EMERGENCY AMBULANCE RESPONDENT 10977. L-ONOR. FREDRICK AZZOPARDI staqsa lill-Ministru għall-Enerġija u s-Saħħa: Għar-rigward tas-sejħa għall-applikazzjoni għall-post ta' Emergency ambulance respondent, jista' l-Ministru jgħid:
a) Meta hemm il-ħsieb li jsiru l-intervisti biex issir l-għażla għal dan il-post;
b) Kemm kien in-numru ta' persuni li applikaw għal dan il-post;
c) Kemm hemm postijiet vakanti f'Malta; u
d) Hemmx postijiet vakanti f'Għawdex?
ONOR. KONRAD MIZZI:Ninsab infurmat li l-proċess beda u l-intervisti se jkunu qegħdin jibdew din il-ġimgħa stess. It-total ta’ applikanti kien ta’ 373 u dawk magħżula se jitqassmu skont il-ħtieġa.
TAXXA TAL-VAT MIĠBURA 10978. L-ONOR. FREDRICK AZZOPARDI staqsa lill-Ministru għall-Finanzi: Jista' l-Ministru jgħid kemm inġabret taxxa tal-VAT minn Malta u minn Għawdex fl-2013 u din is-sena sal-lum?
ONOR. EDWARD SCICLUNA:Ngħarraf lill-Onor. Interpellant li l-informazzjoni mitluba tpoġġiet fuq il-Mejda tal-Kamra waqt il-ħin tat-Tqegħid ta’ Karti.
