Ken-vang najui jeng inge Pakai, ahin amasan ina umho ga-lha tadinge,” ati.
Luk 9:62 Jesun ajah a, “Loukai dia langkon tuhsa haidia kihei kit chu Pathen lenggam din aphachompoi,” ati.
Luk 10:1 Hiche nung hin Pakaiyin misom sagi le ni alhengdoh-in, che dia agotna khopi jouse le mun-tin’a ni nin asol masai.
Luk 10:2 Amisol ho jah a, “Chang-at ding atam lheh jengin, natong’ah alhome; chang-at ding mi ahinsol na din chang-atna Pakai henga taovun.
Luk 10:3 Cheuvin, ven, ngeihon lah a kelngoinoute kilhalut banga kasol nahiuve.
Luk 10:4 Sumbom hihen sakhao hileh kengchot ho geiyin kiken dauvin, lampi dunga jong koima salam bol dauvin.
Luk 10:5 Nalut nau in tin’a amasan, “Hiche in’a hin lung mon leng hen,” tiuvin.
Luk 10:6 Hikoma chu chamna dei mi aum leh ama chunga chu nalungmonu chuntin, aumlou vangleh nahenguva hung kile kit ding ahi.
Luk 10:7 Hiche in’a chun pansauvin, amahon napen peh-u chu neuvin don’un, ajeh chu natong’an atohman asan lom ahi. In khat’a konin inchoma kichon-dauvin.
Luk 10:8 Khopi sung nalut’uva mihon nalamdot’u jongleh, na-anga aluiyu chu ne jengun;
Luk 10:9 chukoma adamlou ho boldamun, ajah-uvah, ‘Pathen lenggam chun nakomu ahinphatai,’ tin seipeh-un.
Luk 10:10 Khopi sung nalut’uva mihon nalamdot lou vangu leh akhosung lamlen dunga potdoh-un lang,
Luk 10:11 Imacha kitimatna inei louvu ahitai, nakhopi sung-uva leivui kakengphanguva beh geiya kathin lhah khum nahiuve; hijongleh Pathen lenggamin hilai ahinphatai, ti nahet diu ahi,’ tin seipeh-uvin.
Luk 10:12 Najah-uva kasei ahi, thupitan nikhoa chuche khopi thoh sanga Sodom khopi thoh oljo ding ahi.
Luk 10:13 “Ohe Chorazin khopi nada ahin, ohe Bethsaida khopi nada ahi! Ajeh chu nakhosunga na ki-tong thil kibol thahatna ho hi Tyre le Sidon a kibol hileh sot’a lung aheiyuva, vutvam kinu’va khaodip pon kisil’a tou diu ahitai.
Luk 10:14 Thupi tan ni leh nathoh diu sanga Tyre le Sidon thoh oljo ding ahi.
Luk 10:15 Capernaum nangma van geiya choisanga um ding nahim? Noimi-gama kikai lha ding nahibouve.
Luk 10:16 Koi hileh naseiyu ngaiya chun Kei seijong angai ahin, nang ho pamsea chun Keijong eipamse ahi; Keima eipamsea chun Eihin-solpa geiya apai ahitai,” ati.
Luk 10:17 Som sagi le ni ho chu kipah thanom tah-in ahung kile kit’uvin, “Pakai, Nangma min jal’in thilha ho geiyin kathu’va anung jenguve,” atiuve.
Luk 10:18 Jesun ajah-uvah, “Vana kona Satan kolphe banga hung lhasuh kamui.
Luk 10:19 Ven, gul ho le aipi ho chotphana thei, chule mel-mapa chunga thahat kapeh nahiu-vin, imachan nasuhset lou diu ahi.
Luk 10:20 Chule lhagao ho nathu’va anunjeh seh chun kipah hih-un, vana naminu akisutjeh-in joh kipah-uvin,” ati.
Luk 10:21 Hichepet chun Lhagao Thengin Jesu kipana adimin hijeh chun aman, “Hepa, van le lei Pakai; thil hicheng hi michingte le lungthim themte na-impeh a, milham ho hengjoh a naphondoh jeh-in kapah chai. Henge, Hepa hitia bol hi nadeilam ahiye.
Luk 10:22 “Thil ijakai ka-pan eipehdoh ahitai; Pa tilouvin Chapa ahepon, Chapa le Chapan aphondoh peh mi tilou koiman Pa ahepoi,” ati.
Luk 10:23 Jesu seijuite lama akiheiyin atumbeh-in, “Nang ho thilmu hi amu jouse vangpha ahiuve.
Luk 10:24 Kasei-peh nahiuve, nathilmuu hi Themgao tamtah le leng tamtah-in mu atup lheh vangun amupha tapouvin, jah ding adei lheh vangun najah tobangu ajapha tapouve,” ati.
Luk 10:25 Jesu patepna din Danthu themho khat adingdoh-in, “Houhil, tonsot kemlou hinna kanei theina dia ipi kabol ding ham?” atileh;
Luk 10:26 Jesun ajah a, “Danthua ipi kisun nasimdoh-em?” ati.
Luk 10:27 Aman adonbut’in, “Nang-man nalungthim pumpi le nahinkho pumpi, nathahat pumpi le nalung-gil pumpia Pakai na-Pathen na-ngailut’a chule nangma naki-ngailut banga naheng nakom na-ngailut ding ahi akiti,” ati.
Luk 10:28 Jesun ajah a, “Nadonbut dih lheh-e, hiti chun bol le chun nahin ding ahi,” ati.
Luk 10:29 Ama them akichan nomjeh-in Jesu jah a, “Kaheng kakom chu koipen ham?” tin adonge.
Luk 10:30 Adon-butnan Jesun, “Pasal khat Jerusalema konin Jericho lama achesuh leh gucha michomho lah a avah lut’in, amahon aponsil ahoh lhau-vin, avouvin athibang bangin adalha tauve.
Luk 10:31 Hichepet tah hin Thempu khat’in hiche lampi chu ahokhan, mipa chu amudoh phat’in lamchom langa apeldoh tai.
Luk 10:32 Hitobang hin Levi mi khat man hikom chu ahinjot pan, mipa chu amudoh phat’in lamchom lang khatma apeldoh kittai.
Luk 10:33 Ahin Samaria mi kholjin vah le khat’in ahintoh khan, amudoh phat’in alainatpi lheh jenge.
Luk 10:34 Mipa chu anailut’in amaha chengse atompeh-in, thao-twi le lengpitwi anun, atouna gan-cha chunga adomdoh-in, jinlhun in’a ahinpo lut’in ajentai.
Luk 10:35 Ajing nikhon denarii ni alan, jinlhun in-ngahpa apen, ‘Hichepa hi analim-bol’in, sum nasuh mangbe leh kahung kit teng sa-nange,’ ati.
Luk 10:36 Hicheng mi thum lah a hi gucha michomho lah a vah lutpa heng le kom chu koipen hinte natim?” atileh,
Luk 10:37 aman, “Ama hepi tah a bolpa chu,” ati. Jesun ajah a, “Nang jong chen lang chutin gabol tan,” ati.
Luk 10:38 Jesu le aseijuite akholjin nauva kho khat’a alut tauvin, Martha kiti numei khat’in a-in’ah alhunsah-e.
Luk 10:39 Ama hin sopi numei Mary kiti khat aneiyin, ama chu Pakai kengbul’a atouvin aseichan angai ngai jenge.
Luk 10:40 Martha vang atoh ding tamjeh-in thu ngai manin aumpon, ahungin, “Pakai, kasopi-nun kachangseh a na eitohsah hi khoh nasah lou ngap ham? Eiki-thopi din seipeh tang-em,” ati.
Luk 10:41 Pakaiyin Martha adonbut’in, “Martha, Martha, thil tampi ngai-toa lung gim nahi.
Luk 10:42 Khohsah ding thil khatseh bou ahin, Maryn aphalai akilhentan, kilahpeh kit louhel ding ahitai,” ati.
Luk 11:1 Munkhat’a Jesu ataovin, atao jouvin aseijuite khat’in ajah a, “Pakai, Johnin aseijuite taoje ahil bangin taoje neihil’un,” ati.
Luk 11:2 Jesun ajah-uvah, “Natao teng hitin seiyun: ‘Pa namin theng kijabol jing hen, Nalenggam hung lhung hen;
Luk 11:3 Niseh a kaneh diu anneh neipeuvin,
Luk 11:4 Eiba jouseu ka-ngaidam bangun Kachonsetnau jouse ngaidamin; Chonset lo na thei patepnaa neilhut hih-un,’ tiuvin,” ati.
Luk 11:5 Jesun ajah-uva, “Nang ho khatpenin jol neihen, ama chu jan khangkimin ahenga chehen lang ajah a, ‘Kajol, bat din changlhah pheng thum neipen.
Luk 11:6 Kajol kholjin khat ahung lhungin aneh dia a-ang a luipeh ding ima kaneipoi, ti hen;
Luk 11:7 aman insunga konin, ‘Neisu gim hih-in kot akikhah tan, kachate jong keijong jalkhuna kalumtauve, hung thouva nang ima pethei kahi-poi,’ ati.
Luk 11:8 Kaseipeh nahiuve, ajol ahijeh chun thouva ima peh ding go hih jeng jong leh, khatpan jummo tah a athum tun tun jeh chun thouvintin angaichat jat chu apeh tei ding ahi.
Luk 11:9 “Kaseipeh nahiuve, thumun namu diu ahi, kiuvun kihonpeh ding nahiuve;
Luk 11:10 ijeh-inem itile athum chan achangin, ahol’an amun, akiuva akihonpehji.
Luk 11:11 Nalah-uva mipa koipen nahiuvem achapan nga athum leh akhel’a gul pea;
Luk 11:12 ahtui athum teng aipi peding’ah?
Luk 11:13 Migiloutah nang hon bon thilpha pehje nahet’u leh ichan geiya pha-joa vana Pa Pathenin ahenga thumte Lhagao Theng apeh ding hitam!” ati.
Luk 11:14 Jesun thilhavop paomo khat anodoh leh, thilha apotdoh phat’in paomopa chu apao theiyin, mipin kidang asalheh jengui.
Luk 11:15 Mi pha-bep’in vang, “Thilha ho nodohna dinga thilha lengpa Beelzebul’in tha apeh hibouva hi,” atiuve.
Luk 11:16 Konkhat man apatepnan vana kona melchihna avetsah diuvin a-ngeh-ui.
Luk 11:17 Alung gel’u ahen Jesun ajah-uvah, “Lenggam kikhentel’a ama le ama kidouva chu amangthah jin, insung kikhen-tel jong alhujin ahi.
Luk 11:18 Satan jong kikhentel hen kidouto leh alenggam iti dinjou ding ham? Beelzebul kamanchah a thilha ho nodoh a neisei jeh-uva kasei ahi.
Luk 11:19 Ken thilha ho nodohna dia Beetzebul kamanchah leh nachateuvin koiba amanchah jiu ham? Hijeh a chu nachateuvin themmo nachan diu ahi.
Luk 11:20 Thilha ho nodohna dinga Pathen khutjung kaman ahivang-leh Pathen lenggam nalah-uva hung lhung ahitai.
Luk 11:21 Mihat’in manchah akipat’a a-in aki-nga laisen anei chengse ahoiye;
Luk 11:22 mihatjon abulua ajotho teng vangleh akisonna galvon alahpeh jin, athil ho achompeh-in ahomjaljitai.
Luk 11:23 Koi hile Keilama pang lou chu eidouvah ahin, eikhop khompi lou chu athecheh ahiye.
Luk 11:24 “Lhagaoboh chu mihem sunga kona apotdoh tengleh twi beina muntin’a avah len, choldo mun aholjie. Mun amu lou teng leh, ‘Kahung potdohna ka-in’a chun kile kit tange,’ atiji.
Luk 11:25 Ahung leh akitheh ngima akigontoh amui.
Luk 11:26 Chuin achen ama sanga gilou cheh lhagao sagi agapuiyin, mipa sunga chun alut’un achengtauve; chutah chun mipa um chan hi amasaa sangin akhoh cheh jon ahi,” ati.
Luk 11:27 Jesun hiche hi asei nalaiyin, mipi lah a pangin numei khat’in ahinsamin, “Navop’a noitwiya navahdoh numei chu anun nom’e,” ati.
Luk 11:28 Jesun vang, “Pathen Thupha ngaiya nit ho chu anun nomjoi,” ati.
Luk 11:29 Mipi ahung kikhopsoh phat’un Jesun, “Hiche khang hi khang gilou ahi, melchihna ahol vangun Jonah melchihna tilou adang kipe louhel ding ahi.
Luk 11:30 Jonah Nineveh kho mite dia melchihna ahibanga, Mihem Chapa hiche khanga dia melchihna pang ding ahi.
Luk 11:31 Lhang gam lengnu chu hiche khang mite toh hung thoudoh khoma thupi tannaa amaho themmo achansah ding ahi; ijeh-inem itile ama chu leiset kolmonga konin Solomon chih thu ngai din ahungin, ahinla ven, Solomon sanga loupijo khat hikoma aume.
Luk 11:32 Nineveh kho mite chu hiche khang mite toh hung thoudoh khoma thupi tannaa hiche khang mite hi themmo achansah diu ahi; ajeh chu amahon Jonah thusei phongin lung aheiyuve; ahinla ven, Jonah sanga loupijo khat hikoma aume.
Luk 11:33 “Koiman mei avah-in ning chong muthim’ah akoi ngaipon, lo jong akhu khum ngaipoi; ahung lut chan muthei din meivah khom chunga atungji bouve.
Luk 11:34 Namit hi natahsa meivah ahin, namit achim laisen natahsa pumpi avah-in, achim lou teng natipumpi athimjitai.
Luk 11:35 Nasunga um vah chu thim am vephan.
Luk 11:36 Athimkom beihel’a natahsa pumpi avah leh meivah vah tah-in nasalvah banga apumpia vah jeng ding ahi.
Luk 11:37 “Jesun thu asei chai phat’in Pharisee khat hin an nehpi din akouve; ama achen ankong aum-tai.
Luk 11:38 Ahin an neh kona akisil lou chu Phariseepan adatmo lheh-e. ,
Luk 11:39 Pakaiyin ajah a, “Tun ahile Pharisee nang hon khon le lheng apolam nasil ngim’un, nasungu la hunama lah le gitlou dimset ahi.
Luk 11:40 Lungthimbei ho,

apolam sempan asung lam jong asem hilou ham?

Luk 11:41 Hijeh chun asunga thil ho chu vaichate peuvin, chuteng ven, nang ho dia thil jouse theng ding ahi.
Luk 11:42 “Ohe, tun vang Pharisee nadau ahi! Nang hon pudina le louna kha geiyin, anche louhing jousea soma khat napeuvin, thu adih-in natanpouvin, Pathen ngailut ding nadonpouve. Adang ho nabol’u toh kitoh a hiche te ni jong nabol diu ahi.
Luk 11:43 “Ohe Pharisee ho ada nahiuve! Nang hon Houthua kikhopna indunga touna pha pha nalheng-un, kailhanga min nasalam diu nadeiyui.
Luk 11:44 Ohe ada nahiuve! Hechen louva mihon achotpeh peh buikhuh ho tobang nahitauve,” ati.
Luk 11:45 “Danthu them ho khat’in adonbut’in, “Houhil, hiche naseiho hin keiho nei-engkal’uve,” ati.
Luk 11:46 Jesun, “Ohe, Danthu them nang ho jong ada nahiuve; Poh jouhoi hilou pohgih hahsa mi nagonpeh-un, nang hon nakhut muh jenga jong khoiloh din nagopouve.
Luk 11:47 Ohe nadau ahi! Napu napateuvin Themgao ho athat’un, nang hon alhanu nasempeh-ui.
Luk 11:48 Napu napateu thilbol chgngse chu phatsah a ahettohsah nahiuvin, amaho athat’a pang’a nang hon alhan nasempeh-u ahi.
Luk 11:49 Hijeh chun Pathen chihnan aseiyin, ‘Keiman nalah-uva Themgao ho le solle ho kasol ding, hiche ho chu abang bang athauva, adang abol hesoh diu ahi,’ ati.
Luk 11:50 Hichu vannoi kisemtil’a pat Themgao ho thisan kiso jouse hiche khang mite chunga hi,
Luk 11:51 Abel thisana pat, maicham le muntheng kah a Zechariah thisan kiso geiya phu lahna ding ahi. Henge, kaseipeh nahiuve, hiche khanga hi aphu kila ding ahi.
Luk 11:52 “Ohe Danthu themho nadau ahi! Hetna kot-heh nala mangun, nang ho geiyin nalut pouvin, lut kigo ho jong nalutsah pouve,” ati.
Luk 11:53 Jesu chukoma kona apotdoh phat’in Danthu them ho le Pharisee ho alung himo lheh jengun thu tampi adong lhoiyun,
Luk 11:54 athuseiya mat din achang lhigeh jenguvin ahi.
Luk 12:1 Mi asang sang akikhop’a khat’in khat chunga lam ajot leu phat’un amasan Jesun aseijuite jah a aseiyin, “Pharisee ho phat lhemna chol lah a kiging phauvin.
Luk 12:2 Hodoh lou dia kikhu khum aumpon, hetdoh lou dia kiselguh jong aumpoi;
Luk 12:3 ajeh chu muthima naseiyu khovah a kija ding, indan sung nunga mi nabenga naseiyu chu intingvuma kisap tho ding ahi.
Luk 12:4 “Kagol kapai nang ho jah a kasei ahi, tahsa that theiya abana ima bol thei louho kicha hih hel’un.
Luk 12:5 Gin ding pentah vetsah unge: mi that’a da muna lelutna tha neiya Pathen bou gingun. Henge, kasei-peh nahiuve, Amabou ginguvin!
Luk 12:6 “Vasah nga khu paisa ni man a kijohji lou ham? Ahin alah-uva khat jeng cha jong Pathen ang’ah suhmil’in aumpoi.
Luk 12:7 Nalu chunguva nasamjang jouseu geiya simtohsa kikoi ahi; kicha hih-un, vasah tampi sanga jong nang ho manlujo nahiuve.
Luk 12:8 “Kaseipeh nahiuve, koi hi le mihem angsunga Keima eiphongdoh chan chu Mihem Chapan jong Pathen Vantilte angsunga aphondoh ding ahi.
Luk 12:9 Koi hi le mihem angsunga eiseileppa chu Pathen Vantilte angsunga seilep’a um ding ahi.
Luk 12:10 Koi hi le Mihem Chapa douna thusei chu ngaidam chang ding, Lhagao Theng taitom vang chu ngaidam chang louhel ding ahi.
Luk 12:11 Mihon Houthua kikhopna in dung le vaibol ho angsung, chule thunei ho angsunga nakailut tengu leh iti nakihon’a ipi nasei diu lungkham hih-un,
Luk 12:12 ipipen nasei diu apettah leh Lhagao Theng-in nahil nauvinte.” ati.
Luk 12:13 Mipi lah a konin mi khat’in Jesu jah a, “Houhil, kasopipan gou eikihoppi din seipeh-in,” ati.
Luk 12:14 Jesun ajah a, “Jol, nangni chunga thutan ding le thil hoppeh dia kon eitun beh em?” ati.
Luk 12:15 Jesun ajah-uvah, “Chingtheiyun neipap kiloset’a konin kikangseu-vin, ajeh chu nei le gou bulhin jeh a mihem hing’ah ahidehpoi,” ati.
Luk 12:16 Aman thulem khat aseiyin, “Mihao khat louva neh le chah apung lheh-in,
Luk 12:17 hijeh chun aman, ‘Ipi kabol ding ham? Kalhosoh kholna ding mun a-ong tapoi,’ atin,
Luk 12:18 ‘Hitin bol inge, kachangsal ho phe lhang ting asanga lencheh sange; hikoma kasuhlou chang jouse leh thil dang jouse koi-tange;
Luk 12:19 chutengleh, “Kahinkho, kum tamtah neh ding thil lhing-set’in nakholsoh tai, choldon, ‘nen, donin nomsa tah-in um tan,” tinge,’ ati.
Luk 12:20 Ahinla Pathenin ajah a, ‘Mi-ngol, tujan teng nahinkho kisubei ding ahitai, hichea kholsa thil jouse hi koi chang ding hitam?’ ati.
Luk 12:21 “Hitobang mi hi ama chang dia gou khol’a Pathen lama hao-lou ahi,” ati.
Luk 12:22 Jesun seijuite jah a, “Hichejeh a chu ipi naneh-uva chule ipi nasil’uva nachen diu tahsa din lungkham hih-un kati ahi.
Luk 12:23 Hinkho hi neh le chah sanga thupijo ahin, tahsa jong nihchen ponsil sanga thupijo ahi.
Luk 12:24 va-ahte khu gel’un; muchi la atupouvin, atjong a-at pouvin, akholna ding in hihen changsal hijongle aneipouve; ahin-la Pathenin avah nauve. Nang ho vachate sanga thupijo nahiuve.
Luk 12:25 Nang ho koipen hin lungkham hat vanga ahinkho tong chan ajopbe theiyem?
Luk 12:26 Chutia aneopen bon nabol thei louvu leh, thil dang dia iti lungkham nahiuvem?