Kobalt birləşmələri yaşıl rəngli CoO-i tozu və tünd qəhvəyi və ya qara rəngli Co2O3 tozu şəklində işlədilir. CoO-i şüşəni göy rəngə boyayan intensiv boyayıcı kimi məşhurdur. Kobaltla boyanma bişmə rejimindən, oksidləşdirici və bərpaedici şərtlərdən, həmçinin şixtada sulfat və nitratların miqdarından asılı deyildir. Boyanmanın intensivliyi CoO-nin miqdarından və şixtanın tərkibindən asılıdır. Kaliumlu şüşələrdə natriuma nisbətən daha intensiv göy rəng alınır. Kobalt birləşmələrini digər boyayıcılarla, məsələn, xrom və mis birləşmələri ilə birlikdə tətbiq etdikdə xoşagələn yaşımtıl mavidən, göyümtül-yaşıla qədər çalarlarda göy və yaşıl rəngli şüşə alınır. Kobalt birləşmələrini MnO2 ilə birlikdə tərkibə daxil etdikdə purpur, bənövşəyi və qara rənglərdə şüşə alınır. Kobalt fövqəladə intensiv boyayıcı olduğundan onu şixtaya çox az miqdarda daxil edirlər.
