Luk : i-lah-uva hung guilhung chengse sutdohna mi tamtah-in abol pan banguvin

Luk 22:30 ka-lenggama kadokhang chunga naneh-uva nadon theina diu, chule laltounaa natouvuva Israel phung som le ni thutan a napan theina diu kapeh nahitauve.
Luk 22:31 “Simon, Simon, ven Satanin changsi kijap mang banga jap mang din nathum’uvin,
Luk 22:32 Keiman natahsan lhahdah louna din katao-peh jinge. Nahung kile kit teng nasopite tilkhouva napan ding ahi,” ati.
Luk 22:33 Peterin ajah a, “Pakai, nang to songkul lut ding hihen thi ding hijongle kigosa kahi,” ati.
Luk 22:34 Jesun, “Kaseipeh nahi Peter, nangman neihet hi thumvei neiseilep masanga tunia ah khong lou ding ahi,” ati.
Luk 22:35 Jesun ajah-uva, “Keiman sumbom le sakhao ahiloule kengchot beiya kasol’uva chu nalhah-sam nau um am?” atileh; amahon, “Ima aumpoi,” atiuve.
Luk 22:36 Jesun ajah-uva, “Tunvang sumbom neiyan kigot hen, sakhao neiyan jong kiken hen, chule chemjam neiloupan jong asang-khol chol joh hen lang kichoh hen.
Luk 22:37 Kaseipeh nahiuve, ‘Ama dan nit louho toh akisimthatai,’ tia Pathen lekhabua kisun chu Kei chunga guilhung ding ahi; ajeh chu ka-chung chang thu hi aban bana guilhung’ah ahitai,” ati.
Luk 22:38 Amahon, “Ven, Pakai, hikoma chemjam ni aum nai,” atiuve. Hichun ajah-uva, “Aphaset nai,” ati.
Luk 22:39 Jesu apotdoh-in achonna ngai bangin Olive mol’a acheleh suijuiten ajuiyui.
Luk 22:40 Amun aphah phat’in ajah-uva, “Lhep’a nalhah louna diuvin taovun,” ati.
Luk 22:41 Ama akom’uva konin song sephahna bep geiyin ache chonin, boh khup’in ataovin,
Luk 22:42 “Hepa, nalung ahileh hiche khon hi Keiya konin chon mang tan, amavang Kei dei hilouvin Nangma deijoh kibol hen,” ati.
Luk 22:43 Hichun van’a konin Vantil khat ahung kilah-in thahat ahungpei.
Luk 22:44 Nasa asa beh-seh jengin gunchu cheh a atao leh, a-ul thisan bangin tol’a ava chet chut’e.
Luk 22:45 Taonaa kipatdoh a seijuite henga ahung leh alung gim behseh jeh-un ana-ihmu gamtauve.
Luk 22:46 Hijeh chun Jesun ajah-uva, “Ibol’a moh ihmut nahiuvem? lhep’a nalhah louna dingun thouvin tao vun,” ati.
Luk 22:47 Jesun thu asei nalaiyin ven, mihonpi ahung kijot’uvin som le ni lah a Judas kitipa chu ahung lamkaiye. Judas hin Jesu ahin nailut’in chop din agoi.
Luk 22:48 Jesun ajah a, “Judas, Mihem Chapa hi chop’a mi napehdoh ahi-ong?” ati.
Luk 22:49 Thilsoh hi anungjui hon amudoh phat’un, Pakai, kachem-jama kasat diu hitam?” tin adong-ui,
Luk 22:50 Alah-uva khat’in Thempu chungnungpa sohpa asat jengleh abilkol jetlam asat lhai.
Luk 22:51 Chutah chun Jesun, “Ngan, bolbe dan!” atin, mipa bilkol chu ajop’in aboldame.
Luk 22:52 Aman dinga hungkon Thempu pipu ho Houin ngah sepai lamkaiho chule upaho jah a Jesun, “Gucha michom man ding banga chemjam le moltum thoa hungkon nahiuvem?
Luk 22:53 Niseh a Houin a nang ho toh ka-um khom laiyin la khatchan jong kachunga khut lha din neigo pou-vin. Amavang nang ho phat hiya, muthim vaihom hita hi la!” ati.
Luk 22:54 Mihon Jesu aman’un Thempu chungnung in’a akailut tauve. Peterin gal-kanga ajuipeh-e.
Luk 22:55 Mihon thutanna in leitol lailunga mei tih-a atoukhom nauvah Peter jong alah-uva atouve.
Luk 22:56 Meivahnaa Peter tou chu soh numei khat’in amun, ave changmel’in, “Hichepa jong hi Ama toh kiloisa ahi,” ati
Luk 22:57 Ahinla Peterin aseilep’in amanu jah a, “Numei, naseipa chu kahepoi,” ati.
Luk 22:58 Phat chom khat jouvin pasal khat’in amun, “Nang jong hiche holoi khat nahibouve,” ati. Peterin, “Pasal, nasei chu kahipoi,” ati.
Luk 22:59 Nidan khat tobang nungin pasal khat man tah titenin, “Adih monga hichepa hi Amatoh kiloisa ahibouve, ajeh chu ama hi Galilee gam mi ahimonge,” ati changmel’e.
Luk 22:60 Ahivangin Peter chun, “Ipi nasei ham kahe hih hel’e,” ati nalaiyin ah ahung khong pai jenge.
Luk 22:61 Pakai kiheiya Peter agah vet leh, “Tunia ah khon masanga thumvei neiseilep ding ahi,” tia Pakaiyin ajah a aseipeh masah chu Peterin ageldoh tai.
Luk 22:62 Hijeh chun apotdoh-in lhase tah-in akaptai.
Luk 22:63 Jesu chinga pang atuh hon totnan aneiyun avotauve.
Luk 22:64 Ponin amai atomun, “Koiham navo’ah? Gaovin seidoh temin?” tin adong-ui.
Luk 22:65 Chule Ama gotnan tampin ataitom’uve.
Luk 22:66 Jingkah khovah lhah-in mipi loi upaho, Thempu pipu ho leh Danthu them chengse akikhom’un Jesu chu Hou vaipoloi kikhop na akailut’un,
Luk 22:67 “Nangma Messiah chu nahi mong em neiseipeh-un?” tin adongui. Aman ajah-uva, “Seipeh jong leng tahsan pouvin natin,
Luk 22:68 chule ima dong jong leng neidon-but lou diu ahi.
Luk 22:69 Tua pat’a vang Mihem Chapa hi tha neipen Pathen jetlama kitousah ding ahitai,” ati.
Luk 22:70 Abonchauvin, “Achutile Pathen Chapa nahi ong?” atiuleh; aman ajah-uva, “Nang hon hichu ahi neitiuve,” ati.
Luk 22:71 Amahon, “Hettohsah dang ipi ding iti nah lai diu ham? Eihon Ama kamsung monga kona kija cheh ta chu!” atiuve.
Luk 23:1 Mipi abonchauvin akipatdoh-un Jesu chu Pilate henga akailut tauve.
Luk 23:2 Hichun ahehse pantauvin, “Hichepa hin Kanam miteu apui chavaiyin, Caesar henga kai peh ding akhah-in, chule, ‘Kei hi Messiah kiti Leng chu kahi,’ tia asei kamandoh-uve,” atiuve.
Luk 23:3 Pilate’n adongin, “Nangma Judate Leng nahim?” atileh; aman adonbut’in ajah a, “Nangsei ahi,” ati.
Luk 23:4 Pilate’n Thempu pipu ho le mipi jah a, “Hichepa chunga themmona ima kamudoh poi,” atileh;
Luk 23:5 amaho akitilse cheh-un, “Aman mipi atilsen, Judea gam pumpia ahil len, Galilee gama ahinpat’a tua hilai ahinphah ahi,” atiuve.
Luk 23:6 Aseiyu hi Pilate’n ajah phat’in Jesu chu Galilee gam mi ahile ahilou adong chenin,
Luk 23:7 ahetdoh-a Jesu chu Herod thu neina gamsung mi ahi aphot chet phat’in, Herod jong chupet’a Jerusalem khopia um ahijeh-in, Herod henga agahsol touve.
Luk 23:8 Herod chun Jesu amu phat’in akipah lheh jenge; ajeh chu achung chang thu ajah a pat’a chu melchihna abol khat beh mu ding kinema ama mu ding atup jing ahiye.
Luk 23:9 Herod chun thu tampi adoh vangin Jesun imachan adonbutpoi.
Luk 23:10 Thempu pipu ho le Danthu themho adingun hot le mah tah-in ahehse se jengui.
Luk 23:11 Herod le asepaiten jong nahsahmo le tot nopnan aneiyun, pon loupi silpeh-in Pilate henga alesoltai.
Luk 23:12 Herod le Pilate chu masanga akidou jing lhon vangin, hiche nikho hin akihou theiyin thu khat akisa lhone.
Luk 23:13 Pilate’n Thempu pipu ho le vaipo ho chule mipi abonchan akoukhomin,
Luk 23:14 ajah-uvah, “Hichepa hi mipi puise dol’a kahenga nahin kailut’u ahin, na-ang sung laitah-uva athem amo kakhol’in, nahehset nau thudol’a hin imacha amo na kamudohpoi;
Luk 23:15 Herod jengin jong amudoh loujeh a kahenguva ahin lesol kit ahitai. Aman thina thei ima abolsepoi.
Luk 23:16 Hijeh chun ama hi jep ing ting lhadoh tange,” ati.
Luk 23:17 ‘(Hiche kut phat hileh Pilate chun sohchang khat alhadoh pehji ahi).
Luk 23:18 Ahinla mipin, “Hichepa hi that’in lang Barabbas joh neilhadoh peh-un,” tin kitoh tah-in asam-tauve.
Luk 23:19 Barabbas hi khopi sung kivaipoh deimoa galbol’a pang, mi that, songkul’a ahen’u ahi.
Luk 23:20 Pilate’n Jesu alhadoh nom thu chu mipi jah a agah sap kit leh,
Luk 23:21 amahon, “Ama chu thingpel’a khenbeh-in, thingpel’a khenbeh-in,” tin alesap tauve.
Luk 23:22 Thumvei chan nan Pilate’n ajah-uva, “Ibol’inem? Ipi thilse abol’em? Athina thei achunga imacha thepmona kamudohpoi. Hijeh chun jep ing ting lhadoh tange,” ati.
Luk 23:23 Ahinla mihon Jesu chu thingpel’a khetbeh teina dia a-obem bem’a asap jengu leh amoh hoh lhah thotauve.
Luk 23:24 Pilate’n angeh banguva bolpeh din thu alhuhsah tai.
Luk 23:25 Kivaipoh deimo jeh a galbol, mithat, songkul’a kihen, athumpau chu alhadoh peh-in, Jesu vang chu a-ngeh banguvin apedoh tan ahi.
Luk 23:26 Jesu akaimangu chun gamlah a hungkon Cyrene gam mi Simon chu achamlouvia aman’un achunga thingpgl chu angam’un Jesu nung juiya putsah din agouve.
Luk 23:27 Mihon tampi Jesu nunga akitol’un, numeihon jong lhase tah-in adip alai akidop’un ajuiyui.
Luk 23:28 Amaho lam ngan Jesu akiheiyin, “Jerusalem chanute Keima neika hih-un, nang ho le nachateu din kap jo’uvin,
Luk 23:29 ajeh chu, ‘Cha neilou aching le naovop khalou naobu, chule nao kivahna khah lou noi anun nom’e,’ tia kiseina phat khat hung ding ahi.
Luk 23:30 Chuteng mihon molsang ho jah a, ‘Neikhu khum’un,’ atiuva, thinglhang ho jah a, ‘Neile khu’vin,’ ati diu ahi;
Luk 23:31 ajeh chu thing hing bon hitia abol’u leh thing go i-aloda diu ham?” ati.
Luk 23:32 Thilse bol mi ni Jesu toh tha khom din apuiyui.
Luk 23:33 “Lugu mun” kiti lai ahinphah phat’un Jesu chu thingpel’a akhenbeh-un, thilse bolte ni jong chu khat ajet lam, khat aveilama akhenbeh tauve.
Luk 23:34 Jesun, “Pa, amaho hi ngaidamin, ajeh chu ipi abol’u ahepouve,” ati. Jesu ponsil chengse chu vang asan’un amaho akihomtauve.
Luk 23:35 Mipi ading hon ave cheh-ui. Vai-pohon vang anelpeh-un, “Midang ahuhhingji me, Pathen lhentum Messiah ahileh Ama kihuhhing hen,” atiuve.
Luk 23:36 Sepaihon jong totnan anei-yun, ahungun juthuh apeuvin,
Luk 23:37 “Judate Lengpa nahileh nangma kihuhhingin,” atiuve.
Luk 23:38 Achung vuma chun, “HICHEPA HI JUDATE LENGPA AHI,” tia kijih akitah-e.
Luk 23:39 Chukoma kikhenbeh thilse bolkhatpan Jesu eng hounan atai-tom panin, “Messiah nahilou ham? Nangma kihuhhingin lang keini jong neihuhhing lhon tang,” ati.
Luk 23:40 Khatpan adonbut’in haphon aphoh-in, “Pathen geiya nagin lou hitam? Talen khat man cheh a?
Luk 23:41 Eini hin dih tah a i-thoh ahi; ajeh chu i-tohman ikisan lhon ahibouve, Aman vang thilse imacha abolpoi,” ati.
Luk 23:42 Chujongle aman, “Jesu Leng-a nahung teng neisumil loujenin,” ati.
Luk 23:43 Jesun ajah a, “Tahbeh a kaseipeh nahi, tunia Keitoh chol-dona gam noma i-umkhom ding ahi,” ati.
Luk 23:44 Sunkim nidan som le ni a pat nilhah lam nidan thum geiyin leiset pumpi chunga mu athimtan,
Luk 23:45 nisa jong avah tapoi; Houin pondal len chu akimlai tah a kehni akisotai.
Luk 23:46 Hichun Jesu oging tah-in apengin, “Pa, nakhut’ah ka-lhagao kapei,” atin, asei jouvin atantai.
Luk 23:47 Thilsoh chengse hi sepai jalamkaipan amusoh phat’in, Pathen avahchoiyin, “Hichepa hi midih mong ahibouve,” ati.
Luk 23:48 Chutobang vetchah vedia hung kikhom mipin thilsoh chengse amusoh keiyun, adip alai kidop’in ahung kile tauve.
Luk 23:49 Jesu hesa chengse le Galilee gama pat ahin lhonpi numeihon thilsoh hichengse hi gal-kanga dingin ave jingui.
Luk 23:50 Ven, amin Joseph kiti, mipha, midih, vaipo khat aumin,
Luk 23:51 ama hi Judea gama Arimathea kiti kholen thim khat’a hung kon, Pathen lenggam ngah jinga um, miho thilbol le angaitou chu jop lou ahi.
Luk 23:52 Ama hi Pilate henga achen Jesu long agathume.
Luk 23:53 Chuin Jesu long chu adomlhan, tupat pon nemin atomin, koima kivuina khah loulai, song kigeihoma kisem lhan sung khat’a alupsah tai.
Luk 23:54 Hiche nikho chu kigin ni ahin, Choldo ni anaitai.
Luk 23:55 Galilee gama pat Jesu toh hung khom numei hon ahinjuiyun, lhan chu amudoh-un along kijamna jong ahetauve.
Luk 23:56 Numei ho chu akile kit’un gim namtui le thao namtui akigot’uve. Choldo nin vang Danthupeh dungjuiyin akicholdo’uve.
Luk 24:1 Hapta kipat ni masa nin numeiho chu jingpi tah-in gim namtui asemsau chu choiyin lhan phunga ahunguve.
Luk 24:2 Lhankot sin song tahdohsan ahung toh khau-vin,
Luk 24:3 asung alut phat’un la Pakai Jesu long amu tapouve.
Luk 24:4 Amu loujeh-uva alungdon pettah-un ponbang vamleh cheh kisil mi ni akom’uva ahung ding lhone.
Luk 24:5 Numeiho chu akicha behseh jengun tola amai asulut gamtauve; ahinla mi te nin ajah-uva, “Ibol’a mithi lah a mihing nahol’u ham?
Luk 24:6 Ama hikoma aum tapoi, athoudoh tai. Galilee gama alen laiya najah-uva asei chu geldoh-un,
Luk 24:7 ‘Mihem Chapa chu michonsete khut’a pehdoh a um ding ahi,’ tia asei chu” atilhone.
Luk 24:8 Hichun numeihon Jesu thusei ho ageldoh-un,
Luk 24:9 lhan phunga konin ahung kile kit’un thilsoh ijakai som le khat toh adang ho jah a aseitauve,
Luk 24:10 Numeiho chu Magdala khoa Mary le Joanna toh, Jacob nu Mary ahiuvin, numei dang ho toh thil ijakai solchah ho aseipeh tauve.
Luk 24:11 Athuseiyu chu mihon ngol hoi asauvin atahsan peh pouve.
Luk 24:12 Peter vang chu akipatdoh-in lhan lama alhaiyin, kun’a lhansung agahvet leh tupat ponnem ho tilou ima dang amupon, thilsoh chu adatmo lheh jengin inlama akile kittai.
Luk 24:13 Hiche nikho ma chun ven, Jerusalema kona kilometre som tobangbep gamla Emmaus kiti kho jonin seijuiho lah mi ni ache lhonin,
Luk 24:14 thilsoh thudol chu akihou-limpeh lhone.
Luk 24:15 Hitia akihoulim lhona athudol asei pet tah lhonin Jesun anailut’in amani chutoh alhon-tai.
Luk 24:16 Ahinla Ama chu ahetdoh lhon louna din amit lhon akiphel’e.
Luk 24:17 Jesun ajah lhona, “Nalamjot puma nakihou lhon hi ipi thu nasei lhon ham?” atileh; ading lhonin a-ngui chet lhone.
Luk 24:18 Amani kah a Cleopas kitipa chun adonbut’in, “Jerusalema khol-jina tulaiya thilsoh umchan helou nangma bou nahiye ong?” atileh;
Luk 24:19 Aman ajah lhona, “Ipi thu soh tam?” ati. Amanin ajah a, “Pathen le mipi maiya thusei le thilbol’a thanei tah, Nazareth khoa Themgao Jesu thudol ahin,
Luk 24:20 Ama chu ka-thempu piputeu le vaipoloiyin tha din apedoh-un thingpel’a akhenbeh tauve.
Luk 24:21 Keihon Ama chu Israelte jalensah dinga kakineppiu ahin, chuleh thil hicheng sokal hi nithum alhingtai.
Luk 24:22 Kaloi lah-uva numei phabepman eilung jinsah uve. Jingpi tah a lhan lama acheuleh,
Luk 24:23 Jesu long agaholmouvin, ahungun mu aneiyuva Vantil nin ajah-uva Jesu hindoh thu asei lhon thu aseiyuve.
Luk 24:24 Keiho lah a abangma lhan lama acheuleh numeiho sei bang chun agatoh-un, Jesu chu agamutapouve,” ati lhone.
Luk 24:25 Aman ajah Ihona, “Mi-ngol, Themgao ho thusei jouse tahsan ding lungtah loi!
Luk 24:26 Messiah chun aloupina alut masanga gim genthei hicheng chu athoh ding mong hilou ham?” ati.
Luk 24:27 Hichun Mose le Themgao hoa pat’in Pathen lekhabua Ama thudol kisutna mun jouse ajah lhona ahilchentai.
Luk 24:28 Ajotna lhon kho ahung nai phat’in Jesu chepai ding bangin akigon;
Luk 24:29 amanin tha khat’a lhun khompi dingin atem lhonin, “Nilhah kon ahitan, nisa jong lhumpai ding ahitai,” ati lhon leh; Ama jong lhung khom din akijot lut tauve.
Luk 24:30 Ankon

g aum phat’un Aman changlhah alan athangvah-in, aheh-bal’in amani apei.

Luk 24:31 Chuin amit lhon akikeodoh tan ahedoh lhontai; hichun amit lhona konin amangtai.
Luk 24:32 Amani khat’in khat jah a, “Lampi dunga eikihoulimpi lhona Pathen thu eihil chen lhona chu i-lung lhon soulah lah jeng lou ham?” akiti lhonin ahi.
Luk 24:33 Amani akipatdoh jeng lhonin Jerusalema ahung kile kit lhon leh, som le khat toh aumpi chengseu anakikhop khomu atoh lhone.
Luk 24:34 Amahon jong Pakai athodoh monga Simon henga akilah thu ana-seiyui.
Luk 24:35 Seijuite nin jong lampi dunga thusoh le changlhah ahebal’a Ama ahetdoh lhon thudol ahetsah lhon’e.
Luk 24:36 Seijuite thilsoh hicheng thudol hi akihoulim pettah-uvin Jesu alah-uva ahung dingin ajah-uva, “Nachunguva cham leng hen,” ati.
Luk 24:37 Amahola” kindot’in akichau-vin, lhadam mudanin akigel’uve.
Luk 24:38 Aman ajah-uva, “Ibol’a hitobanga lung noh phah a, nalung sunguva ginchat lelna hijat naneiyu ham?
Luk 24:39 Kakhut te ni le kakeng te ni veu-vin, Keima mong kahinai. Neitham-un lang neiveuvin, Keiman Kanei bang hin lhadamin gu le phe anei-poi,” ati.
Luk 24:40 Hiche hi aseiyin amaho chu akhut te ni le akeng te ni avetsah tai.
Luk 24:41 Kidang asah-ule akipa behseh jeh-uvin atahsanje jong ahetapou-vin, Aman ajah-uva, “Neh ding ima nanei hih-um?” atileh;
Luk 24:42 amahon nga honsa them khat apeuve.
Luk 24:43 Aman akilah-in a-angsunguva anei.
Luk 24:44 Jesun ajah-uva, “Nalah-uva kalen laiya kaseipeh chengseu Mose Danthu le Themgao ho lekhabua chule Labua kachung chang kisun jouse guilhungsoh tei ding ahi,” ati.
Luk 24:45 Hichun aman Pathen lekhabu thu ahetchetna diuvin alunggil’u ahonpeh-in,
Luk 24:46 chule ajah-uvah, “Akisun chu, Messiah hin gim genthei athoh tei ding, thia nithum ni leh thinaa kona thoudoh kit ding,
Luk 24:47 Ama min’a chonset lung hei ding le chonset jouse ngaidamna ding Jerusalema pat chitin namtin lah a kiphongjal ding ahi.
Luk 24:48 Hi-chengse hi ahetoh nang ho nahiuve.
Luk 24:49 Chule ven, ka-Pa thutepsa chu kahinsolpeh diu ahitan, hijeh’a chu chunga kona thahat kahinsolpeh masangseuva hiche khopia hi naum diu ahi,” ati.
Luk 24:50 Jesun amaho chu Bethany khokeng geiyin apuidoh-in, akhut te ni adom sangin amaho phatthei aboh tai.
Luk 24:51 Phatthei aboh pettah hin akikhenpin, van’a lahtouvin aum-tai.
Luk 24:52 Amahon Ama chu chibai aboh-un kipah tah-in Jerusalema ahung kile kit’un, “chule aphat neisun’uvin Houin a aum’un Pathen avahchoi jing tauve.
Luk 24:53 chule aphat neisun’uvin Houin a aum’un Pathen avahchoi jing tauve.