Malta dibattiti tal-kamra tad-deputati (Rapport Uffiċjali u Rivedut)

THE DEPUTY SPEAKER: L-Onor. David Agius, mistoqsija supplimentari.
ONOR. DAVID AGIUS: Sur President, naf li bħalissa għaddejja wkoll sistema min-naħa tad-Dipartiment jew l-Awtorità tad-Djar biex numru ta’ flats jinkrew mingħand il-privat u jittieħdu f’idejn il-Gvern biex ikunu jistgħu jitqassmu. Jista’ l-Ministru jagħtina ftit aktar informazzjoni dwar dan?
THE DEPUTY SPEAKER: Il-Ministru Said.
ONOR. CHRIS SAID: Nitlob lill-Onor. Agius biex jerġa’ jirrepeti l-aħħar parti tal-mistoqsija.
THE DEPUTY SPEAKER: L-Onor. David Agius.
ONOR. DAVID AGIUS: Jista’ l-Ministru jagħtina ftit informazzjoni dwar kif sejra l-iskema li l-Gvern nieda biex flats min-naħa tal-privat jgħaddu għand l-Awtorità tad-Djar, imbagħad mingħand l-Awtorità jgħaddu għand dawk li jkunu għamlu talba quddiem l-Awtorità tad-Djar?
THE DEPUTY SPEAKER: Il-Ministru.
ONOR. CHRIS SAID: Dik li qed jirriferi għaliha l-Onor. Interpellant hija waħda mill-iskemi li l-Awtorità tad-Djar ħarġet f’dawn l-aħħar xhur u fl-opinjoni tiegħi hija waħda mill-aktar skemi importanti. Din hija l-iskema msejħa “ l-Iskema Kiri” li permezz tagħha l-Awtorità tad-Djar minflok kompliet tibni hi għal dak li jissejjaħ social housing u allura tieħu aktar art, toħroġ fis-suq u tipprova tikri mingħand is-sidien privati. Din hija kirja ta’ għaxar snin b’ċerti kondizzjonijiet biex imbagħad meta l-Awtorità tikri mingħand dawn is-sidien privati tkun tista’ tgħaddihom lill-klijenti tagħha, lil dawk li għandha fuq il-lista li qed jitolbu l-għajnuna. Kien hemm sejħa li ħarġet darbtejn fil-Gazzetta tal-Gvern biex sidien privati li lesti jikru l-appartamenti tagħhom lill-Awtorità tad-Djar bil-kondizzjonijiet li ġew speċifikati, jersqu ‘l quddiem u joffru dawn l-appartamenti.

Irrid ngħid li ż-żewġ sejħiet kienu suċċess u kellna ‘l fuq minn 600 appartament li ġew offruti. Meta ħarġet l-ewwel skema kien hemm indikat li dawn l-appartamenti bilfors iridu jkunu finished minn kollox u bdew l-ispezzjonijiet min-naħa tal-uffiċjali tal-Awtorità biex jiġi assigurat li dawn l-appartamenti kienu up to standard skont l-ispeċifikazzjonijiet. Sussegwentement minbarra li jiġi regolat jekk humiex up to standard, ried jiġi determinat ukoll jekk il-kera li kienet qed tintalab kenitx waħda ġusta u allura kellek okkażjonijiet fejn is-sid intalab li jirrevedi l-kera. Din tiddependi, pereżempju, fuq il-lokazzjoni, f’liema sular ikun qiegħed l-appartament, kemm ikun kbir, jekk ikunx one, two jew three bedroom apartment u dettalji oħra. Il-kera fl-ebda każ ma setgħet taqbeż aktar minn €400 fix-xahar.

Wara li sar dan l-eżerċizzju li għadu għaddej kemm fuq l-ewwel parti kif ukoll fuq it-tieni parti, bdew jiġu ffirmati l-agreements mas-sidien u hemm numru ta’ agreements li diġà ġew iffirmati. Jekk m’iniex sejjer żball hemm madwar 150 agreement li ġew iffirmati mas-sidien. Malli jiġu ffirmati l-agreements dawn l-appartamenti jkunu għad-dispożizzjoni tal-Awtorità tad-Djar biex din tkun tista’ tużahom għall-aktar każijiet urġenti li għandha u fil-fatt dan il-proċess jinsab għaddej ukoll.

Rigward it-tieni sejħa li saret, l-appartamenti li ġew sottomessi mhux bilfors riedu jkunu finished u seta’ kien hemm ċertu xogħol li għadu nieqes. Ir-raġuni hi li kien hemm sidien li qalulna li kienu interessati imma ma kenux lesti li jagħmlu spejjeż biex jagħmlu x-xogħol jekk ma jkunux jafu li l-Awtorità se tieħu l-post. F’dak il-każ kien hemm indikazzjoni mill-Awtorità li se jittieħdu u ngħataw żmien sakemm ilestu x-xogħlijiet. Fil-verità kien hemm numru minnhom li diġà lestew ix-xogħlijiet ukoll u qegħdin jersqu għall-ftehim, għall-kuntratt ta’ kirja ta’ għaxar snin. Jidhrilna li din l-iskema għandha numru ta’ vantaġġi. L-ewwel ħaġa qed nutilizzaw parti mill-istock li mhuwiex utilizzat ta’ appartamenti li għandna madwar il-pajjiż. It-tieni, l-Awtorità m’għandhiex għalfejn tibni numru ta’ blokki oħra ta’ appartamenti ma’ dawk li diġà għandha u allura jiġi evitat iż-żmien, it-tendering, il-binja, però aktar minn hekk l-artijiet li fuqhom iridu jinbnew dawn l-appartamenti speċjalment meta nafu li l-art hija riżorsa skarsa ħafna f’pajjiżna.

Punt importanti ieħor hu li dawn l-appartamenti mhumiex qegħdin kollha fi blokka waħda jew f’numru ta’ blokok imma huma mifruxin madwar il-lokalitajiet kollha f’Malta u f’Għawdex u allura anke dawn il-persuni li għandhom bżonn is-social housing li ħafna drabi jkunu familji b’persuni vulnerabbli jew familji li għandhom ċerti problemi soċjali, mhumiex qed jitpoġġew kollha fl-istess blokk imma qed jiġu mifruxa u allura jkun hemm aktar ċans ta’ integrazzjoni mal-komunità li jkunu fiha. Aħna naraw li hemm numru ta’ vantaġġi permezz ta’ din l-iskema li qed taħdem tajjeb ħafna u qed tgħin ukoll minn kull lat lil dawn il-familji li qegħdin jieħdu dawn l-appartamenti.