Malta debates tal-kamra tad-deputati (Rapport Ufficjali u Rivedut)

MISTOQSIJIET GĦAL TWEĠIBIET BIL-MIKTUB

SIGURTA' SOĊJALI - KONTRIBUZZJONIJIET

W48. L-ONOR. SANDRO SCHEMBRI ADAMI staqsa lill-Ministru tal-Ħarsien Soċjali: Jista' l-Ministru jgħid jekk hemmx il-ħsieb li l-Gvern jemenda l-Liġi tas-Sigurta' Soċjali biex self-employed, li bħalissa qed jieħu pensjoni mnaqqsa għax meta kien marid ma kienx ħallas il-bolol kollha, jirregolarizza l-pożizzjoni tiegħu?
ONOR. EDWIN GRECH: Ninforma lill-Interpellant li huwa prinċipju bażiku ta' kull skema kontributorja li l-kontribuzzjonijiet dovuti jitħallsu qabel l-okkorenza tal-kontinġenza assigurta, jiġifieri, f'dan il-każ, qabel ma wieħed jilħaq l-eta' tal-pensjoni. Effettivament, l-Att dwar is-Sigurta' Soċjali (Kap 318) jesiġu li l-kontribuzzjonijiet, sew imħallsa u sew dawk akkreditati, jitqiesu sa l-eta' tal-pensjoni.
Jidher li l-Onor. Interpellant qed jirriferi għal każ meta persuna li taħdem għaliha nnifisha setgħet ma kenitx intitolata għal benefiċċju tal-mard u għaldaqstant lanqas għall-kontribuzzjonijiet akkreditati. Sussegwentement il-liġi ġiet ammendata, b'danakollu l-persuna li dwar il-każ tagħha qed jirriferi l-Onor. Interpellant, ġaladarba ma kenitx intitolata għall-kontribuzzjonijiet akkredidati, kienet obbligata tħallas il-kontribuzzjonijiet nieqsa qabel laħqet għalqet l-eta' tal-pensjoni. Fid-dawl ta' dawn iċ-ċirkostanzi mhux indikat li ssir xi emenda fuq il-linja ndikata.


AMBAXXATURI MALTIN

W49. L-ONOR. ĊENSU GALEA staqsa lill-Viċi Prim Ministru, Ministru għall-Affarijiet Barranin u Ambjent: Jista' l-Viċi Prim Ministru jagħti tagħrif dwar min huma d-diversi ambaxxaturi Maltin li bħalissa qed jaqdu d-doveri tagħhom bħala ambaxxaturi Maltin pajjiż, pajjiż? Liema huma dawk il-pajjiżi li kellhom l-ambaxxatur Malti għalihom mibdul wara l-elezzjoni li għaddiet? Liema ambaxxaturi oħra hu mistenni li jinbidlu matul iż-żmien li ġej? Kemm mill-ambaxxaturi preżenti qed iservu lil Malta għall-ewwel darba?
ONOR. GEORGE VELLA: L-Ambaxxaturi Maltin li fil-preżent għandhom il-ħatra biex jaġixxu ta' Rappreżentanti Prinċipali skond il-klawsola 111 tal-Kostituzzjoni ta' Malta huma:

Is-Sur Charles AQUILINA	Residenti f'Bonn, il- Ġermanja
Is-Sur George BUSUTTIL	Residenti f'Canberra, l-Awstralja
Is-Sur Victor CAMILLERI	Residenti fi Brussell, il-Belġju
Is-Sur Yves DEBARRO	Residenti fil-Kajr, l-Eġittu
Is-Sur George DOUBLESIN	Residenti fi Triplu, il-Libja
Is-Sur Emmanuel FARRUGIA	Se jkun residenti f'Riyadh, l-Arabja Sawdita
Is-Sur George SALIBA	Residenti f'Mosca, ir- Russja (li fi żmien qasir, imur bħala Rappreżentant Permanenti għall-Ġnus Magħquda fi New York)
Is-Sur Maurice ABELA	Residenti fi Vjenna, l-Awstrija
Dr. Michael BARTOLO	Rappreżentant Permanenti għall-Uffiċċju tal-Ġnus Magħquda f'Ginevra, l-Isvizzera u residenti hemmhekk
Dr. Albert BORG OLIVIER de PUGET	Residenti f'Washington, l-Amerka
Is-Sur Vincent CAMILLERI	Residenti f'Parigi, Franza
Is-Sur Henry DEGABRIELE	Residenti f'Ruma, l-Italja
Is-Sur Richard MATRENZA	Residenti f'Londra, l-Ingilterra
Is-Sur Francis MONTANARO MIFSUD	Ambaxxatur għall- Organizzazzjoni ta' l-ikel u Agrikoltura (Residenti f'Ruma)
Is-Sur Charles VELLA	Residenti f'Beijing, iċ-Cina
Is-Sur Alfred ZARB	Residenti f'Malta
Is-Sur Saviour BORG	Residenti f'Malta
Il-Professur David ATTARD	Residenti f'Malta
Dr Daniel MICALLEF	Residenti f'Malta
Dr John BUTTIGIEG	Residenti f'Malta